Le Auala e Aʻoaʻo ai Lau Fanau

Na foafoaina e Ieova le faatulagaga o le aiga, ma na ia tuu atu i mātua le tiute tauave o le tausia o fanau. (Kolose 3:20) O mātua la, e tatau ona aʻoaʻoina fanau ina ia alolofa iā Ieova, ma avea o ni ē e maufaatuatuaina pe a matutua. (2 Timoteo 1:5; 3:15) E ui e tatau i mātua ona iloa mea o loo i loto o a latou fanau, ae e tāua tele foʻi la laʻua faaaʻoaʻoga. O lea, o le auala sili e aʻoaʻo ai fanau i le Afioga a Ieova, o le taumafai lea e faatatauina muamua i lou olaga.​—Salamo 40:8.

1. IA SAʻOLOTO LAU FANAU E TALANOA MAI IĀ TE OE

LE MANATU O LE TUSI PAIA: “Ia faalogologo lelei tagata uma, ae aua le vave ona tautala.” (Iakopo 1:19) E te manaʻo e saʻoloto le talanoa mai a lau fanau iā te oe. E ao ona latou iloa e te nofosauni e faalogologo atu pe a latou talanoa mai. Ia atiaʻe se siʻomaga toʻafilemu ina ia faigofie ai ona faaali mai o latou manatu. (Iakopo 3:18) Pe afai e latou te iloa e te inainā ma faamasinosino, o le a latou natia la o latou faalogona moni. Ia onosaʻi ma ia faamautinoa atu pea i lau fanau, e te alofa tele iā i latou.​—Mataio 3:17; 1 Korinito 8:1.

LE MEA E MAFAI ONA E FAIA:

• Ia faaavanoa lou taimi pe a fia talanoa mai lau fanau

• Ia fai ma masani le talatalanoa ma lau fanau, ae e lē na o taimi e tulaʻi mai ai faafitauli

2. IA MALAMALAMA I O LATOU FAALOGONA MONI

LE MANATU O LE TUSI PAIA: “O lē e faaalia le tofā mamao i se mataupu, e maua e ia le mea lelei.” (Faataoto 16:20) O nisi taimi, e ao ona e iloa le uiga o faamatalaga a lau fanau ina ia e malamalama ai i o latou faalogona moni. E masani ona faatelē e tamaiti se tala pe fai foʻi ni faamatalaga e aunoa ma le mafaufau i ai. O lea, e lē tatau ona e vave ita. “Pe a tali atu se tasi i se mataupu ae e leʻi faalogo i ai, o lona lava valea lea.”​—Faataoto 18:13; 19:11.

LE MEA E MAFAI ONA E FAIA:

• Ia maumauaʻi e aua neʻi faasalavei atu pe e vave ona e ita, e tusa lava po o le ā le tala a lau tama o loo fai mai

• Ia tomānatu i ou faalogona sa iai a o e laʻitiiti ma mea na e faatāuaina

3. IA TASI LE LEO

LE MANATU O LE TUSI PAIA: “Loʻu atalii e, ia e faalogo i le aʻoaʻiga a lou tamā, ma aua e te tuulafoaʻiina le tulafono a lou tinā.” (Faataoto 1:8) Ua tuu mai e Ieova i mātua le tiute tauave o le aʻoaʻoina o fanau. O lea, e ao ona aʻoaʻoina la oulua fanau ina ia faaaloalo ma usiusitaʻi iā te oulua. (Efeso 6:1-3) E mafai e le fanau ona iloa e lē o ʻautasi manatu’ o o latou mātua. (1 Korinito 1:10) E lē tatau ona atagia atu i le lua fanau o loo eseese o oulua manatu i se mataupu, auā e ono amata ai ona latou lē toe faaaloalo iā te oulua.

LE MEA E MAFAI ONA E FAIA:

• Ia talanoa ma malilie faatasi i le auala e aʻoaʻi ai la oulua fanau

• Taumafai e malamalama i manatu o lau paaga, pe afai e eseese o oulua manatu i le auala e aʻoaʻoina ai la oulua fanau

4. FAATULAGA SE AUALA E AʻOAʻO AI LE FANAU

LE MANATU O LE TUSI PAIA: “Ia aʻoaʻo le tama e tusa ma le ala saʻo.” (Faataoto 22:6) E lē otometi ona taulau manuia le aʻoaʻoina o fanau. E manaʻomia ona oulua faatulaga se auala patino e faia ai faapea, e aofia ai ma le auala e aʻoaʻi ai i latou. (Salamo 127:4; Faataoto 29:17) O aʻoaʻiga e aofia ai foʻi le fesoasoani i le fanau e malamalama i le māfuaaga na e faia ai ni tulafono. (Faataoto 28:7) E lē gata i lea, ia aʻoaʻo i latou ina ia naunau i le Afioga a Ieova ma malamalama i taʻiala o loo iai. (Salamo 1:2) O le faia faapea, o le a fesoasoani ai i fanau ina ia maua se lotofuatiaifo lelei.​—Eperu 5:14.

LE MEA E MAFAI ONA E FAIA:

• Ia faatalitonu lau fanau e iai moni lava le Atua o Lē e mafai ona latou faatuatuaina

• Fesoasoani iā i latou e iloa ma ʻalofia so o se tulaga e lamatia ai i faiga lē mamā, e pei o le faauō i so o se tagata i luga o le Initaneti. Ia aʻoaʻo i latou i auala e ʻalofia ai tagata e faaleagaina tamaiti, i feusuaʻiga po o faiga lē mamā