“Ia Faia Mea Uma Lava Ina ia Faamamaluina ai le Atua”

I LE avea ai ma auauna tuuina atu a le Atua, e tatau ona tatou faaatagia atu le mamalu o Ieova i a tatou upu ma gaoioiga uma. Na taʻua e Paulo se mataupu silisili e fesoasoani iā i tatou e faapea: “Pe tou te aai, pe inu, pe faia se tasi mea, ia faia mea uma lava ina ia faamamaluina ai le Atua.” (1 Kori. 10:31) E aofia ai i lenei mea lo tatou tausisia o tapulaa amiotonu a Ieova, lea o loo faaatagia mai ai ona uiga lelei atoatoa. (Kolo. 3:10) Talu ai o i tatou o tagata paia, e tatau ona avea i tatou ma ni ē e faaaʻoaʻo i le Atua.​—Efe. 5:1, 2.

² Ina ia faauaʻi atu Kerisiano i lenei manatu, na tusi ai Peteru e faapea: “E faapei o fanau usiusitaʻi, aua le amioaʻi e tusa ai ma o outou tuʻinanauga na iai muamua a o leʻi malamalama outou, ae e tusa ai ma Lē e Paia na valaauina outou, ia faapea foʻi ona paia outou uma i a outou amio, auā ua tusia: ʻE tatau ona paia outou, auā o aʻu nei e paia lava aʻu.’” (1 Pete. 1:14-16) E pei lava o Isaraelu anamua, o loo manaʻomia foʻi ona faatumauina e sui uma o le faapotopotoga Kerisiano lo latou tulaga paia. O lona uiga, e tatau ona tumau ona lē taʻuleagaina i latou, ma mamā mai i le faaleagaina i le faia o le agasala, uiga ma amioga a le lalolagi. O lea, ua vavae ese ai i latou mo le auaunaga paia.​—Eso. 20:5.

³ O le paia, e faatumauina e ala i le tausia o tulafono ma mataupu silisili a Ieova o loo taʻua manino i le Tusi Paia. (2 Timo. 3:16) E ala i le suʻesuʻeina o le Tusi Paia, na aʻoaʻoina ai i tatou e faatatau iā Ieova ma ona ala, ma tosina atu ai iā te ia. O a tatou suʻesuʻega na faatalitonuina ai i tatou i le manaʻoga e saʻilia muamua le Malo o le Atua, ma avea le faia o le finagalo o Ieova ma mea e sili ona tāua i o tatou olaga. (Mata. 6:33; Roma 12:2) O le faia faapea, e manaʻomia ai lo tatou oofu i le tagata fou.​—Efe. 4:22-24.

MAMĀ FAALEAGAGA MA LE MAMĀ TAU AMIO

⁴ O le ola e tusa ai ma tapulaa amiotonu a Ieova e lē faigofie i taimi uma. O loo taumafai lo tatou fili o Satani le Tiapolo e faaliliu ese i tatou mai i le upu moni. O aafiaga leaga mai i le lalolagi ma o tatou tuʻinanauga agasala, ua avea ai o se mea faigatā i nisi o taimi. O le ola e tusa ai ma lo tatou tuuina atu e manaʻomia ai ona tatou tauivi i le itu faaleagaga. Ua taʻu mai i le Tusi Paia, e aua neʻi faateʻia i tatou pe a feagai ma teteega ma tofotofoga. O le a sauāina i tatou ona o le amiotonu. (2 Timo. 3:12) E mafai ona tatou fiafia a o feagai ai ma tofotofoga, i le iloaina o tofotofoga e faamaonia ai o loo tatou faia le finagalo o le Atua.​—1 Pete. 3:14-16; 4:12, 14-16.

⁵ E ui e lelei atoatoa Iesu, ae na ia aʻoaʻoina le usiusitaʻi ona o tofotofoga na ia fesagaʻia. E leai ma se taimi na lolo atu ai o ia i faaosoosoga a Satani, pe atiaʻe ni faanaunauga e ausia ni sini faalelalolagi. (Mata. 4:1-11; Ioa. 6:15) E leai foʻi se taimi na faagutugutulua ai Iesu. E ui lava na inosia o ia ona o lona faamaoni, ae na ia tausisia pea tapulaa amiotonu a Ieova. A o toeitiiti oo i lona maliu, na ia lapataʻia ai ona soo o le a inosia foʻi i latou e le lalolagi. Talu mai lava lenā taimi, o loo fesagaʻia pea e soo o Iesu puapuaga. Peitaʻi, ua latou maua le lototele i le iloaina na manumalo le Alo o le Atua i le lalolagi.​—Ioa. 15:19; 16:33; 17:16.

⁶ Ina ia lē avea o ni tagata o le lalolagi, e manaʻomia ona tatou tausisia tapulaa amiotonu a Ieova e pei ona sa faia e lo tatou Matai. E lē gata e tatou te ʻalofia le aafia i faiga faapolotiki ma mataupu tau i le vafealoaʻi a le lalolagi, ae e tatau foʻi ona tatou teena amioga ma uiga matagā o le lalolagi. E tatou te faatāuaina le fautuaga o loo i le Iakopo 1:21: “Inā lafoaʻi ia o mea eleelea uma ma le amioleaga lea e lē aogā, ae ia talia ma le agamalu le upu ua aʻoaʻoina, lea ua mafai ai ona faasaoina o outou ola.” E ala i suʻesuʻega ma le auai i sauniga, ua “aʻoaʻoina” ai i tatou i le upu moni ma ua goto ifo ai i o tatou mafaufau ma loto, ma e tatou te lē atiaʻe ai foʻi ni faanaunauga mo mea o loo ofo mai e le lalolagi. Na tusi le soo o Iakopo: “Pe e tou te lē iloa ea o le faauō atu i le lalolagi ua fai ai tagata ma fili o le Atua? O lea la, o so o se tasi e fia uō ma le lalolagi ua fai o ia ma fili o le Atua.” (Iako. 4:4) O le māfuaaga lenei ua aumaia ai i le Tusi Paia ni lapataʻiga malolosi, e tatau ona tatou tausisia tapulaa amiotonu a Ieova ma faaauau ona vavae ese mai i le lalolagi.

⁷ Ua lapataʻia i tatou e le Afioga a le Atua e faatatau i le aafia i amioga leaga ma matagā e faapea: “O le faitaaga, ma amioga lē mamā uma, po o le matapeʻapeʻa, aua lava neʻi taʻua iā te outou e pei ona tatau i tagata paia.” (Efe. 5:3) O lea, e lē tatau ona faataga o tatou mafaufau e mafaufau i mea matagā, ma e lē tatau foʻi ona faaaofia i a tatou talanoaga. O le faia faapea, e faamaonia atu ai o loo tatou mananaʻo e tausisia tapulaa amiotonu ma mamā a Ieova.

MAMĀ FAALETINO

⁸ E lē gata i le mamā faaleagaga ma le mamā tau amio, ae ua iloa foʻi e Kerisiano le tāua o le mamā faaletino. Ona o Ieova o se Atua e paia, na finagalo ai o ia ina ia tausia e Isaraelu anamua le mamā o le togālauapi. E tatau foʻi ona tatou mamā faaletino, ʻina neʻi silasila Ieova i se mea leaga’ iā i tatou.​—Teu. 23:14.

⁹ E iai le sootaga o le paia ma le mamā faaletino i le Tusi Paia. O se faataʻitaʻiga, na tusi Paulo: ʻLe ʻaupele e, seʻi o tatou faamamā ai iā i tatou mai i mea uma e faaleagaina ai le tino ma le agaga, a ia faaatoatoaina le faapaiaina i le mataʻu i le Atua.’ (2 Kori. 7:1) O lea, e tatau ona taumafai malosi tane ma fafine Kerisiano e faamamā o latou tino, e ala i le taeele e lē aunoa ma tatā o latou lavalava. E ui e eseese tulaga mai i lea atunuu i lea atunuu, ae e masani lava ona maua e Kerisiano ni fasimoli ma vai e faamālū ai, ma faamautinoa foʻi ua taeele le fanau.

¹⁰ E masani lava e toʻatele tagata e iloa i tatou i vaipanoa e tatou te nonofo ai ona o la tatou galuega talaʻi. O le faatumauina o le mamā o totonu ma fafo o o tatou fale, o se molimau lelei lea i tuaoi. O lenei tulaga e mafai ona faia ai se sao o le aiga atoa. E tatau i uso ona uaʻi totoʻa atu i o latou fale ma tafāfale. Ua latou iloa o ni fanua e mamā ma ni fale e tausia lelei, e mafai ona taʻuleleia ai i latou e isi. O le tausolomua o tane i le faia faapea ma taʻimua i mataupu faaleagaga, o se faailoga lea e iloa ai o loo latou pule lelei i o latou lava aiga. (1 Timo. 3:4, 12) E iai foʻi i tuafāfine le tiute tauave o le tausia o mea, aemaise lava totonu o o latou fale. (Tito 2:4, 5) O fanau e lelei ona toleniina, e faia foʻi la latou vaega i le tausia o lo latou tumamā, faapea le mamā o o latou potu. O le faia faapea, ua galulue faatasi ai le aiga atoa e atiaʻe le masaniga o le tumamā, lea e talafeagai ma le tulaga o mea i le lalolagi fou o le a pulea e le Malo o le Atua.

¹¹ O le toʻatele o tagata o Ieova i aso nei e faaaogā taavale e ō ai i sauniga. I nisi o vaipanoa, e matuā manaʻomia ai lava se taavale mo le faiva. E tatau ona mamā ma lelei le tulaga o le taavale. O o tatou fale ma taavale, e tatau ona faamaonia atu ai o i tatou o se vaega o tagata mamā ma paia o Ieova. O le taʻiala lava lea e tatou te faatatauina mo a tatou ato talaʻi ma Tusi Paia.

¹² O a tatou teuga ma laʻei e tatau ona ōgatusa ma mataupu silisili a le Atua. E tatou te lē mananaʻo e ō atu e vaai ni tagata taualoa, pe afai e lē o lelei o tatou laʻei pe soona faatalalē foʻi i le auala o loo laʻei ai. Pe e lē sili atu la ona tatau ona tatou manatu mamafa, a o avea i tatou ma sui o Ieova i le talaʻiga pe tū atu foʻi i luga o le pulelaa? O a tatou teuga ma laʻei, e mafai ona iai se aafiaga i le vaaiga a isi i le tapuaʻiga iā Ieova. E mautinoa lava e lē talafeagai ona laʻei i se auala e lē onomea pe e lē magafagafa ai foʻi i isi. (Mika 6:8; 1 Kori. 10:31-33; 1 Timo. 2:9, 10) O lea, a o tatou sauni i le talaʻiga po o le sauniga, fonotaga matagaluega po o tauaofiaga, e tatau ona manatua le faamatalaga a le Tusi Paia e uiga i le tumamā faaletino ma teuga onomea. E tatou te mananaʻo e viia ma faamamaluina Ieova i taimi uma.

¹³ O le tulaga lava lea e tasi pe a tatou asiasi atu i le ofisa ulu po o se lālā a Molimau a Ieova. Ia manatua, o le taʻu Peteli o lona uiga, o le “Fale o le Atua.” O lea, e tatau ona tatou laʻei ma amioaʻi e pei lava o taimi e tatou te auai ai i sauniga i le Maota mo Sauniga.

¹⁴ E oo foʻi i taimi e tatou te tafafao ai, e tatou te faaalia le manatu mamafa i le auala e laʻei ai ma a tatou teuga. E mafai ona fesili ifo iā i tatou lava, ʻPe ou te matamuli e avatu se molimau lē fuafuaina i se isi, ona o le auala o loo oʻu laʻei ai?’

TAFAOGA MA FAAFIAFIAGA

¹⁵ Ina ia faatumauina se vaaiga paleni ma tausia le soifua mālōlōina, e manaʻomia se taimi e mālōlō ma tafafao ai. Na iai se taimi na valaaulia ai e Iesu ona soo ina ia latou ō atu i se nofoaga tuufua e “fai ai sina mālōlōga.” (Mare. 6:31) E mafai ona avea o se suiga lelei taimi e mālōlō ai, faapea foʻi tafaoga po o faafiafiaga talafeagai. E mafai ona faafouina ai i tatou mo le toe faaauauina o a tatou galuega masani.

¹⁶ Ona o le tele o ituaiga o faafiafiaga o loo iai i aso nei, e tatau ai i Kerisiano ona filifili lelei ma faaaogā le atamai mai iā Ieova i so o se mea e latou te faia. E ui e iai le aogā o faafiafiaga, ae e lē tatau ona faamuamua i le olaga. Ua lapataʻia i tatou, “o aso e gata ai” o le a avea ai tagata ma “ē e pupū i mea faafiafia nai lo o le alolofa i le Atua.” (2 Timo. 3:1, 4) O le tele o faafiafiaga ma tafaoga i aso nei, e lē talafeagai mo ē o loo naunau e tausisia tapulaa amiotonu a Ieova.

¹⁷ Sa tatau i uluaʻi Kerisiano ona tetee atu i le siʻomaga lē mamā o le lalolagi na iai i lenā taimi, o le pupū atu lea i mea faafiafia. I nofoaga na faia ai faafiafiaga i Roma, sa faafiafiaina le ʻaumaimoa i le matamata atu a o faatigāina isi. Na faatinoina ai i inā faiga sauā, le faamasaatoto ma feusuaʻiga lē mamā ina ia faafiafia ai tagata. Peitaʻi, na taumamao ese uluaʻi Kerisiano mai i na mea. O le tele o faafiafiaga a le lalolagi i aso nei e aofia ai nei faiga, ma ua faia e faamalie ai tuʻinanauga e matuā matagā o tagata. E manaʻomia ai ona tatou “matuā faautauta” i le auala o loo tatou savavali ai, ma ia liliuese mai i faafiafiaga lea e mafai ona faavaivaia ai faaleagaga. (Efe. 5:15, 16; Sala. 11:5) I nisi taimi e ui lava e lē leaga se faafiafiaga o loo fai, ae atonu e lē talafeagai le siʻomaga o loo faia ai.​—1 Pete. 4:1-4.

¹⁸ E iai faafiafiaga ma tafaoga talafeagai e mafai ona auai ai Kerisiano. Ua maua e le toʻatele aogā mai i le mulimuli i manatu mai i le Tusi Paia, ma fautuaga talafeagai o loo maua i a tatou lomiga.

¹⁹ I nisi taimi, e valaaulia ai ni aiga i se fale o se aiga mo se faatasitasiga ma isi Kerisiano. Atonu foʻi e valaaulia ni uso ma ni tuafāfine i se ʻaiga o se faaipoipoga po o se faatasiga fiafia faapena. (Ioa. 2:2) E tatau ona iloa lelei e ē o talimālō, o i latou e paʻū i ai so o se mea e ono tupu mai i le faatasiga. Ua manino mai la le manaʻomia o le faautauta pe a faia ni faatasitasiga tetele. O le iai i se siʻomaga fiafia i taimi o faatasiga faapena, ua oo ina faia ai e nisi ni gaoioiga e lē tusa ai ma amioga tatau faa-Kerisiano, e pei o le ʻai tele ma le inu tele faapea foʻi le faia o se agasala matuiā. Ona o lea tulaga, ua iloa ai e Kerisiano e iai le utaga mamao, le atamai o le faatoʻaitiiti o tagata i se faatasiga ma le umi e faia ai. Pe afai e faaaogā le ʻava malosi, e tatau ona faaaogā ma le faautauta. (Fili. 4:5) Pe a faia taumafaiga uma ina ia avea nei faatasiga ma mea e atiaʻe ma faafouina ai faaleagaga, o le a lē soona faamamafaina la meaʻai ma meainu o ni mea e sili ona tāua.

²⁰ O se mea lelei le talimālō. (1 Pete. 4:9) E lelei ona manatua i latou o ē e lē tagolima o i le faapotopotoga, pe a valaaulia isi i o tatou fale mo se taumafataga, mālōlōga ma aufaatasiga. (Luka 14:12-14) Pe afai e valaaulia i tatou i na faatasiga, e tatau ona ōgatusa a tatou amio ma le fautuaga o loo i le Mareko 12:31. O se mea lelei le faaalia pea o le talisapaia mo le agalelei o isi.

²¹ E olioli Kerisiano i le anoanoaʻi o meaalofa mai i le Atua, ma iloa e mafai ona latou ʻaai ma feinu ma fiafia i mea lelei ona o a latou galuega mamafa uma.’ (Fai. 3:12, 13) Pe afai e tatou te “faia mea uma lava ina ia faamamaluina ai le Atua,” o le a manatua pea e ē talimālō ma ē valaaulia nei faatasiga fiafia e faamalieina ma faafouina ai faaleagaga.

MEAFAI I LE AʻOGA

²² E maua e fanau a Molimau a Ieova aogā i le auai i aʻoaʻoga. A o auai i aʻoga, e latou te naunau ina ia iloa lelei faitau ma tusitusi. O nisi o mataupu o loo aʻoaʻoina i aʻoga, e mafai ona aogā i talavou a o latou tuliloaina sini faaleagaga. A o faagasolo tausaga i aʻoaʻoga, e latou te taumafai ma le filigā e ʻmanatua Lē e Sili na Foafoaina i latou,’ e ala i le faamuamua lea o mea faaleagaga.​—Fai. 12:1.

²³ Pe afai o oe o se talavou Kerisiano o loo iai pea i aʻoaʻoga, ia e faaeteete ma ʻalofia le faifaimea faatasi ma talavou o le lalolagi, e aunoa ma se māfuaaga tatau. (2 Timo. 3:1, 2) Talu ai o loo saunia mai e Ieova le puipuiga manaʻomia, e tele la mea e mafai ona e faia e tetee atu ai i taaʻiga a le lalolagi. (Sala. 23:4; 91:1, 2) O lea, ia faaaogā lelei sauniuniga a Ieova e leoleomaluina ai oe.​—Sala. 23:5.

²⁴ Ina ia vavae ese mai i le lalolagi, ua filifili ai le toʻatele o Molimau talavou o loo i aʻoaʻoga, e lē auai i isi mea fai a le aʻoga pe a tuua. Atonu i nisi taimi e faigatā ai i tamaiti o le vasega po o faiaʻoga ona malamalama, i le māfuaaga e latou te faia ai lea faaiʻuga. Peitaʻi, o le faamalieina o le Atua o le mea lenā e sili ona tāua. O lona uiga, e tatau ona e gaoioi e ōgatusa ma lou lotofuatiaifo ua aʻoaʻoina i le Tusi Paia, ma maumauaʻi ina ia lē aafia i faiga faatautavā a le lalolagi po o gaoioiga lotonuu. (Kala. 5:19, 26) O le faalogo atu i fautuaga faale-Tusi Paia a mātua e matataʻu i le Atua ma maua aogā mai i aumea lelei i le faapotopotoga, o le a mafai ai e outou talavou ona tausisia tapulaa amiotonu a Ieova.

GALUEGA TOTOGI MA AUMEA

²⁵ O tiute tauave faale-Tusi Paia o ulu o aiga, o le saunia lea o mea manaʻomia mo o latou aiga. (1 Timo. 5:8) E ui i lea, i le avea ai ma faifeʻau o le tala lelei, ua iloa e nei tane o a latou galuega totogi e tatau ona lona lua i le saʻilia o manaʻoga o le Malo. (Mata. 6:33; Roma 11:13) E ala i le faamaoni atu i le Atua ma lotomalilie i mea ua maua e aai ai ma oofu ai, ua latou ʻalofia ai popolega ma mailei o le manaʻo tele i meafaitino.​—1 Timo. 6:6-10.

²⁶ O Kerisiano tuuina atu uma o loo galulue i galuega totogi, e tatau ona tāmau i o latou mafaufau mataupu silisili o le Tusi Paia. E tatou te galulue i galuega e talafeagai ma Kerisiano. O lona uiga, e tatou te ʻalofia ni faiga e solia ai tulafono a le Atua po o tulafono a le malo. (Roma 13:1, 2; 1 Kori. 6:9, 10) Ia teu pea i manatu le mataʻutia o aumea leaga. I le avea ai ma fitafita a Keriso, e tatou te teena le aafia i faiga faapisinisi e solia ai tapulaa a le Atua, faaleagaina ai lo tatou tulaga solitū, ma faavaivaia ai i tatou faaleagaga. (Isa. 2:4; 2 Timo. 2:4) E leai foʻi ni a tatou sootaga ma le fili o le Atua o “Papelonia le Aai Tele.”​—Faaa. 18:2, 4; 2 Kori. 6:14-17.

²⁷ O le ola e tusa ai ma tapulaa amiotonu a le Atua, o le a taofia ai i tatou mai i le faaauilumaina o faiga faapisinisi po o mea e tatou te mananaʻo i ai, i taimi o faatasitasiga faa-Kerisiano. O le fuafuaga o a tatou faatasitasiga ma isi i sauniga faa-Kerisiano, fonotaga ma tauaofiaga e faapitoa lava mo le tapuaʻiga iā Ieova. O i inā e fafagaina ai i tatou i lana laoai faaleagaga, ma maua ai avanoa e tatou te “fefaalaeiauaʻi ai.” (Roma 1:11, 12; Epe. 10:24, 25) O na faatasitasiga e tatau ona taulaʻi atu i mea faaleagaga.

NONOFO FAATASI I LE AUTASI FAA-KERISIANO

²⁸ O tapulaa amiotonu a Ieova, e aofia ai foʻi le manaʻomia i ona tagata ona ʻtausia o le autasi i le agaga i le fusi o le filemu.’ (Efe. 4:1-3) Nai lo o le taumafai e faamalie le tagata lava ia, e taumafai tagata taʻitoʻatasi ina ia saʻili mea e lelei ai isi. (1 Tesa. 5:15) E lē taumatea o le agaga lea o loo e mātauina i lau faapotopotoga. E tusa lava po o le ā lo tatou lanu, atunuu, tulaga, tamaoaiga po o le tulaga tau aʻoaʻoga, ae e tutusa uma tapulaa amiotonu o loo faatonutonuina ai i tatou uma. E oo lava i tagata e lē talitonu, ua latou mātauina lenei tulaga matilatila o tagata o Ieova.​—1 Pete. 2:12.

²⁹ Ina ia faamamafa atili le faavae mo le autasi, ua faapea mai le Tusi Paia: “E tasi le tino, e tasi foʻi le agaga, e pei ona tasi o le faamoemoe lea na valaauina ai outou; e tasi le Alii, e tasi le faatuatuaga, e tasi le papatisoga; e tasi le Atua o le Tamā o tagata uma, o lē e pule i tagata uma, e galue foʻi e ala i tagata uma, ma e galue i totonu o tagata uma.” (Efe. 4:4-6) O nei upu ua uunaʻia ai i tatou ina ia autasi i le malamalamaga i aʻoaʻoga faavae o le Tusi Paia, faapea foʻi i aʻoaʻoga loloto o le Tusi Paia. O le faia faapea, e faaalia ai lo tatou amanaʻiaina o le pule silisili ese a Ieova. O le mea moni, ua tuuina mai e Ieova i ona tagata le gagana mamā o le upu moni, lea ua mafai ai ona latou auauna soosootauʻau iā te ia.​—Sefa. 3:9.

³⁰ O le filemu ma le autasi o faapotopotoga Kerisiano i aso nei, ua avea ma puna e faafouina ai tagata uma e tapuaʻi iā Ieova. Ua tatou tofo i le faataunuuga o le folafolaga a Ieova: “Ou te autasia i latou e pei o se lafu i le lotoā.” (Mika 2:12) E tatou te mananaʻo e faatumauina pea lenā autasiga filemu, e ala i le tausisia pea o tapulaa amiotonu a Ieova.

³¹ Maʻeu le fiafia o i latou ua taliaina i le faapotopotoga mamā a Ieova! E tauia so o se faataulaga o loo tatou faia ina ia tauaveina le suafa o Ieova. A o tatou faatumauina la tatou faiā tautele ma Ieova, o le a tatou finafinau e tausisia pea ana tapulaa amiotonu ma faailoa atu i isi.​—2 Kori. 3:18.