O le Malo o le a na Aumaia le Parataiso
Ina o i ai Iesu i le lalolagi, sa ia fetalai i ona soo ia tatalo mo le Malo o le Atua: “Ia oo mai lou Malo. Ia faia lou finagalo i le lalolagi, e pei ona faia i le lagi.” (Mataio 6:9, 10) Sa faapea foi ona ia fetalai soo e uiga i “le tala lelei o le Malo.” (Mataio 4:23) O le mea moni, na sili ona tautala soo pea o ia i le Malo nai lo soo se isi lava mea. Ai se a? Aua o le Malo o se mea faigaluega lea o le a faaaogaina e le Atua e foia ai faafitauli ua faigata ai le olaga i ona aso nei. E auala mai i le Malo, o le a le pine ona faaiua lea e le Atua o taua, le galala i le fia ai, faamaʻi, ma amioleaga, ma ona aumaia lea o le autasi ma le filemu.
Pe e te fia soifua ea i se lalolagi faapena? Afai o lea, e tatau la ona e faitau i le tamai tusi lenei. O totonu, o le a e iloaina ai faapea o le Malo o se pulega, peitai e sili ae lena nai lo soo se isi pulega na faapea ona pule i luga o le fanau a tagata. O le a faapea foi ona e vaaia ai le auala faamanititino na faamatalatalaina faasolosolo ai e le Atua ana fuafuaga tau le Malo. Ae le gata i lea, o le a e vaaia ai pe o faapefea ona fesoasoani le Malo ia te oe i nei lava aso.
O le mea moni, e mafai ona avea oe o se tagata nuu o le Malo o le Atua nei lava. Peitai ane ao e lei filifili e fai lenei mea, o le a manaomia ona e iloa atili le tele o mea tau i ai. O lea e faalaeiau atu ai ia te oe ina ia e suesueina lenei tamai tusi. O mea uma lava o le a na tau atu e uiga i le Malo e mai le Tusi Paia.
Muamua lava la, sei o tatou vaai pe ai se a ua tatou manaomia tele ai le Malo o le Atua.
I le amataga o le tala faasolopito o le fanau a tagata, na faia lava e le Atua le tagata e lelei atoatoa ma tuu o ia i se parataiso. I lena taimi sa leai se manaʻoga mo le Malo.
Ui i lea, o Atamu ma Eva, o o tatou uluaʻi matua, na faalogo ia Satani, o se agelu fouvale. Na ia taʻu atu ia i laua pepelo e faasaga i le Atua ma faapogaia ai ona la fouvale i le Atua. O lea la na tatau ai ia laua ona oti, aua “o le oti, o le totogi lea o le agasala.”—Roma 6:23.
O se tagata agasala, le lelei atoatoa e le mafai ona ia mauaina ni fanau lelei atoatoa. O lea o fanau uma lava a Atamu na fananau mai e le lelei atoatoa, tutumu i le agasala, ma oo ai i le oti.—Roma 5:12.
Mai ai i ina, sa manaomia ai loa e le fanau a tagata le Malo o le Atua e fesoasoani ia te i latou ina ia toe magalo mai le faafanoga o le agasala ma le oti. O le a faamamaina foi e le Malo le suafa o le Atua mai pepelo na tetee ai i ai Satani.
Sa folafola e Ieova le Atua faapea o se “fanau” (po o se suli) faapitoa o le a fanau mai na te laveaʻiina le fanau a tagata mai le agasala. (Kenese 3:15) O lenei “fanau” o le a fai ma Tupu o le Malo o le Atua. O ai la lena?
Pe tusa ma le 2,000 tausaga talu ona agasala Atamu, sa ola ai se tagata faatuatua e igoa ia Aperaamo. Sa fetalai Ieova ia Aperaamo ia tuua lona lava nuu ma alu e mau i fale ie i le nuu o Palesitina
Sa faia uma e Aperaamo mea na fetalai atu ai Ieova na te faia, e oo lava i se mea e sili ona faigata e tasi. Na fetalai Ieova ia te ia e osi faataulagaina lona atalii o Isaako i se fata faitaulaga.
Sa le manaʻo moni Ieova i se taulaga faaletagata. Peitaʻi sa finagalo Ieova na te silafia po o le a le tele o le alofa o Aperaamo ia te ia. I le taimi o le a faaoo ai e Aperaamo le oti ia Isaako sa taofia ai loa e Ieova o ia.
Talu ai le faatuatua tele o Aperaamo, na folafolaina atu ai e Ieova ia te ia le laueleele i Palesitina i ana fanau ma na ia fetalai faapea o le Fanau folafolaina o le a auala mai i lona gafa, ma o lona atalii lea o Isaako.—Kenese 22:17, 18; 26:4, 5.
Na maua e Isaako se masaga tama, o Esau ma Iakopo. Sa fetalai Ieova faapea o le a auala mai le Fanau folafolaina ia Iakopo.—Kenese 28:13-15.
O Iakopo, o ia le na faaigoaina e Ieova ia Isaraelu, e toa 12 lana fanau tama, o e na mulimuli ane fai foi a latou fanau. O lea na amata ai ona faatoateleina le fanau a Aperaamo.—Kenese 46:8-27.
Ina ua i ai se oge matuia i lea vaipanoa, ona o ai lea o Iakopo ma lona aiga i Aikupito i le valaau mai a Farao, le tupu o Aikupito.—Kenese 45:16-20.
I Aikupito sa faaalia ai faapea o le Fanau folafolaina e auala mai i se suli o le atalii o Iakopo o Iuta.—Kenese 49:10.
Mulimuli ane ona maliu lea o Iakopo, ma ua faatuputupulaia pea lana fanau seia avea e pei o se nuu. Ona oo ai lea ina matataʻu tagata Aikupito ia i latou ma fai i latou ma pologa.—Esoto 1:7-14.
Mulimuli ane sa auina e Ieova Mose, o se tagata e matua faatuatua, e fai le aveaʻi ia Farao i lea vaitaimi e tuu faasaoloto le fanau a Isaraelu e o.—Esoto 6:10, 11.
Na teena e Farao, o lea na aumaia ai e Ieova mala e sefulu i luga o tagata Aikupito. I le mala mulimuli lava, na auina atu ai le agelu o le oti na te fasiotia uma atalii ulumatua o Aikupito. —Esoto, mataupu e 7 e oo i le 12.
Na fetalai le Atua i tagata Isaraelu faapea a latou fasia se tamaʻi mamoe mo la latou talisuaga afiafi ona valivali lea i le toto o o latou pou faitotoa, ona sopo-loa lea o le agelu o le oti ma o latou fale. Ona faasaoina ai lea o ulumatua a Isaraelu.—Esoto 12:1-35.
O le iʻuga, sa faatonuina loa e Farao tagata Isaraelu ia o ese mai Aikupito. Ae peitaʻi, na toe sui mulimuli lona mafaufau ona toe tuliloa ai lea o i latou e toe faafoʻi mai.
Sa tatalaina e Ieova se auala mo tagata Isaraelu e sosola ai i le āsaina o le Sami Ulaula. Ma ina o taumafai Farao ma ana au e tuliloa i latou, ona malelemo ai lea.—Esoto 15:5-21.
Ona taʻitaʻiina lea e Ieova le fanauga a Isaraelu i se mauga e igoa o Sinai i le toafa. O ina, na ia tuuina atu ai ia i latou ana Tulafono ma ia fetalai atu ai faapea afai latou te tausia, o le a avea ai i latou ma malo o ositaulaga ma se nuu paia. O lona uiga la, sa i ai le avanoa o tagata Isaraelu i le faagasologa o taimi e avea ai o se vaega taua o le malo o le Atua.—Esoto 19:6; 24:3-8.
Ina ua mavae pe tusa o se tausaga na i ai Isaraelu i le Mauga o Sinai, ona taʻitaʻiina ai lea o i latou e Ieova agaʻi i Palesitina, o le laueleele na ia folafolaina atu ia Aperaamo le tamā o o latou tamā.
I Palesitina, na mulimuli ane ona faatagaina lea e le Atua ia pulea e tupu. Ona sosoo ai lea, ma le Malo o le Atua i le lalolagi.
O le tupu lona lua o Isaraelu o Tavita, o se e sau mai le gafa o Iuta. Na faatoilalo e Tavita fili uma o Isaraelu, ma na ia faia ai Ierusalema ma aai laumua o le nuu.
O mea na tutupu i le nofoaʻiga a Tavita ua faaalia ai ina o lagolagoina e Ieova o se tupu, e leai se tupu faalelalolagi e mafai ona manumalo ia te ia.
Sa fetalai Ieova faapea o le Fanau folafolaina o le a avea o se tasi e tupuga mai ia Tavita.—1 Nofoaiga a Tupu 17:7, 11, 14.
O Solomona, le atalii o Tavita, na pule ina ua mavae atu o ia. O ia sa avea o se tupu poto, ma sa manuia Isaraelu i lalo o lana nofoaʻiga.
Sa fausia e Solomona se malumalu matagofie ia Ieova i Ierusalema. O tulaga i Isaraelu i lalo o le nofoaʻiga a Solomona ua faaalia ia i tatou nisi o faamanuiaga o le aumaia e le Malo o le Atua i le fanau a tagata.—1 Tupu 4:24, 25.
Ui i lea, o le toatele o tupu ina ua mavae Solomona sa matua lē faamaoni.
Peitaʻi ao pule pea ē na tupuga mai ia Tavita i Ierusalema, sa faaaogaina e Ieova lana perofeta o Isaia na te taʻu maia se Alo o Tavita i le lumanaʻi o lē o le a pule i le lalolagi uma i le faamaoni. O ia lea o le fanau folafolaina.—Isaia 9:6, 7.
Sa uluaʻi taʻu mai e le perofeta o Isaia lana pule o le a sili atu ona mamalu nai lo Solomona.—Isaia, mataupu e 11 ma le 65.
O nei la, e sili atu i lo muamua, ua taumanatunatu auauna a le Atua po o ai nei o le a avea ma “Fanau.”
A o leʻi oo mai le Fanau, sa amioleaga naua tupu o Isaraelu ma i le 607 T.L.M. sa faatagaina ai e Ieova le nuu e faatoilaloina e tagata Papelonia, ma na faaaunuua ai le tele o tagata i Papelonia. Peitaʻi sa leʻi galo i le Atua lana folafolaga. O le a oo mai lava le Fanau folafolaina i le gafa o Tavita.—Esekielu 21:25-27.
O le mea la na tupu ia Isaraelu na faaalia ai e ui lava ina ono mafai e se tupu poto faamaoni faaletagata ni faamanuiaga, a o nei faamanuiaga e gata mai. E maliliu atu tagata faamaoni a o o latou suli atonu o le a lē faamaoni. O le a la na avea ma vaifofō? O le Fanau folafolaina.
O se taimi mulimuli ane, ina ua mavae le faitau afe o tausaga, ona aliaʻi mai loa lea o le Fanau. O ai la lena?
O se agelu mai le Atua na ia taʻu atu le tali i se teine Isaraelu e leʻi faaipoipo o Maria le igoa. Sa ia taʻu atu ia te ia o le a fanau mai e ia se tama o le a igoa o Iesu. O le mea la lenei na fai atu ai le agelu:
“E sili o ia e taua foʻi o le Alo o le Atua Silisili Ese; e foaʻi atu e Ieova le Atua le nofoaʻiga a Tavita lona tama e fai o ia ma tupu.”—Luka 1:32, 33.
O Iesu la, o ia lena o le Fanau folafolaina ma mulimuli ane avea ma Tupu o le Malo o le Atua. Peitaʻi ai se a na ese ai Iesu mai tagata faatuatua o e na ola muamua.
O Iesu na fanau mai faavavega. O lona tina o se taupou ma e leai sona tama faalelalolagi. O Iesu sa soifua muamua i le lagi ma o le agaga paia o le Atua o le mana galue na faaliliuina le ola o Iesu mai le lagi i le manava o Maria. O lea na te leʻi mauaina le agasala tuufaasolo a Atamu. I lona soifuaga atoa uma lava sa leʻi agasala Iesu.—1 Peteru 2:22.
Ina ua 30 tausaga o lona soifua, ona papatisoina ai lea o Iesu.
Sa ia tautala i tagata tau le Malo o le Atua ma iʻu ai ina faalagilagi ia lava o le Tupu o lona Malo.—Mataio 4:23; 21:4-11.
Sa ia faia foʻi le tele o vavega.
Na ia faamalolo i e mamaʻi.—Mataio 9:35.
Na ia fafagaina faavavega e sa fia aai.—Mataio 14:14-22.
Na ia faatutuina foi e na maliliu.—Ioane 11:38-44.
Na faaalia e nei vavega ituaiga o mea o le a faia e Iesu mo le fanau a tagata o le Tupu o le Malo o le Atua.
O e manatua pe na faapefea ona faia e Tavita Ierusalema ma aai laumua o lona malo? Sa faamatalaina e Iesu faapea o le Malo o le Atua o le a lē i le lalolagi, peitaʻi i le lagi. (Ioane 18:36) O le pogai lea ua taua ai le Malo o “Ierusalema faalelagi.”—Eperu 12:22, 28.
Na faataatia e Iesu tulafono e ao ia i latou o le a fai ma tagata o le Malo ona usiusitaʻi i ai. O nei tulafono o loo i le Tusi Paia. O tulafono sili ona taua faapea o tagata e ao ona alolofa i le Atua ma alofa le tasi i le isi.—Mataio 22:37-39.
Sa faaalia foʻi e Iesu faapea o le a le na o ia e pulea toatasi le Malo. O le a i ai nisi o le fanau a tagata e filifilia mo le lagi ona pule ai lea faatasi ma ia. (Luka 12:32; Ioane 14:3) E toafia la o le a i ai i ina? Ua tali mai le Faaaliga 14:1: e 144,000.
Pe afai e na o le 144,000 e o i le lagi e pule ai ma Iesu, o le a la le mea e mafai ona faamoemoe i ai isi o le fanau a tagata?
Ua fai mai le Tusi Paia: “E fai lava le nuu mo tagata amiotonu, e nonofo ai pea i latou.”—Salamo 37:29.
O i latou o e mau i le lalolagi e faavavau ua taua i latou o “isi mamoe.”—Ioane 10:16.
O lea la e lua faamoemoe. E i ai le 144,000 ua valaauina e Ieova le Atua e o atu i le lagi e pule ai faatasi ma Iesu Keriso. Peitaʻi e faitau miliona isi ua i ai le faamoemoe mautinoa mo le ola i luga o le lalolagi e faavavau o ni tagata o lona Malo.—Faaaliga 5:10.
Sa inoino Satani ia Iesu ma sa tetee i ai. Ina ua uma ona talaʻi Iesu mo le tolu ma le afa tausaga, ona saisaia lea o ia i lalo uunaiga e Satani ma fasiotia i le faatautauina i se laau. Ai se a na faataga ai e le Atua lena?
Manatua, talu ai ona o i tatou na tupuga mai ia Atamu, ua agasala uma ai i tatou ma ua tatau i ai le oti.—Roma 6:23.
Ia manatua foʻi, ona o le auala faavavega na fanau mai ai Iesu, sa lelei atoatoa o ia ma na le tatau ona oo i ai le oti. Ui i lea, na faatagaina e le Atua Satani e ‘tuʻimomomoina lona mulivae’ ia oo ai le oti ia te ia. Peitaʻi na toe faatuina o ia e le Atua i le ola o se agaga e ola pea. Talu ai ona e ia te ia pea le aia i le ola lelei atoatoa faaletagata, na te ono faaaogaina nei lenei uiga e togiolaina ai i tatou o tagata mai le agasala.—Kenese 3:15; Roma 5:12, 21; Mataio 20:28.
Ina ia fesoasoani ia tatou malamalama atoatoa i le uiga o le togiola a Iesu, ua tautala le Tusi Paia e auala i ata faavaloaga.
Mo se faaaoaoga, po o e manatua na faapefea ona fetalai Ieova ia Aperaamo e faataulagaina lona atalii, o se tofotofoga o lona alofa?
O se ata faavaloaga lenei o le togiola a Iesu. Na ia faaalia ai le faapefea ona tele naunau le alofa o Ieova mo le fanau a tagata na ia faatagaina mai ai lona Alo, o Iesu, ia maliu mo i tatou ina ia tatou maua le ola.—Ioane 3:16.
E te manatua le auala na laveaʻiina ai e Ieova Isaraelu mai Aikupito ma faaolaina a latou ulumatua i lona auina mai o le agelu o le oti ma sopoloa ia te i latou?—Esoto 12:12, 13.
O lenei mea o se ata faavaloaga. E pei o le toto o le tamaʻi mamoe o lona uiga o le ola mo ulumatua uma a Isaraelu, o le toto maligi o Iesu o lona uiga o le ola mo e talitonu ia te ia. Ma o mea na tutupu i lena po o le faasaʻolotoga lea mo tagata Isaraelu, o le maliu o Iesu ua mafai ai ona faasaoloto le fanau a tagata mai le agasala ma le oti.
O le pogai lea sa taua ai Iesu “o le Tamaʻi Mamoe a le Atua, na te aveesea le agasala a le lalolagi.”—Ioane 1:29.
E ui i lea, a o i ai Iesu i le lalolagi sa ia āoāoina foʻi aposetolo ma toleniina i latou e talaʻi le tala lelei o le Malo, e oo lava ina ua mavae lona maliu.—Mataio 10:5; Luka 10:1.
O i latou nei o tagata muamua lava na filifilia e le Atua e pule faatasi ma Iesu i lona Malo.—Luka 12:32.
Po o e manatua na folafolaina e le Atua i tagata Siu faapea a latou tausia ana Tulafono, ona fai ai lea o i latou e avea “o se malo o ositaulaga”? O lea la sa ia i latou se avanoa e fai ai ma vaega o le Malo o le Atua ma auauna ai e avea ma ositaulaga faalelagi pe afai latou te talia Iesu. Peitai o le toatele o i latou na teena Iesu.
O lea, mai i lena taimi, na le toe avea ai tagata Siu ma nuu filifilia o le Atua; O Palesitina foʻi na le toe avea ma Nuu o le Folafolaga.—Mataio 21:43; 23:37, 38.
Mai la i aso o Iesu e oo mai i o tatou aso, ua aoaoina ai pea e Ieova i latou nei o e o le a nofo tupu ma Iesu i le lagi. O loo i ai pea ni nai afe o i latou o loo soifua i le lalolagi i aso nei. Ua tatou taua i latou o le vaega totoe.—Faaaliga 12:17.
O lenei, ua amata ona e vaaia le Malo o le Atua. O se pulega i le lagi, o lona Tupu o Iesu Keriso, ma ua faatasi atu ia te ia le 144,000 o tagata mai le lalolagi. O le a pule i luga o le fanau a tagata faamaoni i le lalolagi ma o le a i ai le mana e aumaia le filemu i le lalolagi.
Ina ua mavae lona maliu ona toe faatuina aʻe lea o Iesu ma maliu loa i le lagi. O ina, na ia faatali ai seia fetalai atu le Atua po o afea le taimi mo ia e amata ai ona pule o se Tupu o le Malo o le Atua. (Salamo 110:1) O afea ea la?
O nisi taimi sa auina mai ai e Ieova i tagata miti e tau atu ai ia i latou mea e uiga i lona Malo.
O ona aso la o Tanielu, na auina atu ai e Ieova se miti faapena ia Nepukanesa le tupu o Papelonia. O se laau telē lava.—Tanielu 4:10-37.
Ona tuu lea o le laau i lalo a o lona tafuʻe sa fusifusia mo tausaga e fitu.
O le laau sa suitulaga ia Nepukanesa. Pei lava ona sa fusifusia le tafuʻe laau mo tausaga e fitu, na faapea foʻi ona le iloa le atamai o Nepukanesa mo tausaga e fitu. Ona toe faafoʻisia ane lea o lona atamai.
O na mea uma o se ata faavaloaga. Na faaataina mai e Nepukanesa le pule tau tupu a Ieova i le lalolagi aoao. Muamua lava, sa faatinoina e ala i e na tupuga mai i le Tupu o Tavita i Ierusalema. Ina ua faatoilaloina Ierusalema e Papelonia i le 607 T.L.M., ona motusia ai lea o le laina lena o tupu. E leʻi toe i ai lava se isi tupu i le nofoaʻiga a Tavita “seia afio mai o ia ua i ai le tonu.” (Esekielu 21:27)
O Iesu Keriso lena.
O le a la le umi o le sau mai le 607 T.L.M. e oo i le amataga o le nofoaʻiga a Iesu? E fitu tausaga faavaloaga. O lona uiga e 2,520 tausaga. (Faaaliga 12:6, 14) Ma o le 2,520 tausaga mai le 607 T.L.M. e aumaia ai tatou i le 1914 T.A.
O lea na amata ona pule Iesu i le lagi i le 1914. O le a le uiga o lena mea.
Ua taʻu mai e le Tusi Paia ia i tatou e ala i se faaaliga na vaai i ai le aposetolo o Ioane.
Sa ia vaai i se fafine i le lagi ua na fanaua se tama-tane.—Faaaliga 12:1-12.
O le fafine na faaataina mai ai le faalapotopotoga a le Atua i le lagi, e faia ae i auauna faaagelu uma a le Atua i le lagi. O le tamatane ua faaataina mai ai le Malo o le Atua. Lea na “fanau” i le 1914.
O le a la le mea na tupu e sosoo ai? O le mea muamua lava na faia e Iesu o se tupu o le lafoina ifo lea o Satani, ma agelu na fouvale faatasi ma ia, mai le lagi i le lalolagi.—Faaaliga 12:9.
Ua taʻu mai e le Tusi Paia ia i tatou le iʻuga: “O le mea lea ia outou olioli ai le lagi e atoa ma e ua nonofo ai. O i talofa ia te outou o e nonofo i le fanua ma le sami, auā ua alu ifo ia te outou le Tiapolo ua lotoa tele, auā ua na iloa ua saasaa ona po.”—Faaaliga 12:12.
O lea ina ua amata ona pule Iesu i le lagi, sa oo ina tāfitifiti ona fili i le lalolagi. E pei ona uluaʻi taʻu mai e le Tusi Paia, ua amata ona pule o ia i totonu o ona fili.—Salamo 110:1, 2.
O le a le uiga o lea mo le fanau a tagata?
Na tau mai e Iesu ia i tatou: o taua, le lava meataumafa, faamaʻi, ma mafuiʻe.—Mataio 24:7, 8; Luka 21:10, 11.
Na tatou vaai lava o tutupu nei mea talu mai le 1914, o se isi lea mafuaaga ua tatou iloa ai sa amata ona pule le Malo.
O le a i ai foʻi le “atuatuvale o nuu i le fememeai; . . . e oti foi tagata i le matataʻu.”(Luka 21:25, 26) Na tatou vaaia foʻi na mea, talu mai le 1914.
Sa faaopoopo mai le aposetolo o Paulo faapea o tagata o le a avea i latou ma “e alolofa ia i latou, o e mananao i tupe, . . . o e le faalogo i matua, . . . o e tuumavaega, o e faatuaupua, o e le taofi manao o le tino.”—2 Timoteo 3:1-5.
O lenei la ua e iloa le pogai ua faigata tele ai ona aso nei. Ua matua gaoioi Satani. Peitaʻi ua gaoioi foʻi le Malo o le Atua ia.
Ina ua faatoa mavae atu lava le 1914, ae na amata loa e le vaega totoe o e faamoemoe e pule faatasi ma Iesu i le lagi ona taʻuina atu le tala lelei ua faavaeina le Malo. O lenei galuega ua salalau atu i le lalolagi, e pei ona fetalai ai Iesu.—Mataio 24:14.
O le a le faamoemoe o lenei galuega talaʻi?
Muamua lava, e taʻu atu ai i tagata e uiga i le Malo o le Atua.
Lona lua, e fesoasoani ai i tagata e filifili pe latou te mananao e fai ma tagata o le Malo.
Na fetalai Iesu faapea i o tatou aso o le a vaevaeina ai le fanau uma a tagata i tagata pei ni mamoe ma tagata pei ni ʻoti.—Mataio 25:31-46.
O “mamoe” o i latou o e alolofa ia te ia ma ona uso. O “ʻoti” o i latou na o e lē alolofa.
O le a maua e “mamoe” le ola e faavavau ae le maua e “ʻoti.”
O lenei galuega o le vaevaeina o loo faataunuuina e le talaʻiina o le tala lelei o le Malo.
O le valoaga lenei a le perofeta o Isaia.
“O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga e faamaualugaina foʻi e sili i mauga, ona gasolo ane lea o nuu uma i ai.”—Isaia 2:2.
Ua feagai nei le fanau a tagata ma “aso e gata ai.”
O le “fale” o le tapuaʻiga a Ieova ua “faamaualugaina” i luga ae o lotu sese.
“E o mai lava nuu e tele, ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou i ona ala, ona tatou savavali ai lea i ona ala.”—Isaia 2:3.
O lea, e matua toatele mai nuu uma ua o mai e tapuaʻi ia Ieova ma valaaulia isi e faatasi ma i latou. Ua latou iloa ona gaoioi i le auala e finagalo ai Ieova.
“Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine: e le sii atu le pelu e le tasi nuu i le tasi nuu, latou te le toe aʻoaʻo foi i taua.”—Isaia 2:4.
O i latou o e tapuaʻi ia Ieova e autasi ma fifilemu.
O le taunuuga o lenei gaoioiga a le Malo o le Atua o lea ua faitau miliona nei tagata i le lalolagi aoao ua avea ma tagata nuu o le Malo.
O loo ofaga atu i latou i le vaega totoe, o i latou o e e i ai le faamoemoega e o i le lagi ma pule faatasi ai ma Keriso.
O loo latou mauaina mea ʻai faaleagaga e auala mai le faalapotopotoga a le Atua.—Mataio 24:45-47.
O i latou o se tauusoga faava o Malo o Kerisiano o e alolofa moni le tasi i le isi.—Ioane 13:35.
Latou te olioli i le filemu o le mafaufau, ma se faamoemoe mo le lumanaʻi.—Filipi 4:7.
Toeitiiti nei, ona maea lea o le talaʻiina o le tala lelei. O le a maea foi le aoaoina o “mamoe.” O le a la o le a faia e le Malo?
O e manatuaina le Tupu faamaoni o Tavita na ia faatoilaloina fili uma o tagata o le Atua? Ioe, o le a faia e le Tupu o Iesu le mea lava lea e tasi.
Sa fai se faalepo a le Tupu o Nepukanesa i se tupua tele na faaataina mai ai emupaea uma o le lalolagi mai i ona aso e oo mai lava i o tatou.
Ona ia vaai ai lea o se maa na vaneina mai i se mauga, ona nutililiia ai lea o le tupua i fasi mea. O le maa o le sui lea o le Malo o le Atua.
O le uiga o lenei mea o le faaumatiaga lea o lenei faiga o mea amio leaga.—Tanielu 2:44.
O nisi nei o mea o le a lafotuina e le Malo.
O lotu sese o le a mou atu, pei o se maaolo ua lafoina i le sami.—Faaaliga 18:21.
O le pogai lea ua uunaia ai e uma e alolofa i le Atua e sosola ese mai tapuaʻiga sese NEI.—Faaaliga 18:4.
Ona sosoo ai lea ma Iesu le Tupu o le a ia “taia aʻi e ia nuu . . . e pule foi o ia ia te i latou i le tootoo uamea.”—Faaaliga 19:15.
O le mea lea, e ui lava ina totogi e Molimau a Ieova a latou lafoga, ma usiusitai i tulafono o le malo, ae le aafia lava latou i mea faapolotiki.
Mulimuli ane, o Satani lava ia, le “tarako” tele, o le a lafo i le to e le gata.—Faaaliga 20:2, 3.
E na o “mamoe,” o e gauaʻi ia Iesu o le Tupu, o le a faasaoina i lenei puapuaga tele.—Mataio 25:31-34, 41, 46.
O le aposetolo o Ioane na vaai i se faaaliga o “mamoe” o e e faasaoina mai le puapuaga tele.
“Ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamaʻi Mamoe, ua oofu i latou i ofu sisina, ua i ai foi lau pama i o latou lima.”—Faaaliga 7:9.
O le “motu o tagata e toatele” ua faia ae ia i latou uma o e uaʻi atu i le talaʻiina o le tala lelei.
Ua latou “o mai nai le puapuaga tele.”—Faaaliga 7:14.
O “lau pama” e faaalia ai ua latou tali aloaia Iesu e fai mo o latou Tupu.
O lo latou laeia o “ofu sisina” e faaatagia mai ai lo latou faatuatua i le taulaga togiola a Iesu.
O le “Tamaʻi Mamoe” o Iesu Keriso.
O a faamanuiaga latou te olioli ai? E te manatua ea le fiafia i Isaraelu ina o pule le Tupu faamaoni o Solomona? Ua aumaia ai se ata itiiti o le filemu i le lalolagi i lalo o le Tupu o Iesu.
O le a i ai se filemu moni i le fanau a tagata ma le va o tagata ma manu, e pei lava ona uluai taua e Isaia.—Salamo 46:9; Isaia 11:6-9.
Pei lava ona sa faamaloloina e Iesu o e mamaʻi a o afio i le lalolagi, o lea o le a ia aveesea foʻi maʻi mai le fanau uma a tagata.—Isaia 33:24.
Pei lava ona sa fafagaina e Iesu le anoano o tagata, o lea o le a na faamutaina oge mai le fanau uma a tagata.—Salamo 72:16.
Pei lava ona sa ia faatutuina e na oti, o le a ia faatutuina foʻi taʻitoatasi o e na leʻi ia i latou se avanoa atoatoa e gauaʻi atu ai i latou lava i le Malo o le Atua.—Ioane 5:28, 29.
O le a faasolo malie, ona ia toe aumaia le fanau a tagata i le lelei atoatoa na le iloa ia Atamu.
Pe le o se lumanaʻi fiafia ea lena? Pe e te manao e vaai i ai? Afai o lea, galue ina ia e mafai ai ona e gauaʻi atu nei i le Malo o le Atua ma avea o se tasi o “mamoe.”
Suesue i le Tusi Paia ma ia e iloa Ieova le Atua ma Iesu Keriso.—Ioane 17:3.
Aumea faatasi ma isi o e o tagata nuu o le Malo.—Eperu 10:25.
Aʻoaʻo i tulafono o le Malo ma usiusitai ia i latou.—Isaia 2:3, 4.
Tuuina atu lou ola e auauna ai ia Ieova, ma ia papatisoina.—Mataio 28:19, 20.
Alo ese mai mea leaga, e pei o le gaoi, tala pepelo, amioga le mama, ma le onā e lē finagalo malie i ai Ieova.—1 Korinito 6:9-11.
Auai i le talaʻiina o le tala lelei o le Malo.—Mataio 24:14.
O le fesoasoani la a le Atua, o le a e vaai ai i le parataiso na le iloa ia Atamu e toe faafoʻisia mai mo tagata na tupuga mai ia te ia, ma o le a e vaai ai i lenei folafolaga ua faataunuuina: “Na ou faalogo foi i le leo tele mai le lagi, ua faapea mai, Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mo ona nuu, e ia te i latou le Atua lava, o lo latou Atua ia. E soloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.
[Siata i le itulau 20]
(Tagaʻi i le lomiga mo le ata atoa)
607 T.L.M. 1914 T.A.
T.L.M. T.A.
500 1000 1500 2000 2500
[Ata i le itulau 11]
Aperaamo
Isaako
Iakopo
Iuta
Tavita
[Ata i le itulau 14]
144,000
[Ata i le itulau 16]
Atamu
Iesu