Ua Faamaopoopo Ina ia Faia le Finagalo o Ieova

I LE lalolagi aoao, e faitau afe faalapotopotoga o loo iai. O faalapotopotoga faalelotu, faaupufai, faapisinisi ma isi lava faalapotopotoga. E eseese uma o latou sini, fuafuaga ma manatu, ma e eseese uma tagata o loo auai i nei faalapotopotoga. Peitaʻi, e iai se faalapotopotoga e matilatila ese mai ai. O loo faaalia manino mai i le Afioga a le Atua lenā faalapotopotoga, o Molimau a Ieova. E matilatila ese Molimau a Ieova, ona e latou te pipii atu i mataupu silisili o le Tusi Paia i mea uma e latou te faia.

² O se mea e fiafia ai, ona o lea ua e faifaimea faatasi ma le faalapotopotoga a Ieova. Ua uma ona e faamaonia iā te oe lava po o le ā le finagalo o le Atua. O lea la, ua e faia ai lona finagalo i le taimi lenei. (Sala. 143:10; Roma 12:2) Ua e auauna nei o se faifeʻau maelega faatasi ma le ʻauuso alolofa i le lalolagi aoao. (2 Kori. 6:4; 1 Pete. 2:17; 5:9) E pei ona folafola mai i le Afioga a le Atua, o lou faia faapea e te maua ai le fiafia ma le anoanoaʻi o faamanuiaga. (Faata. 10:22; Mare. 10:30) E ala i lou faia o le finagalo o Ieova, ua e sauniuni ai mo se lumanaʻi matagofie e tumau e faavavau.​—1 Timo. 6:18, 19; 1 Ioa. 2:17.

³ E iai iā Ieova o Lē e Sili na Foafoaina i tatou se faalapotopotoga e tutasi i le lalolagi aoao. E pulea e ia lenā faalapotopotoga, ma o ia o le Ulu o mea uma lava. E tatou te faatuatuaina atoatoa o ia. O ia o lo tatou Faamasino, o lo tatou Faitulafono ma o lo tatou Tupu. (Isa. 33:22) I le avea ai o ia o se Atua maopoopo, ua ia faamaopoopoina ai faatulagaga ina ia mafai ai ona tatou “galulue faatasi ma ia,” e faataunuu lona finagalo.​—2 Kori. 6:1, 2.

⁴ A o latalata mai le iʻuga o lenei faiga o mea, o loo tatou agaʻigaʻi pea i luma i lalo o le taʻitaʻiga a le Tupu tofia, o Keriso Iesu. (Isa. 55:4; Faaa. 6:2; 11:15) O Iesu lava ia na valoia mai o le a sili atu galuega e faia e ona soo, nai lo o mea na ia faataunuuina i lana faiva a o iai i le lalolagi. (Ioa. 14:12) E moni lea manatu pe a fua i le umi o le taimi e latou te faia ai le talaʻiga, ma le faatupulaʻia o le fuainumera o le ʻautalaʻi. O le a sili atu foʻi ona telē le oganuu e galulue ai soo o Iesu. O le a latou folafolaina atu le tala lelei o le Malo i tuluʻiga uma o le lalolagi.​—Mata. 24:14; 28:19, 20; Galu. 1:8.

⁵ Ua faamaonia mai le faataunuuina o mea na valoia e Iesu. Peitaʻi, na taʻua manino mai e Iesu, o le galuega o le folafolaina atu o le tala lelei, o le a faaiʻuina i le taimi atofaina a Ieova. Ua faailoa mai e le Afioga faavaloaga a le Atua, ua lata mai lava le aso tele ma le mataʻutia o Ieova.​—Ioe. 2:31; Sefa. 1:14-18; 2:2, 3; 1 Pete. 4:7.

⁶ A o tatou malamalama lelei i le finagalo o Ieova i lenei vaitaimi o le iʻuga, ua manaʻomia ai ona faateleina a tatou taumafaiga e faia mea o loo ia faafinagaloina mai iā i tatou. O lea, e manaʻomia ai ona tatou faamasani lelei i le auala o loo faagaoioi ai le faalapotopotoga a le Atua, ma ia galulue felagolagomaʻi atoatoa ma lenā faalapotopotoga. O loo faagaoioia lenei faalapotopotoga e faavae i le Afioga a le Atua, lea e aofia ai mataupu silisili, poloaʻiga, tulafono, faatonuga ma aʻoaʻoga.​—Sala. 19:7-9.

⁷ Pe a mulimuli tagata o Ieova i nei taʻiala o loo faavae mai i le Tusi Paia, o le a latou galulue ma nonofo faatasi ai i le filemu ma le autasi. (Sala. 133:1; Isa. 60:17; Roma 14:19) O le ā ua faamalosia ai la tatou faiā ma o tatou uso i le lalolagi aoao? O le alofa. O le alofa lea ua uunaʻia ai i tatou e gaoioi ma ua tatou oofu foʻi i le alofa. (Ioa. 13:34, 35; Kolo. 3:14) Talu ai ua faamanuiaina i tatou e Ieova i le autasi, ua tatou piiama atu ai la i le vaega faalelagi o lana faalapotopotoga.

LE VAEGA FAALELAGI O LE FAALAPOTOPOTOGA A IEOVA

⁸ Na vaaia e perofeta o Isaia, Esekielu ma Tanielu ni vaaiga o le vaega faalelagi o le faalapotopotoga a Ieova. (Isa. mataupu 6; Eseki. mataupu 1; Tani. 7:9, 10) Na vaaia foʻi e le aposetolo o Ioane se vaaiga o lenei faatulagaga faalelagi, ma na ia faamatalaina mai se faaataga o lenā faatulagaga i le tusi o Faaaliga. Na ia vaaia Ieova o loo afio i se nofoālii mamalu, ma o loo faatasi ai ma agelu o loo faalauiloa atu e faapea: “E paia, e paia, e paia Ieova le Atua o Lē e ona le malosi uma lava, o lē o loo soifua, na soifua foʻi, o le a afio mai.” (Faaa. 4:8) Sa vaaia foʻi e Ioane, ʻo loo tū i le ogatotonu o le nofoālii se tamaʻi mamoe,’ o le Tamaʻi Mamoe a le Atua, o Iesu Keriso lea.​—Faaa. 5:6, 13, 14; Ioa. 1:29.

⁹ O le vaaiga lea na vaaia ai Ieova o afio i se nofoālii mamalu, ua faailoa mai ai, o ia o le Ulu o lenei faatulagaga faalelagi. Ua faamatalaina Ieova ma lona tulaga e sili ona maualuga i le 1 Nofoaiga a Tupu 29:11, 12 e faapea: “Ieova e, o oe e ou le silisili ese, o le malosi, o le matagofie, o le mamalu, ma le malualii; auā o oe e ona mea uma i le lagi ma le lalolagi. Ieova e, o oe e ou le malo, ma ua e faasilisilia oe e silisili i mea uma lava. E mai iā te oe ʻoa ma le mamalu, o oe foʻi e pule i mea uma; ma o loo i lou aao le mana ma le malosi, e mafai foʻi e lou aao ona faamamaluina ma faamalosia tagata uma lava.”

¹⁰ I le avea ai ma sē e galulue faatasi ma Ieova, ua iai Iesu Keriso i se tulaga e sili ona maualuga i le lagi ma ua tuuina atu iā te ia le tele o le pule. O le mea moni, ua ʻtuuina e le Atua mea uma lava i lalo o ona vae, ma tofia o ia e fai ma ulu i mea uma lava mo le lelei o le faapotopotoga.’ (Efe. 1:22) Na faapea mai Paulo e faatatau iā Iesu: ʻUa faaeaina o ia e le Atua i se tulaga e sili ona maualuga, ma avatu ma le agalelei iā te ia le suafa e sili i isi igoa uma, ina ia tootutuli tulivae uma lava i le suafa o Iesu, o i latou o i le lagi, ma i latou o i le lalolagi, ma i latou o i lalo ifo o le eleele, ma ia taʻutaʻu atu e laulaufaiva uma o Iesu Keriso o le Alii, ina ia faamamaluina ai le Atua le Tamā.’ (Fili. 2:9-11) O lea la, e mafai ona tatou maufaatuatuaina atoatoa le taʻitaʻiga amiotonu a Iesu Keriso.

¹¹ Na vaaia foʻi e Tanielu i se vaaiga Lē e mai anamuā ona aso o afio i Lona nofoālii i le lagi, ma “ua auauna pea iā te ia le afe o ni afe, ma ua tutū pea i ona luma le selau miliona” o agelu. (Tani. 7:10) Ua faasino atu le Tusi Paia i lenei ʻautau o agelu e faapea ʻo agaga uma i latou mo le auaunaga, ua aauina atu e auauna mo i latou o ē o le a maua le faaolataga.’ (Epe. 1:14) Ua faamaopoopoina nei agelu uma i ni tulaga pule i totonu o le faalapotopotoga a le Atua.​—Kolo. 1:16.

¹² Pe a faaalu se taimi e manatunatu loloto ai i nei vala o le vaega faalelagi o le faalapotopotoga a Ieova, o le a tatou malamalama ai i le auala na tali atu ai Isaia, ina ua ia ʻiloa atu Ieova o loo afio i lona nofoālii sili ma le maualuga,’ ma “ua tutū serafi e latalata ane” iā te ia. Na faapea mai Isaia: “Oi talofa iā te aʻu! O le a ou oti auā o aʻu o se tagata e lē mamā laugutu, o aʻu foʻi ua ou nofo faatasi ma tagata e lē mamā o latou laugutu; ae ua vaai oʻu mata i le Tupu o Ieova o ʻau lava ia!” O le mea moni na matuā maofa Isaia ma ia iloa lona faatauvaa, ina ua ia vaaia le telē ma le mamalu o le faalapotopotoga a Ieova. Na matuā pāʻia lona loto i lenei vaaiga, ma ina ua sau se valaau mai i le lagi e faatatau i se galuega faapitoa o le faailoa atu o faamasinoga a Ieova, na ia tali atu e faapea: “O aʻu lenei! Inā auina atu ia aʻu.”​—Isa. 6:1-5, 8.

¹³ O le iloa lelei o le faalapotopotoga a Ieova, ma faaalia le lototalisapaia mo lenā faalapotopotoga, ua uunaʻia ai Ona tagata e tali atu e pei o Isaia. A o agaʻi pea i luma le faalapotopotoga, e tatou te tauivi ina ia piiama atu pea i ai. E tatou te taumafai malosi e faamaonia atu, o loo tatou maufaatuatuaina le faalapotopotoga a Ieova i aso nei.

O LOO AGAʻI I LUMA LE FAALAPOTOPOTOGA A IEOVA

¹⁴ I le mataupu 1 o le valoaga a Esekielu, ua faaata mai ai Ieova o loo tiʻetiʻe i luga o se kariota tele faalelagi. O lenei kariota matagofie, o loo faaata mai ai le vaega lē vaaia o le faalapotopotoga a Ieova. O loo faasino atu le tiʻetiʻe o Ieova i le kariota, i lona faatonutonuina ma le alofa o lana faalapotopotoga ma faaaogā e tusa ai ma lona finagalo.​—Sala. 103:20.

¹⁵ E tofu lava uili o lenei kariota ma se isi uili i totonu. E tutusa le lapotopoto o nei uili ma e faalava le uili pito i totonu i le uili o loo i le pito i fafo. O le māfuaaga lea ua taʻua ai e mafai ona “taavavale atu i itu uma e fā” nei uili. (Eseki. 1:17) E mafai ona suia faafuaseʻi itu e taavavale i ai nei uili. Peitaʻi, e lē faapea ai e lē o faatonutonuina ma faatautaia lelei lenei kariota. E lē o tuufauina e Ieova lana faalapotopotoga e agaʻi atu i so o se itu e fia alu atu i ai. Ua faapea mai le Esekielu 1:20: ʻE ō atu lava uili i le mea ua uunaʻia e le agaga e ō i ai.’ O lea, e ala i lona agaga paia, e faapogaia e Ieova lana faalapotopotoga e agaʻi i so o se mea ua ia finagalo i ai. O le fesili e tatau ona tatou fesili ifo ai iā i tatou lava: ʻPo o oʻu piiama atu i le faalapotopotoga a Ieova?’

¹⁶ O le piiama atu i le faalapotopotoga a Ieova, e lē na o le tau ina auai i sauniga ma le faiva i le fanua. O le mea autū lava, o lo tatou piiama atu e fesootaʻi i lo tatou agaʻigaʻi i luma ma le tuputupu aʻe faaleagaga. E tatou te ʻfaamautinoa mea e sili ona tāua,’ ma faaaogā sauniuniga o loo fafagaina ai i tatou faaleagaga. (Fili. 1:10; 4:8, 9; Ioa. 17:3) E tatau foʻi ona tatou manatua, pe a maopoopo lelei se mea, o lona uiga o loo lelei ona faamaopoopoina ma o loo iai se agaga felagolagomaʻi. O lea, e tatau ona tatou iloa le tāua o le faaaogāina lelei o o tatou taimi, malosi, tomai ma alagāʻoa ua tuuina mai e Ieova iā i tatou, e faataunuu ai lana galuega. A o tatou piiama atu i le kariota faalelagi a Ieova, e tatou te ola e ōgatusa ai ma le feʻau o loo tatou faalauiloa atu.

¹⁷ E ala i le fesoasoani a le faalapotopotoga a Ieova, ua mafai ai ona tatou agaʻi i luma i le faia o le finagalo o le Atua. Ia manatua, o Lē o loo tiʻetiʻe i lenei kariota faalelagi, o Ieova. O lea la, o le piiama atu pea i lana kariota e faaalia ai lo tatou faaaloalo iā te ia, ma maufaatuatuaina o ia o lo tatou Papa. (Sala. 18:31) Ua folafola mai i le Tusi Paia: “E aumaia lava e Ieova le malosi i lona nuu. E faamanuia foʻi e Ieova lona nuu i le filemu.” (Sala. 29:11) I le avea ai ma vaega o le faalapotopotoga a Ieova i aso nei, ua tatou maua le malosi mai iā te ia, ma le filemu lea o loo ia faamanuiaina ai ona tagata ua faamaopoopoina. E mautinoa o le a faaauau pea ona tatou maua le anoanoaʻi o faamanuiaga, a o tatou faia le finagalo o Ieova i le taimi lenei seʻia oo i le faavavau.