Sa Usitaʻi Iesu i Taimi Uma

Pe e faigofie ona e usitaʻi i ou mātua i taimi uma?— O nisi taimi e faigatā. Pe e te iloa sa usitaʻi Iesu iā Ieova faapea ona mātua?— O le faaaʻoaʻoga a Iesu, e fesoasoani iā te oe ina ia e usitaʻi ai i ou mātua e tusa lava pe e faigatā. Seʻi o tatou talanoa atili e uiga i lenei mataupu.

A o leʻi afio mai Iesu i le lalolagi, sa faatasi ma lona Tamā o Ieova i le lagi. Ae sa iai foʻi ona mātua i inei i le lalolagi. O o la igoa o Iosefa ma Maria. E te iloa na faapefea ona fai i laʻua ma mātua o Iesu?—

Sa faia e Ieova se vavega. Na ia aumaia le ola o Iesu i le lagi ma tuu i le manava o Maria, ina ia mafai ona fanau mai ai Iesu ma ola i le lalolagi. Sa ola Iesu i totonu o le manava o Maria e pei foʻi o isi pepe. Ina ua mavae masina e iva, ona fanau mai loa lea o Iesu. O i inā na avea ai loa Maria ma Iosefa ma ona mātua.

I le 12 o tausaga o Iesu, sa alu ai se malaga umi a lo latou aiga i Ierusalema mo le Paseka. O le sauniga lenei e faamanatu ai le faasaʻolotoina o tagata Isaraelu mai i Aikupito. O i inā na faia ai e Iesu se mea na faaalia ai lona alofa tele i lona Tamā o Ieova. A o toe foʻi atu i lo latou aiga, na iloa ai e Iosefa ma Maria e lē o iai Iesu faatasi ma i latou, ma la suʻeina ai loa o ia. Pe e te iloa o fea na maua ai Iesu?—

Na toe foʻi faatopetope atu Iosefa ma Maria i Ierusalema ma suʻe solo Iesu. Sa popole tele i laʻua ona ua lē maua o ia. Peitaʻi, ina ua mavae aso e tolu, sa maua atu ai loa o ia i le malumalu. Aiseā na alu ai Iesu i le malumalu?—Auā o i inā sa aʻoaʻoina ai o ia e uiga i lona Tamā o Ieova. Sa alofa o ia iā Ieova ma fia iloa le auala e faafiafia ai Ieova. E oo lava ina ua matua Iesu, na usitaʻi pea o ia iā Ieova i taimi uma, e tusa lava pe sa faigatā, ma e oo ai o ia i mafatiaga. Pe sa usitaʻi foʻi Iesu iā Iosefa ma Maria?—Ioe, ua taʻua i le Tusi Paia sa usitaʻi Iesu iā i laʻua.

E faapefea ona e faataʻitaʻi iā Iesu?—E tatau ona e usitaʻi i ou mātua, e tusa lava pe faigatā. Po o le a e faia faapea?—