Ia Piiama Atu Pea i le Faalapotopotoga a Ieova

NA TUSI le soo o Iakopo: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iako. 4:8) E lē mamalu naʻuā pe mamao tele Ieova e lē mafai ai ona faafofoga mai i a tatou tatalo, e ui lava i o tatou tulaga lē lelei atoatoa. (Galu. 17:27) E faapefea ona tatou mafuta vavalalata atu i le Atua? E mafai ona tatou faia faapea e ala i le atiaʻe o se faiā māfana ma Ieova, lea e aofia ai le tatalo faatauanau atu iā te ia. (Sala. 39:12) E mafai foʻi ona tatou atiaʻe se faiā māfana ma le Atua, e ala i le suʻesuʻeina e lē aunoa o lana Afioga le Tusi Paia. O le faia faapea o le a tatou iloa ai Ieova le Atua, o ana fuafuaga ma lona finagalo mo i tatou. (2 Timo. 3:16, 17) O le iʻuga, o le a tatou alolofa ai iā te ia ma faaalia le mataʻu tatau, lea e tatou te lē faia ai se mea e faatigā ai i lona finagalo.​—Sala. 25:14.

² Peitaʻi, e na o le pau le auala ua mafai ai ona tatou faalatalata atu iā Ieova, e ala atu lea i lona Alo o Iesu. (Ioa. 17:3; Roma 5:10) E leai lava se tagata e mafai ona tatou malamalama ai i le finagalo o Ieova, ua na o Iesu. O lona matuā māfana atu i lona Tamā, na mafai ai ona ia faapea mai: “E leai se tasi ua iloa le Atalii e na o le Tamā; ma e leai se tasi ua iloa le Tamā e na o le Atalii, ma sē ua loto le Atalii e faaali i ai.” (Luka 10:22) O lea, pe a tatou suʻesuʻeina tusi o Evagelia ina ia aʻoaʻoina ai e faatatau i manatu ma lagona o Iesu, e tatou te iloa ai foʻi manatu ma lagona o Ieova. O le iloaina o lenā mea, ua mafai ai ona tatou mafuta vavalalata atu i lo tatou Atua.

³ I lalo o le tulaga ulu o le Alo o le Atua, ua tatou atiaʻe ai se faiā vavalalata ma Ieova e ala i le piiama atu pea i le vaega vaaia o Lana faalapotopotoga, lea o loo fesoasoani iā i tatou e aʻoaʻoina ai le auala e faia ai lona finagalo. E pei ona valoia i le Mataio 24:45-47, na tofia e le Matai o Iesu Keriso “le pologa faamaoni ma le faautauta” e saunia mai “meaʻai i le taimi tatau” mo le aiga o le faatuatua. I aso nei, ua saunia e le pologa faamaoni le anoanoaʻi o taumafa faaleagaga. E ala mai i lenei auala, ua fautuaina ai foʻi i tatou e Ieova ina ia faitau i lana Afioga i aso taʻitasi, auai i sauniga faa-Kerisiano e lē aunoa, ma faia se sao uigā i le talaʻia o le “tala lelei o le malo.” (Mata. 24:14; 28:19, 20; Iosua 1:8; Sala. 1:1-3) E tatou te lē mananaʻo e iai sa tatou vaaiga sesē i le pologa faamaoni. Nai lo o lea, e tatou te taumafai e piiama atu pea i le vaega vaaia o le faalapotopotoga a Ieova, ma gauaʻi atu i taʻiala o loo maua mai ai. O le faia faapea, o le a tatou mafuta vavalalata atu ai i lo tatou Atua o Ieova, ma o le a avea ma faamalosiauga ma puipuiga mo i tatou e ui lava i faigatā.

LE POGAI UA FAATETELEINA AI FAIGATĀ

⁴ Atonu ua tele tausaga talu ona e iai i le upu moni. Pe afai o lou tulaga lenā, e mautinoa la ua e malamalama i le uiga o le onosaia o tofotofoga o lo tatou faamaoni. E tusa lava foʻi po o lea faatoʻā e iloa Ieova ma auaufaatasi ma ona tagata, ae ua e iloa o loo matuā faasagatau mai Satani le Tiapolo, i so o se tasi e gauaʻi atu i le pule silisili ese a Ieova. (2 Timo. 3:12) E tusa pe itiiti pe ogaoga faigatā e te onosaia, ae e lē tatau ona e fefe pe lotovaivai ai. O le māfuaaga, ona ua folafola mai e Ieova o le a ia faatumauina oe, ma tauia oe e ala i le laveaʻia o oe ma foaʻi atu le ola e faavavau.​—Epe. 13:5, 6; Faaa. 2:10.

⁵ O i tatou uma lava e ono oo i ai faigatā, a o faagasolo nei aso o loo totoe o le faiga o mea a Satani. Talu mai lava le taimi na faavaeina ai le Malo o le Atua i le lagi i le 1914, e leʻi toe faatagaina Satani i le lagi lea o loo afio ai Ieova. Na lafo ifo o ia i le lalolagi lea o loo taofiofia ai faatasi ma ana temoni. O le faatupulaʻia o mafatiaga i le lalolagi e aofia ai le faateteleina o le sauāina o tagata tuuina atu o Ieova, o āuga na o le ita tele o Satani. O se faamaoniga foʻi lea ua tatou ola nei i aso e gata ai o le pulega amioleaga a Satani i le fanau a tagata.​—Faaa. 12:1-12.

⁶ Ua matuā ita tele Satani ona o lona tulaga toʻilalopopo, ma ua ia iloa ua puupuu lona taimi o totoe. E faatasi ai ma ana temoni, ua taumafai malosi o ia ina ia faalavelavea le galuega o le talaʻia o le Malo, ma lepetia le autasi o tagata o Ieova. O lea ua tatou tau ai i le taua faaleagaga lea e faamatalaina e faapea, e “tatou te lē o tau ma tagata a o malo, ma pule, ma taʻitaʻi o le lalolagi o loo pulea lenei lalolagi pogisa, ma agaga leaga uma i mea o i le lagi.” Ina ia mafai ona tatou manumalo ma iai i le itu a Ieova, e lē tatau ona tatou faavaivai i lenei taua, ae e tatau ona ofuina pea lo tatou ofutau atoatoa faaleagaga. E tatau ona tatou “tutū mausalī e tetee atu i togafiti” a le Tiapolo. (Efe. 6:10-17) O lea, e manaʻomia ai ona tatou tumau.

ATIAʻE LE TUMAU

⁷ O le tumau, o “le malosi lea e lavātia ai tulaga faigatā po o toʻatugā.” I se tulaga faaleagaga, o le tumau e faasino atu lea i le uiga o le maumauaʻi e fai le mea saʻo e ui lava ina feagai ai ma faigatā, teteega, sauāga po o se isi lava mea ua fuafuaina e faaliliueseina ai i tatou mai i le ala o le faamaoni iā Ieova. E tatau ona atiaʻe le tumau faa-Kerisiano, ma e tele se taimi e faaalu e atiaʻe ai. E faateleina pea lo tatou malosi e tumau ai, a o tatou agaʻigaʻi i luma faaleagaga. Pe a tumau i tofotofoga lāiti i le taimi na faatoʻā amata ai la tatou savaliga o ni Kerisiano, e faasolo ina tatou malolosi ma mafai ai ona tumau i taimi e sili ona faigatā, lea e mautinoa o le a oo mai. (Luka 16:10) E lē tatau ona tatou faatali seʻia oo mai tofotofoga ogaoga, ona faatoʻā faia lea o la tatou faaiʻuga maumauaʻi e tutumau faamaoni. E tatau ona faia la tatou faaiʻuga maumauaʻi a o leʻi oo mai le tofotofoga. Na taʻua e Peteru e tatau ona atiaʻe le tumau, faatasi ai ma isi uiga faale-Atua ina ua ia tusi: “O le mea lea ia outou faaopoopo ai i lo outou faatuatua le amiolelei, ia faaopoopo i la outou amiolelei le poto, ia faaopoopo i lo outou poto le amio pulea, ia faaopoopo i la outou amio pulea le tumau, ia faaopoopo i lo outou tumau le faamaoni i le Atua, ia faaopoopo i lo outou faamaoni i le Atua le alofa i le ʻauuso, ia faaopoopo i lo outou alofa i le ʻauuso le alofa.”​—2 Pete. 1:5-7; 1 Timo. 6:11.

⁸ Ua faailoa mai foʻi iā i tatou e Iakopo le tāua o le atiaʻe o le tumau i lana tusi e faapea: “Oʻu uso e, ia outou manatu o se mea e olioli tele ai, pe a outou fesagaʻi ma tofotofoga eseese. Ua outou iloa, o le tofotofoina o lo outou faatuatua, e iʻu ina outou tumau ai. Ia atoatoa galuega o lo outou tumau, ina ia atoatoa ma lelei ai outou i mea uma, ma ia leai se mea e mativa ai.” (Iako. 1:2-4) O loo faapea mai Iakopo e tatau i Kerisiano ona talia tofotofoga ma ia olioli tele ai, auā e fesoasoani lea e atiaʻe ai lo tatou tumau. Po o le auala lea na e vaai ai i tofotofoga? Ona sosoo lea ma le faailoa mai e Iakopo e faapea o le tumau e faataunuuina ai se galuega, ina ia atoatoa ai o tatou uiga faa-Kerisiano ma mafai ai ona talia atoatoa i tatou e le Atua. Ioe, e atiaʻe pea lo tatou tumau i lea aso ma lea aso, a o tatou fesagaʻi ma tofotofoga ma manumalo ai. O le iʻuga, ona o le tumau, ua tatou atiaʻe ai ma isi uiga lelei lea e tatou te manaʻomia.

⁹ E faafiafiaina Ieova pe a tatou tumau, ma ua uunaʻia ai o ia e tauia i tatou i le ola e faavavau. Na taʻua atili e Iakopo: “E fiafia le tagata e tumau e ui lava i tofotofoga, auā a uma ona tofotofoina o ia, ona maua ai lea e ia o le pale o le ola, lea na folafola mai e Ieova iā i latou o ē e alolofa pea iā te ia.” (Iako. 1:12) O le mea moni, o le taulaʻi atu i le ola e faavavau e mafai ai ona tatou tumau. Pe a tatou lē tumau, e lē mafai ona tatou iai pea i le upu moni. Pe a lolo atu i omiga mai i le lalolagi, o le a tatou toe paʻuʻū atu ai la i le lalolagi. Pe a tatou lē tumau, o le a tatou lē mauaina le agaga paia o Ieova, ma o le a tatou lē faaalia atu ai foʻi le fua o le agaga i o tatou olaga.

¹⁰ Ina ia faaauau ona tatou tumau i nei aso faigatā, e tatau ona tatou atiaʻe le vaaiga saʻo e faatatau i puapuaga e oo mai i le avea ai ma Kerisiano. Ia manatua na tusi Iakopo: “Ia outou manatu o se mea e olioli tele ai.” Atonu e lē faigofie lenā mea ona e ono aofia ai puapuaga faaletino ma mafatiaga o le mafaufau. Ae ia manatua, e faalagolago i ai lo tatou ola e faavavau. O se mea na tupu i le ʻauaposetolo, e fesoasoani iā i tatou e iloa ai pe e faapefea ona olioli i taimi o puapuaga. O loo maua lea tala i le tusi o Galuega e faapea: “[Ua latou] aumai le ʻauaposetolo, ua sasa i latou ma faatonu atu, e aua neʻi toe tautatala i le suafa o Iesu, ma tuu atu loa i latou e ō. Ona ō ese ai lea o i latou mai i luma o le Faamasinoga Sili, ua olioli ina ua taʻuaogāina i latou ia faaleagaina ona o lona suafa.” (Galu. 5:40, 41) Na malamalama le ʻauaposetolo, o puapuaga na latou fesagaʻia o se faamaoniga lea o lo latou usiusitaʻi i le poloaʻiga a Iesu, ma na latou mauaina ai le finagalo malie o Ieova. I tausaga mulimuli ane a o tusia e Peteru lana uluaʻi tusi faagaeeina, na ia taʻua ai le aogā o puapuaga e oo mai ona o le amiotonu.​—1 Pete. 4:12-16.

¹¹ O se isi mea na tupu, e aofia ai Paulo ma Sila. A o faia la laʻua galuega faamisionare i Filipi, na puʻeina faamalosi ai i laʻua ma molia ai o ni ē e faalavelave i le aai ma o ni ē e folafolaina atu tū e faasā ona faia. O le iʻuga, na sasaina faamoʻamoʻa i laʻua ma lafo i le falepuipui. Ua faapea mai le Tusi Paia, a o iai i laʻua i le falepuipui e aunoa ma le togafitia o o la manuʻa “i le vaeluapō, ua tatalo ai Paulo ma Sila ma usu viiga i le Atua; ma ua faalogo foʻi i ai isi pagota.” (Galu. 16:16-25) Na iai iā Paulo ma lana aumea se vaaiga saʻo i o la puapuaga ona o Keriso. E lē gata o se faamaoniga o lo la faamaoni i luma o le Atua ma tagata, ae o se auala foʻi lea e molimau atu ai i ē e ono faalogo i le tala lelei. Sa aafia ai ola o isi. I lenā lava po, na iʻu ina faalogo le leoleo o le falepuipui ma lona aiga ma avea ai ma soo. (Galu. 16:26-34) Na faatuatuaina e Paulo ma Sila Ieova, o lona mana ma lona naunautaʻiga e tausia i laʻua i taimi o puapuaga. Na tauia lo la faatuatuaina o Ieova.

¹² I aso foʻi nei, ua saunia mai e Ieova mea uma e manaʻomia e faatumauina ai i tatou i taimi o tofotofoga. E finagalo o ia ina ia tatou tutumau. Ua ia tuuina mai lana Afioga ua faagaeeina, e faaauupegaina ai i tatou ina ia maua le poto saʻo e faatatau i lona finagalo. O lenei mea e faamalosia ai lo tatou faatuatua. Ua tatou maua le avanoa e auaumea faatasi ai ma uso talitonu, ma fai la tatou auaunaga paia. Ua iā i tatou foʻi le faaeaga o le faatumauina lea o se faiā vavalalata ma Ieova e ala i le tatalo. E faafofoga mai o ia a o tatou vivii atu, ma pe a tatou talosaga faatauanau atu foʻi mo se fesoasoani i le tausisia o se tulaga mamā i lana silafaga. (Fili. 4:13) E tatau foʻi ona manatua le malosi lea e maua mai i le manatunatu loloto i le faamoemoe o loo i o tatou luma.​—Mata. 24:13; Epe. 6:18; Faaa. 21:1-4.

TUMAU I TOFOTOFOGA ESEESE

¹³ E talitutusa tofotofoga o loo tatou fesagaʻia i aso nei, ma tofotofoga na fetaiaʻi ma uluaʻi soo o Iesu Keriso. I aso nei, ua pagatia Molimau a Ieova ona o le upuleagaina, faapea faiga sauā mai i tagata tetee ona o le lē malamalama. E pei lava o aso o le ʻauaposetolo, o le tele o teteega e faapogaia e tagata mapolotu, lea o loo faaalialia i lumamea a latou aʻoaʻoga ma gaoioiga sesē i le Afioga a le Atua. (Galu. 17:5-9, 13) I nisi taimi, e maua ai e tagata o Ieova se fesoasoani e ala i le faaaogā o a latou aiā tatau faaletulafono, lea e faamaonia e malo faapolotiki. (Galu 22:25; 25:11) Peitaʻi, e faamalosia foʻi e ē o loo pule ni faasāsāaga aloaʻia i la tatou galuega, ma taumafai e faamuta la tatou faiva faa-Kerisiano. (Sala. 2:1-3) I tulaga faapena, e tatou te lototetele e mulimuli i le faaaʻoaʻoga a le ʻauaposetolo faamaoni o ē na faapea atu: “E tatau ona matou usiusitaʻi i le Atua o le pule, nai lo o tagata.”​—Galu. 5:29.

¹⁴ A o faateteleina pea uiga lotonuu i le lalolagi aoao, o le faateteleina foʻi lea o omiga ua oo i le ʻautalaʻi o le tala lelei, ina ia latou lafoaʻia ai la latou faiva mai i le Atua. Ua atili talisapaia ai e auauna uma a le Atua le lapataʻiga i le Faaaliga 14:9-12, e faatatau i le tapuaʻi atu i “le manufeʻai ma lona faatusa.” Ua tatou iloa le tāua o upu a Ioane: “O le mea lenei e manaʻomia ai le tumau o le ʻaupaia, o i latou o loo tausi i poloaʻiga a le Atua ma le faatuatua o Iesu.”

¹⁵ O tofotofoga e tulaʻi mai ona o taua, fouvalega, sauāga tuusaʻo ma faasāsāaga aloaʻia, e ono lē mafai ai ona saʻoloto le faatinoina o lau tapuaʻiga faa-Kerisiano. Atonu o le a lē mafai ona outou potopoto faatasi o se faapotopotoga. Pe e ono motusia foʻi a outou fesootaʻiga ma le ofisa o le lālā. E ono lē faataunuuina foʻi asiasiga a le ovasia o le matagaluega. Pe atonu foʻi o le a lē oo atu lomiga. Pe a tulaʻi mai nisi o tulaga faapea, o le ā e tatau ona e faia?

¹⁶ Ia fai so o se mea e te mafaia i le tele e mafai ai, e ui lava i nei tulaga. Atonu e mafai ona fai suʻesuʻega a le tagata lava ia. E masani lava e mafai ona feiloaʻi se vaega toʻalaiti i se fale o se aiga mo le faia o se suʻesuʻega. E mafai ona faaaogā lomiga na suʻesuʻeina i le taimi ua teʻa ma le Tusi Paia e faia ai le sauniga. Aua le popole pe atuatuvale. E masani lava e maua e le Vaega Pule se auala e fesootaʻi atu ai i uso taʻimua i se taimi vave.

¹⁷ E tusa lava po ua lē mafai ona outou toe faatasi ma le ʻauuso Kerisiano, ae ia e manatua o loo faatasi mai pea Ieova ma lona Alo o Iesu Keriso iā te oe. E mafai ona tumau pea lou faamoemoe. E mafai lava ona faafofoga mai Ieova i au tatalo ma faamalosia oe e lona agaga. Ia talosaga atu iā te ia mo lana taʻitaʻiga. Ia e manatua, o oe o se auauna a Ieova ma o se soo o Iesu Keriso. O lea, ia faaaogā lelei ni avanoa e tulaʻi mai e molimau atu ai. O le a faamanuia Ieova i au taumafaiga, ma atonu e lē umi ae outou auaufaatasi loa ma isi i le tapuaʻiga moni.​—Galu. 4:13-31; 5:27-42; Fili. 1:27-30; 4:6, 7; 2 Timo. 4:16-18.

¹⁸ E tusa foʻi pe e faamataʻuina oe i le oti e pei ona sa oo i le ʻauaposetolo ma isi, ae ia e faatuatuaina pea “le Atua o lē na te faatūina o ē ua feoti.” (2 Kori. 1:8-10) O lou faatuatua i lana sauniuniga o le toetū, e mafai ona fesoasoani iā te oe e tumau ai e ui lava i tofotofoga e sili ona ogaoga. (Luka 21:19) Na faataatia e Keriso Iesu le faaaʻoaʻoga. Na ia silafia o lona faamaoni e ui lava i tofotofoga, o le a faamalosia ai isi ina ia tumau. E mafai foʻi ona avea lou tumau ma faamalosiauga mo isi ou uso.​—Ioa. 16:33; Epe. 12:2, 3; 1 Pete. 2:21.

¹⁹ E ese mai i sauāga ma teteega, e iai foʻi nisi o tulaga faigatā atonu e manaʻomia ai ona e tumau. O se faataʻitaʻiga, ua faavaivai nisi ona o le lē ano mai o tagata o le oganuu. O isi o loo tauivi pea ma maʻi o le tino po o le mafatia i tulaga tau faalogona, pe onosaia foʻi tulaga eseese ona o le lē lelei atoatoa. Na tumau foʻi le aposetolo o Paulo i se tofotofoga na faalavelavea ai lana auaunaga, pe faafaigatā ai i nisi taimi. (2 Kori. 12:7) Na “mafatia” foʻi Epaferoti o se Kerisiano mai i Filipi i le uluaʻi senituri, ona ua “faalogo [ana uō] ua maʻi o ia.” (Fili. 2:25-27) O o tatou tulaga lē lelei atoatoa faapea tulaga lē lelei atoatoa o isi, e ono māfua ai nisi o faafitauli e matuā faigatā ona tatou onosaia. Atonu o ni feeseeseaʻiga i lo outou va ma isi uso Kerisiano po o totonu foʻi o lou aiga. Peitaʻi, o na faafitauli uma e mafai lava ona tumau ai, ma e mafai ona manumalo ai i latou o loo mulimuli i fautuaga o loo i le Afioga a Ieova.​—Eseki. 2:3-5; 1 Kori. 9:27; 13:8; Kolo. 3:12-14; 1 Pete. 4:8.

IA MAUMAUAʻI PEA E TUMAU I LE FAAMAONI

²⁰ E tatau ona tatou piiama atu pea i lē ua tofia e Ieova e fai ma Ulu o le faapotopotoga, o Iesu Keriso. (Kolo. 2:18, 19) E tatau foʻi ona tatou galulue soosootauʻau ma le “pologa faamaoni ma le faautauta,” faapea i latou ua tofia o ni ovasia. (Epe. 13:7, 17) E ala i le piiama atu pea i faatulagaga a le faalapotopotoga ma felagolagomaʻi ma i latou o loo taʻimua, o le a faamaopoopoina ai i tatou e faia le finagalo o Ieova. E tatau ona tatou faaaogā atoatoa le faaeaga o le tatalo. Ia manatua, pe e falepuipui i tatou pe loka toʻatasi foʻi i se mea, e lē mafai lava ona motusia ai a tatou fesootaʻiga ma lo tatou Tamā alofa i le lagi, pe saveʻuina ai lo tatou autasi ma o tatou uso tapuaʻi.

²¹ Ina ua mavae lona toetū, na tuuina atu e Iesu se galuega e tatau ona faia e ona soo e pei ona taʻua i le Mataio 28:19, 20: “O le mea lea, ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou.” I se uiga maumauaʻi ma le tumau, seʻi o tatou faia taumafaiga uma e tatou te mafaia e faataunuu ai lo tatou tofiga e talaʻi, ma ia finafinau pea e faataunuu lenei galuega na tuuina mai e Iesu. I le pei o Iesu, seʻi o tatou tutumau. Tau ina ia matuā tāmau i o tatou mafaufau le faamoemoe o le Malo ma le ola e faavavau o loo tatou tulimataʻia. (Epe. 12:2) I le avea ai ma soo papatisoina o Keriso, ua tatou maua ai le faaeaga e faia se sao i le faataunuuina o le valoaga a Iesu e faatatau i le “taufaaiʻuiʻuga o le faiga o mea a le lalolagi.” Na ia faapea mai: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” (Mata. 24:3, 14) Pe a tatou faia ma le lotoatoa lenā galuega i le taimi nei, o le a tatou maua le olioli o le ulu atu lea i le ola e faavavau i le lalolagi amiotonu a Ieova.