Ua Filifilia e Iesu Ona Aposetolo e 12

Ua pe ā nei o le tausaga ma le ʻafa talu ona faailoa atu e Ioane le Papatiso, o Iesu o le Tamaʻi Mamoe a le Atua. Ina ua amata le faiva a Iesu, na avea ai nisi o tane faamaoni ma ona soo, e pei o Aneterea, Simona Peteru, Filipo, Natanielu (o lē ua igoa foʻi iā Patolomaio), Ioane, ma atonu foʻi ma Iakopo (le uso o Ioane). A o faagasolo taimi, na avea ai le toʻatele o isi ma soo o Keriso.—Ioane 1:45-47.

Ua sauni nei Iesu e filifili ona aposetolo. O i latou nei o le a avea ma ana aumea vavalalata, ma o le a mauaina toleniga faapitoa. Peitaʻi a o leʻi filifilia i latou, ua alu atu Iesu i le mauga, lea atonu e latalata i le sami o Kalilaia ma e lē mamao mai i Kapanaumi. Ua ia tatalo ai i inā i le pō atoa, e talosaga atu i le Atua mo le atamai ma lana faamanuiaga. I le aso e sosoo ai, ua ia valaau atu i ona soo e ō mai iā te ia, ma ua ia filifilia ai loa ona soo e toʻa 12 e avea ma ona aposetolo.

Ua filifilia e Iesu le toʻaono e pei ona taʻua i le amataga o le mataupu, faatasi ai ma Mataio o lē sa valaauina e Iesu a o iai i le ofisa aolafoga. O le isi toʻalima ua filifilia e Iesu, o Iuta (o lē ua igoa foʻi iā Tataio ma o “le atalii o Iakopo”), Simona le Kanana, Toma, Iakopo le atalii o Alefaio, ma Iuta le Sekara.—Mataio 10:2-4; Luka 6:16.

Ua malamalama lelei Iesu i ona aposetolo nei e toʻa 12, talu ai ua leva ona latou faimalaga faatasi. O nisi o i latou o ona tauaiga. O le ʻauso o Iakopo ma Ioane, atonu o tauusoga ia o Iesu. Ua manatu nisi o Alefaio o le uso o Iosefa, le tamāfai o Iesu. Pe afai e saʻo lea manatu, o lona uiga la, o le tauusoga o Iesu Iakopo le atalii o Alefaio.

E faigofie iā Iesu ona manatua igoa o ona aposetolo. Ae faapefea oe? Pe e mafai ona e manatuaina o latou igoa? O se tasi o auala e fesoasoani iā te oe, o le manatua lea e toʻalua aposetolo o Iesu e igoa iā Simona, e toʻalua e igoa iā Iakopo, ma e toʻalua e igoa iā Iuta. O le uso o Simona (Peteru) o Aneterea, ae o le uso o Iakopo (atalii o Sepetaio) o Ioane. O se tasi na o auala e manatua ai igoa o nei aposetolo e toʻavalu. O isi aposetolo e toʻafā e aofia ai le aolafoga (Mataio), o lē na masalosalo iā Iesu (Toma), o lē na valaauina a o iai i lalo o le laau (Natanielu), ma le uō a Natanielu (Filipo).

E toʻa 11 aposetolo e ō mai mai i Kalilaia le itumalo sa ola aʻe ai Iesu. O Natanielu e sau mai i Kana. O Filipo, Peteru, ma Aneterea e ō mai mai i Petesaita. E leʻi umi ae malaga atu Peteru ma Aneterea i Kapanaumi ma nonofo ai i inā. O le nuu foʻi lenā o loo nofo ai Mataio. E nonofo latalata foʻi i Kapanaumi Iakopo ma Ioane, ma e iai foʻi le la pisinisi faifaiva e lata ane i inā. E foliga mai e na o le pau le aposetolo e sau mai i Iutaia, o Iuta le Sekara lea na mulimuli ane faalataina Iesu.