VAEGA 2

Ia Faamaoni le Tasi i le Isi

“O ē ua faatasia e le Atua, aua neʻi tuueseeseina e se tagata.”—Mareko 10:9

E finagalo Ieova ia iai le faamaoni i le faaipoipoga. Ua ia fetalai mai: “Aua neʻi outou feutagaʻi ma le lē faamaoni.” (Malaki 2:16) E tāua lenā uiga i lau faaipoipoga, auā a leai se faamaoni, e lē mafai foʻi ona maufaatuatuaina e le tasi le isi. E tāua tele le iai o le maufaatuatuaina ina ia māfana ai pea le alofa o se ulugalii.

Ua avea o se luʻi i aso nei le faaalia o le faamaoni i le liʻo o le faaipoipoga. O lea, ina ia puipuia lau faaipoipoga, e ao ona e maumauaʻi e faatino vala e lua o loo mulimuli mai.

1. IA FAAMUAMUA LAU FAAIPOIPOGA

LE MANATU O LE TUSI PAIA: “Ia outou faamautinoa o mea e sili ona tāua.” (Filipi 1:10) O lau faaipoipoga o se tasi lea o mea sili ona tāua i lou olaga. O lea, e tatau ona ave i ai lau faamuamua.

E finagalo Ieova e te uaʻi atu i lau paaga ma ʻolioli faatasi’ i le olaga. (Failauga 9:9) Ua ia faailoa manino mai e lē tatau ona e tuulafoaʻia lau paaga. Nai lo lea, ia mafaufau i ni auala e mafai ona faafiafia ai e le tasi le isi. (1 Korinito 10:24) Ia lagona e lau paaga e te manaʻomia moni ma talisapaia o ia.

O se tane o loo aumaia le ipu ti vevela mo lona toʻalua; ua mānava mai le tane a o loo fai le meaʻai a lana avā

LE MEA E MAFAI ONA E FAIA:

Ia fai ma masani le faaalu o se taimi faatasi ma lau paaga, ma ia faalogologo lelei atu iā te ia
Ia mafaufau i mea e lelei ai “oulua” uma, ae e lē na o “oe”

O se tane ma lana avā o loo fiafia faatasi i se la tafaoga

2. IA LEOLEO LOU LOTO

LE MANATU O LE TUSI PAIA: “Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” (Mataio 5:28) Pe a faaauau ona mafaufau se tasi i mea e lē mamā, o lona uiga ua lē faamaoni o ia i lana paaga.

E finagalo Ieova ina ia e “leoleoina lou loto.” (Faataoto 4:23; Ieremia 17:9) E mafai ona e faia faapea pe afai e te pulea ou mata. (Mataio 5:29, 30) Ia mulimuli i le faaaʻoaʻoga a Iopu, o lē na osia se feagaiga ma ona mata e aua neʻi vaavaai atu i se isi fafine ma manaʻonaʻo i ai. (Iopu 31:1) Ia maumauaʻi e aua neʻi matamata i ata matagā tau feusuaʻiga, ma ʻalofia so o se faiā fetosinaaʻi ma se isi tagata e ese mai i lau paaga faaipoipo.

O se tane o loo iai i luga o lana kesi i le galuega le ata o lana avā

LE MEA E MAFAI ONA E FAIA:

Ia iloa e isi lou alofa moni i lau paaga e ala i au upu ma gaoioiga
Ia nofouta i faalogona o lau paaga, ma vave faamuta so o se faiā ma se isi tagata pe afai e lē o fiafia ai lau paaga