Le Lolo i Aso o Noa​—O Ai na Faalogo, a o Ai e Leʻi Faalogo?

Na faia e le toʻatele o tagata i aso o Noa mea leaga. Kenese 6:5

Na fai fanau a Atamu ma Eva, ma ua faatoʻateleina tagata i le lalolagi. Na aufaatasi atu nisi o agelu i le fouvalega a Satani.

Na ō mai i latou i le lalolagi ma liutino tagata, ina ia faaipoipo atu i fafine na mananaʻo i ai. Na fanaua e nei fafine ni fanau tama e tinoeese, sauā ma malolosi.

Ua tumu le lalolagi i tagata amioleaga. Ua taʻua i le Tusi Paia: “Ua matuā leaga amioga a tagata i le lalolagi, o manatu ma faanaunauga uma o o latou loto, e leaga i taimi uma lava.”

Na faalogo Noa i le Atua ma fau le vaa. Kenese 6:13, 14, 18, 19, 22

O Noa o se tagata lelei. Na taʻu atu i ai e Ieova o le a Ia faaumatia tagata amioleaga e ala i se lolo tele.

Na faatonu e le Atua Noa e fau se vaa telē, ma ave i ai lona aiga ma ituaiga o meaola uma.

Na lapataʻia e Noa tagata e uiga i le Lolo o le a oo mai, ae e latou te leʻi faalogo. Na tauemu nisi iā Noa, a o isi na ʻinoʻino iā te ia.

Ina ua uma ona fau le vaa, ona ave lea e Noa o meaola i totonu.