Faalaeiau le Faaaogāina o le Tusi Paia

O LO tatou faanaunauga o le tataʻi atu lea o manatu o tagata uma i le Afioga a le Atua, le Tusi Paia. O lenā tusi e paia o loo avea ma faavae o le feʻau o loo tatou talaʻia, ma tatou te mananaʻo i tagata ina ia latou mātauina o mea o loo tatou fai atu ai, e lē o ni o tatou lava manatu, ae o manatu e mai le Atua. E manaʻomia ona ati aʻe le maufaatuatuaina e tagata o le Tusi Paia.

I le Faiva i le Fanua. Pe a sauniuni mo le faiva i le fanua, ia filifili e lē aunoa ni mau se tasi pe lua e fetufaaʻi ai ma tagata o ē naunau e fia faalogo mai. E tusa lava po o e fuafua e fai se taulimaga puupuu o se lomiga faale-Tusi Paia, e masani ona aogā pe a faitau se mau talafeagai mai i le Tusi Paia. O loo i le Tusi Paia le mana e sili atu ona malosi e tataʻi ai mafaufau o tagata e pei ni mamoe, na i lo so o se mea lava tatou te ono fai atu ai i tatou lava. I tulaga e lē mafai ona e faitau atu mai i le Tusi Paia, e te ono filifili e sii atu se manatu o loo iai. I le uluaʻi senituri, sa lē taatele le mauaina o kopi o tusi tāʻai o le Tusi Paia. Peitaʻi, sa lē aunoa ona sii mai le Tusi Paia e Iesu ma ona aposetolo. E ao foʻi ona tatou faia se taumafaiga ina ia tauloto mau ma faaaogā tatau i la tatou faiva, i nisi taimi e tau lava o le sii atu o mau.

Pe afai e mafai ona e faitau atu mai i le Tusi Paia, ia uu lelei ina ia mafai ai e le tagata e ona le fale ona mulimuli mai a o e faitauina. Afai o mulimuli mai le tagata e ona le fale i lana lava Tusi Paia, e ono sili atu foʻi ona lelei lana tali mai i mea o loo ia faitauina.

Peitaʻi e ao ona e manatua, o nisi tagata faaliliu o le Tusi Paia ua pule lava latou i le auala latou te faaliliuina ai le Afioga a le Atua. E ono lē tutusa a latou faaliliuga i manatu uma ma le tulaga sa iai i uluaʻi gagana o le Tusi Paia. O nisi o faaliliuga faaonapōnei ua aveese ai le suafa moni o le Atua, ua lē manino le mea o fai mai ai mau i le uluaʻi gagana e faatatau i le tulaga o ē ua oti, ma ua natia le mea o fai mai ai le Tusi Paia e faatatau i le fuafuaga a le Atua mo le lalolagi. Ina ia mafai ona faaali i le tagata le mea ua tupu, e ono manaʻomia ona e faatusatusa mau autū mai i nisi o Tusi Paia, po o uluaʻi faaliliuga o le gagana lava lenā. O le tele lava o mataupu, o loo saunia mai e le Reasoning From the Scriptures se faatusatusaga o auala o loo faaliliuina ai e faaliliuga eseese manatu autū o fuaiupu e masani ona faaaogāina. So o se tasi lava e naunau i le upu moni o le a matuā fiafia i le poto e uiga i mea moni.

I Sauniga a le Faapotopotoga. E ao ona faalaeiauina tagata uma ina ia faaaogā a latou Tusi Paia i sauniga a le faapotopotoga. E tele auala e mafai ona lelei ai lenei faiga. E fesoasoani e faatumauina ai le uaʻi mai o le aofia i mea o talanoaina. E faaopoopo ai le taulaʻi mai o le vaai i faatonuga o loo taʻu atu e le failauga. Ma e matuā faamautūina ai i mafaufau o tagata lotofiafia e fou mai e faapea, o le Tusi Paia o le puna lava lea o o tatou talitonuga.

E matuā faalagolago tele le mulimuli mai o lau aofia i a latou lava Tusi Paia a o e faitauina mau, i le faalaeiauga e te avatu. O se tasi o auala e sili ona lelei o le valaaulia saʻo lava lea o i latou.

E faalagolago lava iā te oe, le failauga, po o fea mau e te manaʻo e faamamafa e ala i le fai i le aofia e suʻe i ai. E sili ona lelei le faitauina o mau na o le a fesoasoani iā te oe e ati aʻe ai au manatu autū. Afai la ae lava le taimi, ona faaopoopo atu lea o nisi mau e lagolagoina ai ou manatu.

O le mea lava ia ua mautinoa, e lē lava i taimi uma le tau ina taʻu atu o le tusi, le mataupu, po o le fuaiupu e maua i ai le mau, pe valaaulia le aofia e suʻe i ai. Afai e te faitauina se mau ona e toe see lea i se isi mau a o leʻi maua e lau aofia le mau muamua, e lē umi lava ae fiu ma lē toe taumafai ai loa e suʻe a latou Tusi Paia. Ia mātaʻitūina lau aofia. Faitau le mau pe afai ua maua mau a le toʻatele.

Ia muaʻi manatunatu. Ia lava le taimi e taʻu atu ai lau mau a o leʻi faitauina. O le faiga lea o le a faaitiitia ai le taimi e maʻimau e faatali ai a o suʻe mau a le aofia. E ui e faaitiitia ai le mataupu e talanoaina pe a e faataga le taimi e suʻe ai mau a le aofia, peitaʻi o aogā e maua mai ai e lē mafaatusaina.