Le Auala e Maua ai le Lotu Moni

Pe afai e te manaʻo e avea o se uō a le Atua, e ao ona e faatinoina le lotu e faamaonia e le Atua. Na fetalai Iesu e faapea, “o ē tapuaʻi moni,” o le a tapuaʻi atu i le Atua e ōgatusa ma le “upu moni.” (Ioane 4:23, 24, NW) E na o le tasi lava le auala saʻo e tapuaʻi atu ai i le Atua. (Efeso 4:4-6) O le lotu moni e taʻitaʻiina atu ai i le ola e faavavau, ma o le lotu sesē e taʻitaʻiina atu i le faaumatiaga.​—Mataio 7:13, 14.

E mafai ona e iloaina le lotu moni e ala i lou mataʻitūina o tagata o latou faatinoina le lotu moni. Talu ai e lelei Ieova, o i latou o ona tagata tapuaʻi moni ia te ia e ao ona avea o ni tagata lelei. E pei lava ona fuaina mai e se laau o le moli o loo lelei ni moli lelei, e fuaina mai foʻi e le lotu moni tagata lelei.—Mataio 7:15-20.

O uō a Ieova e faaaloalo loloto i le Tusi Paia. Ua latou iloa o le Tusi Paia e mai le Atua. Latou te faatagaina le mea o fai mai ai e taʻitaʻia o latou olaga, e foʻia o latou faafitauli, ma fesoasoani ia i latou ina ia aʻoaʻoina e uiga i le Atua. (2 Timoteo 3:16) Latou te taumafai e faatinoina mea o latou talaʻia.

E faaalia e uō a Ieova le alofa o le tasi i le isi. Na faaalia e Iesu le alofa i tagata e ala i le aʻoaʻoina o i latou e uiga i le Atua, e ala foʻi i le faamālōlōina o i latou na mamaʻi. O i latou e faatinoina le lotu moni latou te faaalia foʻi le alofa i isi. I le pei o Iesu, latou te lē vaai maulalo ia i latou o ē matitiva po o ni tagata e ese se ituaiga e tupuga mai ai. Na fetalai Iesu e faapea o le a iloa e tagata ona soo e ala i lo latou faaalia o le fealofani.​—Ioane 13:35.

O uō a le Atua e latou te faamamaluina le suafa o le Atua, o Ieova. Pe afai e musu se tasi e faaaogā lou igoa, pe o le a avea ea lena tagata ma au uō vāvālalata? E leai! Pe a iai sa tatou uō, tatou te faaaogāina lona igoa ma tatou te faamatala atu i isi mea lelei e faatatau i lena uō. O lea o i latou e mananaʻo e avea ma uō a le Atua e ao ona latou faaaogāina lona suafa ma talanoa atu i isi e faatatau ia te ia. E finagalo Ieova ia i tatou ia tatou faia lena mea.​—Mataio 6:9; Roma 10:13, 14.

I le pei o Iesu, o uō a le Atua latou te aʻoaʻoina tagata e faatatau i le Malo o le Atua. O le Malo o le Atua o le pulega faalelagi o le a faapea ona faia le lalolagi ia avea ma parataiso. O uō a le Atua latou te tufaina atu lenei tala lelei e faatatau i le Malo o le Atua i isi.​—Mataio 24:14.

E taumafai Molimau a Ieova e avea ma uō a le Atua. Latou te faaaloalo i le Tusi Paia ma latou te fealofani. Latou te faaaogāina ma faamamaluina foʻi le suafa o le Atua ma aʻoaʻo isi e faatatau i le Malo o le Atua. E faatino e Molimau a Ieova le lotu moni i le lalolagi i aso nei.