“O le Toetū ma le Ola”

Ua tuua e Iesu Perea ma ua taunuu atu nei i le taufaasiʻusiʻuga o Petania, o se nuu pe tusa ma le lua maila (3 km) le mamao i le itu i sasaʻe o Ierusalema. O loo faavauvau Maria ma Mareta i le maliu o lo la tuagane o Lasalo, ma ua ō atu le toʻatele o tagata e faamāfanafana iā i laʻua.

Mulimuli ane, ua alu atu se tasi iā Mareta ma taʻu atu i ai o lea ua maliu atu Iesu. O lea ua faanatinati atu ai o ia e faafeiloaʻi Iesu. Ua faamatala atu e Mareta mea na la mafaufau i ai ma lona uso mo aso e fā: “Le Alii e, ana e iai i inei, semanū e lē oti loʻu tuagane.” E lē faapea ua leai se faamoemoe o Mareta, auā ua ia toe faapea atu iā Iesu: “Ua ou iloa lava, o mea uma e te talosaga atu ai i le Atua, e foaʻi mai lava e le Atua iā te oe.” (Ioane 11:21, 22) O lea e talitonu Mareta, atonu e mafai lava ona fesoasoani Iesu i lona tuagane e ui ua maliu o ia.

Ua fetalai atu Iesu iā Mareta: “O le a toetū lou tuagane.” Ua manatu Mareta o loo faasino atu le fetalaiga a Iesu, i le toetū i le lalolagi i le lumanaʻi. O le faamoemoe foʻi lea sa iai iā Aperaamo ma isi. Ua faailoa atu e Mareta lona mautinoa o le a tupu moni lenei mea i le faapea atu: “Ou te iloa e toetū o ia i le toetū i le aso mulimuli.”—Ioane 11:23, 24.

Ae faamata e mafai ona aumaia e Iesu le mapusaga i lea lava taimi? Ua faamanatu atu e Iesu iā Mareta, ua tuuina mai e le Atua iā te ia le mana e toe faatutū ai ē ua maliliu i le fetalai atu: “O lē e faatuatua mai iā te aʻu, e ui ina oti o ia, ae e toe ola mai lava; a o ē o loo ola ma faatuatua mai iā te aʻu, e lē oti lava.”—Ioane 11:25, 26.

E lē o faapea mai Iesu e lē oo lava le oti i ona soo o loo ola i lenā taimi, auā o le a oo foʻi iā te ia le oti e pei ona ia fetalai atu ai i ona aposetolo. (Mataio 16:21; 17:22, 23) O loo faamamafa atu e Iesu, o le faaalia o le faatuatua iā te ia e mafai ona iʻu atu ai i le ola e faavavau. O le a maua e le toʻatele o i latou e faaalia le faatuatua le ola e faavavau, pe a toe faatutūina mai i le oti. Ae e iai foʻi ē e faamaoni o le a soifua i le iʻuga o lenei faiga o mea, atonu e lē oo i ai le oti. Po o le ā lava le tulaga, o i latou uma e faaalia le faatuatua iā Iesu e mafai ona mautinoa e latou te maua le faamoemoe o le ola e faavavau.

Ae pe e mafai e Iesu o lē na fetalai “O aʻu o le toetū ma le ola,” ona fesoasoani iā Lasalo o lē ua fā nei aso talu ona maliu? Ua fesili atu Iesu iā Mareta: “Pe e te talitonu i lenei mea?” Ua tali mai Mareta: “Ioe, le Alii e, ua ou talitonu o oe o le Keriso, o le Alo o le Atua, o Lē ua maliu mai i le lalolagi.” O le faatuatua o Mareta e mafai e Iesu ona faia se gaoioiga i lenā lava aso, ua ia faanatinati atu ai i le fale i lona uso ma musumusu atu iā te ia: “Ua oo mai le Aʻoaʻo ma o loo fia vaai iā te oe.” (Ioane 11:25-28) O lea, ua tuua ai e Maria le fale. Ua mulimuli atu iā te ia isi tagata, ma le manatu o loo alu atu o ia i le tuugamau o Lasalo.

Nai lo o lea, ua alu atu Maria iā Iesu ma faapaʻū i ona vae, ua tagi masūsū, ma toe faaleo atu faalogona sa iai i lona uso e faapea: “Le Alii e, ana e iai i inei, semanū e lē oti loʻu tuagane.” Ua silasila atu Iesu iā Maria o loo tagi, ma o loo fetagisi foʻi le motu o tagata, ona ōi ai lea o ia ma ua ootia lona finagalo. Ona tagi ai lea o ia. Ua matuā pāʻia loto o tagata o loo vaavaai ane i lenei mea. Ua fesili isi e faapea: ʻAfai e mafai e Iesu ona faapupulaina mata o le tamāloa tauaso, pe e lē mafai foʻi la ona ia taofia le oo o le oti i lenei tagata?’—Ioane 11:32, 37.