Faatalitali i Ierusalema

O TAGATA o loo i ina o soo o Iesu. Ua usiusitai iā te ia ma latou nonofo i Ierusalema. Ma a o latou faatalitali, na faatumulia ai le fale atoa i se leo tele. E pei o se matagi agi malosi. Ma na amata ai ona aliali mai ni laulaufaiva afi i luga aʻe o ulu o soo taitasi uma lava. Pe e mafai ona e iloaina le afi i luga o i latou uma taitoatasi? O le a le uiga o lena mea?

O se vavega! Ua toe foi Iesu i le lagi e faatasi ma lona Tamā, ma ua ia liligiina ifo le agaga paia o le Atua i ona soo. Pe e te iloa le mea ua faia e le agaga paia i a i latou? Ua amata ona latou tautatala i gagana eseese.

E toatele tagata i Ierusalema na latou faalogo i le leo e pei o se matagi malosi ma latou o mai ai e vaai po o le a le mea ua tupu. O isi tagata mai isi atunuu na latou o atu i ina i le tausamiga a Isaraelu o le Penetekoso. O se vaaiga na ofo ai nei mālo! Ua latou faalogo i le au soo ua tautatala mai i a latou gagana i mea uiga ese ua faia e le Atua.

‘O tagata uma nei e mai Kalilaia,’ o le tala lea a tagata asiasi. ‘E faapefea ona mafai ona latou tautatala i nei gagana eseese a atunuu matou te o mai ai?’

Ua tulai nei Peteru ma faamatala atu i a i latou. Ua leo tele ma taʻu atu i tagata pe na faapefea ona fasiotia Iesu ma na toe faatuina mai o ia e Ieova. ‘Ma ua i ai nei Iesu i le itu taumatau o le Atua i le lagi,’ o upu ia a Peteru. ‘Ma na ia liligi ifo le agaga paia na folafolaina mai. O le pogai lena ua tou vaai ma faalogo ai i nei vavega.’

Ina ua taʻua e Peteru nei mea, o le toatele o tagata ua faanoanoa i mea na faia i a Iesu. ‘O le ā se mea matou te faia?’ o la latou fesili lea. Ona fai atu lea o Peteru: ‘E tatau ona suia nei tou olaga ma papatisoina ma avea ma soo o Iesu.’ I lea aso na papatiso ai e tusa ma le 3,000 soo o Iesu.