E Alofa o Ia i Tamaiti Lāiti

VAAI atu i a Iesu lena e fusi mai le tama itiiti. E mafai ona e iloaina e alofa Iesu i e laiti. O tamaloloa na o loo vaavaai atu o ona aposetolo. O a upu a Iesu o fai atu i a i latou? Sei o tatou sailia.

Faatoa taunuu mai lava Iesu ma ona soo mai se malaga umi. I le auala na finau ai le au aposetolo. O lea ina ua taunuu le malaga na fesili Iesu i a i latou: ‘O le ā na tou finau ai i le auala?’ O le mea moni, na iloa e Iesu le mea na finau ai. Ae na ia fai se fesili na te iloa ai pe o le a taʻu atu e le au aposetolo.

Ua le tali mai le au aposetolo, auā i le auala, na finau ai latou po o ai e sili. O isi aposetolo na mananao e sili atu i lo isi. O le a faapefea e Iesu ona taʻu atu e sese le manao e fia sili?

Ua ia valaau i le tama itiiti, ma faatu i luma o i latou uma. Ona ia faapea atu lea i ona soo: ‘Ou te manao ia outou iloa ma le mautinoa lenei mea, afai e le suia outou ma pei o tamaiti, tou te le ulu atu lava i le malo o le Atua. O lē e sili i le malo, o lē e pei o lenei tama itiiti.’ Pe e te iloa le mafuaaga na taʻua ai e Iesu lenei mea?

O tamaiti laiti e le popole i latou e uiga i le sili pe tāua atu i lo isi. O lea e tatau i le au aposetolo ona aʻoaʻo ia pei o tamaiti i lea auala ma aua le finau po o ai e sili ma tāua.

E i ai foi isi taimi, e faaalia ai e Iesu lona alofa i tamaiti laiti. I ni nai masina mulimuli ane, na aumai ai e tagata a latou fanau e vaai i a Iesu. Na taumafai le au aposetolo e vavao. Ae na fai atu Iesu: ‘Ia tuu mai tamaiti i a te au, ae aua le taofia, auā o tagata e pei o latou e fai aʻe ai le malo o le Atua.’ Ona tago lea o Iesu ua fusi mai tamaiti ma faamanuia i ai. Pe e le o se mea lelei ea ona iloa e alofa Iesu i tamaiti laiti?