Se Pologa na Usiusitaʻi i le Atua

O Iosefa o se tasi lea o atalii laʻitiiti o Iakopo. Na iloa e uso matutua o Iosefa e sili ona alofa Iakopo iā Iosefa. O le ā sou iloa, o ā ni o latou faalogona i lenā mea? Na latou lotoleaga iā Iosefa ma ʻinoʻino iā te ia. Sa faia e Iosefa ni miti e lē masani ai, ma na ia taʻu atu i ona uso na miti. Na latou manatu o le uiga o miti a Iosefa, e iai le aso o le a latou ifo ai iā te ia. O lea, na atili ai ona latou feita iā Iosefa.

I se tasi aso a o vaaia e uso o Iosefa mamoe e lata i le aai o Sekema, na auina atu ai e Iakopo Iosefa e vaai po o ā mai ona uso. Na latou iloa mamao atu Iosefa ma faapea ane le tasi i le isi: ʻLea ua sau le tama faimiti. Seʻi o tatou fasioti o ia.’ Na latou puʻe o ia ma lafo i totonu o se lua. Ae na faapea atu Iuta o se tasi o uso o Iosefa: ʻAua le fasiotia o ia, ae ia tatou faatau atu o ia o se pologa.’ O lea na latou faatauina ai Iosefa mo tupe siliva e 20, i tagata Mitiana faatauʻoa ia na ō i Aikupito.

Na latou ave le ofu talaloa o Iosefa ma fufui i le toto o se ʻoti ma avatu i lo latou tamā, ma faapea atu: ʻPe e lē o le ofu lenei o lou atalii?’ Na manatu Iakopo ua ʻaina e se manufeʻai Iosefa ma oti ai. Na matuā faanoanoa Iakopo, ma e leai se tasi na mafai ona faamāfanafanaina o ia.

Na faatauina atu Iosefa o se pologa i Aikupito, i se tamāloa tāua e igoa iā Potifara. Ae na fesoasoani pea Ieova iā Iosefa. Na vaai Potifara i le galue mamafa o Iosefa, ma o ia o se tagata e mafai ona talitonuina. E leʻi umi ae tofia loa Iosefa e vaaia mea uma a Potifara.

Sa vaavaai atu le avā a Potifara, o Iosefa o se tama aulelei ma malosi. O aso uma lava e na te fai atu ai iā Iosefa e la te momoe. O le ā le mea o le a faia e Iosefa? Na ia tetee atu i le avā a Potifara ma faapea atu: ʻLeai, e sesē lenei mea. E talitonuina aʻu e loʻu matai, ma o oe o lana avā. Pe a ta momoe, o le a ou agasala ai i le Atua.’

I se tasi aso, na taumafai ai le avā a Potifara e faamalosi Iosefa e la te momoe. Na ia tago atu i le ofu o Iosefa ae na sola ese Iosefa. Ina ua toe foʻi mai Potifara i le fale, na taʻu atu e lana avā se pepelo iā te ia e faapea, na faia e Iosefa se mea leaga iā te ia. Na matuā ita Potifara ma ia aveina ai Iosefa i le falepuipui. Ae e leʻi galo Iosefa iā Ieova.