Le Auala e Fai ai Saʻiliʻiliga Loloto

O LE tupu o Solomona sa ia “mafaufau foi, ma suesue, ma saunia faataoto e tele.” Aiseā? Auā sa ia fiafia i le tusia o “upu moni lava.” (Fai. 12:9, 10) Sa “matuā sue [Luka] i mea uma lava talu le amataga” ina ia faasolosolo lelei le faamatalaina o mea sa tutupu i le soifuaga o Keriso. (Luka 1:3) Sa faia uma e nei auauna e toʻalua a le Atua ni saʻiliʻiliga loloto.

O le ā lenei mea o le saʻiliʻiliga loloto? O se saʻiliʻiliga ma le faaeteete mo ni faamatalaga e faatatau i se mataupu faapitoa. E aofia ai le faitau, ma e aofia ai le faatatauina o mataupu silisili o le suʻesuʻega. E ono aafia ai foʻi le faatalanoaina o tagata.

O ā mea tutupu e manaʻomia ai saʻiliʻiliga loloto? O nisi nei o ni nai faaaʻoaʻoga. A o faia lau suʻesuʻega totino po o le faitauga Tusi Paia, e ono lāgā ai ni fesili e tāua iā te oe. E ono lāgā mai e se tasi o e molimau atu i ai se fesili o le a e manaʻo ia maua ni faamatalaga patino mo se tali. Atonu pe ua tofia oe e fai se lauga.

Manatunatu i le tofiga e fai se lauga. O le mataupu lea ua tofia mai e fai ai lau lauga e ono foliga faigofie. E mafai faapefea ona e faatatauina i lau aofia? Faaloloto atili manatu e ala i le faia o se saʻiliʻiliga loloto. Pe afai e lagolagoina manatu e ni fuainumera faamaumauina po o se faaaʻoaʻoga foʻi e fetaui lelei i lau mataupu, ma e naunau i ai i latou o i lau aofia, o le a avea le manino o manatu ma auala e mafai ona aʻoaʻoina mai ai ni mea, pe e uunaʻia ai foʻi. O mataupu ia ua lomia, lea e fai ai lau lauga atonu ua sauniunia mo tagata faitau i le lalolagi atoa, ae e manaʻomia ona e faamatala, faataʻitaʻi, ma faatatau manatu i se faapotopotoga e tasi po o se tagata e toʻatasi. E faapefea ona faasolosolo le faiga o lenei mea?

A o leʻi faia lau saʻiliʻiliga loloto, manatunatu i lau aofia. O ā mea ua uma ona latou silafia? O ā mea e manaʻomia ona latou iloa? Ia ona faatulaga lea o lau fuafuaga. Pe ina ia faamatala? ia faatalitonu? ia faamaonia le sesē? pe ia faagaee ai? O le faamatala, e manaʻomia ai le saunia o nisi faamatalaga e faamanino ai le mataupu. E ui lava atonu ua malamalama i mea moni faavae, ae ono manaʻomia lava ona e faalautele atili po o anafea ae po o le a faapefea ona fai mea e pei ona taʻua. O le faatalitonu e manaʻomia ai le iai o māfuaaga e taʻu mai ai pe aiseā ua faapea ai ona fai, e aofia ai le taʻua o ni faamaoniga. O le faamaonia le sesē e manaʻomia ai se malamalamaga lelei o itu uma e lua o se mataupu faatasi ai ma le iloiloina ma le faaeteete o faamaoniga ua faaaogā. O le mea moni lava ia, tatou te lē saʻilia e tau ina iai ni finauga malolosi ae o ni faiga e faamatala ai mea moni i se auala agalelei. O le faagaee e aofia ai le pāʻia o le loto. O lona uiga o le faagaee o lau aofia ma ati aʻe lo latou faanaunauga e gaoioi i mea ua talanoaina. O faaaʻoaʻoga i mea moni lava na tutupu i olaga o i latou na uia ia gaoioiga, e ui lava i faigatā, e mafai ona fesoasoani ina ia pāʻia ai le loto.

Pe ua e sauni nei loa e amata? Toeitiiti lava. Fuafua po o le ā le tele o faamatalaga e te manaʻomia. Atonu e tāua le silafia po o le ā le umi o le taimi e alu ai. Afai o lea o le a e faamatalaina atu le mataupu i isi, o le ā le tele o le taimi o le a avanoa mo oe e faia ai? Lima minute? Fāsefulu lima minute? Pe ua faatulaga le taimi, e pei o se sauniga a le faapotopotoga, pe e mafai ona fetuunaʻi, e pei o se suʻesuʻega faale-Tusi Paia pe o se asiasiga faaleoleo mamoe?

O le mea mulimuli lava, o ā meafaigaluega mo le faia o saʻiliʻiliga loloto o iā te oe? E faaopoopo atu i mea o loo iā te oe i le aiga, pe e iai nisi meafaigaluega i le potutusi i le tou Maota o le Malo? Pe o le a lotomalilie uso ua leva tausaga o auauna iā Ieova e te faaaogāina a latou meafaigaluega mo saʻiliʻiliga loloto? Pe e iai se faletusi mo tagata lautele i lou vaipanoa lea e iai tusi e mafai ona faaaogā pe a manaʻomia?

Le Faaaogāina o la Tatou Meafaigaluega Sili mo Saʻiliʻiliga Loloto—Le Tusi Paia

Afai o lau saʻiliʻiliga loloto lea o le a fai e aofia ai le uiga o se mau, amata lava la i le Tusi Paia.

Iloilo Manatu o Loo Siʻomia Ai. Fesili ifo iā te oe lava: ‘O ai sa taulaʻi atu i ai lenei mau? O le ā o faaalia mai e fuaiupu o loo siʻomia ai e uiga i mea tutupu na taʻitaʻia atu ai i faamatalaga po o uiga faaalia o tagata o loo aafia ai?’ O faamatalaga auʻiliʻili faapena e masani lava ona fesoasoani iā i tatou ina ia malamalama ai i se mau, ma e avatu ai foʻi se tulaga ola i le lauga lea e te ono faaaogāina ai nei faamatalaga.

Mo se faaaʻoaʻoga, e masani lava ona sii mai le Eperu 4:12 e faaalia ai le mana o le Afioga a le Atua e pāʻia ai loto ma aafia ai olaga. O manatu o loo siʻomia ai ua faalolotoina atili lo tatou talisapaia moni o lenā mea. O loo talanoaina ai mea na tutupu iā Isaraelu i le 40 tausaga i le vao a o leʻi ulu atu i le nuu lea na folafola e Ieova iā Aperaamo. (Epe. 3:7–4:13) O “le afioga a le Atua,” o lana folafolaga e faaoo i latou i le nofoaga o le filemu e ōgatasi ma lana feagaiga ma Aperaamo, sa leʻi mate; sa ola ma oo atu ina faataunuuina. Sa iā Isaraelu māfuaaga uma e faaalia ai le faatuatua i ai. Peitaʻi ane, a o taʻitaʻia ese i latou e Ieova mai i Aikupito ma taʻitaʻia atu i le Mauga o Sinai ma agaʻi atu ai i le Nuu o le Folafolaga, sa faaauau pea ona latou faaalia le leai o se faatuatua. O lea la, e ala i a latou gaoioiga e faatatau i le auala na faagaoioia ai e le Atua lana afioga, na faaalia ai mea sa i o latou loto. E faapena foʻi o tatou aso, o folafolaga mai le Atua ua faaalia ai mea o i loto o tagata.

Siaki le Faasino Mau. O nisi Tusi Paia e iai o latou faasino mau. Ae ā lau Tusi Paia? Afai o iai, e ono fesoasoani mai. Mātau se faataʻitaʻiga mai i le New World Translation of the Holy Scriptures. O loo faasino atu le 1 Peteru 3:6 iā Sara o se faataʻitaʻiga e lelei ona faaaʻoaʻo i ai avā Kerisiano. O se faasinomau i le Kenese 18:12 ua lagolagoina ai lenā manatu e ala i le taʻu mai, sa faapea “lemu” ifo Sara iā te ia lava e faatatau iā Aperaamo o lona alii. O lona gauaʻi atu la, sa sau mai i le loto. E faaopoopo atu i lenā malamalamaga, e ono faasino oe e faasinomau i ni mau e faaalia ai le faataunuuga o se valoaga faale-Tusi Paia pe o se ata o le feagaiga o le Tulafono. Peitaʻi, e ao foʻi ona manatua, o nisi faasinomau e lē o maua mai ai ituaiga faamatalaga faapena. Atonu pe na o manatu e talitutusa pe i faamatalaga i soifuaga o tagata po o tulaga o laufanua o loo faasino atu i ai.

Faaaogā le Faasinoupu o le Tusi Paia. O le mea e taʻu o le faasinoupu o le Tusi Paia o se lisi e faasolosolo i le alafapeta o upu o loo faaaogā i le Tusi Paia. E mafai ona fesoasoani iā te oe ia maua mau e fesootaʻi i le mataupu o loo e saʻiliʻili loloto i ai. A o e suʻeina nei mau, o le a e aʻoaʻoina ai isi faamatalaga auʻiliʻili e fesoasoani iā te oe. O le a e mātauina ai faamaoniga o “matua o upu” o le upu moni o loo faatulaga mai i le Afioga a le Atua. (2 Timo. 1:13) O loo aofia ai i le New World Translation se lisi autū o le “Faasologa o Upu o le Tusi Paia” (Bible Words Indexed). E sili atu ona tele mea o loo aofia i le Comprehensive Concordance. Afai e maua i lau gagana, o le a mafai ona faasinoina atu ai iā te oe mau uma o loo iai upu autū i le Tusi Paia.

Faamasani e Faaaogā Isi Meafaigaluega mo le Faia o Saʻiliʻiliga Loloto

O loo lisi mai i le pusa i le itulau e 33 isi meafaigaluega mo saʻiliʻiliga loloto ua saunia mai e “le auauna faamaoni ma le mafaufau.” (Mata. 24:45-47) O le tele lava o nei meafaigaluega e iai se lisi o mataupu o loo iai i totonu, ma o le tele o loo iai faasinoupu i le pito i tua, lea ua faatulaga ina ia fesoasoani iā te oe e maua saʻo ai lava faamatalaga patino e te manaʻomia. I faaiʻuga o tausaga taʻitasi, e lomia ai faasinoupu i Le Olomatamata ma le Ala Mai! faa-Peretania mo mataupu o lenā tausaga.

O le masani i ituaiga faamatalaga o loo maua i nei lomiga mo le suʻesuʻeina o le Tusi Paia, e mafai ona faatelevave ai le faagasologa o le saʻiliʻiliga loloto. Seʻi fai ma faataʻitaʻiga, faapea e te manaʻo e fia iloa e faatatau i se valoaga, se aʻoaʻoga, se amioga faa-Kerisiano, po o le faatatauina o mataupu silisili o le Tusi Paia. E ono maua i Le Olomatamata mea o loo e saʻilia. O le Ala Mai! e talanoaina ai mea o loo tutupu i le taimi nei, o faafitauli o loo aafia uma ai, o tapuaʻiga, o le faasaienisi, ma faafitauli o atunuu eseese. O faamatalaga i tala taʻitasi i tusi a Evagelia lea e faatulaga mai i le faasologa na tutupu ai, o loo maua i Le Tagata Silisili o Ē Uma na Soifua Mai. O le talanoaina auauaʻi o fuaiupu taʻitasi o tusi atoa o le Tusi Paia e maua i lomiga e pei o le Faaaliga—Ua Latalata Lona Tumutumuga Matagofie!, Pay Attention to Daniel’s Prophecy!, ma tusi e lua o le Isaiah’s Prophecy—Light for All Mankind. E te maua i le Reasoning From the Scriptures, tali faamalieloto i le faitau selau o fesili faale-Tusi Paia lea e masani lava ona lāgā mai i le auaunaga i le fanua. Mo se malamalamaga manino e uiga i isi tapuaʻiga, o a latou aʻoaʻoga, atoa ma o latou talaaga faasolopito, tagaʻi i le Mankind’s Search for God. O nisi auʻiliʻiliga o le talafaasolopito faaonapōnei o Molimau a Ieova o loo aofia ai i le polosiua Molimau a Ieova—Autasi i le Faia o le Finagalo o le Atua i le Lalolagi Aoao. Mo se lipoti i le agaʻigaʻi i luma o loo iai le talaʻiga o le tala lelei i le lalolagi atoa, siaki Le Olomatamata o Ianuari 1 lata mai nei. Ua avea le Insight on the Scriptures ma tusi autū e faaaogā e pei o se lomifefiloi ma se faafanua mo le Tusi Paia. Afai e te manaʻomia ni auʻiliʻiliga e faatatau i tagata, o nofoaga, o gagana, po o mea tutupu i le talafaasolopito e fesootaʻi i le Tusi Paia, e aogā tele le tusi lenei.

“Watch Tower Publication Index.” O le Index (Faasinoupu) lenei, ua lomia i le sili atu i le 20 gagana, o le a faasinoina oe i faamatalaga o loo i le tele o a tatou lomiga. Ua vaevaeina i le faasino mataupu ma le faasino mau. Ina ia faaaogā le faasino mataupu, suʻe se upu o loo iai i le mataupu lea e te manaʻo e iloiloina. Ina ia faaaogā le faasino mau, suʻe i le lisi o mau, ona fili lea o le mau o loo e manaʻo e malamalama atili i ai. Afai sa lomia ni manatu i lau gagana e faatatau i lenā mataupu po lenā mau i tausaga o loo aofia i le Index, o le a e mauaina se lisi o lomiga e te suʻe atu i ai. Tagaʻi i le pito i luma o le Index e te iloa ai faapuupuuga o igoa o lomiga o loo sii mai. (Mo se faaaʻoaʻoga, o le a e iloaina ai o le w99-SM 3/1 15 e faatatau atu i Le Olomatamata o le 1999, lomiga o Mati 1, itulau 15.) O ulutala autū e pei o le “Mea na Tutupu i le Faiva i le Fanua” (Field Ministry Experiences) ma le “Talaaga o Soifuaga a Molimau a Ieova” (Life Stories of Jehovah’s Witnesses) e fesoasoani tele i le sauniaina o ni taulimaga e faagaee ai le naunau mo le faapotopotoga.

Ona o le faia o saʻiliʻiliga loloto e mafai ona e matuā uaʻi atoatoa atu i ai, ia faaeteete ina neʻi e misia le fuafuaga na fai ai. Tausisi i lou sini o le saʻilia o faamatalaga manaʻomia mo le mataupu o loo taulimaina. Afai e faasino oe e le Index i se lomiga patino, suʻe i itulau o faasino mai, ona faaaogā lea o tamaʻi ulutala ma fuaiupu amata o palakalafa e taʻitaʻia ai oe i faamatalaga e talafeagai ma ou manaʻoga. Afai o loo e saʻilia le uiga o se fuaiupu patino mai se mau o le Tusi Paia, ia muamua ona suʻe le fuaiupu lenā i le itulau o loo faasino atu i ai oe. Ona iloilo loa lea o manatu o loo siʻomia ai.

“Watchtower Library” i le CD-ROM. Afai e mafai ona e faaaogāina se komepiuta, atonu e aogā la iā te oe le faaaogā o le Watchtower Library i le CD-ROM, lea o loo lisi mai ai se aofaʻiga tele o a tatou lomiga. O le polokalame e faigofie ona faaaogā, lea e mafai ai ona e saʻilia se upu, se tuufaatasiga o ni upu, po o se mau sii mai so o se lomiga i le Watchtower Library. E tusa lava pe lē maua lenei meafaigaluega mo saʻiliʻiliga loloto i lau gagana, ae atonu e mafai ona aogā iā te oe i se gagana o loo faaaogāina tele i le tulaga faavaomalo ae mafai ona e malamalama ai.

O Isi Potutusi Faatiokarate

I lana tusi faagaeeina lona lua iā Timoteo, na fai atu ai Paulo i le talavou e aumai iā te ia i Roma “tusi taai, aemaise paʻu e tusi ai.” (2 Timo. 4:13, NW) Sa faatāuaina ma teu e Paulo nisi tusitusiga. E mafai foʻi ona e faia le mea lava lenā e tasi. Pe e te teuina au lava kopi o Le Olomatamata, Ala Mai!, ma La Tatou Faiva o le Malo e tusa lava po ua uma ona talanoaina nei lomiga i sauniga a le faapotopotoga? Afai e te teuina, o le a mafai la ona e faaaogā o ni meafaigaluega mo saʻiliʻiliga loloto, faatasi ai ma isi lomiga faa-Kerisiano o loo iā te oe. O le tele o faapotopotoga latou te aoaoina mai lomiga eseese faatiokarate ma teuina i se potutusi i le Maota o le Malo. E mafai ona faaaogā e le faapotopotoga atoa nei lomiga, a o latou iai i le Maota o le Malo.

Ia Tausia ni Au Lava Faila

Ia mātaʻitū i mataupu e ono faaosofia ai le naunau, lea e mafai ona e faaaogāina pe a e tautala pe aʻoaʻo atu. Pe a e tau ane i se nusipepa po o se mekasini i se faamatalaga, ni fuainumera faamaumauina, po o se faaaʻoaʻoga e ono mafai ona e faaaogāina i lau faiva, ʻoti ese mai pe sii mai le faamatalaga. Ia aofia ai ma le aso, le ulutala o le mataupu, ia atonu ma le suafa o le tusitala po o le nusipepa. A o auai i sauniga a le faapotopotoga, faamau i lalo manatu e fetufaaʻi ai po o faataʻitaʻiga e ono fesoasoani iā te oe e faamatala ai le upu moni i isi. Pe na tau ea lou manatu i se faataʻitaʻiga lelei ae sa leʻi maua se avanoa e faaaogā ai i le taimi lava lenā? Ia tusi i lalo, ma teu i se faila. O le umi lava ona e auai i le Aʻoga o le Faiva Faatiokarate, o le tele foʻi lenā o taulimaga ua e saunia. Na i lo le tiaʻi o au faamaumauga mai i na lauga, ia teu faalelei. E ono aogā i se taimi mulimuli ane au saʻiliʻiliga loloto na sa fai.

Talanoa i Tagata

E anoanoaʻi faamatalaga e mafai ona maua mai i isi tagata. A o sauniunia e Luka faamatalaga mo lana Evagelia, e aliali mai e tele faamatalaga sa ia maua mai i le faatalanoaina o molimau na vaai tino i mea na tutupu. (Luka 1:1-4) Atonu e mafai e se aumea Kerisiano ona aumai se faamalamalamaga i se mataupu o loo e tauivi e saʻiliʻili loloto i ai. E tusa ai o le Efeso 4:8, 11-16, o loo faaaogā e Keriso “mea alofa i tagata” e fesoasoani iā i tatou ina ia tutupu aʻe i le “iloa lelei o le Alo o le Atua.” O le faatalanoaina o i latou ua iai le poto masani i le auaunaga i le Atua e ono maua mai ai manatu aogā. O le fetalanoaaʻi ma tagata e ono faaalia mai ai foʻi mea o latou manatunatu i ai, ma e fesoasoani lenei iā te oe i le sauniunia o ni mataupu e sili ona aogā.

Fuafua Iʻuga o Au Saʻiliʻiliga

Pe a uma ona seleseleina le saito, e ao ona aveese le fatu mai le aputi. O le mea foʻi lenā e fai i mea e maua mai i au saʻiliʻiliga loloto. A o leʻi saunia mo le faaaogāina, e manaʻomia ona e tuueseina mea e aogā mai i mea e lē aogā.

Afai o le a e faaaogāina le faamatalaga i se lauga, fesili ifo iā te oe: ‘Pe o le manatu lea ua ou fuafua e faaaogā e maua moni mai ai se mea aogā i laʻu taulimaga o le mataupu? Po o le mea ea, e ui lava o se manatu lelei, ae pe e foliga mai ea o le a taʻitaʻieseina ai manatu mai le mataupu lea e tatau ona ou talanoa e faatatau i ai?’ Afai o loo e fuafua e faaaogā ni mea na tutupu talu ai nei po o se manatu mai i le tāfa fesuisuiaʻi o faiga faasaienisi po o vailaau mo togafitiga faafomaʻi, ia faamautinoa ua e faaaogā faamatalaga aupito i lata mai. Aua foʻi neʻi galo, o nisi faamatalaga i a tatou lomiga tuai atonu ua uma ona toe faafou i ni faamatalaga lata mai, o lea la ia iloilo faamatalaga aupito i lata mai lona lomiaina e faatatau i le mataupu.

E faapitoa lava ona manaʻomia le faaeteete pe afai o le a e filifili e faaaogā ni faamatalaga mai i le lalolagi. Aua neʻi galo o le Afioga a le Atua o le upu moni lea. (Ioa. 17:17) Sa faatinoina e Iesu le vaega autū i le faataunuuina o fuafuaga a le Atua. O le pogai lea o le faapea mai o le Kolose 2:3: “Ua ia te ia le oloa uma o le poto atoa ma le malamalama, ua lilo ai.” Ia fuafua la iʻuga o au saʻiliʻiliga loloto i le manatu lenā. E tusa ai o saʻiliʻiliga loloto i ni faamatalaga mai i le lalolagi, fesili ifo iā te oe lava: ‘Pe o le mataupu ea lenei ua soona faamamafaina naʻuā manatu, pe e lē o mautinoa, pe lē o lava le faamaninoga? Pe sa tusia ea ma se manatu faapito po o se faanaunauga i faiga faapisinisi? Pe e ioeina e isi faamaumauga taualoa lenā faamatalaga? Ae o le mea sili lava, pe e talafeagai ma upu moni o le Tusi Paia?’

Ua faalaeiauina i tatou e le Faataoto 2:1-5 ina ia faaauau ona saʻili atu i le atamai, le malamalama ma le faautauta, ‘e pei ona sailiili i le ario; ma e pei ona suesue i le oloa lilo.’ E aofia ai e lē gata i taumafaiga mamafa ae o taui faaʻoaina. E manaʻomia taumafaiga i le saʻiliʻili loloto, ae o le faia faapea o le a fesoasoani iā te oe ina ia maua manatu o le Atua i mataupu, e faasaʻo ai manatu sesē, ma faamautūina ai lou malamalama i le upu moni. O le a fesoasoani foʻi ina ia ʻānoa ma ola lau taulimaga, ia saunia e le gata e te fiafia i le taulimaina ae logo lelei foʻi i le faalogo.