Malamalama i Valoaga a Esekielu

LE UIGA O LE UPU VALOAGA

I le Tusi Paia, o le veape Eperu na·vaʼʹ lea ua faaliliuina “valoia,” e faasino atu i le folafolaina o se feʻau faagaeeina, o se faamasinoga, o se aʻoaʻoga tauamio, po o se poloaʻiga mai i le Atua. E mafai foʻi ona faasino atu i le faaoo atu o se folafolaga mai i le Atua o se mea o le a oo mai. O valoaga a Esekielu o loo aofia ai na ituaiga uma o valoaga mai i le Atua.—Eseki. 3:10, 11; 11:4-8; 14:6, 7; 37:9, 10; 38:1-4.

AUALA NA FAAOO ATU AI

• 

  FAAALIGA

• 

  TALAFAATUSA

• 

  FAATINOGA

O le tusi o Esekielu o loo aofia ai faaaliga, talafaatusa, ma le faatinoga o feʻau faavaloaga.

FAATAUNUUGA

I nisi taimi, e sili atu ma le tasi le faatau- nuuga o valoaga a Esekielu. O se faaaʻoaʻoga, na faatapulaa le faataunuuga o valoaga o le toe faafoʻisiaga ina ua toe foʻi tagata o le Atua i le Nuu Folafolaina. Ae e pei ona iloiloina i le Mataupu e 9 o lenei lomiga, o le tele o valoaga o le toe faafoʻisiaga o loo iai se faataunuuga i aso nei ma i le lumanaʻi.

I tausaga ua mavae, na tatou manatu i nisi o vaega o valoaga a Esekielu e iai faaataga ma o latou faataunuuga. Peitaʻi, e lē faamatalaina i lenei lomiga se tasi, o se meafaitino, se nofoaga, po o se mea na tupu e iai se faaataga faavaloaga ma sona faataunuuga i aso nei, seʻi vaganā ai e iai se faavae manino faale-Tusi Paia e fai ai faapea.a Nai lo o lea, o loo faasino atu i se faataunuuga sili o le tele o valoaga a Esekielu. O le a iloiloina ai foʻi lesona e tatou te aʻoaʻoina mai i le feʻau a Esekielu, faapea ma tagata, o nofoaga, ma mea na tutupu na taʻua e Esekielu.