Ua Faateʻia le Toʻatele i Upu a Iesu

O loo aʻoaʻo atu Iesu i se sunako i Kapanaumi e faapea, o ia o le areto moni mai i le lagi. Atonu o le toe faaauauina lea o lana faamatalaga, mai i mea sa ia taʻu atu i tagata na toe foʻi ane mai i le itu i sasaʻe o le sami o Kalilaia. O i latou nei sa fafagaina faavavega i falaoa ma iʻa sa tufatufaina i inā.

Ua faaauau le fetalaiga a Iesu: “Na aai o outou tamā i le manai i le toafa, a ua feoti i latou.” I se faaeseesega ua ia faapea atu: “O aʻu o le areto ola na sau mai i le lagi; pe a ʻai ai se tasi i lenei areto, o le a ola o ia e faavavau. O le areto ou te avatu, o loʻu tino lea e fai ma sui o ola o le lalolagi.”—Ioane 6:48-51.

I le Paseka i le 30 T.A., na fetalai atu ai Iesu iā Nikotemo e faapea o le alofa tele o le Atua i le lalolagi, ua ia foaʻi mai ai lona Atalii e avea ma Faaola. Peitaʻi, o lea ua faamamafa atu e Iesu le manaʻomia ona aai i lona tino, e ala i le faaalia o le faatuatua i le taulaga o le a ia faia. O le auala lea e maua ai le ola e faavavau.

Peitaʻi ua teena e tagata fetalaiga a Iesu ma faapea ane: “E faapefea ona aumai e lenei tagata lona tino tatou te aai ai?” (Ioane 6:52) E finagalo Iesu ia latou malamalama o loo ia tautala i se auala faafaatusa. O lana faamatalaga e sosoo ai, ua faailoa mai ai le uiga o lana fetalaiga.

ʻPe afai tou te lē aai i le tino o le Atalii o le tagata, ma inu i lona toto, e lē i totonu iā te outou le ola. O lē e ʻai i loʻu tino ma inu i loʻu toto, e maua e ia le ola e faavavau, auā o loʻu tino o le meaʻai moni lea, ma o loʻu toto o le meainu moni lea. O lē e ʻai i loʻu tino ma inu i loʻu toto e tumau ona autasi ma aʻu.’—Ioane 6:53-56.

E mautinoa le lē logolelei o nei upu i tagata Iutaia. Atonu e latou te manatu o loo fautua atu Iesu ina ia ʻaina tino o tagata, pe solia foʻi le tulafono a le Atua e ala i le ʻaina o le toto. (Kenese 9:4; Levitiko 17:10, 11) Peitaʻi, e lē o faasino atu Iesu i le aai i le tino moni o se tagata po o le inuina foʻi o le toto moni. Nai lo o lea, o loo uiga atu lana fetalaiga e faapea o i latou uma e fia maua le ola e faavavau, e tatau ona faaalia le faatuatua i le taulaga o le a ia faia, pe a ia ofoina atu lona tino lelei atoatoa ma faamaligiina lona toto. Peitaʻi, e lē o malamalama foʻi le toʻatele o ona soo i lenei aʻoaʻoga. Ua tali atu nisi: “E mataʻutia nei upu; o ai se isi e fia faalogo i ai?”—Ioane 6:60.

Ua silafia e Iesu ua tomumumu nisi o ona soo, o lea ua ia fetalai atu ai: ʻPo ua outou tausuai ea i lenei mea? Ae e faapefea pe a outou vāai atu, ua alu aʻe le Atalii o le tagata i le mea na iai muamua? O upu ua ou fai atu ai iā te outou, o le agaga lea ma le ola. Ae e lē talitonu nisi o outou.’ O lea, ua tuua ai Iesu e le toʻatele o ona soo ma lē toe mulimuli atu iā te ia.—Ioane 6:61-64.

Ua fesili atu nei Iesu i ona aposetolo e toʻa 12: “Po ua outou fia ō foʻi ma outou?” Ua tali mai Peteru: “Le Alii e, o ai a matou ō i ai? Ua iā te oe upu o le ola e faavavau. Ua matou talitonu ma matou iloa o oe o Lē e Paia a le Atua.” (Ioane 6:67-69) Maʻeu se faailoaga o le faamaoni, e ui lava e lē o malamalama atoatoa Peteru ma isi aposetolo i lea taimi, i le uiga tonu o le aʻoaʻoga a Iesu.

E ui i le fiafia o Iesu i le tali a Peteru, ae ua toe fetalai atu o ia: “Po ou te leʻi filifilia ea outou e toʻasefulu lua? Ae o le tasi o outou ua faitala taufaaleaga.” (Ioane 6:70) O loo faasino atu Iesu iā Iuta le Sekara. E foliga mai o le taimi lea, ua silafia e Iesu ua amata ona uia e Iuta se ala sesē.

E ui i lea, o loo fiafia pea Iesu i le iloaina o loo mulimuli atu pea iā te ia Peteru ma isi aposetolo, ma faia se sao i le galuega faasaoola o loo ia faia.