Pe E te Lagona le Fefe ma le Tuua Toʻatasi?

Seʻi vaai foʻi i le tamaitiiti o loo i le ata. E foliga mai ua ia lagona le fefe ma le tuua toʻatasi, a ea? Pe na iai se taimi na oo ai iā te oe na faalogona?— E iai taimi e oo ai i tagata uma lava faalogona faapena. O loo taʻua i le Tusi Paia i uō a Ieova na lagona le fefefe ma le tuua toʻatasi. O se tasi o i latou o Elia. Seʻi o tatou talanoa e uiga iā te ia.

Na nofo Elia i Isaraelu a o leʻi taitai fanau mai Iesu. O Aapo o le tupu o Isaraelu, ma o lana masiofo o Iesepela. E leʻi tapuaʻi i laʻua iā Ieova, ae na tapuaʻi i le atua sesē e igoa iā Paala. O le pogai lenā na toʻatele ai tagata Isaraelu na tapuaʻi iā Paala. O Iesepela o se fafine e leaga tele ma na manaʻo e fasioti auauna uma a Ieova, e aofia ai ma Elia. E te iloa le mea na faia e Elia?—

Na sola mamao Elia i se toafa ma lafi ai i se ana. Aiseā?— Ioe, na fefe o ia. Ae sa lē tatau ona fefe, auā na iloa e Elia e tele le malosi o Ieova. I se tasi taimi, na tali mai ai Ieova i lana tatalo e ala i le auina mai o se afi mai i le lagi. E mautinoa la, e mafai e Ieova ona fesoasoani iā Elia!

A o iai Elia i le ana, na fetalai mai Ieova iā te ia: ʻO le ā lau mea o fai i inā?’ Na tali atu Elia: ʻE na o aʻu lava o loo tapuaʻi atu iā te oe. Ua tuua toʻatasi na o aʻu ma ua ou fefe ina neʻi fasiotia aʻu.’ Na manatu Elia ua fasiotia uma auauna a Ieova. Peitaʻi na fetalai mai Ieova iā Elia: ʻLeai, e lē saʻo lenā manatu. E 7,000 tagata o loo tapuaʻi mai pea iā te aʻu. Ia e lototele. E tele galuega ou te manaʻo e te alu e fai!’ Pe na fiafia Elia ina ua faalogo atu i na upu?—

O le ā e te aʻoaʻoina mai i le mea na tupu iā Elia?— E lē tatau ona e lagona le fefe ma le tuua toʻatasi. O loo iai au uō e alolofa iā Ieova ma alolofa foʻi iā te oe. E lē gata i lea, e sili atu ona malosi Ieova, ma o le a fesoasoani mai pea iā te oe. Po ua e fiafia e iloa e lē o tuua toʻatasi oe?—