Ua Talanoa Mai Ieova iā Samuelu

E toʻalua atalii o Eli le Ositaulaga Sili sa auauna o ni ositaulaga i le faleʻie paia. O o la igoa o Hofeni ma Fineaso. E la te leʻi usitaʻia tulafono a Ieova, ma e leʻi lelei le auala na la feagai ai ma tagata. Pe a avatu e tagata Isaraelu manu e osi ai taulaga iā Ieova, e ave e Hofeni ma Fineaso aano o manu e sili ona lelei mo i laʻua. Na faalogo Eli i mea na faia e ona atalii, ae e leʻi gaoioi o ia e faasaʻo. Po o le a faataga pea e Ieova nei mea e tutupu?

E ui lava e laʻitiiti Samuelu nai lo o Hofeni ma Fineaso, ae e na te leʻi faataʻitaʻi iā i laʻua. Sa fiafia Ieova iā Samuelu. I se tasi pō a o moe o ia, na faalogoina ai e Samuelu se leo o valaau i lona igoa. Na tu o ia i luga ma tamoʻe atu iā Eli ma faapea atu: ʻO aʻu lenei.’ Ae na tali mai Eli: ʻOu te leʻi valaau atu iā te oe. Alu e toe taoto.’ Ona toe alu ai lea o Samuelu e moe. E leʻi umi ae ia toe faalogoina foʻi le leo o valaau mai iā te ia. I le taimi lona tolu na faalogoina ai e Samuelu le leo o valaau mai iā te ia, na iloa ai loa e Eli o Ieova lea o loo valaau mai iā Samuelu. O lea na fai atu ai Eli iā Samuelu, pe a toe faalogoina le leo, e tatau ona e tali atu: ʻFetalai mai ia Ieova. O loo faalogo atu lau auauna.’

Na alu Samuelu e taoto, ae ia toe faalogoina le leo o valaau mai: ʻSamuelu! Samuelu!’ Na tali atu o ia: ʻFetalai mai. O loo faalogo atu lau auauna.’ Na faapea mai Ieova iā te ia: ʻIa taʻu atu iā Eli o le a ou faasalaina o ia ma lona aiga. O loo ia iloaina mea leaga o loo faia e ona atalii i totonu o loʻu faleʻie paia, ae e leai sana gaoioiga o fai i ai.’ I le taeao na sosoo ai, na tatala ai e Samuelu faitotoʻa o le faleʻie paia e pei ona ia masani ai. Na fefe o ia e taʻu atu i le ositaulaga sili le mea sa fetalai mai ai Ieova. Ae na valaau atu Eli iā te ia ma fesili: ʻLoʻu atalii e, o le ā na fetalai mai ai Ieova iā te oe? Taʻu mai mea uma na ia fetalai atu ai iā te oe.’ Ona taʻu atu lea e Samuelu o mea uma na fetalai mai ai Ieova iā te ia.

A o tuputupu aʻe Samuelu, sa faaauau pea ona fesoasoani Ieova iā te ia. Na iloa e tagata Isaraelu uma, ua filifilia e Ieova Samuelu e avea o se perofeta ma o se faamasino.