Ovasia Faimalaga—O Uso Faigaluega Faatasi i le Upu Moni

Sa iai ovasia faimalaga i le faapotopotoga Kerisiano o le uluai senituri, o ē sa feasiasiaʻi i faapotopotoga ina ia atiina aʻe ai. Sa tuuina atu i latou lava, e lē mo le sailia o ni ʻoa totino, ae ina ia latou fesoasoani ia i latou o i faapotopotoga e faaauau pea ona savavali ma le taʻuaogāina i le Atua.​—Galuega 11:23, 24; 14:21, 22; 15:32; 20:2, 31-35; Filipi 2:20-22, 29; 1 Tesalonia 2:5-12.

I aso nei, ua maua ai foi e faapotopotoga o Molimau a Ieova aogā mai ovasia faimalaga. Ua tele tausaga o le poto masani o nei tane i gaoioiga o le talaʻiga a Molimau a Ieova ma le avea foi o ni ovasia. Ua latou faaavanoaina i latou mai galuega faaletino ma tiute tauave i le aiga, ina ia ofoina atu i latou i le faiva i taimi atoa. Mo i latou ua faaipoipo, ua masani ona saosaolaumea a latou avā i le faiva i taimi atoa faatasi ma a latou tane.

E tofia se ovasia matagaluega na te tausia se matagaluega pe tusa ma le 18 i le 25 faapotopotoga. Na te asiasia faapotopotoga taitasi o le matagaluega pe tusa e faalua i le tausaga, ma pe a mavae ni tausaga e lua pe tolu ona tofia foi lea i se isi matagaluega. O lenei auala e mafai ai e faapotopotoga ona maua aogā mai le eseese o poto masani ma tomai o ovasia eseese o matagaluega.

E siaki e le ovasia o matagaluega le tulaga faaleagaga o le faapotopotoga ma ana galuega. Na te avatuina ni nai lauga i le faapotopotoga ma fono faatasi foi ma toeaina ma auauna o le faiva ina ia talanoaina pe mafai faapefea ona latou faaleleia la latou auaunaga i le faapotopotoga.

A o faagasolo le vaiaso, e galulue ai o ia ma lana avā, pe afai ua faaipoipo, faatasi ma Molimau o le faapotopotoga, e fesoasoani atu ia i latou e faaleleia la latou faiva i lea fale ma lea fale. O le a asiasi foi o ia ma lana avā i tagata fiafia fou e faamalosiau ia i latou i le faatuatua. E mafai ona e talosagaina sea asiasiga.

E faapena foi i le ovasia itumalo ona iai ni agavaa faaleagaga tutusa ma se talaaga o le poto masani. E femalagaai o ia mai lea matagaluega i lea matagaluega, tuuina atu i ai le auaunaga i vaiaso taitasi e tusa ai ma fonotaga matagaluega. E galulue faatasi foi o ia ma lana avā ma Molimau i le faiva i le fanua i se tasi o faapotopotoga o le matagaluega o loo ia asiasia. Na te vaaia sauniuniga faaiʻu o le polokalama o le fonotaga matagaluega ma tuuina atu ni lauga i le taimi o le fonotaga, e aofia ai ma le lauga lautele.

Pe a faaiʻu e ovasia faimalaga a latou asiasiga i se faapotopotoga po o se matagaluega, ona latou faaauau atu lea e asia se isi, e mulimuli atu i le faasologa lava e tasi, seia oo ina asia uma faapotopotoga po o matagaluega i totonu o le ono masina; ona latou toe amata foi lea.

I le tele o atunuu, e femalagaai ai ovasia faimalaga i taavale pe faaaogā foi auala o femalagaaiga a tagata lautele. I isi atunuu, atonu latou te faaaogā ai uila vilivae pe savavali foi. E totogi e le Sosaiete tupe faaalu i femalagaaiga a le ovasia faimalaga ma saunia foi mo ia ma lana avā sina alauni itiiti mo ni a la mea totino e manaomia. E masani ona saunia le nofoaga e api ai ma ni taumafataga mo le ovasia faimalaga ma lana avā e tagata o faapotopotoga taitasi.

Ua manaomia e lenei auaunaga se agaga o le faataulagaina totino. Ua matuā maumauai ovasia faimalaga ma a latou avā e tuuina atu la latou auaunaga i faapotopotoga e aunoa ma le tuu atu o se avega taugata i o latou luga.​—1 Tesalonia 2:9.

• O le ā le fuafuaga sa iai i ovasia faimalaga i le faapotopotoga Kerisiano o le uluai senituri?

• Ua faapefea ona agavaa ma avanoa ovasia faimalaga i aso nei mo lenei faiva?

• Faamatala auaunaga a ovasia matagaluega ma itumalo ma le auala latou te ola ai.

[Ata i le itulau 20]

O loo lauga atu le ovasia itumalo i se fonotaga matagaluega

[Ata i le itulau 21]

O loo tuuina atu e ovasia matagaluega faatonuga i le talaʻiga i lea fale ma lea fale, talanoa atu i toeaina o le faapotopotoga, asiasi faatasi ma ē naunau fou i suesuega faale-Tusi Paia, ma lauga atu i faapotopotoga