Na Auauna le Faiaʻoga Sili i Isi Tagata

PE E te fiafia pe a fai e se tagata se mea lelei mo oe?— Ioe, ma e fiafia foʻi isi tagata pe a faia e se tasi se mea lelei mo i latou. E faapena uma lava i tatou. Na silafia e le Faiaʻoga Sili le mea lenā, ma o le māfuaaga lenā na ia faia ai mea lelei mo tagata i taimi uma. Na ia faapea mai: ʻNa ou sau, ina ia ou auauna atu i tagata, ae lē ina ia auauna mai tagata.’​—Mataio 20:28.

O lea la, afai tatou te fia faataʻitaʻi i le Faiaʻoga Sili, o le ā e tatau ona tatou faia?— E tatau ona tatou auauna atu i isi. Ae o le toʻatele o tagata latou te lē faia mea lelei mo isi. O le mea moni, e toetoe o tagata uma, latou te mananaʻo e auauna atu tagata iā i latou. I se tasi o taimi, na mananaʻo ai foʻi soo o Iesu e auauna atu isi iā i latou. Sa manaʻo lava le tagata ia, e faasili ma faatāua ia lava.

I se isi aso, na malaga faatasi ai Iesu ma ona soo. Ina ua taunuu i le aai o Kapanaumi lea e lata ane i le Sami o Kalilaia, ona latou ō atu uma lea i se fale. Ona fesili atu lea o Iesu iā i latou: “Pe se ā na outou fefinauaʻi ai i le ala?” Latou te leʻi tali atu, auā na latou finau i le auala po o ai o i latou e sili.​—Mareko 9:33, 34.

Na silafia e Iesu e sesē manatu o ona soo i le mafaufau faapea e sili atu le tasi na i lo le isi. O lea la, e pei ona tatou iloa mai le mataupu muamua o le tusi lenei, na avane e Iesu se tamaitiiti ma faatū i luma o ona soo, ma fetalai atu e tatau ona latou loto maualalo e pei o le tamaitiiti lenā. Ae e leai ma se mea na latou maua mai lenā faaaʻoaʻoga. A o latalata i le taimi o lona maliu, na aʻoaʻo ai e Iesu se lesona e leʻi mafai ona galo iā i latou. O le ā na faia e Iesu?—

A o latou aai faatasi, na tū ai Iesu i luga ma tago i le solo, ma nonoa i lona manava. Ona tago atu lea i se ʻapa fafano ma faatumu i vai. Atonu sa tau mānatu soo po o le ā le mea a Iesu o le a fai. A o latou vaavaai atu, na alu ane Iesu iā i latou taʻitoʻatasi ma fufulu o latou vae. Ona tago atu lea i le solo ma solo i o latou vae. Faauta i le mea na tupu! O le ā sou manatu pe ana e iai i lenā taimi? O ā ni ou faalogona?—

Na manatu soo o Iesu, e lē saʻo le auauna atu o le Faiaʻoga Sili iā i latou e ala i le faia o lenei mea. Na latou māsiasi ai. Sa lē manaʻo Peteru e faia e Iesu lenei galuega faatauvaa mo ia. Ae na tali atu Iesu, e tāua lona fufuluina o o latou vae.

I aso nei, e lē masani ona tatou fufuluina vae o isi tagata. Ae o le mea lea sa masani ona fai a o iai Iesu i le lalolagi. E te iloa le māfuaaga?— O le atunuu lea na nonofo ai Iesu ma ona soo, sa see e tagata seevae sulu e tai pei o ni seevae tosotoso. E pefua uma o latou vae pe a savavali i auala pefu. O se gaoioiga agalelei la le fufuluina o vae o tagata e asiasi atu i o latou fale.

Ae i le taimi lenā na faatasi ai Iesu ma ona soo, e leai ma se tasi o ona soo na ofo ane e fufuluina vae o isi. O le ala lenā, na fufulu ai e Iesu o latou vae. I le faia o lenā gaoioiga, na aʻoaʻo atu ai e Iesu se lesona tāua i ona soo. Na tatau ona latou iloa lenei lesona. O se lesona e tatau foʻi ona tatou iloa i aso nei.

E te iloa le lesona lenā?— Ina ua toe nofo Iesu i lalo faatasi ma ona soo, ona fetalai atu lea: ʻUa outou iloa ea le mea ua ou faia iā te outou? Tou te taʻua mai aʻu, o le Aʻoaʻo ma le Alii; ua lelei foʻi la outou e fai mai na, auā o aʻu lava lea. O lenei, afai o aʻu le Alii, ma le Aʻoaʻo, ua ou fufuluina o outou vae, e tatau ona fufulu e le isi vae o le isi o outou.’​—Ioane 13:2-14.

Ua faaalia i inei, e manaʻo Iesu e auauna atu le tasi soo i le isi soo. E leʻi manaʻo Iesu e mafaufau le tagata na o ia lava. E leʻi manaʻo foʻi Iesu latou te manatu, o i latou o ni tagata tāua ma e ao lava ona auauna atu isi iā i latou. Na manaʻo Iesu ina ia latou naunau e auauna atu i isi.

Maʻeu se lesona lelei, a ea?— Po o le a e faataʻitaʻi ea i le Faiaʻoga Sili ma auauna atu i isi tagata?— Tatou te mafai uma lava ona faia mea lelei mo isi. O le faia faapea o le a fiafia tele ai i latou. Ae e sili atu i lenā, o le a fiafia ai Iesu ma lona Tamā.

E ese le faigofie o le auauna i isi tagata. Afai e te vaavaai faalelei, o le a e iloa ai ni mea e mafai ona e faia mo isi tagata. O se faataʻitaʻiga: Pe e iai se mea e mafai ona e fai e fesoasoani ai i lou tinā? O lenā e te iloa le tele o mea e faia e si ou tinā mo oe, ma isi i totonu o le aiga. Pe e mafai ona e fesoasoani i si ou tinā?— Aiseā e te lē fesili ai iā te ia?

Atonu e mafai ona e fesoasoani i le laulauina o meaʻai, a o leʻi aai. E mafai foʻi ona e fesoasoani i le fufuluina o ipu, pe a uma ona aai le aiga. O isi tamaiti latou te faamamāina le otaota i aso uma. Po o le ā lava lau mea e mafai ona fai, ae o le a e pei o Iesu pe a e auauna i isi.

E iai ni ou tei laiti e mafai ona e fesoasoani i ai? Ia manatua, na auauna foʻi le Faiaʻoga Sili i ona soo. O le a e pei o Iesu pe a e faia mea mo nai ou tei. O le ā e mafai ona e faia mo i latou?— Atonu e mafai ona e fesoasoani iā i latou, ia iloa teu a latou mea taalo pe a uma ona taaalo. Pe e te fesoasoani foʻi e fai o latou ofu. Po o lou fesoasoani e teu o latou moega. E a, e mafai ona e mafaufau i se isi mea e te faia mo i latou?— O le a alolofa nai ou tei iā te oe pe a e fesoasoani iā i latou, e pei ona alolofa soo o Iesu iā te ia.

E mafai foʻi ona e auauna i isi i le aʻoga. Atonu e mafai ona e fesoasoani i tamaiti o lau vasega po o lou faiaʻoga. A paʻūʻū ni api aʻoga a se tamaitiiti, e lelei pe a e fesoasoani i ai. Atonu e mafai ona e ofo atu e solo le laupapa, pe fai se isi feʻau mo lou faiaʻoga. O se isi gaoioiga lelei, o le tatalaina lea o le faitotoʻa mo se isi.

O le a iai taimi tatou te iloa ai, e lē faafetai mai tagata pe a tatou fesoasoani iā i latou. O le ā sou manatu, pe e taofia ai ea i tatou mai le faia o mea lelei?— E leai! O le toʻatele o tagata latou te leʻi faafetai iā Iesu mo ana galuega lelei. Ae e leʻi taofia ai Iesu mai le faia o mea lelei.

O lea la, aua neʻi o tatou fiu i le auauna atu i tagata. Seʻi o tatou manatua le Faiaʻoga Sili, o Iesu, ma ia taumafai e mulimuli atu pea i lana faataʻitaʻiga.