Mataupu Luasefulu
Ia Teu Mau i Manatu le Aso o Ieova
1. Ina ua e faatoʻā iloa ua lata ona oo mai se laveaʻiga mai mea uma e faatigā ai o tatou loto i lenei faiga tuai o mea, na faapeʻī ou faalogona?
O SE tasi o mea muamua ua e aʻoaʻoina mai i le Tusi Paia, o le fuafuaga a Ieova mo le lalolagi atoa ia avea ma parataiso. I lenā lalolagi fou, o le a lē toe iai ni taua, o soligātulafono, le mativa, o maʻi, o puapuaga ma le oti. E oo lava i ē ua maliliu o le a toe tutū mai. Maʻeu ni faamoemoega ofoofogia! O le lalata mai o na mea uma ua faamamafaina i le faamaoniga e faapea, o le faatasi mai lē vaaia o Keriso i le avea ma Tupu ua pule, na amata i le 1914 ma e talu mai lenā taimi, ua tatou ola i aso e gata ai o lenei lalolagi amioleaga. I le iʻuga o nei aso e gata ai, o le a faaumatia ai e Ieova lenei faiga o mea ma faaoo mai ai le lalolagi fou e pei ona folafolaina!
2. O le ā le “aso o Ieova”?
2 Ua taʻua e le Tusi Paia lenei faaumatiaga o loo fotuaʻi mai, o le “aso o [Ieova].” (2 Peteru 3:10) O “le aso o le toasa o Ieova” i le lalolagi aoao a Satani. (Sefanaia 2:3) E faatumutumu i “le taua i le aso tele o le Atua e ona le malosi uma lava . . . , ua igoa i le gagana Eperu o Amaketo,” lea e faaumatia ai “tupu o le lalolagi ma le atu laulau uma.” (Faaaliga 16:14, 16, LF) Pe o faamaonia mai ea i lou olaga lou talitonu maumauaʻi ua latalata mai lenei “aso o Ieova”?—Sefanaia 1:14-18; Ieremia 25:33.
3. (a) O afea o le a oo mai ai le aso o Ieova? (e) Ua faamaonia faapefea le aogā o le lē faaali maia e Ieova “o lea aso ma lea itu aso”?
3 E lē o taʻu maia e le Tusi Paia iā i tatou le aso tonu o le a afio mai ai Iesu Keriso i lona avea ma Faaoosala a Ieova, e faaoo mai le sala i le faiga o mea a Satani. Na fetalai mai Iesu: “A o lea aso ma lea itu aso e le iloa e se tasi, e le iloa lava e agelu i le lagi, po o le Atalii; ua na o le Tamā lava.” (Mareko 13:32) Pe afai e iai nisi e lē alolofa moni iā Ieova, o le a iai so latou uiga e faalēano i lenā aso, ae liliu atu i le saʻilia o mea a le olaga nei. Peitaʻi o ē alolofa moni iā Ieova o le a auauna iā te ia ma le lotoatoa, e tusa lava po o fea le taimi o le a oo mai ai le iʻuga o lenei faiga amioleaga o mea.—Salamo 37:4; 1 Ioane 5:3.
4. O le ā le lapataʻiga na fetalai i ai Iesu?
4 I sina upu lapataʻi mo ē e alolofa iā Ieova, ua fetalai mai ai Iesu: “Ia outou, ina mataala ia, auā tou te le iloa pe oo mai afea [lea] aso.” (Mareko 13:33-37, LF) Ua ia ʻaiʻoi mai iā i tatou ina ia aua le avea le ʻai ma le inu po o “le popole i mea a le olaga nei” e alu uma i ai o tatou mafaufau ae galo ai iā i tatou le tāua o taimi ua iai.—Luka 21:34-36; Mataio 24:37-42.
5. E pei ona faamatala mai e Peteru, o le ā o le a aumaia e le aso o Ieova?
5 Ua faapena foʻi ona fautuaina i tatou e Peteru ina ia teu mau i manatu “le aso o le Atua, e teʻa eseese ai le lagi ina ua mu, e liu suāvai foi o mea na fai aʻi ina ua mu.” O le a faaumatia faigāmalo uma a tagata—“le lagi”—e faapena foʻi ma le sosaiete o tagata amioleaga—“le lalolagi”—ma ona “mea na fai aʻi,” o manatu ma gaoioiga a lenei lalolagi leaga, e pei o ona uiga fia tutoʻatasi ese mai le Atua, ma lona olaga lē mamā ma le matapeʻapeʻa i meafaitino. O le a suia nei mea e le “lagi fou [le Malo faalelagi o le Atua] ma le lalolagi fou [se sosaiete fou o tagata i le lalolagi]” lea o le a “mau ai le amiotonu.” (2 Peteru 3:10-13) O nei mea mataʻutia o le a tutupu i le lalolagi o le a faafuaseʻi ona amataina ma i se aso ma se itu aso e leʻi faatalitalia.—Mataio 24:44.
Ia Mataala i le Faailoga
6. (a) I le tali atu a Iesu i le fesili a ona soo, o le ā le tele na faatatau atu ai lenā tali i le iʻuga o le faiga o mea faa-Iutaia? (e) O ā vaega o le tali a Iesu o loo taulaʻi atu i mea tutupu ma uiga faaalia, talu mai le 1914 ma faasolo mai ai?
6 Pe a fua atu i taimi o loo tatou ola ai, ua tatau ona tatou matuā masani lelei ma vala uma o le faailoga tuufaatasi lea e mātaulia ai aso e gata ai—“le faaiʻuiʻuga o le faiga o mea.” Ia manatua, ina ua tali atu Iesu i le fesili a ona soo, e pei ona faamauina i le Mataio 24:3 (NW), o nisi o mea na ia faamatalaina i le fuaiupu e 4 e oo i le 22, sa iai so latou faataunuuga itiiti i le faiga o mea faa-Iutaia i le va o le 33 ma le 70 T.A. Peitaʻi ua iai se faataunuuga tele o le valoaga i le vaitaimi talu mai le 1914, le taimi ‘o le faatasi mai o Keriso ma le faaiʻuiʻuga o le faiga o mea.’ O loo taʻu mai e le Mataio 24:23-28 mea o le a tutupu lea na amata mai i le 70 T.A., seʻia oo i le taimi o le faatasi mai o Keriso. O mea e tutupu ua faamatalaina i le Mataio 24:29–25:46 e faataunuuina a o faagasolo le taimi o le iʻuga.
7. (a) Aiseā e tatau ai lava iā i tatou ona mataalia i le faataunuuina o le faailoga e mea o loo tutupu i le taimi nei? (e) Tali fesili o loo i le faaiʻuga o lenei palakalafa, o loo faaalia ai le auala ua faataunuuina ai le faailoga talu mai le 1914.
7 E tatau iā i tatou taʻitoʻatasi ona mātauina mea o loo tutupu ma uiga faaalia e faataunuu ai le faailoga. O le faafesootaʻi atu o nei mea i valoaga a le Tusi Paia o le a fesoasoani lea iā i tatou e teu mau ai i manatu le aso o Ieova. O le a mafai ai foʻi ona tatou faaalia uiga pulunaunau, a o tatou lapataʻia isi e uiga i le lalata mai o lenā aso. (Isaia 61:1, 2) A o manatuaina nei faanaunauga, seʻi o tatou autaluina fesili o loo mulimuli mai, lea e faamatilatila ai vala o le faailoga, e pei ona faamauina i le Mataio 24:7 ma le Luka 21:10, 11.
O le ā le auala matuā ese lava ua faataunuuina ai le sii taua o le tasi “nuu i le tasi nuu, ma le tasi malo i le tasi malo,” lea na amata mai i le 1914? E tusa ai o taua, o le ā ua tupu talu mai lenā taimi?
I le 1918, o le ā le faamaʻi na maliliu ai le toʻatele, e sili atu i lo le aofaʻi o ē na maliliu i le Taua Muamua a le Lalolagi? E ui lava i le atamai faafomaʻi o le tagata, ae o ā faamaʻi o loo maliliu ai pea le faitau miliona o tagata?
O le ā le tele ua oo i ai le aafiaga o le lalolagi i le utiuti o taumafa, e ui lava i le alualu i luma o le atamai faasaienisi i le senituri ua mavae atu?
Aiseā ua e talitonu ai faapea, o faamatalaga a le 2 Timoteo 3:1-5, 13, e lē o faasino atu i le olaga ua leva ona iai, ae o loo faasino atu i le faateleina o le tulaga mataʻutia o le olaga, a o tatou agaʻi atu i le iʻuga o aso e gata ai?
Le Tuueseeseina o Tagata
8. (a) O le ā le isi mea o loo faamatalaina i le Mataio 13:24-30, 36-43, sa faafesootaʻi atu e Iesu i le faaiʻuiʻuga o le faiga o mea? (e) O le ā le uiga o le tala faatusa a Iesu?
8 E iai isi mea mataʻina o loo faasolosolo ona tutupu sa faafesootaʻi atu e Iesu i le faaiʻuiʻuga o le faiga o mea. O se tasi o nei mea o le tuueseeseina lea o ‘tagata o le malo’ mai ‘fanau a le ua leaga.’ Sa taʻua e Iesu lenei mea i lana faataoto i le fanua na totō ai le saito, lea na alu ane le fili ma toe lūlū i ai ma le titania. O “le saito” i lana tala faatusa ua faaatagia ai Kerisiano moni faauuina. “O le titania” o i latou ua faapea mai o Kerisiano ae ua faamaonia mai o i latou lava o ‘fanau a le ua leaga,’ talu ai lo latou pipii atu pea i le lalolagi lea e pule ai le Tiapolo. Ua tuuesea i latou nei mai ‘tagata o le Malo o le Atua’ ma ua faailogaina mo le faaumatiaga. (Mataio 13:24-30, 36-43) Po ua tupu moni ea lenei mea?
9. (a) Ina ua mavae le Taua Muamua a le Lalolagi, o le ā le tuueseesega tele na tupu i le va o i latou uma o loo faapea mai o Kerisiano? (e) Na faapefea ona faamaonia atu e Kerisiano faauuina e faapea, o i latou o auauna moni o le Malo?
9 Ina ua mavae le Taua Muamua a le Lalolagi, sa tuueseeseina ai i latou uma na faapea mai o Kerisiano, i ni vaega se lua: (1) O taʻitaʻi o lotu ua faapea mai o lotu Kerisiano ma ē e mulimuli atu iā i latou, o ē sa lagolago malosi i Malo Sosoo (ua taʻua nei o Malo Aufaatasi) ae i le taimi e tasi o loo matuā lotonuu i o latou lava atunuu, ma (2) o Kerisiano moni o lenā vaitaimi ina ua mavae le taua, o ē sa lagolago atoatoa i le Malo Faa-Mesia o le Atua, ae lē i malo o lenei lalolagi. (Ioane 17:16) Ua faamaonia le avea o i latou nei o ni auauna moni o le Malo o le Atua, e ala i lo latou talaʻia o “lenei tala lelei o le malo” i le lalolagi aoao. (Mataio 24:14) O ā iʻuga na maua mai ai?
10. O le ā na faataunuuina muamua e le galuega o le talaʻia o le Malo?
10 Muamua, sa aoaoina le vaega totoe o ē ua faauuina e le agaga o le Atua, o ē ua iai le faamoemoe ina ia iai faatasi ma Keriso e fai ma vaega o le Malo faalelagi. E ui o loo nonofo i latou i atunuu eseese, ae ua maopoopo i latou i se faalapotopotoga e autasi. Ua latalata mai le taimi e faamāeʻa ai le faamaufaailogaina o i latou nei ua faauuina.—Faaaliga 7:3, 4.
11. (a) O le ā le galuega o le aoaoina o loo faaauau pea, ma i le ōgatusa ai ma le ā le valoaga? (e) O le ā ua faamaonia mai e le faataunuuga o lenei valoaga?
11 Ona sosoo ai lea o le aoaoina o “le motu o tagata e toatele mai atu nuu uma, ma aiga, ma nuu, ma gagana eseese,” e ala i le taʻitaʻiga a Keriso. O i latou nei ua faia aʻe ai “isi mamoe” o ē o le a faasaoina mai “le puapuaga tele” ma oo atu ai i le lalolagi fou a le Atua. (Faaaliga 7:9, 14; Ioane 10:16) O lenei galuega o le talaʻia o le Malo o le Atua a o leʻi oo mai le iʻuga, o loo faagasolo pea seʻia oo mai i le taimi nei. Ua fesoasoani ma le faamaoni le motu o tagata e toʻatele o isi mamoe, lea ua faitau miliona nei lo latou aofaʻi, i le vaega totoe faauuina ina ia faalauiloa atu le feʻau tāua o le Malo. Ua oo atu lenei feʻau i atunuu uma.
O ā Mea o le a Tutupu i le Lumanaʻi?
12. O le ā se tele o le galuega talaʻi e tatau ona fai a o leʻi oo mai le aso o Ieova?
12 O mea uma ua taʻua i luga e faailoa mai ai lo tatou lalata atu i le iʻuga o aso e gata ai ma ua i faitotoʻa nei le aso o Ieova. Ae pe o iai ea ni valoaga e tatau ona faataunuuina a o leʻi amataina lenā aso mataʻutia? Ioe. O se tasi o pogai, e leʻi māeʻa le tuueseeseina o tagata e tusa ai o le finauga i le Malo. I nisi o vaipanoa sa fesagaʻi ma teteega ogaoga mo le tele o tausaga, ua faateleina ai nei i inā soo fou. E oo lava i vaipanoa e teena ai e tagata le tala lelei, o loo faaalia ai pea e Ieova lona alofa mutimutivale e ala i lo tatou avatuina i ai o le molimau. O lea, ia tatou talaʻi pea! Ua faamautinoa mai e Iesu iā i tatou, pe a māeʻa le galuega, ona oo mai loa lea o le iʻuga.
13. E pei ona faamauina i le 1 Tesalonia 5:2, 3, o le ā le mea mataʻina o le a tupu, ma o le ā lona uiga iā i tatou?
13 Ua valoia mai e le isi valoaga e sili ona mataʻina o le Tusi Paia e faapea: “Auā pe a latou fai ane, ‘O loo filemu, ua le āfaina [“saogalemu,” NW],’ ona oo lea ia te i latou o le fano faafuasei, faapei o le faatiga o le fafine to a fanau mai, latou te le sosola ai lava.” (1 Tesalonia 5:2, 3) E lē o mautinoa mai pe faapeʻī le auala o le a faalauiloaina ai le ‘filemu ma le saogalemu.’ Peitaʻi e mautinoa lava o le a lē faauiga atu faapea, e mafai e taʻitaʻi o malo ona latou foʻia moni faafitauli o tagata. O i latou o loo teu mau i o latou mafaufau le aso o Ieova, o le a lē faasesēina i lenā faalauiloaga. Ua latou iloa, e faia loa lenā faalauiloaga, ona faafuaseʻi loa lea o le oo mai o le faaumatiaga.
14. O ā mea o le a tutupu a o faagasolo le puapuaga tele, ma i le ā le faasologa?
14 I le amataga o le puapuaga tele, o le a faasagatau atu ai taʻitaʻi ma tupu iā Papelonia le Aai Tele, le emepaea o lotu sesē o le lalolagi, ma o le a latou matuā faatamaʻiaina o ia. (Mataio 24:21; Faaaliga 17:15, 16) Pe a mavae lenā, o le a faasagatau atu atunuu iā i latou o loo sapasapaia le pule silisili ese a Ieova, o inā loa e tupu aʻe ai le toʻasa o Ieova i faigāmalo faapolotiki ma i latou o loo lagolagoina, ma iʻu ai i lo latou faaumatiaga aʻiaʻi. O inā loa e gāpā ai le taua iā Amaketo e fai ma tumutumuga o le puapuaga tele. Ona lafoina lea o Satani ma ana temoni i le tō e lē gata, e lē toe mafai ona latou faaaafiaina le fanau a tagata. Ona faaiʻu ai lea o le aso o Ieova, lea o le a faapaiaina ai lona suafa.—Esekielu 38:18, 22, 23; Faaaliga 19:11–20:3.
15. Aiseā e lē atamai ai le manatu faapea, e leʻi taitai oo mai le aso o Ieova?
15 O le a oo mai le iʻuga o lenei faiga o mea i le taimi tonu lava, e tusa ai ma le faasologa a le Atua. O le a lē tuai mai lava. (Sapakuka 2:3) Ia manatua, na vave ona oo mai le faaumatiaga o Ierusalema i le 70 T.A., a o leʻi faatalitalia e tagata Iutaia, ina ua latou manatu ua teʻa atu le tulaga lamatia na iai. Ae faapefea Papelonia anamua? Sa matuā malosi, sa matuā mautinoa ma malupuipuia i pa maualuluga. Peitaʻi e tasi lava le pō na faatoʻilaloina ai. E faapena foʻi, le oo faafuaseʻi mai o le faaumatiaga i lenei faiga amioleaga o mea. Pe a oo mai lenā aso, talosia e maua mai i tatou o loo autasi i le tapuaʻiga moni, ona sa teu mau pea i o tatou manatu le aso o Ieova.
Talanoaga Autalu
• Aiseā e matuā tāua ai le teu mau i manatu o le aso o Ieova? E mafai faapefea ona tatou faia lenā mea?
• Ua faapefea ona aafia totino i tatou i le tuueseeseina o tagata lea o loo faagasolo?
• O le ā o loo lumanaʻi pea a o leʻi amataina le aso o Ieova? O le ā la e tatau ona faia e i tatou taʻitoʻatasi?
[Ata i le itulau 180]
Ua toe o se aga ona faaiʻuina lea o aso e gata ai, i le faaumatiaga o le faiga o mea a Satani