O le ā Lau Vaaiga i le Tusi Paia?

MANATU O LE TUSI PAIA

“O Tusitusiga Paia uma e mai i le agaga o le Atua.”​—2 Timoteo 3:16, Faaliliuga a le Lalolagi Fou.

AOGĀ E TE MAUA MAI AI

Tali faamalieloto i fesili tāua o le olaga.​—Faataoto 2:1-5.

Taʻiala maufaatuatuaina mo le olaga i aso taʻitasi.​—Salamo 119:105.

Faamoemoe moni mo le lumanaʻi.​—Roma 15:4.

PE MAFAI ONA TATOU TALITONU MONI I LE TUSI PAIA?

Ioe, mo ni māfuaaga se tolu:

• Autasi mataʻina. Na tusia le Tusi Paia i se vaitaimi e silia i le 1,600 tausaga, e ni tagata eseese e 40. O le toʻatele o i latou e leʻi feiloaʻi muamua le tasi i le isi. Peitaʻi, e autasi le tusi atoa ma e tasi lona matua autū!

• E faamaoni ona tusitala. E lē taʻua e tusitala o le talafaasolopito o le lalolagi, le faatoʻilaloina o o latou tagatānuu. Peitaʻi, o tusitala o le Tusi Paia, e latou te taʻua ma le saʻo o latou masei, faapea masei o o latou tagatānuu.​—2 Nofoaiga a Tupu 36:15, 16; Salamo 51:1-4.

• Valoaga maufaatuatuaina. I le pe ā ma le 200 tausaga muamua atu, na valoia ai i le Tusi Paia le paʻū o le aai o Papelonia anamua. (Isaia 13:17-22) E lē gata na taʻu mai le auala o le a faatoʻilalo ai Papelonia, ae faapea foʻi le igoa o lē o le a ia faatoʻilaloina.​—Isaia 45:1-3.

  E tele foʻi isi valoaga o le Tusi Paia na faataunuuina e oo lava i nai vala lāiti. Ma o le mea moni lenā e tatou te faatalitalia e uiga i le Afioga a le Atua.​—2 Peteru 1:21.