Tausisia le Filemu i Lou Auaiga

1. O ā nisi mea e mafai ona faapogaia ai fevaevaeaiga i aiga?

AMUIA i latou o ē o i aiga o loo iai le alofa, le femalamalamaai, ma le filemu. E faamoemoe o loo faapena lou aiga. Ae faanoanoa e faapea atu, e lē mafaitaulia aiga ua lē fetaui i ai lena faamatalaga ma ua iai mafuaaga ua fevaevaeai ai. O ā mea e fevaevaeai ai auaiga? O le a tatou talanoaina i lenei mataupu ni mea se tolu. I nisi aiga, e lē tutusa uma lotu a tagata o le aiga. I nisi aiga, atonu o se tasi o matua e lē o se matua moni o le fanau. Ae i nisi foi aiga, o le tauivi ina ia maua mea e ola ai po o le tuinanauga mo le faateleina o meafaitino e foliga mai ua māfua ai ona fevaevaeai tagata o le aiga. Peitai, o tulaga ua fevaevaeai ai le tasi auaiga atonu e lē o aafia ai le isi auaiga. O le ā ua eseese ai?

2. O fea ua saili atu i ai nisi mo taʻiala i le olaga faaleaiga, ae o le ā le puna e sili ona lelei mo na taʻiala?

² O se tasi o vala, o manatu faaalia. Pe afai e te taumafai moni e malamalama i manatu o le isi tagata, e foliga mai la o loo e iloa le auala e faatumauina ai se auaiga autasi. O le vala lona lua o le mea o loo puna mai ai ou taʻiala. E toatele tagata ua mulimuli atu i fautuaga mai a latou uo i galuega, o tuaoi, o tagata o loo tusia tala i nusipepa, po o isi taʻiala mai tagata. Ae o nisi, ua latou iloa le mea o loo taʻua i le Afioga a le Atua e uiga i o latou tulaga, ona latou faatatauina lea o mea ua latou aʻoaʻoina. E mafai faapefea e le faia o lenei mea ona fesoasoani i se aiga ina ia tausisia lo latou filemu?​—2 Timoteo 3:16, 17.

PE AFAI E ESE LE LOTU A LAU TANE

3. (a) O le ā le fautuaga a le Tusi Paia e tusa ai o le faaipoipo atu i se tasi e ese lana lotu? (e) O ā nisi o mataupu silisili faavae e faatatauina pe afai o le isi paaga e talitonu ae o le isi e lē talitonu?

³ Ua fautuaina malosi e le Tusi Paia i tatou ina ia lē faaipoipo atu i se tasi e ese lana talitonuga faalelotu. (Teuteronome 7:3, 4; 1 Korinito 7:39) E ui i lea, atonu sa faatoʻā e aʻoaʻoina le upu moni mai le Tusi Paia ae ua uma ona e faaipoipo, peitai e lē o faia faapena e lau tane. O le ā la le mea e fai? O le mea moni, o loo tumau pea tautoga o le faaipoipoga. (1 Korinito 7:10) Ua faamamafa mai e le Tusi Paia le tumau o le fusi o le faaipoipoga ma o lea ua faalaeiauina ai ulugalii faaipoipo ina ia foia o latou feeseeseaiga nai lo le sosola ese mai ai. (Efeso 5:28-31; Tito 2:4, 5) Ae faapefea pe afai e matuā tetee lava lau tane i lou auai i le lotu ua faamaonia mai e le Tusi Paia? E ono taumafai o ia e taofi oe mai lou alu atu i sauniga a le faapotopotoga, pe atonu o le a ia faapea mai e lē manao i lana avā ina ia alu atu mai lea fale i lea fale, e talanoa atu e uiga i lotu. O le ā o le a e faia?

4. I le ā le vala e mafai ai e se avā ona faaalia le magafagafa pe afai e lē o tutusa a la lotu ma lana tane?

⁴ Fesili ifo ia te oe lava, ʻAisea ua faapea ai lagona o laʻu tane?’ (Faataoto 16:20, 23) Pe afai e lē o matuā malamalama lelei o ia i mea o loo e faia, atonu la o le a ia popole ia te oe. Pe atonu foi o loo uunaia o ia e tauaiga e tetee mai talu ai ua e lē toe faia nisi o tū masani e tāua ia i latou. Na faapea mai se tasi tane: “Sa ou lagona ua lafoaia aʻu, ona o le tuua na o aʻu i le fale.” Na iai faalogona o lenei tamaloa e faapea ua ia lē toe mauaina lana avā ona o le lotu. Peitai o le faamaualuga na musu ai e taʻutino atu ona lagona tuua toatasi. Atonu e manaomia e lau tane se faamautinoaga e faapea, o lou alofa mo Ieova e lē uiga ai ua itiiti nei lou alofa mo lau tane nai lo le tulaga sa iai i taimi ua mavae. Ia mautinoa le faaalu o se taimi faatasi ma ia.

5. O le ā le paleni lelei e tatau ona tausia pea e le avā o lē e ese le lotu a lana tane?

⁵ Peitai ane, e iai se isi mea e sili atu ona tāua e ao ona manatunatu i ai pe afai o le a e feutagai ma le tulaga i se uiga atamai. Ua fautuaina avā e le Afioga a le Atua e faapea: “Ia outou usiusitai atu i a outou lava tane, pei ona tatau i le Alii.” (Kolose 3:18) O lea, ua lapatai mai ai e teena le agaga o le fia tutoatasi. E lē gata i lea, e ala i le faapea mai, e “pei ona tatau i le Alii,” ua faaalia ai i lenei mau e faapea, o le gauai atu o se tasi i lana tane e tatau ona ia manatunatu ai foi i le gauai atu i le Alii. E tatau ona iai le paleni lelei.

6. O ā mataupu silisili e tatau ona manatua pea e se avā Kerisiano?

⁶ Mo se Kerisiano, o le auai i sauniga a le faapotopotoga ma le molimau atu i isi e uiga i lona faatuatua e faavae mai i le Tusi Paia o ni vala tāua na o le tapuaiga moni ma e lē tatau ona faatalalē i ai. (Roma 10:9, 10, 14; Eperu 10:24, 25) O le ā la e te faia, pe afai ua faatonuina tuusaʻo mai oe e se tagata ina ia e lē usitaia se tasi o mea o loo faafinagaloina e le Atua? Na faalauiloa mai e aposetolo o Iesu Keriso e faapea: “E tusa ona sili o lo matou anaana i le Atua i lo matou anaana i tagata.” (Galuega 5:29) O le mea lelei na latou faia ua saunia ai se muai faaaoaoga e mafai ona faatatauina i le tele o tulaga i le olaga. Pe o le a uunaia ea oe e lou alofa mo Ieova e te tuuina atu ai ia te ia le tuutoina ua talafeagai lelei ona avatu ia te ia? I le taimi lava e tasi, pe o le a avea ea lou alofa ma lou faaaloalo mo lau tane e uunaia ai oe e taumafai ina ia faatino lenei uiga i se auala e faafiafiaina ai o ia?​—Mataio 4:10; 1 Ioane 5:3.

7. O le ā le maumauai e tatau ona iai i se avā Kerisiano?

⁷ Na taʻua e Iesu o le a lē faigofie i taimi uma lenei tulaga. Na ia lapatai mai e faapea, talu ai teteega i le tapuaiga moni, o le a oo ai i ni tagata talitonu o nisi aiga se lagona e peiseai ua tuulafoaia i latou, e pei ua vavae ese e se pelu i latou mai le isi vaega uma o le aiga. (Mataio 10:34-36) Na tupu lenei mea i se fafine i Iapani. E 11 tausaga o tetee pea lana tane ia te ia. Sa matuā leaga faiga sa fai e lana tane ia te ia ma e masani ona loka o ia i fafo o le fale. Ae sa tutumau pea o ia. Sa fesoasoani atu ia te ia uo i le faapotopotoga Kerisiano. Sa ia tatalo faatauanau ma maua le tele o faalaeiauga mai le 1 Peteru 2:20. Sa maumauai le talitonuga o lenei fafine Kerisiano e faapea, pe afai e tumau mausalī pea o ia, e iai lava se aso o le a la auauna faatasi ai ma lana tane ia Ieova. Ma o le tulaga lena na oo i ai.

8, 9. E ao faapefea ona gaoioi se avā ina ia alofia ai le tuuina atu o ni toʻatugā lē talafeagai i lana tane?

⁸ E tele mea aogā e mafai ona e fai e suia ai uiga faaalia o lau paaga. Mo se faaaoaoga, pe afai e tetee lau tane i lau lotu, aua e te faatupu ia te ia ni mafuaaga tatau e faitio mai ai i nisi o mataupu. Ia tausi mamā le fale. Ia teuteu lelei ou foliga vaaia. Ia taʻu atu ia te ia le tele o faaupuga o le alofa ma le agaga talisapaia. Aua le faitio ae ia lagolagosua. Ia faaali atu o loo e faaaloalogia lona tulaga ulu. Aua e te tauimasui pe a e lagona ua agaleagaina oe. (1 Peteru 2:21, 23) Ia faapalepale i tulaga lē lelei atoatoa faaletagata, ma pe a mapuna aʻe se fefinauaiga, ia lotomaulalo e muamua ona e faatoese atu.​—Efeso 4:26.

⁹ Aua neʻi avea lou auai atu i sauniga o se mafuaaga e tuai ai ona fai le meatausami a lau tane. Atonu foi e te filifili e auai atu i le faiva faa-Kerisiano i taimi e lē o iai lau tane i le fale. E atamai mo se avā Kerisiano ona taumamao mai le talaʻi atu i lana tane pe afai e lē o taliaina mai. Nai lo lea, e usitaia e le avā le fautuaga a le aposetolo o Peteru: “Ia faapea outou fafine, ia usiusitai i a outou lava tane, afai foi e le faalogo nisi i le upu, ia maua i latou i le amio lelei a avā, a e leai se upu, pe a latou vaai ane i a outou amio mamā ma le faaaloalo.” (1 Peteru 3:1, 2) E taumafai avā Kerisiano ia sili atu ona latou faaatagia maia fua o le agaga o le Atua.​—Kalatia 5:22, 23.

PE AFAI E LĒ O SE KERISIANO MONI LE AVĀ

10. E ao faapefea i se tane talitonu ona amioai i lana avā pe afai e ese le talitonuga a lana avā?

¹⁰ Ae faapefea pe afai o le tane o se Kerisiano moni ae ua lē o faapena le avā? Ua aumaia e le Tusi Paia taʻiala mo na tulaga. Ua faapea mai: “Ai se uso ua iai se avā lē talitonu, ae ua malie le avā ina ia la nonofo pea, aua neʻi tuua o ia.” (1 Korinito 7:12, NW) Ua timai mai foi i tane: “Ia outou alolofa atu i a outou avā.”​—Kolose 3:19.

11. E mafai faapefea e se tane ona faaalia le magafagafa ma faatino ma le faautauta lona tulaga ulu i lana avā pe afai e lē o se Kerisiano moni lana avā?

¹¹ Pe afai o oe o le tane a se avā e ese ona talitonuga faalelotu mai ia te oe, ia atili la ona e faaeteete e faaali atu le faaaloalo mo lau avā ma lou manatunatu i ona faalogona. Ona o ia o se tagata matua, e tatau ai foi la ona ia mauaina se saʻolotoga e faatino ai ona talitonuga faalelotu, e tusa lava pe e te lē ioe i ai. I le taimi muamua e te talanoa atu ai ia te ia e uiga i lau lotu, aua neʻi e faatalitalia o le a ia lafoaia ona talitonuga ua leva ona taofi mau i ai, ae talia se isi talitonuga fou. Nai lo le soona fai atu i ai o na tū faalotu ua leva ona faapelepele i ai o ia ma lona aiga e sese, ia e taumafai ma le onosai e fetufaʻi oulua manatu mai le Tusi Paia. Atonu o loo ia lagona e peiseai ua lafoaia o ia pe afai ua tuutoina atu le tele o le taimi i gaoioiga a le faapotopotoga. Atonu e tetee mai o ia i au taumafaiga ina ia auauna ia Ieova, peitai o le feau moni lea e fia faaoo mai: “Ou te manaomia atili sou taimi mo aʻu!” Ia onosai. Pe afai e te manatunatu alofa, e iai se taimi atonu o le a fesoasoani mai ai o ia ina ia taliaina le tapuaiga moni.​—Kolose 3:12-14; 1 Peteru 3:8, 9.

LE AʻOAʻOINA O LE FANAU

12. E tusa lava pe eseese lotu a le tane ma lana avā, ae ao faapefea ona faatatauina mataupu silisili o le Tusi Paia i le aʻoaʻoina o le la fanau?

¹² I se auaiga e lē o autasi uma i le tapuaiga, e avea ai i nisi taimi le avatuina o faatonuga faalelotu i le fanau o se mataupu faigata. E ao faapefea ona faatatauina mataupu silisili faale-Tusi Paia? Ua tofia e le Tusi Paia i le tamā le tiute tauave autū mo le faatonuina o le fanau, ae iai foi se matafaioi tāua e faia e le tinā. (Faataoto 1:8; faatusatusa i le Kenese 18:19; Teuteronome 11:18, 19.) E tusa lava pe lē o taliaina e le tamā le tulaga ulu o Keriso, ae o loo avea pea o ia ma ulu o le aiga.

13, 14. Pe afai e faasā e le tane lana avā mai lona aveina o le fanau i sauniga faa-Kerisiano pe faia se suesuega ma i latou, o le ā e mafai e le avā ona ia faia?

¹³ O nisi tamā lē talitonu latou te lē tetee pe a faatonuina e le tinā le fanau i mataupu faalelotu. Ae o nisi tamā e tetee. Ae faapefea pe afai e lē faatagaina oe e lau tane e te aveina le fanau i sauniga a le faapotopotoga pe faasā foi ona e faia se suesuega ma i latou i le fale? Ua tatau nei la ona e faapaleniina lelei nisi o avega tauave​—o lau avega tauave ia Ieova le Atua, i lau tane o ia o lou ulu, ma i lau fanau pele. E mafai faapefea ona e faafoeina lelei nei mea?

¹⁴ E mautinoa lava o le a e tatalo mo lenei mataupu. (Filipi 4:6, 7; 1 Ioane 5:14) Ae i le iuga, o oe lava lē e tatau ona filifili i le auala o le a uia. Pe afai e te amataina ma le faautauta, i le faamanino atu i lau tane e te lē o faasagatau i lona tulaga ulu, e mulimuli ane atonu o le a faaitiitia lona tetee mai. E tusa lava pe faasā oe e lau tane mai lou aveina o le fanau i sauniga po o le faia o se suesuega faale-Tusi Paia aloaia ma i latou, ae mafai lava ona e aʻoaʻoina i latou. I lou tautala atu i aso taitasi ma lau faaaoaoga lelei, ia e taumafai e totō i o latou loto se alofa mo Ieova, le faatuatua i lana Afioga, le faaaloalo mo mātua​—e aofia ai lo latou tamā​—le manatu alofa mo isi tagata, ma le talisapaia o galuega faamaoni. Atonu i se taimi, o le a mātauina e le tamā āuga lelei ma e mafai ai ona ia talisapaia le tāua o au taumafaiga.​—Faataoto 23:24.

15. O le ā le tiute tauave a se tamā talitonu i le aʻoaʻoina o le fanau?

¹⁵ Pe afai o oe o le tane talitonu ae lē talitonu lau avā, e ao la ona e tauaveina le tiute tauave o le tausi aʻe o lau fanau “i aoaiga ma apoapoaiga a le Alii.” (Efeso 6:4) A o faia faapea, e mautinoa e tatau ona e agalelei, alofa, ma faautauta i le feutagai ai ma lau avā.

PE AFAI E ESE LAU LOTU MAI LE LOTU A OU MĀTUA

16, 17. O ā mataupu silisili faale-Tusi Paia e ao ona manatua e le fanau pe a latou taliaina se lotu e ese mai le lotu a o latou mātua?

¹⁶ Ua lē o toe avea o se mea fou le oo lava i fanau o loo i le vaavaaiga pea a mātua, ona latou taliaina ni manatu faalelotu e ese mai manatu faalelotu o o latou mātua. Pe ua oo ea ia te oe lena mea? Pe afai o le tulaga lena, ua iai la se fautuaga a le Tusi Paia mo oe.

¹⁷ Ua faapea mai le Afioga a le Atua: “Ia outou faalogo i o outou mātua i le Alii, auā o le mea tonu lava lea. Ia e ava i lou tamā ma lou tinā.” (Efeso 6:1, 2) E aofia ai i lena mea le faaaloalo tatau mo mātua. Peitai ane, e ui e tāua le usiusitai i mātua, ae e lē tatau ona avatua e aunoa ma le faaaloalo ai i le Atua moni. Pe afai ua lava le matua aʻe o se tamaitiiti e amata ai ona fai ni ana filifiliga, o le a faateleina la sana avega tauave e tusa ai ma ana gaoioiga. Ua moni lenei e lē gata e tusa ai ma le tulafono a le atunuu, ae ua sili ai foi e tusa ai ma le tulafono a le Atua. Ua faapea mai le Tusi Paia: “E taitasi i tatou ma tala i lana amio i le Atua.”​—Roma 14:12.

18, 19. Pe afai e ese le lotu a le fanau mai le lotu a o latou mātua, e mafai faapefea ona latou fesoasoani atu i o latou mātua ina ia malamalama lelei i o latou talitonuga?

¹⁸ Pe afai o ou talitonuga ua faapogaia ai suiga i lou olaga, taumafai ia e malamalama i manatu o ou mātua. E foliga mai o le a fiafia i laua pe afai o iuga o lou aʻoaʻoina ma faatatauina aʻoaʻoga a le Tusi Paia, ua sili ai ona e faaaloalo, ona e usiusitai, ma e naunau e faia mea o loo la manaomia mai ia te oe. Peitai ane, afai o lou faatuatuaga fou ua faapogaia ai foi ona e teena talitonuga ma tū o loo la faapelepele i ai, atonu o le a ia i laua se lagona faapea o loo e teena se tofi sa la saili e avatu ia te oe. Atonu o le a la popole foi mo lou lelei pe afai o le mea ua e faia e lē o masani tele ai lo outou vaipanoa, pe afai foi ua e lē toe uaʻi atu e sailia mea na o loo la manatu e mafai ona aogā mo lou manuia faaletino. E mafai foi ona avea le fiasili ma faafitauli. Atonu la te manatu, o lona uiga o loo e faapea mai o oe e saʻo a o laua e sese.

¹⁹ O lea la, i se vave e mafai ai, taumafai e fai se fuafuaga ina ia faafeiloai atu ou mātua i nisi o le ʻau toeaina po o isi Molimau taʻumatuaina i la outou faapotopotoga. Faalaeiau ou mātua ina ia asiasi atu i se Maota o le Malo e faalogologo ai lava i laua i mea o loo talanoaina ai ma tagai lava i laua i ituaiga o tagata e iai Molimau a Ieova. I se taimi, atonu o le a toʻa ifo ai uiga o ou mātua. E tusa lava pe maumauai pea le tetee o mātua, e faaleaga lomiga faale-Tusi Paia, ma faasā le fanau mai le auai atu i sauniga faa-Kerisiano, ae masani lava ona iai avanoa e faitau ai a latou lomiga i se isi mea, e talanoa atu ai i isi uso Kerisiano, ma latou molimau ma fesoasoani atu ai i isi i se tulaga lē fuafuaina. E mafai foi ona e tatalo atu ia Ieova. O nisi talavou e tatau ona latou faatalitali seia lava lo latou matutua e nonofo ese ai mai le aiga ona faatoʻā mafai lea ona latou faia atili nisi mea. Peitai ane, po o le ā lava le tulaga e iai, ia aua neʻi galo ona “ava i lou tamā ma lou tinā.” Ia fai lau vaega o le faatupuina o le filemu i le aiga. (Roma 12:17, 18) Ae o le sili i na mea uma, ia sailia le filemu ma le Atua.

LE LUʻI O LE AVEA MA MATUAFAI

20. O ā lagona atonu e iai i le fanau pe afai o lo latou tamā po o le tinā o se matuafai?

²⁰ I le tele o aiga, o le tulaga e aumaia ai le luʻi silisili e lē o finauga faalelotu ae o faafitauli i aiga ua toe suia paaga faaipoipo a mātua. E tele auaiga i aso nei o loo iai fanau mai faaipoipoga ua mavae a se tasi o matua po o mātua uma e toalua. I se aiga faapena, atonu e oo ai i le fanau lagona fuā ma le ita pe atonu o le a vaeluaina ai le alofa faamaoni. O le iuga, atonu latou te matuā tetee ai i ni taumafaiga faamaoni a se matuafai ina ia avea o se tamā po o se tinā lelei. O le ā e mafai ona fesoasoani ina ia taulau manuia ai se aiga ua toe suia paaga faaipoipo a mātua?

21. E ui i ni tulaga faapitoa o loo iai, ae aisea e ao ai i mātuafai ona saili atu mo se fesoasoani i mataupu silisili o loo i le Tusi Paia?

²¹ Ia manatua e ui i ni tulaga faapitoa o loo iai, ae o mataupu silisili faale-Tusi Paia ua manuia ai isi auaiga e faatatauina foi iinei. O le lē amanaiaina o na mataupu silisili atonu, e foliga ai ua foia se faafitauli mo sina taimi puupuu, ae mautinoa e mulimuli ane o le a taʻitaʻia atu ai i le loto tiga. (Salamo 127:1; Faataoto 29:15) Ia atiina aʻe le atamai ma le faautauta​—le atamai e faatatauina mataupu silisili faale-Atua ma ia manatua ona aogā mo se taimi umi, ma ia faautauta e mātaulia le mafuaaga e tautatala ma faia ai e tagata o le aiga nisi o mea. E manaomia foi le magafagafa.​—Faataoto 16:21; 24:3; 1 Peteru 3:8.

22. Aisea atonu e faigata ai i fanau ona talia se matuafai?

²² Pe afai o oe o se matuafai, atonu e te manatua sa talia fiafia oe e le fanau a o avea oe o se uo a le aiga. Peitai ina ua avea oe o so latou matuafai, atonu ua suia o latou uiga. Ona o le manatua pea o le matua moni lea ua latou lē o toe nonofo faatasi, atonu ai o loo tauivi le fanau ma se feteenaiga po o ai e alolofa faamaoni i ai, atonu o loo manatu faapea e te manao e fāoa le alofa lea o loo latou alolofa ai i le matua ua lē o toe iai. I nisi taimi, atonu latou te faamanatu saʻo mai lava ia te oe faapea e lē o oe o lo latou tamā po o lo latou tinā. E tiga na ituaiga o faamatalaga. Peitai “aua le faataalise ona ita o lou loto.” (Failauga 7:9) E manaomia le faautauta ma le magafagafa ina ia feutagai ai ma lagona ootia o le fanau.

23. E ono mafai faapefea ona taulimaina aoaiga i se aiga o loo iai se fanau e eseese o latou mātua moni?

²³ E tāua na uiga pe a avatuina e se tasi aoaiga. E matuā tāua aoaiga e maumauai. (Faataoto 6:20; 13:1) Ma talu ai e lē tutusa uma tamaiti, e ono eseese ai foi aoaiga o le tasi tamaitiiti mai le isi. Ua iloa e nisi mātuafai, atonu i le amataga e sili ona lelei mo le matua moni ona taulimaina lenei vala o le avatuina o aoaiga. Ae manaomia tele, mo mātua uma e toalua ona ioe faatasi i aoaiga ma tausisi i ai, aua neʻi faaʻauʻau se matua i lana lava tama moni ae lē faapena i le tama moni a le isi o i laua. (Faataoto 24:23) E tāua le usiusitai, ae manaomia ona faapalepale i vaivaiga o le lē lelei atoatoa. Aua le māteletele. Ia aoai atu ma le alofa.​—Kolose 3:21.

24. O le ā e mafai ona fesoasoani e alofia ai faafitauli i mea tau i amioga i le va o ituaiga i se aiga ua toe suia paaga faaipoipo a mātua?

²⁴ E tele aogā o talanoaga faaleaiga mo le puipuia mai faalavelave. E mafai ona fesoasoani i le aiga ina ia taulai atu ai i mataupu e sili ona tāua o le olaga. (Faatusatusa i le Filipi 1:9-11.) E mafai foi ona fesoasoani ai i tagata taitoatasi ina ia iloa le auala e mafai ona ia lagolago atu ai i le mauaina o sini o le aiga. E lē gata i lea, o talanoaga faaleaiga e tuusaʻo e mafai ona alofia ai faafitauli i mea tau i amioga. E manaomia ona malamalama fanauteine i le auala e fai ai ma le onomea o latou lavalava ma talafeagai ai a latou amioga a o iai lo latou tamāfai ma ni o latou tuaganefai, ma e manaomia foi e fanautama ni fautuaga mo a latou amioga talafeagai i lo latou tināfai ma ni o latou tuafāfinefai.​—1 Tesalonia 4:3-8.

25. O ā uiga e mafai ona fesoasoani e tausia ai pea le filemu i se aiga ua toe suia paaga faaipoipo a mātua?

²⁵ Ia onosai a o faafetaiaia le luʻi faapitoa o le avea ma se matuafai. E tele se taimi e alu i le atiina aʻe o ni faiā fou. O le mauaina o le alofa ma le faaaloalo mai o le fanau o ē e leai sou sootaga i ai o se matua moni e mafai ona avea o se galuega faigata tele. Peitai e mafai ona faia faapea. O le loto e atamai ma faautauta, ua faaopoopo atu i ai ma se faanaunauga malosi ina ia faafiafia Ieova, o le ki lea i le filemu i totonu o se aiga ua toe suia paaga faaipoipo a mātua. (Faataoto 16:20) O na uiga e mafai foi ona fesoasoani ia te oe e faafetaiaia ai ma le manumalo isi tulaga.

PE O FEVAEVAEAI EA LOU AIGA ONA O LE SAILIA O MEAFAITINO?

26. I ā auala e mafai ai e faafitauli ma uiga faaalia i meafaitino ona fevaevaeai ai se aiga?

²⁶ O faafitauli ma uiga faaalia i meafaitino e mafai ona fevaevaeai ai aiga i le tele o vala. E faanoanoa, talu ai ua taapeape nisi aiga ona o fefinauaiga i tupe ma le faanaunauga o le fia mauoa​—po o le fia mauoa atili. E mafai ona tutupu aʻe fevaevaeaiga pe a taufai faigaluega uma paaga e toalua ma ua faatupuina ai se uiga “o tupe a aʻu ia, a o tupe a oe na.” E tusa lava pe leai ni fefinauaiga e faia, peitai afai e taufai faigaluega uma paaga e toalua, atonu la te iloa ai ua itiiti se taimi e maua i le la faasologa e faaaluina e le tasi mo le isi. O se tulaga masani ua faateleina i le lalolagi o le nonofo ese lea o tamā mai o latou aiga mo ni vaitaimi uumi​—e faitau masina pe faitau tausaga foi​—ina ia faateleina tupe e maua mai nai lo tupe sa latou mauaina a o nonofo i le aiga. E mafai ona taʻitaʻia atu lenei mea i ni faafitauli e sili ona matuia.

27. O ā nisi o mataupu silisili e mafai ona fesoasoani i se aiga o loo omia i tulaga tau tupe?

²⁷ E leai ni tulafono e mafai ona faavaeina mo le taulimaina o nei tulaga, talu ai o le eseese o aiga e tatau ai ona eseese omiga ma manaoga e tatau ona latou faatautaia. Ae o loo mafai lava ona fesoasoani atu fautuaga a le Tusi Paia. Mo se faaaoaoga, i le Faataoto 13:10 ua faaalia ai, o nisi taimi e mafai ona alofia ni popolega lē manaomia e ala i le ʻfilifili faatasi.’ E aofia i lenei mea e lē na o le taʻu atu e se tasi o ona lava manatu ae saili atu foi mo fautuaga ma saili po o faapeī le manatu o le isi tagata i le mataupu. E lē gata i lea, o le fuafuaina lelei o le tupe maua e mafai ona fesoasoani e autasia ai taumafaiga a le aiga. O nisi taimi e talafeagai​—atonu mo na o sina taimi​—mo paaga uma e toalua ona faigaluega mo le totogia o isi tupe faaalu, ae maise lava pe afai o iai se fanau po o isi tagata o loo faalagolago atu ia i laua le tausiga. Pe afai o le tulaga lenei, e mafai e le tane ona toe faamautinoa atu i lana avā le iai pea o sona taimi mo ia. E mafai e ia ma le fanau ona fesoasoani atu ma le alofa e faia nisi o galuega sa masani ona faia toatasi e le avā.​—Filipi 2:1-4.

28. O ā fautuaga faamanatu, pe afai e utagiaina, o le a fesoasoani lea i se aiga e saosaolaumea ai i le autasi?

²⁸ Ae peitai, ia manatua pea e ui o tupe o ni mea e manaomia i lenei faiga o mea, ae lē aumaia ai le fiafia. E mautinoa lava le lē aumaia ai o le ola. (Failauga 7:12) O le mea moni, o le soona faamamafa o meafaitino e mafai ona faapogaia ai le faaleagaina faaleagaga ma i amioga tatau. (1 Timoteo 6:9-12) Maeu le sili atu ona lelei pe a muai sailia le Malo o le Atua ma lana amiotonu, faatasi ai ma le mautinoa o le mauaina o lana faamanuiaga i a tatou taumafaiga ina ia maua mea e talafeagai i le olaga! (Mataio 6:25-33; Eperu 13:5) E ala i le faamuamuaina pea o manaoga faaleagaga ma e ala i le sailia muamua o le filemu ma le Atua, e mafai ai ona e iloaina, e ui lava atonu o loo fevaevaeai lou auaiga i nisi tulaga, ae o le a avea o se auaiga e tasi o loo autasi moni i vala e sili ona tāua.