Mataupu 121
I Luma o le Au Saniterini, ona Sosoo lea ma Pilato
UA LATALATA ina ao. O lona faatolu ai lea ona faafitia e Peteru Iesu, ma ua uma foi ona faia e sui o le au Saniterini la latou faamasinoga faatagāfai ma ua taape. Ae peitai, na latou toe feiloai i le malama ae o le taeao o le Aso Faraile, o le taimi lea i le maota tele o le au Saniterini. O la latou fuafuaga e foliga mai ina ia faafoliga atu ai e faaletulafono le faamasinoga lea na faia i le po. Ina ua avatu Iesu i o latou luma, na latou fai atu, e pei ona sa latou faia i le po: “Afai o oe o le Keriso, fai mai ia i a te i matou.”
Na tali atu Iesu: “Pe afai ou te fai atu i a te outou, tou te lē talitonu mai lava. Afai foi ou te fesili i a te outou, tou te lē tali mai lava.” Ae peitai, na faasino atu ma le lototele e Iesu po o ai ia, i le faapea atu: “E amata i nei ona po ona nofo o le Atalii o le tagata i le itu taumatau o le Atua mamana.”
Na latou fai atu uma ma le fia iloa: “O oe foi ea le Alo o le Atua?”
Na tali atu Iesu: “O aʻu lea ua outou fai mai ai na.”
Ona sa faanaunau na tagata i le fia fasioti tagata, o lea na lava ai lea tali. Sa latou manatu o se upuvale. Sa latou fesili atu: “Se ā le aogā o nisi molimau? Auā o i tatou lava, ua tatou faalogo i lana lava upu.” O lea na latou fusifusi ai i a Iesu, taʻitaʻi ese atu i a te ia, ma tuuina atu o ia i le kovana Roma o Ponotio Pilato.
Na matauina uma na mea e Iuta, o lē na faalata i a Iesu. Ina ua ia iloa atu ua faasalaina Iesu, ona faanoanoa ai lea o ia. O lea, sa ia alu atu ai i ositaulaga sili ma toeaina ia toe faafoi atu le 30 tupe siliva, ma faamatala atu: “Ua ou agasala, ina ua ou faalata lē ua lē sala.”
Na latou tali atu ma le lē alofa: “Sa matou mea ea lena? Faitalia lava oe.” O lea na lafoai ai e Iuta tupe siliva i le malumalu ae alu ese ma taumafai ai e sisi o ia lava. Ae peitai, atonu na gau le lālā na nonoa ai e Iuta le maea, ma paʻū ifo ai lona tino i maa o i lalo, ma pā ai o ia.
Na lē mautinoa e ositaulaga sili po o le ā le mea e fai i tupe siliva. Na latou filifili faapea: “E sa ona tuu ia mea i le mea e teu ai oloa, auā o le tau o le toto.” O lea, ina ua uma se felafolafoaiga, ona latou faatau ai lea i le tupe se fanua a le faiipu omea e tatanu ai tagata ese. O lea na taʻua ai lea fanua o le “Fanua o le Toto.”
A o leʻi taitai lava le taeao na avatu ai Iesu i le maota o le kovana. Ae o tagata Iutaia na latou ō faatasi sa mumusu e ulu atu i ai ona na latou talitonu faapea o le aufaatasi vavalalata ma Nuu Ese o le a faaleagaina ai i latou. O lea ina ia feutagaʻi mai i a i latou, sa sau ai Pilato i fafo. Na ia fesili atu: “Se ā se mea ua outou momoli ai i lena tagata?”
Na latou tali atu: “Afai ana lē pagota o ia, po ua matou lē tuuina atu o ia i a te oe.”
I lona faanaunauga e ʻaloese mai le aafia ai, na tali atu ai Pilato: “Inā ave ia e outou i a te ia, inā faamasino i a te ia i la outou tulafono.”
I le faaalia o o latou faanaunauga fia fasioti tagata, na tali atu ai tagata Iutaia: “E sa ona matou fasioti o se tasi.” E moni, afai latou te fasiotia Iesu i le taimi o le Tausamiga o le Paseka, atonu o le a faapena foi ona faapogaia ai le faanunununu o tagata, talu ai o le toatele o tagata sa faaaloalo i a Iesu. Ae afai e mafai ona latou tuuina atu i tagata Roma e faasalaina o ia i se tuuaʻiga faapolotiki, o le a mafai ai ona saoloto i latou mai lenei avega mamafa i luma o tagata.
Sa fatu aʻe nei e taʻitaʻi lotu nisi moliaga eseese, sa leʻi taʻua i la latou uluai faamasinoga lea na latou taʻusalaina ai Iesu faapea ua upuvale. E tolu vaega o le moliaga na latou faia: “Na matou iloa lenei tagata ua ia [1] faasese i le nuu, [2] ua vavao foi ona avatu o taulaga i a Kaisara, ma [3] ua faapea mai, o ia lava o le Tupu, le Keriso.”
O le moliaga faapea na fai atu Iesu o ia o le tupu o le mea lea sa popole ai Pilato. O lea, na toe ulu atu ai o ia i lona maota, ua valaau atu i a Iesu ina ia sau i a te ia, ma fesili atu: “O oe ea le tupu o tagata Iutaia?” I se isi faaupuga, pe ua e solia ea le tulafono e ala i le faalauiloa atu o oe lava e avea o se tupu e tetee i a Kaisara?
Na fia silafia e Iesu po o le ā le tele na faalogo ai Pilato e uiga i a te ia, o lea na ia fesili atu ai: “Pe se upu mai i a te oe lea upu, pe na taʻua aʻu e nisi i a te oe?”
Sa taʻutino e Pilato na te lē iloa e uiga i a Iesu ma sa manao e fia iloa le mea moni. O lea, na ia fesili atu ai: “Ou te se Iutaia ea? Ua tuuina mai oe i a te aʻu e lou nuu ma le au ositaulaga sili; pe se ā le mea ua e faia?”
E leai lava se auala na taumafai ai Iesu e ʻaloese mai le mataupu, e uiga i le tulaga tautupu. O le tali na avatu e Iesu e lē taumatea sa ofo ai Pilato. Luka 22:66–23:3; Mataio 27:1-11; Mareko 15:1; Ioane 18:28-35; Galuega 1:16-20.
▪ Mo le ā le fuafuaga na toe feiloai ai le au Saniterini i le taeao?
▪ Sa faapefea ona oti Iuta, ma o le ā sa faia i tupe siliva e 30?
▪ Na i lo o le fasiotia o ia e i latou lava, aisea na mananao ai tagata Iutaia ia fasiotia e tagata Roma Iesu?
▪ O ā moliaga sa faia e tagata Iutaia faasaga i a Iesu?