Lesona 8

Le Olaga Faaleaiga e Fiafia i ai le Atua

O le ā le tulaga o le tane i le aiga? (1)

E ao faapefea e le tane ona feagai ai ma lana avā? (2)

O ā tiute tauave a se tamā? (3)

O le ā le vaega a le avā i le aiga? (4)

O le ā e manaomia e le Atua mai i mātua ma fanau? (5)

O le ā le vaaiga a le Tusi Paia i le teteʻa ma le tatalaina o faaipoipoga? (6, 7)

1. Ua faapea mai le Tusi Paia o le tane o le ulu ia o lona aiga. (1 Korinito 11:3) E tatau ona tasi le avā a le tane. E tatau ona faaipoipoina lelei i laua e tusa ai ma le tulafono.​—1 Timoteo 3:2; Tito 3:1.

2. E tatau i le tane ona alofa i lana avā e pei ona alofa ifo ia te ia lava. E tatau ona ia feagai ai ma lana avā e pei ona feagai ai Iesu ma ona soo. (Efeso 5:25, 28, 29) E lē tatau ona oo lona lima i lana avā po o le soona faia o ia i so o se auala. Nai lo le faia faapena, e tatau ona faaali atu ia te ia le āva ma le faaaloalo.​—Kolose 3:19; 1 Peteru 3:7.

3. E tatau i se tamā ona galue malosi auā le tausia o lona aiga. E ao ona ia saunia meaʻai, lavalava, ma le fale mo lana avā ma le fanau. E tatau foi i se tamā ona tausia manaoga faaleagaga o lona aiga. (1 Timoteo 5:8) E taʻimua o ia i lona aiga auā le aʻoaʻoina e uiga i le Atua ma Ana fuafuaga.​—Teuteronome 6:4-9; Efeso 6:4.

4. E tatau ona avea le avā o se fesoasoani lelei mo lana tane. (Kenese 2:18) E tatau ona saosaolaumea atu o ia i lana tane i le aʻoaʻoina ma le toleniina o le la fanau. (Faataoto 1:8) E manaomia e Ieova le avā ina ia tausi atu i lona aiga ma le alofa. (Faataoto 31:10, 15, 26, 27; Tito 2:4, 5) E tatau ona faaaloalo loloto atu o ia i lana tane.​—Efeso 5:22, 23, 33.

5. E manaomia e le Atua ia fanau ina ia usiusitai atu i o latou mātua. (Efeso 6:1-3) Ua ia faatalitalia mātua ina ia latou faatonu ma faasaʻo a latou fanau. E manaomia e mātua ona faaalu le taimi ma a latou fanau ma suesue le Tusi Paia ma i latou, ia tausi atu i o latou manaoga faaleagaga ma faalogona ootia. (Teuteronome 11:18, 19; Faataoto 22:6, 15) E lē tatau lava i mātua ona aoaia a latou fanau i se auala soonafai ma le sauā.​—Kolose 3:21.

6. Pe a faafaigata i paaga faaipoipo ona iai se la faiā lelei, e tatau ia i laua ona taumafai e faatatauina fautuaga a le Tusi Paia. Ua uunaia i tatou e le Tusi Paia ina ia faaali atu le alofa ma ia faamagalo atu. (Kolose 3:12-14) E lē o fautuaina maia e le Afioga a le Atua le teteʻa o se auala e foia ai ni faafitauli laiti. Ae atonu e filifili se avā e tuua lana tane pe afai (1) e teena ma le maumauai e le tane le tausia o lona aiga, (2) ua matuā sauā tele o ia ua faapea ona faamataʻuina ai le soifua lelei ma le ola o le avā, (3) ua matuā tetee tele le tane ua lē mafai ai e le avā ona tapuai atu ia Ieova.​—1 Korinito 7:12, 13.

7. E tatau i paaga faaipoipo ona faamaoni atu le tasi i le isi. O le mulilua o le agasala lea faasaga i le Atua ma faapena foi i le paaga a se tasi. (Eperu 13:4) O feusuaiga faaleituaiga i fafo atu e ese mai i lē ua faaipoipo i ai, ua na o le pau lena o le faavae faale-Tusi Paia e tatala ai le faaipoipoga ma mafai ai ona toe faaipoipo atu. (Mataio 19:6-9; Roma 7:2, 3) E inosia e Ieova pe a tatala faaipoipoga a tagata e aunoa ma faavae faale-Tusi Paia ma toe faaipoipo atu i se isi tagata.​—Malaki 2:14-16.

[Ata i le itulau 16, 17]

Ua faatalitalia e le Atua ia mātua ina ia aʻoaʻo a latou fanau ma ia faasaʻo i latou

[Ata i le itulau 17]

O se tamā alofa e tausi atu faaletino ma le faaleagaga i lona aiga