Ua Aoaoina ma Faaauupegaina e Ieova Ona Tagata mo Galuega

I le faagasologa o senituri, na salalau atu ai le aposetasi i le lalolagi aoao. O ituaiga o lotu e tele, na iai nisi o a latou aʻoaʻoga mai le Tusi Paia, ae sa faaautū lava i le mulimuli atu i uputuu faaletagata ma le tele o aganuu faanuupo o latou amataga. Sa masani ona latou tuleia i tua faamoemoega faatatau i le afio mai o Keriso.​—Faatusatusa le Mataio 13:24-30, 37-43.

Ae peitai, na fetalai Iesu ina ia mataala pea mo lona toe afio mai! O se tasi vaega na faia faapea sa mauaina i Allegheny, Pennsylvania, Iunaite Setete o Amerika. I le amataga o le sefulu tausaga mai le 1870, na amata ai e Charles Taze Russell ma nisi o ana uo ona faia se suesuega auiliili o le Tusi Paia e aunoa ma se pulega faalotu e uiga i le toe afio mai o Keriso. Sa amata foi ona latou sailiili i le upu moni o le Tusi Paia e uiga i le tele o isi aʻoaʻoga faavae. Sa o le amataga lena o taualumaga a Molimau a Ieova i aso nei.​—Mataio 24:42.

Sa oo ina malamalama lenei vaega faapea o le aʻoaʻoga i le Tolutasi Paia e lē faale-Tusi Paia, ae ua na o Ieova le Atua e ona le malosi uma lava ma o Lē na Foafoaina Mea; o Iesu Keriso o Lana uluai foafoaga ma o lona Alo e toatasi; ma o le agaga paia e lē o se peresona ae o le malosi galue lē vaaia o le Atua. Sa iloa foi e le vaega lenei faapea o le solu e lē o se mea e lē mafai ona oti a e mafai ona oti, o le faamoemoe mo ē ua oti o le toetu, ma o le faasalaga mo tagata amioleaga e lē salamō e lē o le faapuapuagatia e faavavau ae o le faaumatiaga.

Sa iloa foi faapea o le tuuina mai e Iesu o lona soifua o se togiola mo le fanau a tagata o se aʻoaʻoga faavae a le Tusi Paia. Muamua, e 144,000 tane ma fafine na filifilia mai le uluai senituri e oo mai i o tatou aso, o le a togiolaina mai le lalolagi e avea o ni suli faatasi ma Keriso i le Malo faalelagi. E ala i le togiola a Iesu, ona maua ai lea e le faitau piliona o le fanau a tagata, o le toatele o i latou o le a toe faatutuina aʻe nai le oti, le lelei atoatoa faaletagata ma le faamoemoe o le ola e faavavau i le lalolagi i lalo o le pulega a lea Malo.

Na iloa foi e Russell ma ana aumea faapea o le a lē vaaia le faatasi mai o Keriso i la le agaga. O Taimi o Nuu Ese, o le vaitaimi lena sa leʻi faalauiloaina ai e so o se malo i le lalolagi le pule silisiliese o le Atua, o le a iʻu i le 1914. Ona faavaeina ai loa lea o le Malo o le Atua i le lagi. O nei aʻoaʻoga ua mataulia faatasi ma Molimau a Ieova i aso nei.

Sa faasilasilaina e Russell ma ana aumea nei upu moni i mea latalata ma mamao e ala i lauga ma tusi ua lolomia. Ia Iulai 1879, na amata ai ona lolomia e Russell le Zion’s Watch Tower [Olo Matamata a Siona] (lea ua taʻua nei o Le Olomatamata). Na ia filifili faapea o taualumaga o le talaʻiga a Tagata Aʻoga o le Tusi Paia e tatau ona faalagolago atoatoa i foai tauofo ma i lea e lē tatau ai ona iai ni āogā lafoga. E tatau foi ona faasalalauina atu le feau e ala i taumafaiga tauofo e lē totogia a i latou o ē talitonu. Na foai foi Russell lava ia mai mea sa ia faaputuputuina mai i pisinisi seia oo i lena taimi.

Na faapotopoto faatasi Tagata Aʻoga o le Tusi Paia i ni vasega, e pei ona sa taʻua ai a latou faapotopotoga i lena taimi. Sa latou faapotopoto faatasi e oo atu i le faatolu i le vaiaso, mo le faia o ni lauga, suesuega o Tusitusiga Paia, ma ni sauniga mo le molimau a tagata taitoatasi. Sa latou filifilia i lea taimi ma lea taimi tane maufaatuatuaina e avea o ni toeaina e vaavaaia taualumaga faaleagaga a vasega taitasi.

I le 1884 na resitalaina ai i Pennsylvania le Zion’s Watch Tower Tract Society (Sosaiete o Savali o le Olo Matamata a Siona) o se faalapotopotoga e leʻi faia mo le mauaina o polofiti. O le a palota faaletausaga se peresitene o le faalapotopotoga. Na saunia ai i lenei mea se mea faigaluega faaletulafono, e lē faalagolago i le olaga o so o se tagata, na te tauaveina i luma le galuega tau aʻoaʻoga a le Tusi Paia. Na filifilia ai Charles T. Russell e avea ma peresitene, ma sa vaavaai atu i lona ofisa e avea ma ofisa ulu.

Na faia ni taumafaiga sili ina ia faalauteleina le galuega i isi atunuu. Na pāʻia Kanata ma Egelani e lenei galuega i le amataga o le sefulu tausaga sa amata i le 1880. I le 1891 na faia ai e Russell se malaga taamilo i Europa ma Sasae Tutotonu, ina ia mafaufauina ai mea e mafai ona faia ina ia faalautele atili ai le faasalalauina atu o le upu moni i inā. I le amataga o le sefulu tausaga mai le 1900, na faavaeina ni ofisa lala o le Sosaiete i Peretania, Siamani, ma Ausetalia.

I le 1909 na siitia atu ai le ofisa ulu o le Sosaiete o le Olo Matamata i Brooklyn, Niu Ioka, ina ia faalauteleina ai le faateleina o le galuega talaʻi i se tulaga faavaomalo. Sa oo ina tatau ai ona faavae se faalapotopotoga auaufaatasi i lalo o le tulafono a le Setete o Niu Ioka, lea ua lauiloa nei o le Watchtower Bible and Tract Society of New York, Inc. (Sosaiete o le Tusi Paia ma Savali o le Olomatamata o Niu Ioka, Inc.). I le 1914 na faatuina ai le International Bible Students Association (Faalapotopotoga Faavaomalo o Tagata Aʻoga o le Tusi Paia) i Lonetona i Egelani, ina ia faaauilumaina taualumaga a Tagata Aʻoga o le Tusi Paia i Malo uma o le Taupulega a Peretania. I le taimi nei, e 70 sosaiete ma faalapotopotoga ua faavaeina faaletulafono i le tele o atunuu i le lalolagi atoa o loo auauna i fuafuaga a le Sosaiete o le Olo Matamata. O nei mea uma o mea e fesoasoani i tagata, ua lagolagoina e foai tauofo ma tagata faigaluega tauofo.

I le 1916, na maliu ai Charles Taze Russell, ma soloai ane i ai Joseph Franklin Rutherford ia te ia e avea ma peresitene o le Sosaiete o le Olo Matamata. I le taufaaiʻuiʻuga o le Taua Muamua a le Lalolagi, na matuā tofotofoina ai Tagata Aʻoga o le Tusi Paia e ni sauaga, na faatumutumu i le faafalepuipui seseina o uso e toavalu o ē na auauna i tulaga tāua i le ofisa ulu o le Sosaiete i Amerika. Na foliga mai ai ua tāli mate le galuega a Tagata Aʻoga o le Tusi Paia. Ae peitai, i le 1919 na toe faasaoloto mai ai nei uso ma ua taʻumamāina i latou, ma na amata ai loa se faalautelega sili o le galuega talaʻi.

E ala i le ofisa ulu o le Sosaiete, na faaauau ai pea e le vaega autasi o Tagata Aʻoga Kerisiano faauuina o le Tusi Paia, ona saunia meaʻai faaleagaga i itu aso tatau mo tagata uma taitoatasi o ē o auaufaatasi ma le faalapotopotoga. E pei ona sa avea le faapotopotoga o Kerisiano faauuina o le uluai senituri ma “le auauna faamaoni ma le mafaufau” lea na taʻua e Iesu, ua faapena foi i le vaega faauuina o Tagata Aʻoga tuuina atu o le Tusi Paia, o loo auai i le galuega o le Malo ona faia aʻe ai le vasega o “le auauna faamaoni ma le mafaufau” i o tatou aso. I le afio mai o Iesu e asia le faapotopotoga, na ia silafia ai lenei vasega o loo saunia meaʻai mo tagata o le aiga; ona ia tofia lea o lenei vasega e pule i ana mea uma lava.​—Mataio 24:45-47; Luka 12:42.

E leʻi pine ina ua mavae le Taua Muamua a le Lalolagi, na iloa ai ma le manino faapea ua faavaeina le Malo o le Atua e ala ia Keriso Iesu i le lagi i le 1914. O lea ua mafai nei ona faataunuuina atoatoa ai upu a Iesu, e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma, ona oo mai ai lea o le gataaga.” Na tausolomua Joseph F. Rutherford i le faalauiloaina atu o lenei feau o le Malo i se aofaiga atili o ni tagata se toatele.​—Mataio 24:14.

O lea, na filifili ai le Sosaiete ia faia ana lava lomiga e faaaogā ai tagata galulue tauofo o ē o ni tane tuuina atu, ina ia faamautinoa ai le maua pea lava pea o lomiga o tusi faale-Tusi Paia i se tau maulalo e sili ona mafaia. Sa faalaeiauina Tagata Aʻoga uma lava o le Tusi Paia ina ia auai e lē aunoa i le talaʻiina o le tala lelei o le Malo. Sa faaaogāina faasalalauga i leitio o lauga faale-Tusi Paia i nisi o atunuu.

A o leʻi oo i le 1918, sa malamalama Tagata Aʻoga o le Tusi Paia faapea o la latou fuafuaga mo le talaʻiga, o le aoaoina lea o le vaega totoe o ē ua filifilia ina ia faatasi ma Keriso Iesu i le lagi, ma ia lapataia le lalolagi e uiga i le faamasinoga a le Atua o loo sau. Sa itiiti se manatu na tuuina atu i le aoaoina o i latou o le a faasaoina mai le iʻuga o le faiga amioleaga o mea o loo iai nei, ina ia ola i le lalolagi. Ona oo atu lea i le 1918 ma agaʻi mai ai, na molioo atu ai i le lautele aoao le lauga “E Faitau Miliona o loo Ola Nei e Lē Oo i ai le Oti!”

I le 1923 na faaalia ai i se suesuega o le faataoto a Iesu i le Mataio 25:31-46 e uiga i mamoe ma ʻoti, e faapea, a o leʻi oo mai Amaketo o le a maua ai e i latou ua fiafia i le amiotonu ae latou te lē maua le faaeaga mo le Malo faalelagi, le faamaoniga a le Atua ma o le a faasaoina foi ia Amaketo. I le 1935 na faaalia ai foi e nisi suesuega atili nei tagata e pei o ni mamoe e tutusa i latou ma le motu o tagata e lē mafaitaulia, o loo faamatalaina i le Faaaliga 7:9-17. O le a aoaoina i latou nei mai atunuu uma ma o le a maua le faamoemoe o le faasaoina mai le Puapuaga Tele ma maua le ola e faavavau i le lalolagi. O lenei malamalamaga na avatu ai le uunaʻiga tele i le galuega talaʻi.​—Ioane 10:16.

I le 1931 na talia ai e Tagata Aʻoga o le Tusi Paia le igoa Molimau a Ieova. Muamua atu i lena, sa lauiloa i latou o Tagata Aʻoga o le Tusi Paia, o Tagata Aʻoga Faavaomalo o le Tusi Paia, tagata o le Tafa o Ata Faa-Meleniuma ma tagata o le Olo Matamata. Sa oo ina faaigoaina i latou i ni igoa faaulaula o le ʻau faa-Rus­sell ma le ʻau faa-Rutherford. Ma e leai se igoa o nei igoa na mataulia tonu ai i latou. Sa mautinoa ona tatau ia i latou le igoa Kerisiano, lea na tuuina atu i soʻo o Iesu e ala i le taʻiala tauatua i le uluai senituri, ae peitai sa faaaogāina foi e le tele o vaega na mulimuli atu i aʻoaʻoga sese. Ina ia faaesea la i latou lava mai le faitau miliona o Kerisiano i le na o le igoa, sa tatau ai ona iai se igoa e matuā faaesea ai ona mataulia soʻo moni o Keriso i aso nei.

Sa faamanino mai ai i le suesueina o le Tusi Paia e faapea, e pei lava ona sa taʻua e Ieova ona tagata o Isaraelu o ana molimau, o lea, ua tatau ai foi i ona tagata i le faaiʻuga o le faiga o mea, o ē na tuuina atu mo le faalauiloaina atu o lona suafa ma lana fuafuaga, ona taʻua foi ma le saʻo o Molimau a Ieova. O le igoa lenei ua matuā faaesea ai ma le tonu Kerisiano tapuai moni a Ieova mai isi uma o ē ua faapea mai o Kerisiano i aso nei.​—Salamo 83:18; Isaia 43:10-12.

I le 1942, i le taimi o le Taua Lona Lua a le Lalolagi, na maliu ai Joseph F. Rutherford, ona soloai ane lea ia te ia o Nathan H. Knorr e avea ma peresitene o le Sosaiete o le Olo Matamata. Ua vaaia ai foi la i le taimi lea i valoaga le faaaliga manino faapea o le a iai se vaitaimi o sina filemu ma le saolotoga lea o le a maua ai le avanoa mo le faalauteleina sili o le galuega talaʻi a o leʻi oo mai le iʻuga o lenei faiga o mea. Ia Fepuari 1943, na faavaeina ai le Aʻoga Faale-Tusi Paia o le Olomatamata o Kiliata (Watchtower Bible School of Gilead), e aʻoaʻoina ai faifeau faataimi-atoa mo le galuega faamisionare i isi atunuu ese. Mulimuli ane ai i lena tausaga, ona faaopoopo atu lea i le faasologa faalevaiaso o sauniga a Molimau a Ieova se polokalama faapitoa e toleniina ai mo le faiva.

I le 1950, na amata ai ona tatalaina e le Sosaiete ni vaega o le New World Translation of the Holy Scriptures, o se faaliliuga i le Gagana faa-Peretania faaonaponei na faia mai uluai gagana na lomia ai le Tusi Paia. O lenei Tusi Paia e faigofie ona malamalama ai ma ua faaliliuina ma le saʻo, na saunia i se tau taugofie i masini lomitusi a le Sosaiete, ua avea o se fesoasoani tele i le galuega talaʻi. E oo mai i aso nei, ua sili atu i le 40 miliona kopi ua lomia i gagana e 11.

E oo atu i le faaiʻuga o le 1988, ua tusa ma le tolu ma le afa miliona Molimau a Ieova ua auai i le galuega talaʻi i le sili atu i le 200 atunuu ma motu o le sami. O le Faamanatuga o le maliu o Keriso, o le sauniga lea ua iai ma se aofaiga aupito tele o ē na auai i sauniga na faia i a latou faapotopotoga e 57,670 i le 1988, e 9,201,071 tagata na auai.

Ua vaaia faapea o loo faaaogāina moni lava e le Atua Molimau a Ieova, ona o lo latou faaauau pea ona tiotio i lana auaunaga, i lo latou autasi i le lalolagi aoao, i lo latou maelega i le faamaualugaina o le suafa o Ieova ma le talaʻiina o lona Malo, i o latou tulaga mamā e ao ona ausia ai tau amio, i lo latou talia o le Tusi Paia atoa o le Afioga lē masese a le Atua, ma lo latou saoloto mai le talitonu i aitu ma faiga faaagaga.

O vaega o loo mulimuli mai o loo faaalia ai pe faapefea ona e maua aogā mai lenei toe faafoisia o le tapuaiga moni a le Atua.

• O ā aʻoaʻoga faavae a le Tusi Paia na faaesea ai Tagata Aʻoga o le Tusi Paia mai ituaiga o lotu?

• O ā taualumaga faalefaalapotopotoga sa aafia ai Tagata Aʻoga o le Tusi Paia e oo atu i le 1918?

• Ua mafai faapefea ona fai atu faapea o le vaega o Tagata Aʻoga faauuina o le Tusi Paia lea ua faia aʻe ai “le auauna faamaoni ma le mafaufau” o le Mataio 24:45-47?

• O le ā le malamalamaga o le fuafuaga a le Atua na avatu ai le uunaʻiga tele i le faalauteleina o le galuega talaʻi?

• O le ā le fuafuaga ua faataunuuina e le igoa Molimau a Ieova?

• O ā faamaoniga e iloa ai o loo faaaogāina moni lava e le Atua Molimau a Ieova?

[Ata i le itulau 8]

C. T. Russell i le 1879

Lomiga o Iulai 1879

Se Vaega Muamua o Tagata Aʻoga o le Tusi Paia, Pittsburgh, Pennsylvania

[Ata i le itulau 9]

Ofisa ulu, 1889-1909, Pittsburgh, Pennsylvania

Ofisa autū, 1909-1918, Brooklyn, Niu Ioka

Fale sa nonofo ai i ofisa ulu, 1909-1926, Brooklyn, Niu Ioka

[Ata i le itulau 10]

Le ofisa ulu o Molimau a Ieova i le lalolagi, Brooklyn, Niu Ioka, Iunaite Setete o Amerika

Tauagavale i luga:

Atufalega o ofisa

Taumatau i luga:

Fale e nonofo ai

Tauagavale i lalo:

Atufalega o falegaosimea

Taumatau i lalo:

Le nofoaga o laʻuga o tusi

[Ata i le itulau 11]

Faasalalauina i le leitio e J. F. Rutherford

Le uluai masini lomitusi taavilivili a le Sosaiete o le Olomatamata, na faagaoioia e tagata tauofo

Le New World Translation o le Tusi Paia, ua lomia nei i gagana e 11