Faapotopotoga mo le Atiina aʻe i le Alofa ma le Autasi

Atonu ua e auai i nisi o sauniga a faapotopotoga a Molimau a Ieova e latalata ane i le mea o e mau ai. O tagata mai matata eseese uma o le olaga​—vaega o aiga, tagata nofo fua, o ē matutua ma talavou​—sa iai i inā. Sa latou autasi uma lava i la latou tapuaiga ma sa naunau e fesoasoani atu i isi.

I so o se faatulagaga lava e mananao ai ni tagata se toatele e galulue ma le autasi, e manaomia ona iai sina vaavaaiga. O le Atua o le Atua o le solosolo lelei; o lea la, e tatau ona atagia lena solosolo lelei i le faapotopotoga a ona tagata. E pei ona sa iai i le uluai senituri, e faapena foi i aso nei, e tofia tane Kerisiano agavaa, taʻumatuaina, ma lava le poto masani e avea ma toeaina, po o ovasia. E vaavaaia e i latou nei le faapotopotoga ma tausia manaoga faaleagaga o le faapotopotoga. E fesoasoani foi ia i latou isi tane faamaoni ua taʻua o auauna o le faiva. O nei tane e lē maua ni totogi po o nisi manuia tau tupe ae auauna tauofo, e faafetaiai e i latou a latou lava tupe faaalu, e masani ona maua mai i a latou galuega faaletino.​—1 Korinito 14:33, 40; Filipi 1:1; 1 Timoteo 3:8, 9.

E faapefea ona filifilia i latou nei? E manaomia ona avea i latou o ni auauna faamaoni a le Atua, o ē ua faaalia ni agavaa faapitoa faale-Tusi Paia. O nisi o nei mea: ia ʻvasagamalie i masani, ia faautauta, ia sololelei, ia talimalo, ia agavaa e aʻoaʻo atu, ma ia manatunatu ma le tonu; e lē matapeʻapeʻa i tupe; e tausi lelei i lona aiga; e lē o se tagata fou faatoā liliu; e tatau ona taʻuleleia e tagata i tua’; ʻe taofi mau i le upu moni, e tusa ai ma le faiva o le aʻoaʻo atu.’​—1 Timoteo 3:1-15; Tito 1:7-9.

E lē palotaina nei tane i ni ofisa e le faapotopotoga, auā e masani atonu o le toatele o ē o iai o ni Kerisiano fou. Na i lo o lea, e fautuaina i latou e tane taʻumatuaina ua lava le poto masani, o ni toeaina, ma o ē ua iai le tofa mamao i le tele o loo ausia ai e i latou ua mafaufauina tulaga manaomia faale-Tusi Paia. Ona faia lea o tofiga a toeaina ma auauna o le faiva i lalo o le vaaiga a le Vaega Pule o Molimau a Ieova, ma o lenei mea ua mulimuli atu lea i le faavae na faataatia e le faapotopotoga Kerisiano i le uluai senituri.

O nei toeaina, po o ovasia, e lē o faia aʻe ai se vasega o ni taʻitaʻi lotu (clergy class); e lē o i latou foi o ni pule i isi. E pei ona fetalai Iesu, o sē e fai ma taʻitaʻi ia fai ma auauna i tagata uma. I le faapotopotoga la o Molimau a Ieova, ua avea moni toeaina ma uso faigaluega faatasi mo le Malo o le Atua.​—Mataio 20:26, 27; 23:8-11; Roma 12:8; 1 Korinito 3:5; 4:1, 2; Kolose 4:11; 1 Tesalonia 5:12-14.

I le avea o ni ovasia, latou te vaaia ai faatonuga o saunia i sauniga ma taʻimua i le galuega talaʻi. O le talaʻiina o le tala lelei o le Malo i a latou oganuu uma ua tofia i ai, o se sini autū lena a le faapotopotoga. E avea foi ovasia o ni leoleo mamoe, i lo latou asiasi atu i tagata o le faapotopotoga, e faamalosiau ia i latou e tusa ma le manaomia.​—Mataio 24:14; Galuega 1:8; 1 Tesalonia 2:11, 12; 5:14, 15; 2 Timoteo 2:24-26; Eperu 13:17; Iakopo 5:13-16; 1 Peteru 5:1-4.

E iai foi i toeaina le tiute tauave e faasaʻo ai ma avatu le aoaiga i so o se tasi atonu o loo mulimuli atu i se auala sese ma o sē e mafai ona aumaia ai se tulaga lamatia i le mamā tau amio ma le faaleagaga ma le autasi o le faapotopotoga.​—1 Korinito 5:4, 5, 7, 11-13; Tito 1:9; 2:15; 3:10, 11.

O le auaufaatasi e lē aunoa ma le faapotopotoga o le a avatu ai ia te oe se mafutaga faaleuso lelei ma le tele o aogā faaleagaga.​—Salamo 35:18; 84:10.

• O ai e vaaia mataupu a faapotopotoga taitasi?

• I luga o le ā le faavae e filifilia ai ovasia?

• O ā o latou tiute tauave?

[Ata i le itulau 13]

E faatonu e ovasia le faapotopotoga, taʻimua i le talaʻiga i lea fale ma lea fale, faalaeiau atu e ala i asiasiga faaleoleo mamoe, e avatu foi fautuaga ma aʻoaʻiga pe a manaomia