O le Tamāloa ma le Fafine Muamua na Faia e le Atua

Na faia e Ieova se faatoʻaga i se nofoaga e taʻua o Etena. Na tumu lenei faatoʻaga i fugālaau, laau tetele ma manu. Ona faia lea e le Atua o le tagata muamua o Atamu mai i le efuefu, ma feula i ona pogaʻiisu le mānava ola. E te iloa le mea na tupu? Na maua mai ai se tagata ola. Na faaaogā e Ieova Atamu e vaaia le faatoʻaga, ma faatonu o ia e faaigoa manu uma.

Na taʻu atu e le Atua iā Atamu se tulafono tāua e faapea: ʻE mafai ona e ʻai i laau uma, ae e iai se laau faapitoa e tasi e aua e te ʻai ai. Pe afai e te ʻai i le fua o lenā laau, o le a e oti ai.’

Mulimuli ane na faapea ane Ieova: ʻO le a ou faia se fesoasoani mo Atamu.’ Na faamoegase Atamu e Ieova, ona faaaogā lea e Ieova o se tasi o ivi ʻasoʻaso o Atamu e faia ai se fafine e avea ma avā a Atamu. O lona igoa o Eva. Na avea Atamu ma Eva ma aiga muamua na iai i le lalolagi. O ā ni faalogona o Atamu e faatatau i lana avā? Na matuā fiafia o ia ma faapea atu: ʻO le tagata lenei ua faia e Ieova mai i loʻu ivi ʻasoʻaso. O ia o se tagata e pei o aʻu.’

Na faapea atu Ieova iā Atamu ma Eva ia maua ni a la fanau ma faatumu ai le lalolagi. Na finagalo Ieova ina ia latou galulue faatasi ma le fiafia e faia le lalolagi atoa e avea o se parataiso, po o se paka matagofie e pei o le faatoʻaga o Etena. Ae e lē o le mea lenā na tupu. Aiseā? O le a tatou iloaina le tali i le tala o loo sosoo mai.