Paulo ma Timoteo

O Timoteo o se uso talavou i le faapotopotoga i Lusa. O lona tamā o se Eleni, ae o lona tinā o se Iutaia. Na aʻoaʻoina o ia mai lava i lona laʻitiiti e faatatau iā Ieova, e Eunike lona tinā ma Loi le tinā o lona tinā.

I le taimi na asiasi atu ai Paulo i Lusa i lana talaʻiga faataamilo lona lua, na ia mātauina ai le alofa moni o Timoteo i le ʻauuso ma sa naunau e fesoasoani iā i latou. Na valaaulia e Paulo Timoteo ina ia faatasi atu i lana malaga. A o faagasolo taimi, na toleniina ai e Paulo Timoteo ina ia avea o se tagata talaʻi ma o se faiaʻoga tomai o le tala lelei.

O so o se mea lava na faimalaga i ai Paulo ma Timoteo, na taʻitaʻia i laʻua e le agaga paia. I se tasi pō na vaaia ai e Paulo i se faaaliga se tamāloa na faapea mai iā te ia, ina ia alu atu i Maketonia ma fesoasoani iā i latou. O lea na ō ai Paulo, Timoteo, Sila ma Luka e talaʻi i inā ma faavae ai faapotopotoga.

I le aai o Tesalonia i Maketonia, e toʻatele tane ma fafine na avea ma Kerisiano. Ae na iai nisi tagata Iutaia sa lotoleaga iā Paulo ma ē na malaga faatasi ma ia. Na latou faapotopoto mai ni tagata ma fetoso le ʻauuso i alii pule o le nuu ma alalaga atu: ʻO tagata nei o fili o le malo o Roma!’ Na lamatia ola o Paulo ma Timoteo, o lea na la sosola ai loa i Perea i le pō.

Sa naunau tagata Perea e aʻoaʻoina le tala lelei, ma na avea tagata Eleni ma Iutaia sa iai i inā o ni tagata talitonu. Ae ina ua ō atu nisi tagata Iutaia mai i Tesalonia ma faatupu le vevesi i inā, na alu ese ai Paulo ae alu atu i Atenai. Na nonofo Timoteo ma Sila i Perea e faamalosiau i le ʻauuso. A o faagasolo taimi, na toe auina atu ai e Paulo Timoteo i Tesalonia e fesoasoani i le ʻauuso a o feagai ai ma sauāga ogaoga i inā. Mulimuli ane, na auina atu e Paulo Timoteo e asiasi i le tele o faapotopotoga ma faalaeiau iā i latou.

Na faapea atu Paulo iā Timoteo: ʻE sauāina i latou e mananaʻo e auauna iā Ieova.’ Na sauāina ma tuuina Timoteo i le falepuipui ona o lona faatuatua. Sa fiafia o ia ona o lenā avanoa na mafai ai ona faamaonia atu lona faamaoni iā Ieova.

Na faapea atu Paulo i uso i Filipi: ʻUa ou auina atu Timoteo iā te outou. O le a ia aʻoaʻoina outou i le auala e ola ai o se auauna a Ieova, ma o le a ia toleniina outou i le faiva.’ Na iloa e Paulo e mafai ona ia maufaatuatuaina Timoteo. Na la galulue faatasi o ni uō ma o se ʻauuso mo tausaga e tele.