“Ia Manatua i Latou o Loo Taʻimua iā te Outou”

E MAFAI ona faaliliuina upu a le aposetolo o Paulo o loo faamauina i le Eperu 13:7 e faapea: “Ia manatua i latou o loo avea ma pule iā te outou.” I le Penetekoso 33 T.A. ma faasolo mai ai, na faatino ai e aposetolo faamaoni o le Alii o Iesu Keriso le matafaioi o se vaega pule. Sa taʻimua le vaega pule i le saunia o taʻiala mo le faapotopotoga Kerisiano na faatoʻā faavaeina. (Galu. 6:2-4) Pe tusa o le 49 T.A., ua faatoʻateleina sui o le vaega pule ma ua aofia ai ma i latou e lē o ni aposetolo. Ina ua faia e le vaega pule le faaiʻuga i le mataupu e faatatau i le peritomeina, na aofia ai i lea vaega le “ʻauaposetolo ma toeaina i Ierusalema.” (Galu. 15:1, 2) O lo latou tiute tauave na iai o le tilofaʻia lea o mataupu na aafia ai Kerisiano i so o se vaipanoa. Na latou auina atu tusi ma poloaʻiga e faamalosia ai faapotopotoga, ma mafai ai e le ʻausoo ona tumau i le autasi i manatu ma gaoioiga. Na usiusitaʻi ma gauaʻi atu faapotopotoga i le taʻitaʻiga a le vaega pule. O le iʻuga, na faamanuia Ieova iā i latou ma na faatuputeleina ai faapotopotoga.​—Galu. 8:1, 14, 15; 15:22-31; 16:4, 5; Epe. 13:17.

² Ina ua mavae le maliliu o le ʻauaposetolo, e toʻatele ē na liliu ese mai i le upu moni. (2 Tesa. 2:3-12) E pei lava ona valoia i le talafaatusa a Iesu i le saito ma le vao leaga, na lūlūina vao leaga (Kerisiano faatagāfai) i le fanua o saito (Kerisiano faauuina). A o faagasolo mai le tele o senituri, na faaauau pea ona ola faatasi nei vaega seʻia oo i le taimi o le seleselega, “o le taufaaiʻuiʻuga lea o le faiga o mea a le lalolagi.” (Mata. 13:24-30, 36-43) Na faaauau pea ona maua e sui taʻitoʻatasi o Kerisiano faauuina na ola ai i lea taimi le finagalo malie o Iesu, peitaʻi e leʻi iai se vaega pule. E leʻi iai se auala manino i luga o le lalolagi sa faaaogā e Iesu i lenā taimi, e aumaia ai taʻiala i ona soo. (Mata. 28:20) E ui i lea, na ia valoia o le a iai se suiga pe a oo i le taimi o le seleselega.

³ “O ai la le pologa faamaoni ma le faautauta?” Na faaaogā e Iesu lenei fesili e faatomua ai se talafaatusa. O lenei talafaatusa, o se vala o “le faailoga” na ia taʻua e faatatau i “le taufaaiʻuiʻuga o le faiga o mea a le lalolagi.” (Mata. 24:3, 42-47) Na faailoa mai e Iesu o le a galue mamafa lenei pologa faamaoni, i le sauniaina o meaʻai faaleagaga “i le taimi tatau” mo tagata o le Atua. Sa faaaogā e Iesu se vaega o tane e taʻimua i le uluaʻi senituri nai lo o se tagata e toʻatasi. I se tulaga tutusa, e lē o se tagata e toʻatasi le pologa faamaoni lea ua faaaogā e Iesu i le taufaaiʻuiʻuga o lenei faiga o mea.

MĀTAULIAINA “LE POLOGA FAAMAONI MA LE FAAUTAUTA”

⁴ O ai na tofia e Iesu e fafagaina ona soo? E talafeagai lona faaaogāina o Kerisiano faauuina o loo i le lalolagi. O loo faasino atu le Tusi Paia iā i latou “o ositaulaga ua avea ma tupu,” ma ua tofiaina e “ʻfaalauiloa atu uiga silisili ona lelei’ o lē na valaauina [i latou] mai i le pōuliuli i lona malamalama ofoofogia.” (1 Pete. 2:9; Mala. 2:7; Faaa. 12:17) Pe o faia aʻe le pologa faamaoni i Kerisiano faauuina uma o loo i le lalolagi? E leai. Ina ua fafagaina faavavega e Iesu le motu o tagata e toʻa 5,000 tamāloloa, e lē aofia ai fafine ma tamaiti, sa ia tufatufa atu meaʻai i le ʻausoo, ona avatu lea e le ʻausoo i le motu o tagata. (Mata. 14:19) I lenā auala, na ia fafagaina ai le toʻatele e ala atu i se vaega toʻaitiiti. O le auala foʻi lenā o loo ia saunia mai ai meaʻai faaleagaga i aso nei.

⁵ O lea, e faia aʻe “le auauna pule e faamaoni ma faautauta” i se vaega toʻaitiiti o uso faauuina, o loo faia tuusaʻo so latou sao i le sauniunia ma le tufatufaina atu o meaʻai faaleagaga, a o faagasolo le faatasi mai o Keriso. (Luka 12:42) A o faagasolo aso e gata ai, o loo auauna faatasi i le ofisa ulu uso faauuina o loo faia aʻe ai le “pologa faamaoni ma le faautauta.” I aso nei, o uso faauuina nei o loo faia aʻe ai le Vaega Pule o Molimau a Ieova.

⁶ O loo faaaogāina e Iesu le Vaega Pule e faailoa mai faamatalaga e faatatau i le faataunuuina o valoaga o le Tusi Paia. O loo aumaia foʻi e le Vaega Pule taʻiala i le taimi talafeagai, i auala e faatatauina ai mataupu silisili o le Tusi Paia i le olaga i aso faisoo. O loo tufatufaina atu nei meaʻai faaleagaga e ala i faapotopotoga a Molimau a Ieova i le lalolagi aoao. (Isa. 43:10; Kala. 6:16) I taimi o le Tusi Paia, na tofia se pologa maufaatuatuaina po o se auauna pule, e vaavaaia mea a le aiga. I se tulaga tutusa, ua tuuina atu i le pologa faamaoni ma le faautauta se tiute tauave o le vaavaaia lea o le ʻauaiga o le faatuatua. O loo vaavaaia foʻi e le pologa faamaoni meatotino a le faalapotopotoga, le galuega talaʻi, o polokalame mo fonotaga ma tauaofiaga, tofiaina o ovasia e galulue i vaega eseese o le faalapotopotoga, ma le saunia o lomiga faale-Tusi Paia. O nei sauniuniga uma e mo le lelei o le “ʻaufaigaluega.”​—Mata. 24:45.

⁷ O ai la le “ʻaufaigaluega”? E faasino atu le ʻaufaigaluega i ē uma o loo fafagaina faaleagaga. I le tauamatamataga o aso e gata ai, o le ʻaufaigaluega, o i latou uma o ni ē faauuina. Ae mulimuli ane, na aofia ai foʻi i le ʻaufaigaluega le motu o tagata e toʻatele o “isi mamoe.” (Ioa. 10:16) E maua uma e le ʻaufaauuina ma isi mamoe meaʻai faaleagaga, o loo tufatufaina mai e le pologa faamaoni.

⁸ Pe a afio mai Iesu e faalauiloa ma faaoo mai le faamasinoga i lenei faiga leaga o mea a o faagasolo le puapuaga tele, o le a ia tofia ai le pologa faamaoni e “vaavaaia ana mea uma.” (Mata. 24:46, 47) O le a maua e i latou o loo faia aʻe ai le pologa faamaoni lo latou tofi i le lagi. O i latou faatasi ai ma isi sui uma o le 144,000, o le a tofia e vaavaaia mea uma a Keriso. E ui o le a lē toe iai se pologa faamaoni ma le faautauta i le lalolagi i lenā taimi, ae o le a saunia mai pea e Ieova ma Iesu taʻiala mo tagatānuu o le Malo faa-Mesia i le lalolagi, e ala mai iā i latou ua tofia o ni “perenise.”​—Sala. 45:16.

AISEĀ E TATAU AI ONA “MANATUA I LATOU O LOO TAʻIMUA”?

⁹ E anoanoaʻi māfuaaga e tatau ai ona tatou “manatua i latou o loo taʻimua,” ma faamaonia atu lo tatou maufaatuatuaina o i latou. O le ā le aogā o lo tatou faia faapea? Na tusi le aposetolo o Paulo: “O loo leoleoina e i latou o outou ola talu ai e tatau ona latou fai atu se tala; ina ia latou faia ma le olioli ae e lē ma le ōi, auā e leaga lea mo outou.” (Epe. 13:17) E tāua tele la ona tatou usiusitaʻi ma gauaʻi atu i faatonuga mai i ē o loo taʻimua, auā o loo latou leoleoina i tatou mo lo tatou lelei ma le puipuiga faaleagaga.

¹⁰ Na faapea mai Paulo i le 1 Korinito 16:14: “Ia faia a outou mea uma lava i le alofa.” O filifiliga uma e faia mo tagata o le Atua e faavae i le uiga silisili lenei o le alofa. O loo faamatalaina le alofa i le 1 Korinito 13:4-8 e faapea: “E faapalepale ma e agalelei le alofa. E lē lotoleaga le alofa, e lē gugutu, e lē faafefeteina, e lē amio valea, e lē saʻili mo lona lava lelei, e lē itaitagofie. E lē faitauina mea leaga e fai atu iā te ia. E lē fiafia i le amiolētonu, ae e fiafia i le mea moni. E onosaʻi i mea uma, e talitonu i mea uma, e faamoemoe i mea uma, e tumau i mea uma. E lē uma le alofa.” Talu ai e faavae filifiliga uma e faia mo le lelei o auauna a Ieova i le alofa, ua alagatatau ai la ona tatou lagona le malupuipuia i lalo o lea taʻitaʻiga. E sili atu i lenā, o le auala lea o loo faaatagia mai ai le alofa o Ieova.

¹¹ E pei ona sa faia i le uluaʻi senituri, o loo faaaogā foʻi e Ieova i aso nei tane e lē lelei atoatoa e vaavaaia ona tagata. E ui i o latou tulaga lē lelei atoatoa, na faaaogā e Ieova tagata i aso ua mavae e faataunuu lona finagalo. Na fausia e Noa le vaa, ma talaʻi atu e faatatau i le faaumatiaga na faaloloʻi ane i ona aso. (Kene. 6:13, 14, 22; 2 Pete. 2:5) Na tofia Mose e na te taʻitaʻia ese le nuu o Ieova mai i Aikupito. (Eso. 3:10) Na faagaeeina tane lē lelei atoatoa e tusia le Tusi Paia. (2 Timo. 3:16; 2 Pete. 1:21) O le faaaogāina la e Ieova o tane lē lelei atoatoa i aso nei e faatonutonu le talaʻiga ma le galuega o le faia o soo, e lē tatau ona avea ma māfuaaga e tatou te lē faatuatuaina ai le faalapotopotoga a le Atua. Nai lo o lea, e faamalosia ai i tatou i le iloaina pe ana leai le lagolagosua a Ieova, e lē mafai ona faataunuuina e le faalapotopotoga mea uma ua ausia i le taimi lenei. Ua faamaonia mai e le pologa faamaoni o loo taʻitaʻia i latou e le agaga o Ieova, pe a fua i mea na latou tofo i ai, e aofia ai foʻi tulaga faigatā. Ua liligi mai le anoanoaʻi o faamanuiaga i le vaega vaaia o le faalapotopotoga a Ieova i aso nei. O lea, ia tatou lagolagoina ma le lotoatoa ma maufaatuatuaina lea faalapotopotoga.

AUALA E FAAALIA AI LO TATOU MAUFAATUATUAINA O IEOVA MA ANA FAATULAGAGA

¹² E faaalia e uso ua tofia e taʻimua i le faapotopotoga lo latou maufaatuatuaina o Ieova ma ana faatulagaga, e ala i le talia ma le fiafia o o latou tiute tauave ua tofia i ai, ma faatinoina ma le faamaoni. (Galu. 20:28) I le avea ai ma tagata talaʻi o le Malo, e tatou te auai ma le maelega i le galuega talaʻi mai i lea fale i lea fale, faia o toe asiga faapea suʻesuʻega faale-Tusi Paia. (Mata. 24:14; 28:19, 20) Ina ia tatou maua atoatoa aogā mai i meaʻai faaleagaga o loo saunia mai e le pologa faamaoni, e tatou te sauniuni lelei ma auai i sauniga faa-Kerisiano e aofia ai fonotaga ma tauaofiaga. E tele foʻi aogā e tatou te maua mai i faalaeiauga o loo fefaasoaaʻi ai ma o tatou uso, i taimi o nei faatasitasiga faa-Kerisiano.​—Epe. 10:24, 25.

¹³ E faaalia lo tatou maufaatuatuaina o le faalapotopotoga, e ala i le lagolagoina i foaʻi tauofo faaletino. (Faata. 3:9, 10) Pe a tulaʻi mai ni tulaga ua manaʻomia ai e o tatou uso le fesoasoani faaletino, e vave lava ona tatou tali atu e aunoa ma le faatuai. (Kala. 6:10; 1 Timo. 6:18) Ua tatou faia nei mea ona o lo tatou alofa faaleuso. E tatou te tulimataʻia i taimi uma avanoa e faaali atu ai iā Ieova ma lana faalapotopotoga, lo tatou lototalisapaia mo mea lelei ua foaʻi mai mo i tatou.​—Ioa. 13:35.

¹⁴ E faaalia foʻi lo tatou maufaatuatuaina o le faalapotopotoga, i lo tatou lagolagoina lea o faaiʻuga e faia e uso ua tofia e taʻimua i le faalapotopotoga. E aofia ai i le faia faapea, lo tatou mulimuli atu ma le lotomaulalo i taʻiala mai i uso e pei o ovasia o le matagaluega ma toeaina i faapotopotoga. O nei uso e aofia iā “i latou o loo taʻimua,” lea e tatau ona tatou usiusitaʻi ma gauaʻi i ai. (Epe. 13:7, 17) E tusa pe e tatou te lē malamalama atoatoa i māfuaaga e latou te faia ai nisi o faaiʻuga, ae e tatou te iloa o le lagolagoina o na faaiʻuga e iʻu ai i ni iʻuga lelei. O le faia faapea, ua faamanuiaina ai i tatou e Ieova ona o lo tatou usiusitaʻi i lana Afioga ma lana faalapotopotoga. Ua faaalia ai foʻi lo tatou gauaʻi i lo tatou Matai o Iesu Keriso.

¹⁵ O lea la, e anoanoaʻi māfuaaga ua alagatatau ai ona tatou maufaatuatuaina le pologa faamaoni ma le faautauta. O loo taumafai Satani le atua o lenei faiga o mea, i le mea e gata ai lona malosi, e faalumaina le suafa o Ieova ma lana faalapotopotoga. (2 Kori. 4:4) Aua lava neʻi o tatou lolo atu i togafiti leaga a Satani! (2 Kori. 2:11) Ua ia iloa “ua puupuu lona taimi” o totoe, ona lafoina loa lea o ia i le tō. O lea ua ia taumafai malosi ai e faaliliu ese le toʻatele o tagata o Ieova i le tele e mafai ai, ma latou fulitua atu ai i le Atua. (Faaa. 12:12) Peitaʻi, a o faateteleina taumafaiga a Satani, tau ina ia tatou faia taumafaiga uma e mafuta vavalalata atu ai iā Ieova. Ia tatou maufaatuatuaina Ieova, faapea le auala o loo ia faaaogāina e taʻitaʻia ai ona tagata i aso nei. O lo tatou faia faapea, ua tatou maua ai se ʻauuso autasi.