Foaʻi e Ieova le Malosi iā Samasoni

Na toe tapuaʻi foʻi le toʻatele o tagata Isaraelu i tupua. O lea na faataga ai e Ieova tagata Filisitia e pule i o latou laueleele. Ae na iai lava tagata Isaraelu sa alolofa iā Ieova. O se tasi o i latou o se tamāloa e igoa iā Manoa. E leai sa la fanau ma lana avā. I se tasi aso, na auina mai ai e Ieova se agelu i le avā a Manoa. Na faapea atu le agelu iā te ia: ʻO le a e fanauina se tama tama. O le a ia laveaʻia tagata Isaraelu mai i tagata Filisitia. O le a avea o ia o se Naseri.’ Pe e te iloa po o ai nei tagata e taʻu o Naseri? O i latou o ni auauna faapitoa a Ieova. E leʻi faataga ona ʻoti o latou lauulu.

E leʻi umi ae fanau le atalii o Manoa, ma ua ia faaigoa o ia iā Samasoni. Ina ua tuputupu aʻe o ia, na faatupuina e Ieova lona malosi ma avea ai Samasoni o se tagata e sili ona malosi. Sa mafai e Samasoni ona tapēina se leona e aunoa ma le faaaogāina o se auupega. I se tasi taimi, na fasiotia toʻatasi ai e Samasoni tagata Filisitia e toʻa 30. Na feita tagata Filisitia iā te ia, ma saʻili pea auala e fasiotia ai o ia. I se tasi taimi a o moe Samasoni i Kasa, na ō atu ai tagata Filisitia i faitotoʻa o le pā o le aai ma faatalitali ai i inā, ina ia mafai ona latou fasiotia o ia i le taeao e sosoo ai. Ae i le vaeluapō, na ala aʻe Samasoni ma alu atu i le faitotoʻa o le pā o le aai ma fafaʻi ese. Ona ia amoina lea o le faitotoʻa seʻia oo i le tumutumu o se mauga e lata i Heperona.

I se taimi mulimuli ane, na ō atu ai tagata Filisitia i le uō teine a Samasoni o Talila ma faapea atu: ʻE matou te avatu ma oe tupe siliva e afe selau, pe afai e te saʻilia le māfuaaga o le malosi o Samasoni. E matou te mananaʻo e puʻe o ia ma ave i le falepuipui.’ Na ioe Talila i le mea sa latou fai mai ai, ona o lona manaʻo i le tupe. I le taimi muamua, na musu Samasoni e taʻu iā te ia le māfuaaga o lona malosi. Ae ua faaauau pea ona tauanau o ia e Talila seʻia oo lava ina taʻu i ai e Samasoni le pogai o lona malosi. Na ia faapea atu: ʻE leʻi ʻotiina lava loʻu lauulu ona o aʻu o se Naseri. Pe afai e ʻoti loʻu lauulu, o le a lē toe iai soʻu malosi.’ Na matuā sesē lava le mea sa fai e Samasoni, a ea?

Na alu atu faavave loa Talila ma fai atu i tagata Filisitia: ʻUa ou iloa le māfuaaga o lona malosi.’ Ua ia faamoe Samasoni i ona vae, ona ia valaau atu lea i se tasi tagata e sau e ʻoti le lauulu o Samasoni. Ua valaau o ia: ʻSamasoni, ua ō mai tagata Filisitia.’ Ona ala lea o Samasoni, ae ua leai sona malosi. Ua puʻe o ia e le ʻau Filisitia, faatauaso o ia, ma ave i le falepuipui.

I se tasi aso, na faapotopoto ai le faitau afe o tagata Filisitia i le malumalu o lo latou atua o Takono, ma alalaga leotetele e faapea: ʻUa tuuina mai e lo tatou atua iā i tatou Samasoni. Aumai i fafo Samasoni, ina ia tatou toē ai iā te ia.’ Ona latou ave lea o ia ma faatū i le va o pou tetele e lua ma taufaalili iā te ia. Na valaau atu Samasoni: ʻIeova e, faamolemole seʻi toe foaʻi tasi mai lava le malosi i lenei taimi.’ O le taimi lea ua toe uumi le lauulu o Samasoni. O lea, na ia faaaogā ai lona malosi uma na totoe e tulei ai nei pou tetele e lua o le malumalu. Na malepe i lalo le fale atoa ma fasiotia ai tagata uma na iai, ma na maliu ai foʻi ma Samasoni.