O Ai Fili o le Atua?

O le fili sili o le Atua o Satani le Tiapolo. O ia o se peresona agaga o lē na fouvale faasaga ia Ieova. O loo faaauau ona tau Satani faasaga i le Atua ma faapogaia le tele o faafitauli i tagata. E matuā leaga Satani. O le pepelo lava ia ma le fasioti tagata.​—Ioane 8:44.

Na faatasi atu isi peresona agaga ia Satani i lana fouvale faasaga i le Atua. Ua taʻua e le Tusi Paia i latou o temoni. I le pei o Satani, e avea temoni ma fili o tagata. E fiafia i latou e faatigā i tagata. (Mataio 9:32, 33; 12:22) O le a faaumatia e Ieova ia Satani ma ana temoni e faavavau. Ua puupuu lo latou taimi o totoe latou te faapogaia ai faafitauli i tagata.​—Faaaliga 12:12.

Afai e te manaʻo e avea ma uō a le Atua, e lē ao la ona e faia mea e manaʻo Satani e te faia. E ʻinoʻino Satani ma ana temoni ia Ieova. O i latou o fili o le Atua, ma latou te mananaʻo e fai oe ma fili o le Atua. E ao ona e filifili po o ai e te manaʻo e faafiafia​—o Satani po o Ieova. Pe afai e te manaʻo i le ola e faavavau, e ao la ona e filifilia le faia o le finagalo o le Atua. E tele togafiti ma auala a Satani e faasesēina ai tagata. E toʻatele tagata ua ia olegiaina.​—Faaaliga 12:9.