Ua Valaaulia Oe e le Atua ia Avea ma Ana Uō

E finagalo le Atua e avea oe ma ana uō. Pe sa iai ea se taimi na e mafaufau ai e mafai ona avea oe o se uō a le Peresona silisili ese i le vateatea aoao? O Aperaamo, o lē sa ola anamua, sa ta‘ua o ia o le uō a le Atua. (Iakopo 2:23) Sa olioli fo‘i isi o loo ta‘ua i le Tusi Paia i se faigāuō ma le Atua ma sa matuā faamanuiaina ai. I aso nei, ua avea ai tagata mai vaega eseese uma o le lalolagi ma uō a le Atua. E mafai fo‘i ona avea oe ma uō a le Atua.

O le avea o se uō a le Atua e sili atu na i lo le avea o se uō a so o se tagata. E lē taitai faatigā le Atua i ana uō faamaoni. (Salamo 18:25) O le avea ma se uō a le Atua e sili atu ona lelei na i lo le mauaina o ʻoa. Pe a oti se tagata mauʻoa, e avatu ana tupe i isi. Peitaʻi, o i latou e olioli i se faigāuō ma le Atua ua iai se oloa e leai se tasi e mafai ona ia aveesea.​—Mataio 6:19.

Atonu e taumafai nisi tagata e taofia oe mai le aʻoaʻoina e uiga i le Atua. E oo lava i nisi o au uō ma aiga atonu latou te faia lenei mea. (Mataio 10:36, 37) Pe afai e taliē ane isi ia te oe po o le faamata‘uina foʻi o oe, fesili ifo ia te oe lava, ‘O ai ou te manaʻo e faafiafia—o tagata po o le Atua?’ Mafaufau i le mea lenei: Pe afai e fai atu se tasi ia te oe e aua e te toe taumafa, pe o le a e usitaʻi atu ea ia te ia? E mautinoa lava e leai! E te manaʻomia meaʻai ina ia e soifua ai pea. Ae e mafaia e le Atua ona faaolaina oe e faavavau! O lea, ia aua lava neʻi faatagaina se tasi e taofia oe mai lou aʻoaʻoina o le auala e mafai ai ona avea oe ma uō a le Atua.​—Ioane 17:3.