O le ā le Vaaiga a Kerisiano e Tatau Ona Iai i le ʻAva Malosi?

I le lalolagi atoa, e eseese manatu o tagata e faatatau i le ʻava malosi. O nisi e fiafia e taumafa le ʻava malosi pe a faatasitasi ma a latou uō. O isi e filifili e lē taumafa i le ʻava malosi, ae o isi e inu tele seʻia oo lava ina onanā. O le ā le manatu o le Tusi Paia i le ʻava malosi?

1. Pe e sesē le taumafa o le ʻava malosi?

E lē o faapea mai le Tusi Paia e sesē le taumafaina o le ʻava malosi. Nai lo lea, ina ua taʻua i le Tusi Paia le tele o meaalofa lelei mai i le Atua, na aofia ai ma le “uaina e faafiafia ai le loto o le tagata.” (Salamo 104:14, 15) O loo taʻua i le Tusi Paia nisi o tane ma fafine faatuatua, na taumafaina foʻi le ʻava malosi.​—1 Timoteo 5:23.

2. O le ā le fautuaga a le Tusi Paia iā i latou e filifili e inu i le ʻava malosi?

E taʻusalaina e Ieova le inu tele ma le onā. (Kalatia 5:21) Ua faapea mai lana Afioga: “Aua neʻi e faatasi ma ē e inu tele i le uaina.” (Faataoto 23:20) Pe a tatou filifili e inu i le ʻava malosi pe a faatasitasi ma isi pe na o i tatou foʻi, e lē tatau ona inu tele ma oo ina lē saʻo ai le mafaufau, lē mafai ona pulea faamatalaga ma gaoioiga, pe faaleagaina ai foʻi lo tatou soifua mālōlōina. Pe afai e lē mafai ona pulea le inu, e tatau la ona tatou lotomalie e aua le toe inuina le ʻava malosi.

3. E faapefea ona tatou faaalia le faaaloalo i filifiliga a isi e faatatau i le ʻava malosi?

E tatau i tagata taʻitoʻatasi ona filifili pe inu i le ʻava malosi. E lē tatau ona tatou faamasinoina le filifiliga a se tasi e inu i le ʻava malosi ae fuafua lelei. E lē tatau foʻi ona tatou uunaʻia se tasi e inu i le ʻava malosi ae lē o manaʻo ai. (Roma 14:10) E tatou te filifili e lē inuina le ʻava malosi, pe afai e ono lē fiafia ai isi. (Faitau le Roma 14:21.) E lē tatau ona tatou saʻilia lo tatou “lava lelei, ae ia faaauau ona saʻili le lelei o isi.”​—Faitau le 1 Korinito 10:23, 24.

SAʻILIʻILI ATILI

4. Filifili pe e te inu

O le ā le silafaga a Iesu i le inuina o le ʻava malosi? Ina ia iloa le tali, seʻi iloilo le vavega muamua na ia faia. Faitau le Ioane 2:1-11, ona talanoa lea i fesili nei:

• I le vavega, o le ā e tatou te aʻoaʻoina mai i le silafaga a Iesu i le ʻava malosi ma i latou sa inuina?

• Talu ai e leʻi taʻusalaina e Iesu le inuina o le ʻava malosi, o le ā la le vaaiga e tatau ona iai i se Kerisiano i se isi e filifili e inu le ʻava malosi?

E ui lava e mafai ona inu e se Kerisiano le ʻava malosi, ae e lē faapea ai o se gaoioiga lelei le inu i taimi uma. Faitau le Faataoto 22:3, ona iloilo lea po o ā aafiaga o vaega o loo mulimuli mai pe a e filifili e inu:

• Ua sauni e ave le taavale pe faia se galuega e faaaogā ai se masini.

• Pe afai o se tinā maʻitaga.

• Ua fautuaina oe e se fomaʻi e aua le inu i le ʻava malosi.

• E lē mafai ona e pulea le tele o lau inu.

• E lē faatagaina i le tulafono ona e inu i le ʻava malosi.

• O loo lua iai faatasi ma se tagata ua filifili e tuu lana inu, ona e lē mafai ona ia pulea lana inu i le taimi ua teʻa.

Pe e tatau ona faaaogā le ʻava malosi i le ʻaiga o se faaipoipoga po o se faatasiga faasamasamanoa? Ina ia iloa po o le ā e fesoasoani iā te oe e filifili ai, faaali le VITIŌ.

VITIŌ: Pe e Tatau Ona Faaaogā le ʻAva Malosi i Laʻu Faaipoipoga? (2:41)

Faitau le Roma 13:13 ma le 1 Korinito 10:31, 32. Pe a uma ona faitau mau taʻitasi, ona talanoa lea i le fesili lenei:

• E faapefea i le faatatauina o lenei mataupu silisili ona fesoasoani iā te oe e faia se filifiliga e faafiafia ai Ieova?

5. Filifili po le ā le tele e te inu ai

Pe a e filifili e tagofia le ʻava malosi ia manatua le manatu lenei: E ui e lē o taʻusalaina e Ieova le inuina o le ʻava malosi, ae na te taʻusalaina le inu tele. Aiseā? Faitau le Hosea 4:11, 18, ona talanoa lea i le fesili lenei:

• O le ā e tupu i se tasi pe a inu tele i le ʻava malosi?

E faapefea ona ʻalofia le inu tele? E manaʻomia ona e iloa lelei le mea e gata mai ai lau inu. Faitau le Faataoto 11:2, ona talanoa lea i le fesili lenei:

• Aiseā e tatau ai ona fuafua lelei le tele o lau inu?

6. Auala e foʻia ai le masaniga o le inu tele

VITIŌ: ʻOu te Leʻi Fiafia i Loʻu Olaga’ (6:32)

• I le vitiō, na faapefea ona aafia gaoioiga a Dmitry i le ʻava malosi?

• Pe sa faigofie ona tuu lana inu?

• Na faapefea ona taofia lana masaniga o le inu tele?

Faitau le 1 Korinito 6:10, 11, ona talanoa lea i fesili nei:

• O le ā le matuiā o le onā?

• E faapefea ona iloa, e mafai e se tasi e inu tele i le ʻava malosi ona faia suiga?

Faitau le Mataio 5:30, ona talanoa lea i le fesili lenei:

• O le tipiesea o le lima, o loo uiga atu i le faia o faataulaga ina ia faafiafia ai Ieova. O le ā e te faia pe a faigatā ona tuu le inu tele i le ʻava malosi?a

Faitau le 1 Korinito 15:33, ona talanoa lea i le fesili lenei:

• O ā aafiaga o lou faauō atu i tagata e inu tele?

AOTELEGA

Ua saunia e Ieova le ʻava malosi ina ia tatou maua ai le fiafia, ae e na te taʻusalaina le inu tele ma le onā.

Fesili Autalu

• O le ā le manatu o le Tusi Paia i le ʻava malosi?

• O ā aafiaga o le inu tele?

• E faapefea ona tatou faaaloalo i filifiliga a isi e faatatau i le ʻava malosi?

MANATU FAAOPOOPO

E faapefea ona faia e talavou filifiliga lelei e faatatau i le ʻava malosi?

Mafaufau i Āuga Leaga o le ʻAva Malosi (2:31)

Mātau auala e mafai ona fesoasoani iā te oe e tuu ai le inu tele.

“Le Vaaiga Saʻo i le ʻAva Malosi” (Le Olomatamata, Ianuari 1, 2010)

Pe e tatau i Kerisiano ona faia le tū o le faafetoʻai o ipu uaina e faamanuia atu ai?

“Fesili Mai le ʻAufaitau” (Le Olomatamata, Fepuari 15, 2007)

I le tala “O Aʻu o se Paelo e Mama,” mātau pe na faapefea ona tuua e se tamāloa le inu seʻia onā.

“E Mafai e le Tusi Paia Ona Suia Olaga” (Le Olomatamata, Me 1, 2012)