O le ā e Tupu pe a Tatou Feoti?

E PEI ona e iloa, o tagata i aso nei e faasolosolo ina matutua, e mamaʻi ma oo i le oti. E oo foʻi le oti i isi tamaiti. Pe e tatau ona e fefe i le oti, po o se tagata foʻi ua oti?— E te iloa le mea e tupu pe a tatou feoti?—

E leai ma se tagata i aso nei na oti ma toe ola mai e faamatala po o le ā le mea na tupu. Peitaʻi, a o iai le Faiaʻoga Sili i le lalolagi, na iai se tagata na oti ae na toetū mai. E mafai ona tatou aʻoaʻoina le mea e oo iā i latou ua feoti, e ala i le faitauina o le tala i le tamāloa lenā. O le tamāloa lenei o se uō a Iesu ma sa nofo i Petania, i se aai laʻitiiti e lē mamao tele mai Ierusalema. O lona igoa o Lasalo, ma e toʻalua ona tuafāfine e igoa iā Mareta ma Maria. Seʻi tatou vāai la po o le ā o fai mai ai le Tusi Paia e tusa ai ma le mea na tupu.

Na maʻi tigāina Lasalo i se isi aso. E mamao ese le nofoaga na iai Iesu i le taimi lenā. O lea na auina ai e Maria ma Mareta se tagata e taʻu atu le feʻau iā Iesu, o loo maʻi lo la tuagane o Lasalo. Na la auina le tagata iā Iesu, auā ua la iloa e mafai e Iesu ona faamālōlō lo la tuagane. E lē o se fomaʻi Iesu, peitaʻi e iai lona mana mai le Atua e faamālōlō ai so o se ituaiga o maʻi.​—Mataio 15:30, 31.

Ae na faateteleina le maʻi o Lasalo ma iʻu ai ina oti, a o leʻi taunuu atu Iesu. Peitaʻi, na fetalai atu Iesu i ona soo, o loo moe Lasalo ma o le a alu e fafagu. E leʻi malamalama le ʻausoo i le tala a Iesu. O lea na taʻu saʻo atu ai e Iesu: “Ua oti Lasalo.” O le ā ua faaalia e lenei mea e faatatau i le oti?— Ioe, e pei o se moe ua gase. Ua matuā gase lava le moe a le tagata ma lē mafai ai ona faia sana miti.

Ua sau nei Iesu e asi Mareta ma Maria. E toʻatele uō a le aiga na iai i lenā taimi. Na latou ō mai e faamāfanafana iā Mareta ma Maria, ona ua oti lo la tuagane. Ina ua faalogo Mareta ua sau Iesu, na alu atu ma faafeiloaʻi i ai. E leʻi umi ae alu atu foʻi Maria e feiloaʻi iā Iesu. Ua matuā faanoanoa Maria ma o loo tagi, ua faapaʻū i vae o Iesu. O loo fetagisi foʻi isi uō na mulimuli atu iā Maria.

Na fesili atu le Faiaʻoga Sili po o fea o tuu ai Lasalo. Ona mulimuli atu lea o Iesu i tagata a o savavali i le ana na teu ai le tino o Lasalo. Ina ua vaai Iesu i le fetagisi o tagata, ona tagi ai foʻi lea ma ia. Sa silafia e Iesu le tulaga mafatia e oo i ai, pe a oti se tagata e pele iā i tatou.

Na iai se maa i luma o le ana, ona fetalai atu lea o Iesu: “Ave ese ia le maa.” Pe tatau ona aveese le maa?— Sa manatu Mareta e lē lelei lenā tonu. Ua faapea atu: “Le Alii e, ua oo ina manogi, auā o lona pō fā lenei.”

Ae ua fetalai atu Iesu iā Mareta: “Pe na ou lē fai atu ea iā te oe, Afai e te talitonu, ona e iloa lea o le mamalu o le Atua?” O le uiga o le tala a Iesu, o le a vaaia e Maria se vavega e viia ai le Atua. O le ā o le a fai e Iesu? Ina ua ave ese le maa, na tatalo leotele Iesu iā Ieova. Ona faapea atu lea o Iesu ma le leotele: “Lasalo e, inā sau ia i fafo.” Faamata e mafai ona sau Lasalo i fafo?—

Faamata e mafai ona e fafaguina se tagata o moe?— Ioe, a faapea e te valaau leo tele i ai, o le a ala i luga. Ae, e mafai ona e fafagua se tagata ua oti?— E leai. E tusa lava po o le ā le leotele o lau valaau, ae e lē mafai ona lagona e le tagata oti lou leo. E leai se mea e mafai ona fai e so o se tagata i le lalolagi, e fafagu mai ai i luga se tagata ua oti.

Peitaʻi, e ese la Iesu. E iai se mana faapitoa o Iesu e mai le Atua. Ina ua valaau atu la Iesu iā Lasalo, na iai se mea ofoofogia na tupu. Na sau i fafo mai le ana le tagata ua atoa aso e fā talu ona oti! Ua toe ola! Na mafai nei ona toe mānava, savali ma tautala! Ioe, ua toe faatūina e Iesu, Lasalo mai le oti.​—Ioane 11:1-44.

Seʻi manatu foʻi i ai: O le ā na tupu iā Lasalo ina ua oti? Pe na iai se vaega o Lasalo—o sona agaga—na tuua lona tino ma alu atu e nofo i se isi nofoaga? Pe na alu atu le agaga o Lasalo i le lagi? Faamata na iai faatasi ma le Atua ma Ana agelu, mo aso e fā?—

E leai. Manatua foʻi, na fetalai Iesu o loo moe Lasalo. O le ā le mea e tupu pe a e moe? Seʻi faapea o e moe gase, e te lē iloa la se mea o tupu i lenā taimi, a ea?— A faapea e te ala i luga, e te lē iloa le umi na e moe ai seʻiloga e te vaai i le uati pe ua tā se fia.

E faapena uma lava tagata oti. E latou te lē iloa se mea. E latou te lē lagonaina se mea. E lē mafai foʻi ona latou faia se mea. O le mea lenā na tupu iā Lasalo ina ua oti. A oti le tagata, e tai pei lava o moe gase ma na te lē manatuaina foʻi se mea. Ua fai mai le Tusi Paia: “A o ē ua oti, latou te lē iloa se mea.”​—Failauga 9:5, 10.

Seʻi manatu foʻi i lenei mea: Ana faapea na iai Lasalo i le lagi mo aso e fā, pe na lē tatau ea la ona fai mai sana tala i le nofoaga na iai?— Ana faapea foʻi na iai i le lagi, faamata e toe aumaia o ia e Iesu i le lalolagi mai lenā nofoaga matagofie?— E mautinoa lava e leai!

Peitaʻi, e toʻatele tagata e fai mai e iai se vaega o i tatou e faaauau pea ona ola pe a tatou feoti. E latou te faapea mai sa faaauau ona ola Lasalo i se isi nofoaga. Peitaʻi, e lē o le tala lenā a le Tusi Paia. O loo faapea mai na faia e le Atua le uluaʻi tagata ma “tagata ola.” Ua faapea mai foʻi le Tusi Paia na oti Atamu ina ua agasala. Ua oti, ma ua na lē toe iloa se mea. O lea na toe foʻi atu ai i le eleele na fai mai ai o ia. O loo taʻua i le Tusi Paia na tuufaasolo mai foʻi le agasala ma le oti i fanau a Atamu.​—Kenese 2:7; 3:17-19; Roma 5:12.

E fefefe isi i tagata oti. E mumusu e ō i tuugamau ona e faapea e iai agaga o tagata oti e ese mai i o latou tino, ma atonu e faasauā mai i tagata ola. Ae, faamata e mafai e se tagata oti ona faasauā i tagata ola?— E leai.

Ua manatu isi tagata faapea e mafai e tagata oti ona asiasi mai i tagata o loo ola. O lea latou te tuu ai meaʻai mo ē ua feoti. Peitaʻi, o tagata latou te faia mea faapena, e lē talitonu i le tala a le Atua e uiga i tagata oti. Afai tatou te talitonu i le tala a le Atua, tatou te lē fefefe la i tagata oti. A faapea tatou te matuā faafetai i le Atua ona o le foaʻi mai o le ola, o le a tatou faaalia la e ala i le faafiafiaina o Ia.

Peitaʻi, atonu e te taumānatu: ʻPe toe faatūina e le Atua tamaiti ua feoti? Pe e finagalo moni ai lava?’ O le a tatou talanoa ai la i le mataupu o sosoo mai.

Seʻi faaauau ona tatou faitau i le tala a le Tusi Paia e uiga i le tulaga o tagata ua feoti i le Salamo 115:17; 146:3, 4; ma le Ieremia 2:34.