E Mafai Ona Puipuia e Iesu i Tatou

INA ua matua Iesu ma oo ina iloa le auala na puipuia ai o ia i le taimi na laʻitiiti ai, faamata na tatalo Iesu iā Ieova, ma faafetai atu iā te ia?— O le ā sou manatu, o le ā se tala a Iesu na fai atu iā Maria ma Iosefa ina ua iloa, na faasao e Maria ma Iosefa lona ola e ala i le ave o ia i Aikupito?—

O le mea moni, e lē o toe pepe Iesu. E lē o toe iai foʻi i le lalolagi e pei o le taimi muamua. Peitaʻi, pe e te mātauina i aso nei, e manatu isi tagata o loo avea pea Iesu ma pepe i totonu o le fale o manu?— O le mea lenā o loo tupu i le tele o atunuu i le Kirisimasi, lea e vaaia ai ata o Iesu o avea pea ma pepe.

E ui lava e lē o toe iai Iesu i le lalolagi, pe e te talitonu o loo soifua pea Iesu?— Ioe, na toe faatūina Iesu mai le oti, ma ua avea nei o ia o se Tupu malosi i le lagi. O le ā sou manatu, o le ā e mafai ona faia e Iesu, e puipuia ai i latou o loo auauna iā te ia?— O se faataʻitaʻiga, a o iai Iesu i le lalolagi, na ia faaalia ai le auala e mafai ona ia puipuia ai i latou e alolofa iā te ia. Seʻi tatou vaai la i le mea na fai e Iesu, a o latou faatasi ma ona soo i luga o se vaa.

Ua oo nei i le afiafipō. Ua alu le aso o aʻoaʻo atu Iesu i tafatafa ane o le Sami o Kalilaia, o se vai telē e tusa ma le 13 maila (20 kilomita) lona umī, ae 7.5 maila (12 kilomita) lona lautele. Ona fetalai atu lea o Iesu i ona soo: ʻTatou ō ia i le isi itu o le vai.’ Ona latou feosofi loa lea i se vaa, ma amata la latou folauga. Ua vaivai tele Iesu, ma na alu i le taumuli o le vaa e taoto ai. E leʻi umi, ae gase loa lana moe.

O loo feala pea le ʻausoo ina ia vaavaai lelei le alāvaa. Na lelei lava le alu o le vaa, ae mulimuli ane ua amata ona agi se matagi malosi. Ua faasolo ina malosi le agi o le matagi, ma ua amata ona lapopoʻa galu. Ua fafati mai nei galu ma taia ai le tino o le vaa, ma ua sao mai le vai i totonu o le vaa.

Ua fefefe le ʻausoo neʻi goto le vaa. Ae e leʻi fefe Iesu. O loo faaauau pea ona moe i le pito i tua o le vaa. Ona latou fafaguina lea o Iesu ma fai atu: ʻLe Aʻoaʻo e, le Aʻoaʻo e, laveaʻi mai i matou; o le a matou feoti i le afā.’ Ona tulaʻi lea o Iesu, ma faapea atu i le matagi ma galu: ʻFaalogo ia, inā malū ia.’

Na faafuaseʻi lava ona uma le matagi, ma toʻafilemu le vai. Ua ofo le ʻausoo. E latou te leʻi vaai muamua lava i se mea faapenei. Ua faapea atu le tasi i le isi: ʻO ai ea lenei? Auā ua fai atu o ia i le matagi ma le vai, ona usiusitai ai lea iā te ia?’​—Luka 8:22-25; Mareko 4:35-41.

E te iloa, o ai Iesu?— E te iloa o fea e maua mai ai le mana o Iesu?— E leʻi tatau ona fefefe le ʻausoo a o latou faatasi ma Iesu, auā e lē pei Iesu o tagata. E mafai ona fai e Iesu mea ofoofogia, lea e lē mafai e se isi lava tagata ona faia. Seʻi oʻu taʻuina atu se isi foʻi mea na faia e Iesu a o matuā sou le sami.

Na tupu lenei mea i se tasi aso mulimuli ane. Ina ua oo i le afiafi, ona faapea atu lea o Iesu i ona soo e ō loa i le vaa ma muamua atu i le isi itu o le sami. Ona alu lea o Iesu e na o ia i le mauga. O se nofoaga filemu e mafai ona tatalo ai i lona Tamā, o Ieova le Atua.

Na ō atu le ʻausoo i le vaa ma amata loa la latou folauga i le isi itu o le sami. E leʻi umi lava ae agi le matagi. Ua faasolosolo ina agi malosi mai. Ua oo nei i le pō. Ua tuu i lalo le la o le vaa, ma amata loa ona alo a latou foe. Peitaʻi, e lē o alu lelei le vaa, auā o loo faasaga i le itu o agi mai ai le matagi. O loo taumalua le vaa i galu tetele, ma ua pisi mai vai i totonu o le vaa. Ua taumafai le ʻausoo ia oo atu i le matafaga, ae e lē mafai.

O loo iai pea Iesu e na o ia i le mauga. E umi se taimi o iai pea i inā. Peitaʻi, ua iloa atu e Iesu le tulaga lamatia o ona soo ona o galu malolosi. Ona alu ifo lea mai le mauga ma tū i le matafaga. Na manaʻo Iesu e fesoasoani atu i ona soo, o lea na savali ai i luga o le sami o loo sou!

O le ā le mea e tupu pe a e taumafai e savali i luga o le vai?— E te magoto, ma atonu e te malemo foʻi. Ae e ese le mea na oo iā Iesu. E iai le mana faapitoa o Iesu. E umi le savaliga a Iesu ona faatoʻā taunuu lea i le vaa. Ua amata ona tafa mai ata, ma ua vaai mai le ʻausoo iā Iesu o savali atu i luga o le vai. E lē talitonu le ʻausoo i le mea o loo tilotilo i ai. Ua fefefe tele i latou, ma ua alalaga atu ona o lo latou fefefe. Ona fetalai atu lea o Iesu iā i latou: “Ia outou loto tetele; o aʻu lava, aua tou te matataʻu.”

Na faafuaseʻi lava ona uma le afā ina ua oso Iesu i luga o le vaa. Ua toe maofa foʻi le ʻausoo. Ua latou ifo iā Iesu ma faapea atu: “E moni, o oe lava o le Alo o le Atua.”​—Mataio 14:22-33; Ioane 6:16-21.

Ai se manaia pe ana tatou iai i lenā taimi, ma tatou vāai i vavega a Iesu, a ea?— E te iloa le māfuaaga na faia ai e Iesu vavega faapena?— Auā e alofa i ona soo ma e manaʻo e fesoasoani iā i latou. Na faia foʻi e Iesu vavega na, e faaalia ai le maoaʻe o lona mana lea o le a ia faaaogāina i le lumanaʻi pe a avea o ia ma Pule o le Malo o le Atua.

E oo lava i aso nei, ua faaaogā ai e Iesu lona mana e puipuia ai ona soo mai taumafaiga a Satani e taofi i latou mai le talanoa atu i tagata, e uiga i le Malo o le Atua. Peitaʻi, e lē faaaogāina e Iesu lona mana e puipuia ai ona soo mai le oo iai o maʻi, po o le aveeseina foʻi o o latou maʻi. E oo lava i aposetolo o Iesu, na maliliu uma. Na fasiotia Iakopo le uso o Ioane, ma na tuu foʻi Ioane i le falepuipui.​—Galuega 12:2; Faaaliga 1:9.

E faapena foʻi i aso nei. Pe e auauna tagata iā Ieova pe leai, e oo uma lava tagata i maʻi ma le oti. Peitaʻi, ua toeitiiti ona lē toe iai lea o tulaga faapena pe a pule Iesu o le Tupu o le malo o le Atua. E leai la se tasi o le a toe fefe fua, auā o le a faaaogā e Iesu lona mana ina ia manuia ai i latou uma e usitai iā te ia.​—Isaia 9:6, 7.