Fafau aʻe se Matua

UA SILAFIA e failauga tomai le aogā o le iai o se matua. Pe a latou sauniunia se lauga, o le a fesoasoani le matua iā i latou ina ia uaʻi atu ai i se vala patino o faamatalaga ma ia mafaufau loloto atili i ai. O le iʻuga, na i lo o le tau i le talanoaina o ni manatu se tele, latou te fafau aʻe a latou mataupu i se auala o le a sili atu ona aogā i lo latou aofia. Pe a fesootaʻi tuusaʻo manatu tāua taʻitasi i le matua ma fesoasoani i lona fafauina aʻe, o le a fesoasoani foʻi lea i le aofia ina ia manatuaina ai na manatu ma talisapaia ai lo latou tāua.

E ui ina e mafai ona taʻua faapea o lau matua, o le mataupu lea o loo e talanoaina, ae o le a e iloa le faaleleia o le uigā o lau lauga pe afai e te manatu faapea o lau matua o se manatu patino lea o loo e fafau aʻe ai lau mataupu. O le Malo, le Tusi Paia, ma le toetū o ni mataupu taatele. E mafai ona fafau aʻe ai i na mataupu ni matua eseese. O nisi nei o faaaʻoaʻoga: “O le Malo, o se Pulega Moni,” “O le a Faia e le Malo o le Atua le Laueleele o se Parataiso,” “Na Faagaeeina le Tusi Paia e le Atua,” “O le Tusi Paia o se Taʻiala mo o Tatou Aso,” “Ua Ofo Mai e le Toetū se Faamoemoe mo Ē Faavauvau,” ma le “O le a Fesoasoani le Faamoemoe o le Toetū iā i Tatou ina ia Tumau Mausalī ai pe a Fesagaʻi ma Sauāga.” O na matua uma e mātua eseese lava faamatalaga e manaʻomia ona fafau aʻe ai.

I le ōgatasi ma le matua autū o le Tusi Paia, na faamatilatila ai i le talaʻiga a Iesu i lana faiva i le lalolagi le matua e faapea: “Ua latalata mai le malo o le lagi.” (Mata. 4:17) Sa faapefea ona fafau aʻe lenā matua? E sili atu i le 110 taimi i totonu o Evagelia e fā, sa faasino atu i lenā Malo. Ae e sili atu mea na faia e Iesu na i lo le toe faaaogāina pea o le upu “malo.” O mea sa ia aʻoaʻo atu ma vavega sa ia faia, na faamanino atu ai e Iesu faapea o ia, o lē sa iai i lenā taimi, o le Alo o le Atua, o le Mesia, o lē o le a tauaao atu i ai e Ieova le Malo. Na faailoa atu foʻi e Iesu e faapea, e ala iā te ia sa tatala atu ai le avanoa mo isi ina ia auai i lenā Malo. Sa ia faamatilatilaina uiga e tatau ona faaalia e i latou o ē o le a tuuina atu i ai lenā faaeaga. I ana aʻoaʻoga ma galuega mamana sa ia faia, na ia faamanino atu ai le mea o le a uiga i ai le Malo o le Atua i olaga o tagata ma sa faaalia ai foʻi faapea o lona tuliesea o temoni e ala i le agaga o le Atua, o se faamaoniga lea ‘o le oo moni mai i lana ʻaufaalogologo o le malo o le Atua.’ (Luka 11:20) O le Malo lenā sa poloaʻiina e Iesu ona soo ina ia molimau atu i ai.—Mata. 10:7; 24:14.

Faaaogāina o se Matua Talafeagai. E lē o tau manaʻomia ona e fafau aʻe se matua i le tele e pei ona faia ai e le Tusi Paia, ae o le iai o se matua talafeagai e tutusa lava lona tāua.

Afai o loo faitalia oe ma filifili lau matua, ia manatunatu muamua i le sini o lau taulimaga. Ma a o e filifilia au manatu tāua e fafau aʻe ai lau auivi, ia faamautinoa ua lagolago moni e na manatu le matua ua e filifilia.

Afai ua tofia atu le matua, ia iloilo ma le faaeteete mea o loo faaalia ai i le auala e fafau aʻe ai lau mataupu. Atonu e manaʻomia ai sina taumafaiga ina ia iloa le tāua ma le aogā o lenā matua. Afai o le a e filifilia ni faamatalaga e fafau aʻe ai se matua ua tofia atu, ia faia se filifiliga faaeteete ina ia mafai ai ona faauaʻi atu pea i le matua. I le isi itu, afai ua saunia mai le mataupu, e manaʻomia pea ona e iloiloina le auala e faaaogā ai ina ia ōgatasi ma le matua. E manaʻomia foʻi ona e manatunatu i le pogai e tāua ai le mataupu i lau aofia, atoa ma lou sini e ao ona iai i le taulimaina. O le a fesoasoani lenei iā te oe ina ia faamautinoa ai mea e ao ona faamamafa i lau taulimaga.

Le Auala e Faamamafa ai le Matua. Ina ia talafeagai ona faamamafa le matua, e tatau ona e faataatia le faavae pe a filifilia ma tuufaatasia lau mataupu. Afai e te faaaogā na o faamatalaga e lagolagoina ai lau matua ma afai e te mulimuli i taʻiala ua aofia ai i le sauniunia o se auivi lelei, o le a toetoe ai lava ina otometi lou faamamafaina o le matua.

O le toe taʻua o mea, e mafai ona fesoasoani e faamalosia ai le matua. I musika faaanamua (classical music), o le matua o se fati lea e usu ma toe saga usu ina ia mātaulia ai le fatuga atoa. E lē faapea e toe taʻua lava upu na e tasi i taimi uma. I nisi taimi e na o se fuaiupu puupuu e tasi pe lua e toe taʻua, i isi taimi e faaaogā ai upu eseese o le matua, ae po o le ā lava le auala e faaaogā ai, ua faailoa mai ma le atamai e le fatupese lana fati e ala i le toe usuina o ni upu o le fatuga seʻia oo ina iai sona aafiaga atoa i le fatuga. O le auala lenā e ao ona iai le matua o se lauga. O le toe taʻua o upu autū mai le matua, e tai pei o le fati o se fatuga faamusika o loo usu ma toe usu i taimi uma. O ni upu e uiga tutusa ma na upu po o le toe faaupuina o le matua e mafai ona logolelei ai le matua. O le faaaogāina o lenā auala o le a avea ai le matua o se manatu autū e faapea ona manatuaina e lau aofia.

O nei taʻiala e lē gata e faatatau i lauga mai le pulelaa ae faapea foʻi i talanoaga i le faiva i le fanua. O sina talanoaga puupuu o le a sili atu ona manatuaina pe afai e faamatilatila le matua. O aʻoaʻoga e avatu i se suʻesuʻega faale-Tusi Paia o le a faigofie atu ona manatuaina pe afai sa faamamafa le matua. O taumafaiga sa e faia i le filifilia ma le fafauina aʻe o se matua talafeagai o le a tele sona aogā i le faaleleia o lou uigā o se failauga ma o se faiaʻoga o le Afioga a le Atua.