O le ā le Tala Lelei?

1. O le ā le tala lelei mai i le Atua?

E finagalo le Atua ina ia maua e tagata uma se olaga fiafia i luga o le lalolagi. Na ia foafoaina le lalolagi ma mea uma o loo iai ona e alofa i tagata. E lē o toe umi ona gaoioi lea o le Atua e aumaia se lumanaʻi lelei mo tagata i atunuu uma. O le a ia laveaʻia tagata mai i tulaga e māfua ai ona mafatia.​—Faitau le Ieremia 29:11.

E leai se faigāmalo o mafai ona aveesea atoatoa faiga sauā, faamaʻi, ma le oti. Ae o loo iai se tala lelei. Ua toeitiiti ona aveesea lea e le Atua faigāmalo a tagata o loo iai nei, ae suitulaga ai lona malo. O le a fiafia tagatānuu o lona malo i le tele o le filemu ma le soifua mālōlōina lelei.​—Faitau le Isaia 25:8; 33:24; Tanielu 2:44.

2. Aiseā ua faanatinati ai le talaʻia o le tala lelei?

E faatoʻā leai ni mafatiaga pe a aveesea e le Atua le lalolagi o tagata amioleaga. (Sefanaia 2:3) O afea o le a tupu ai lenā mea? O loo valoia e le Afioga a le Atua tulaga o loo lamatia ai soifua o tagata i aso nei. O mea o loo tutupu i le lalolagi, e iloa ai ua latalata le taimi o le a gaoioi ai le Atua.​—Faitau le 2 Timoteo 3:1-5.

3. O le ā e tatau ona tatou faia?

E tatau ona tatou aʻoaʻoina mea e uiga i le Atua mai i lana Afioga, le Tusi Paia. Ua tai pei o se tusi mai i se tamā alofa mo i tatou. O loo taʻua ai le auala e maua ai se olaga lelei i le taimi lenei, ma le auala o le a maua ai le ola e faavavau i le lalolagi i le lumanaʻi. O le mea moni, e ono lē mananaʻo nisi e te mauaina le fesoasoani e malamalama ai i le Tusi Paia. Peitaʻi, talu ai ua folafola mai e le Atua se lumanaʻi lelei mo i tatou, o lea, e lē tatau ona faatagaina isi e taofia i tatou mai i le aʻoaʻoina o le Tusi Paia.​—Faitau le Faataoto 29:25; Faaaliga 14:6, 7.