Le Māfuaaga e ao ai Ona Tatou Galulue

OLE ā le mea e sili ona e fiafia i ai, o le faia o feʻau po o le taalo?— E leai se mea e leaga ai le taalo. O loo taʻua i le Tusi Paia faapea na ʻtumu malae o le aai i Ierusalema i tama ma teine o loo taaalo.’​—Sakaria 8:5.

Na fiafia le Faiaʻoga Sili e matamata a o taaalo tamaiti. Na ia faapea mai a o leʻi afio mai i le lalolagi: “Na ou i ai ma [le Atua], o aʻu o le tufuga [“sili,” NW] . . . sa ou olioli i ona luma i aso uma lava.” Ia mātau, na galulue faatasi Iesu ma Ieova a o iai i le lagi. A o iai la Iesu i le lagi, na fetalai mai o ia: “O loʻu fiafia foʻi, sa i le fanau o tagata lea.” Ua uma ona tatou aʻoaʻoina, sa matuā naunau le Faiaʻoga Sili i tagata uma, e aofia ai ma tamaiti.​—Faataoto 8:30, 31.

O le ā sou manatu, faamata na taalo Iesu i le taimi na laʻitiiti ai?— Atonu na taalo. Talu ai na avea Iesu ma “tufuga sili” a o soifua i le lagi, faamata na galue Iesu a o iai i le lalolagi?— Na taʻua Iesu o ʻle atalii o le tufuga.’ Peitaʻi, na taʻua foʻi Iesu “o le tufuga.” O le ā ua faaalia mai e lenei mea?— E lē taumatea na aʻoaʻoina Iesu e lona tamā fai, o Iosefa. O lea na avea ai foʻi Iesu ma tufuga.​—Mataio 13:55; Mareko 6:3.

O le ā le ituaiga o tufuga na iai Iesu?— Talu ai na avea Iesu ma tufuga sili i le lagi, o le ā sou manatu, pe e lē tatau foʻi la ona avea Iesu ma tufuga e tele lona tomai i le lalolagi?— Seʻi manatu i le faigatā o galuega e fai e se tufuga i le taimi o Iesu. Atonu sa alu Iesu e tā i lalo ma tipitipi faalaiti laau, ona laʻu lea i le fale e faaaogā e fai ai laulau, kapoti ma isi meāfale.

O le ā sou manatu, na fiafia Iesu i lana galuega?— E te lē fiafia pe ana mafai ona e faia ni laulau, nofoa po o isi meāfale mananaia e faaaogā e tagata?— Fai mai le Tusi Paia, o se mea lelei le ʻolioli o le tagata i ana lava galuega.’ O le fiafia lea e maua mai i le galue, e te lē mauaina pe a e taalo.​—Failauga 3:22.

O le mea moni, e aogā i o tatou mafaufau ma o tatou tino le faia o feʻau. E toʻatele tamaiti e na o le nofonofo ma matamata i televise, pe taaalo i taaloga o le vitiō. E oo ai ina lapopoʻa ma vaivai o latou tino, ae latou te lē maua ai le fiafia ma e lē fiafia ai foʻi isi. O ā mea e tatau ona tatou faia e maua ai le fiafia?—

Na tatou aʻoaʻoina i le Mataupu e 17 o le tusi lenei, e tatou te maua le fiafia pe a foaʻi atu, ma fai mea mo isi tagata. (Galuega 20:35) E taʻua e le Tusi Paia Ieova o “le Atua fiafia.” (1 Timoteo 1:11, NW) Na tatou faitau foʻi i le tusi o Faataoto, na ʻolioli Iesu i ona luma i aso uma lava.’ Aiseā?— Na taʻua e Iesu se tasi o māfuaaga ina ua faapea mai: “O loo galue loʻu Tamā e oo mai lava i le aso nei; o loo galue foʻi aʻu.”​—Ioane 5:17.

A o iai Iesu i le lalolagi, e leʻi avea o ia ma tufuga i lona olaga atoa. E iai se galuega faapitoa na manaʻo Ieova na te faia a o iai i le lalolagi. E te iloa lenā galuega?— Na fetalai Iesu: “E tatau ona ou folafola le tala lelei o le malo o le Atua i nisi aai foʻi; auā o le mea lea na auina mai ai aʻu.” (Luka 4:43) Na talitonu isi tagata i le talaʻiga a Iesu, ma na faapea ona latou taʻu atu i isi tala a Iesu, e pei o le fafine Samaria o loo i le ata.​—Ioane 4:7-15, 27-30.

O ā ni faalogona o Iesu i lenei galuega? O le ā sou manatu, na manaʻo Iesu e fai lenā galuega?— Na faapea mai Iesu: “O laʻu mea e ʻai, ia ou faia le finagalo o lē na auina mai aʻu, ma faaiʻu lana galuega.” (Ioane 4:34) E te fiafia e ʻai i meaʻai e sili ona e fiafia i ai, a ea?— E mafai la ona e malamalama i le fiafia tele o Iesu i le galuega na tuuina mai e le Atua mo ia.

Na faia i tatou e le Atua ina ia tatou maua le fiafia e ala i feʻau ma galuega. Na fetalai mai le Atua, o Lana meaalofa i tagata, o le ʻolioli lea o le tagata i ana galuega’ mamafa. A faapea la e te toaga e fai feʻau a o e laʻitiiti, o le a sili ai ona e fiafia i lou olaga atoa.​—Failauga 5:19.

E lē faapea la e mafai e se tamaitiiti ona faia galuega a tagata matutua, peitaʻi, e tofu uma lava i tatou ma mea e mafai ona fai. Atonu e toaaga ou mātua e faigaluega, ina ia maua mai ni tupe e tausi ai le aiga. E te iloa foʻi, e tele lava galuega e tatau ona fai ina ia teu mamā ai le fale.

O ā ni feʻau e mafai ona e faia, e fesoasoani ai i le aiga?— E mafai ona e fesoasoani i le laulauina o meaʻai, le fufuluina o ipu, tiaʻi le lapisi, teu lou moega, ma teu lelei au mea taalo. Atonu ua e faia nisi o na feʻau. E fesoasoani tele au feʻau na i le aiga.

Seʻi tatou vaai i aogā o na feʻau. E tatau ona teu lelei au mea taalo pe a uma ona faaaogā. O le ā sou manatu, aiseā e tāua ai lenā mea?— Auā e mamā ai le fale, ma atonu e lē tutupu ai ni faalavelave faafuaseʻi. Seʻi faapea o loo faataatitia solo au mea taalo, ae sau lou tinā i se aso o tumu uma ona lima i mea, ma tū i se mea taalo. Atonu e see lou tinā, paʻū i lalo, ma lavea ai. E lē gata i lea, atonu e ave ai lou tinā i le falemaʻi. E lē lelei lenā mea, a ea?— O lea la, o se mea lelei le teu faalelei o au mea taalo pe a uma ona e taalo ai.

E iai foʻi isi galuega a tamaiti. O se faataʻitaʻiga, o meaaʻoga. E aʻoaʻo lau faitau tusi i le aʻoga. E fiafia isi tamaiti e faitau tusi, peitaʻi e faigatā i isi tamaiti. E tusa lava pe faigatā ona e faitau pe a faatoʻā amata, ae o se mea lelei mo oe lou iloa faitau. A faapea e te iloa faitau, e tele mea aogā e mafai ona e aʻoaʻoina. O le a mafai ona e faitau i le afioaga a le Atua, le Tusi Paia. O lea la, e aogā tele lou faamaoni i au meaaʻoga, a ea?—

E iai nisi tagata e lē fiafia e galulue. Atonu e te masani i se tagata faapena. Peitaʻi, talu ai na faia i tatou e le Atua ina ia galulue, e tatau ona tatou iloa le auala e galue fiafia ai. O le ā le tele o le fiafia o le Faiaʻoga Sili i lana galuega?— Na tai pei e taumafa i se meataumafa e fiafia i ai. O le ā le galuega na fiafia ai?— O le taʻuina atu i tagata o tala iā Ieova le Atua ma le auala e mafai ona latou maua ai le ola e faavavau.

O nai manatu nei e fesoasoani e tatou te fiafia ai i le faia o feʻau. Ia fesili ifo iā te oe, ʻAiseā e tatau ai ona fai lenei feʻau?’ E faigofie se feʻau pe a e iloa lona tāua. Pe telē pe laʻitiiti le feʻau, ae ia fai ma le faamaoni. A faapea e fai faamaoni, o le a e fiafia ai i au feʻau e fai, e pei o lo tatou Faiaʻoga Sili.