FAIA ISI MA SOO
LESONA 11
Faafaigofie
Mataupu silisili: “Pe afai tou te faaaogā ni upu e lē malamalamagofie, pe faapefea la ona malamalama se tasi i upu ua fai atu?”—1 Kori. 14:9.
Mea na Faia e Iesu
1. Ia matamata le VITIŌ, pe faitau le Mataio 6:25-27, ona manatunatu lea i fesili nei:
a. Na faapefea ona faataʻitaʻi mai e Iesu le manatu mamafa o Ieova iā i tatou?
e. E ui na silafia e Iesu le tele o mea e faatatau i manufelelei, ae o le ā se manatu faigofie na ia uaʻi i ai? Aiseā na lelei ai lenā auala?
O le ā e Tatou te Aʻoaʻoina Mai iā Iesu?
2. Pe a faigofie le auala e aʻoaʻo atu ai, o le a manatua e tagata mea na tatou aʻoaʻo atu ma o le a pāʻia ai o latou loto.
Faaaʻoaʻo iā Iesu
3. Aua le tautala soo. Ia taulaʻi i le mataupu o loo i le lomiga mo suʻesuʻega, nai lo o le faamatala uma atu o mea o loo e iloa e faatatau i le mataupu. Pe a uma ona fai atu le fesili, ia faatali ma le onosaʻi i le tali. Pe afai e na te lē iloa le tali pe e ese foʻi ona manatu mai i aʻoaʻoga a le Tusi Paia, ia fai atu nisi fesili e fesoasoani iā te ia e mafaufau atili ai i le mataupu. O le taimi lava e malamalama ai le tagata aʻoga i le manatu tāua, ia see loa i le isi manatu.
4. Fesoasoani i lau tagata aʻoga e faaaogā mea ua ia iloa, ina ia malamalama ai i aʻoaʻoga fou. O se faataʻitaʻiga, a o leʻi amataina se lesona i le toetū, ia autalu puupuu mea ua ia iloa e faatatau i le tulaga o le tagata ua oti.
5. Ia filifili lelei ni faataʻitaʻiga. A o leʻi faia se faataʻitaʻiga, ia fesili ifo:
a. ʻPe e faigofie lenei faataʻitaʻiga?’
e. ʻPo o le a faigofie ona malamalama i ai laʻu tagata aʻoga?’
i. ʻPo o le a fesoasoani i laʻu tagata aʻoga e manatua ai le manatu tāua, ae e lē na o le faataʻitaʻiga?’