Lesona 1

Le Auala E te Iloa ai le Mea e Manaomia e le Atua

O le ā le faamatalaga tāua o loo iai i le Tusi Paia? (1)

O ai le tusitala o le Tusi Paia? (2)

Aisea e tatau ai ona e suesueina le Tusi Paia? (3)

1. O le Tusi Paia o se meaalofa tautele lea mai le Atua. E tai pei o se tusi mai se tamā alofa i lana fanau. Ua ia taʻuina mai ia i tatou le upu moni e faatatau i le Atua—po o ai o ia, ma po o le ā lona tulaga. Ua ia faamatalaina mai foi pe faapefea ona faafetaiaia faafitauli ma pe faapefea foi ona mauaina le fiafiaga moni. Ua na o le Tusi Paia lava na te taʻuina mai ia i tatou le mea tatou te faia ina ia faafiafia ai le Atua.—Salamo 1:1-3; Isaia 48:17, 18.

2. Na tusia le Tusi Paia e ni tane eseese pe ā ma le toʻa 40 ma i se vaitaimi e silia i le 1,600 tausaga, e amata mai i le 1513 T.L.M. O loo faia aʻe le Tusi Paia i ni tusi laiti e 66. O i latou na tusiaina le Tusi Paia na faagaeeina e le Atua. Na latou tusia manatu o le Atua ae e lē o o latou lava manatu. O lea, o le Atua o i le lagi o ia lea o le Tusitala o le Tusi Paia, ae lē o se tagata i le lalolagi.—2 Timoteo 3:16, 17; 2 Peteru 1:20, 21.

3. Na faamautinoa lelei e le Atua ua saʻo le siiina o le Tusi Paia ma faasaoina. E tele atu Tusi Paia ua lolomiina nai lo so o se isi lava tusi. E lē o tagata uma o le a fiafia e vaai ua e suesueina le Tusi Paia ae aua e te faatagaina lena mea e taofia ai oe. E faalagolago lou lumanai e faavavau i lou iloa o le Atua ma le faia o lona finagalo e ui lava i teteega.—Mataio 5:10-12; Ioane 17:3.