Tavita ma Koliata

Na faapea atu Ieova iā Samuelu: ʻIa e alu i le aiga o Iese. O se tasi o ona atalii o le a avea ma tupu e sosoo ai o Isaraelu.’ Ona alu ai lea o Samuelu i le aiga o Iese. Ina ua ia iloa atu le atalii aupito i matua, na ia manatu e faapea: ʻO ia lenei ua filifilia.’ Ae na fetalai atu Ieova e lē o le tagata lenā. Na faapea atu Ieova: ʻOu te vaai i le loto o le tagata, ae e lē o ona foliga.’

Na aumai e Iese isi ona atalii e toʻaono i luma o Samuelu. Ae na faapea atu Samuelu: ʻE leʻi filifilia e Ieova se tasi o i latou. E iai nisi ou atalii?’ Na tali mai Iese: ʻToe toʻatasi loʻu atalii, o le uii o Tavita. O loo iai o ia i le fanua e leoleoina aʻu mamoe.’ Ina ua alu ane Tavita, ona faapea mai lea o Ieova iā Samuelu: ʻO ia lenei ua ou filifilia!’ Ona liligi lea e Samuelu o le suāuu i le ulu o Tavita, ma faauuina ai o ia e avea ma tupu o Isaraelu.

I se taimi mulimuli ane, na tau ai tagata Isaraelu ma tagata Filisitia, lea sa iai se sauʻai e igoa iā Koliata na tau mo tagata Filisitia. I aso taʻitasi e taufaifai ai Koliata i tagata Isaraelu. Na ia valaau leotele atu: ʻIa auina mai se tagata e ma te tau. Afai e manumalo o ia, o le a fai i matou ma a outou pologa. Ae afai ou te manumalo, o le a fai outou ma a matou pologa.’

Na alu Tavita i le mea o loo iai le ʻautau a Isaraelu e ave meaʻai mo ona uso, o i latou o ni fitafita. Na ia lagona atu Koliata ma faapea atu: ʻO le a ou alu ou te tau ma ia.’ Na fai mai le tupu o Saulo: ʻUa na o oe o se tamaitiiti.’ Ua tali atu Tavita: ʻE fesoasoani mai Ieova iā te aʻu.’

Na taumafai Saulo e avatu lona ofutau iā Tavita, ae na fai atu Tavita: ʻE lē mafai ona ou tau i lenei ofutau.’ Ua ave e Tavita lana maatā ma alu atu i se ālia. Na ia aumai ai ni maa lamolemole e lima ma tuu i se ato. Ona tamoʻe atu lea o ia e faafetaui Koliata. Na valaau leotele mai le sauʻai: ʻSau iā te aʻu. Ou te tuuina atu lou tino i manufelelei o le lagi ma manu o le fanua.’ E leʻi fefe Tavita. Ua ia tali atu ma le leotele: ʻE te sau iā te aʻu ma le pelu ma le tao, ae ou te alu atu iā te oe i le suafa o Ieova. E te lē o tau ma i matou, ae o loo e tau faasaga i le Atua. O le a iloa e tagata uma i le aso lenei, e sili atu ona malosi Ieova nai lo o se pelu po o se tao. O le a ia tuuina mai outou uma i o matou lima.’

Ona tuu lea e Tavita o se maa i lana maatā ma sasau i le mea e gata ai lona malosi. O le fesoasoani a Ieova, na lele saʻo atu ai le maa iā Koliata ma ua goto i lona muāulu. Ua paʻū faō le sauʻai ma oti ai, ona sosola ai lea o tagata Filisitia. Pe e te maufaatuatuaina Ieova e pei ona faia e Tavita?