Faatonuga mo le Sauniga o La Tatou Faiva ma le Olaga Faa-Kerisiano

Lisi o Mataupu

1. O nei faatonuga e fesoasoani iā i latou uma e faia vaega i le sauniga o La Tatou Faiva ma le Olaga Faa-Kerisiano. A o sauniuni mo a latou vaega, e tatau ona latou iloilo faatonuga o loo i le Polokalame mo le Sauniga o le Faiva ma le Olaga Faa-Kerisiano, ma lenei pepa o faatonuga. E tatau ona talosagaina tagata talaʻi uma e faaavanoa i latou ina ia auai i le aʻoga. O isi o loo aufaatasi e lē aunoa ma le faapotopotoga, e mafai ona tusia o latou suafa pe afai e ioe i aʻoaʻoga a le Tusi Paia, ma o loo ola e ōgatusa ma mataupu silisili faa-Kerisiano. Pe a manaʻo se tasi e leʻi avea ma tagata talaʻi e tusia lona suafa i le aʻoga, e tatau i le ovasia o le Sauniga o le Faiva ma le Olaga Faa-Kerisiano ona iloilo agavaa faatasi ma lenā tagata, ona faailoa lea i ai po ua agavaa. E tatau ona iai i le talanoaga lē o loo faia lana suʻesuʻega faale-Tusi Paia (po o se tasi o ona mātua talitonu). E tutusa agavaa mo le auai i le aʻoga, ma agavaa mo le avea ai ma tagata talaʻi e leʻi papatiso.—od mata. 8 pala. 8.

UPU TOMUA

2. 1 minute. Pe a māeʻa le pese ma le tatalo amata i vaiaso taʻitasi, e faaosofia e le taʻitaʻifono o le Sauniga o le Faiva ma le Olaga Faa-Kerisiano, le naunau o tagata mo le sauniga o le a faia. E tatau i le taʻitaʻifono ona uaʻi atu i manatu o le a sili ona aogā i le faapotopotoga.

ʻOA TAUTELE MAI I LE AFIOGA A LE ATUA

3. Lauga: 10 minute. Ua saunia atu i le Polokalame mo le Sauniga o le Faiva ma le Olaga Faa-Kerisiano, se matua ma ni manatu autū se lua pe tolu. O lenei lauga e tofia atu i se toeaina, po o se auauna o le faiva agavaa. Pe a iloiloina se tusi fou o le Tusi Paia mo le faitauga Tusi Paia, o le a iai se vitiō e faaali e faatomua ai lenā tusi o le Tusi Paia. E mafai e le failauga ona faafesootaʻi ni manatu mai i le vitiō i lana matua. Peitaʻi, e tatau ona ia faamautinoa ua ia taʻua manatu autū o loo i le polokalame mo le sauniga. E lē gata i lea, pe a lava le taimi, e ao ona ia faaaogā ata ua saunia ina ia lagolagoina ai le mataupu. E mafai foʻi ona ia faaaofia ai isi manatu mai i lomiga ua saunia, pe afai e lagolagoina ai le mataupu.

4. Saʻiliʻiliga mo ʻOa Faaleagaga: 10 minute. O lenei vaega, o fesili ma tali, e leai sona faatomuaga po o ni upu faaiʻu. E tatau ona faia e se toeaina, po o se auauna o le faiva agavaa. E tatau ona fai uma atu fesili i le aofia. E lē gata i lea, e mafai ona ia filifili pe faitau pe e lē faitauina mau o loo sii mai. E tatau iā i latou e faia tali ona 30 sekone pe itiiti ifo le uumi o a latou tali.

5. Faitau Tusi Paia: 4 minute. O lenei vaega e tofia atu i se uso. E tatau i le tagata aʻoga ona faitau fuaiupu ua faatulaga atu, e aunoa ma le faia o sana faatomuaga po o ni upu faaiʻu. E ao i le taʻitaʻifono o le sauniga ona mātauina po o saʻo aʻiaʻi le faitau a le tagata aʻoga, pe e faigofie ona malamalama i ai, sologa lelei, talafeagai faamamafaga, saʻo le fesuiaʻiga o le leo, talafeagai mānavaga, ma ia faitau e pei lava ona masani ai. Talu ai o nisi faitau Tusi Paia e pupuu a o isi e uumi, e tatau la i le ovasia o le Sauniga o le Faiva ma le Olaga Faa-Kerisiano ona iloilo tomai o tagata aʻoga pe a faia nei tofiga.

TOLENIGA MO LE FAIVA I LE FANUA

6. 15 minute. O le vaega lenei o le sauniga ua faatulaga ina ia maua ai e tagata uma le avanoa e toleni ai mo le talaʻiga, ma faaleleia ai le auala e talanoa ai ma tomai e talaʻi ma aʻoaʻo atu ai. Pe a talafeagai, e ono mafai foʻi ona maua e toeaina ni tofiga mo tagata aʻoga. E tatau i le tagata aʻoga ona galue i le suʻesuʻega mai i le polosiua Aʻoaʻo Atu po o le Alofa i Tagata o loo i puipui i autafa o tofiga, i le Polokalame mo le Sauniga o le Faiva ma le Olaga Faa-Kerisiano. I nisi taimi, o le a faatulaga atu ai se vaega e faia o se talanoaga. O lenei vaega e tofia atu i se toeaina, po o se auauna o le faiva agavaa.—Tagaʻi i le palakalafa e 15 i le auala e taulima ai le vaega mo talanoaga.

7. Amataina o se Talanoaga: O lenei tofiga e mafai ona faia e se uso po o se tuafafine. E tatau ona faaaogā se tagata o le itupā e tasi po o se tagata o le aiga e fai ma ana fesoasoani. E mafai ona tutū pe nonofo le tagata aʻoga ma lana fesoasoani.—Ina ia iloa le mataupu ma le faatulagaga mo lenei tofiga, tagaʻi i le palakalafa e 12 ma le 13.

8. Toe Asia le Tagata: O lenei tofiga e mafai ona faia e se uso po o se tuafafine. E tatau ona faaaogā se tagata o le itupā e tasi e fai ma ana fesoasoani. (km 5/97 itu. 2) E mafai ona tutū pe nonofo le tagata aʻoga ma lana fesoasoani. E ao i le tagata aʻoga ona faataʻitaʻi le tala e fai atu pe a toe talanoa ma se tasi na talanoa muamua i ai.—Ina ia iloa le mataupu ma le faatulagaga mo lenei tofiga, tagaʻi i le palakalafa e 12 ma le 13.

9. Faia Isi ma Soo: O lenei tofiga e mafai ona faia e se uso po o se tuafafine. E tatau ona faaaogā se tagata o le itupā e tasi e fai ma ana fesoasoani. (km 5/97 itu. 2) E mafai ona tutū pe nonofo le tagata aʻoga ma lana fesoasoani. O le vaega lenei e ao ona faataʻitaʻi mai ai se vaega o se suʻesuʻega faale-Tusi Paia o loo faagasolo. E lē manaʻomia se faatomuaga po o ni upu e faaiʻu ai seʻi vaganā o loo galue patino se tagata aʻoga i se tasi o na suʻesuʻega. E lē manaʻomia ona faitau uma le mataupu o loo tofia mo le taulimaga, e ui e mafai ona fai.

10. Faamatala Ou Talitonuga: Pe a faatulaga mai o se lauga, e tatau ona faia e se uso. Ae a faatulaga mai o se faataʻitaʻiga, e mafai ona faia e se uso po o se tuafafine. E tatau ona faaaogā se tagata o le itupā e tasi po o se tagata o le aiga e fai ma ana fesoasoani. E tatau i le tagata aʻoga ona avatu se tali manino ma faautauta i le fesili autū, e faaaogā ai lomiga o loo saunia atu. A o faia lenei vaega, e mafai ona filifili le tagata aʻoga pe taʻua le lomiga pe leai.

11. Lauga: O lenei tofiga e ao ona faia e se uso ma e taulimaina e pei o se lauga mo le faapotopotoga. Pe afai e faavae mai le lauga i se manatu mai i le faaopoopoga A o le polosiua Alofa i Tagata, e tatau i le tagata aʻoga ona faamatilatila le auala e faaaogā ai le mau (po o mau) i le faiva. O se faataʻitaʻiga, e mafai ona ia faamatala le taimi e faaaogā ai le mau, o le uiga o le mau, ma le auala e fefulifulisaʻi ai ma se tagata i le mau. Pe afai e faavae mai le lauga i se lesona i le polosiua Alofa i Tagata, e tatau i le tagata aʻoga ona uaʻi atu i le auala e faatatau ai lenā manatu i le faiva. E mafai ona ia faamatilatila le faaaʻoaʻoga o loo i le manatu muamua o le lesona, po o isi mau o loo iai i le lesona pe a manaʻomia.

12. Mataupu: O faatonuga i lenei palakalafa ma le palakalafa o sosoo mai e mo le vaega “Amataina o se Talanoaga” ma le “Toe Asia le Tagata.” Seʻi vaganā ua faailoa atu se isi faatonuga, ae o le sini o le tagata aʻoga o le faailoa atu o se upu moni faigofie o le Tusi Paia e fetaui lelei ma le tagata o loo talanoa i ai, ma faataatia se faavae mo se isi talanoaga. E tatau i le tagata aʻoga ona filifili se mataupu e talafeagai ma aogā i tagata o le oganuu. E ono filifili o ia pe faaaogā se lomiga po o se vitiō mai i a tatou Meafaigaluega mo le Aʻoaʻo Atu. Nai lo o le aʻo faatauloto o se taulimaga, e tatau i le tagata aʻoga ona faataʻitaʻi mai tomai mo le faia o se talanoaga, e pei o le faaalia o le naunau moni, ma talanoa e pei ona masani ai.

13. Faatulagaga: E tatau i le tagata aʻoga ona faaaogā le faatulagaga ua tofia atu ma ia talafeagai ma le oganuu. Mo se faaaʻoaʻoga:

(1) Fale i le Fale: O lenei faatulagaga e aofia ai le talaʻi mai i le fale i le fale—a lē o le talanoa ma le tagata i lona fale, o le telefoni, po o se tusi—ma le toe asia o se tasi na talanoa muamua i ai i le talaʻiga mai i lea fale i lea fale.
(2) Molimau Lē Fuafuaina: O lenei faatulagaga e faailoa mai ai le auala e faaaogā lelei ai avanoa e avatu ai se molimau i talanoaga faasamasamanoa. E ono aofia ai le faailoa atu o se manatu faale-Tusi Paia i se isi e te feiloaʻi ai i le galuega, aʻoga, ou tuaoi, i luga o auala o femalagaaʻiga mo le lautele, po o so o se mea lava e te alu i ai a o faagasolo le aso.
(3) Molimau i Nofoaga Faitele: O lenei faatulagaga e aofia ai le molimau atu e ala i fata tusi, i oganuu o pisinisi, i magāala, o paka, o nofoaga e paka ai taavale, po o so o se nofoaga e maua ai tagata.

14. Faaaogāina o Vitiō ma Lomiga: E mafai ona filifili le tagata aʻoga pe faaaogā se vitiō po o se lomiga e fua i le tulaga o mea. Pe afai o le tofiga mo le tagata aʻoga e aofia ai se vitiō, pe filifili foʻi o ia e faaaogā se vitiō, e tatau ona faatomua ma talanoa le vitiō, ae e lē faaalia.

AUALA E OLA AI O SE KERISIANO

15. Pe a uma le pese, ona sosoo ai lea ma le vaega e 15 minute, lea e aofia ai se mataupu se tasi pe lua ua faatulagaina ina ia fesoasoani i le aofia e faatatau le Afioga a le Atua. Seʻi vaganā ua iai se faatonuga, ae o nei mataupu e tofia i toeaina po o ni auauna o le faiva agavaa, ae o manaʻoga o le faapotopotoga e taulimaina e se toeaina. Pe afai o le vaega o se talanoaga, e ono faia e le failauga ni fesili faaopoopo a o faagasolo le talanoaga, e ese mai i fesili ua saunia atu. E tatau ona faapuupuu lana faatomuaga, ina ia lava ai le taimi e talanoaina ai manatu autū ma faia ai sao o le aofia. Pe afai e aofia ai se faatalanoaga, e fautuaina le faia mai i le pulelaa pe a talafeagai.

16. Suʻesuʻega Faale-Tusi Paia a le Faapotopotoga: 30 minute. E tofia atu i se toeaina agavaa. (O faapotopotoga e toʻaitiiti toeaina e iai, e mafai ona faaaogā auauna o le faiva agavaa pe a manaʻomia.) E filifili e le ʻautoeaina po o ai e agavaa e faia le Suʻesuʻega Faale-Tusi Paia a le Faapotopotoga. O i latou e faamaoniaina, e tatau ona mafai ona taulima le Suʻesuʻega i se auala lelei ma aogā ina ia uma ai le suʻesuʻega i le taimi faatulagaina, ia faamamafa mau autū, ma fesoasoani i tagata uma e talisapaia le aogā o manatu na talanoaina. O le a latou maua aogā mai i le iloiloina o taʻiala i le auala e taulima ai se vaega o fesili ma tali. (w23.04 itu. 24, pusa) Afai ua uma ona talanoaina māeʻaeʻa lelei le mataupu ua faatulagaina mo le vaiaso, e lē manaʻomia ona toe faaumiumi le suʻesuʻega. Pe a talafeagai, e ao ona faaaogā fai suʻesuʻega ma tagata faitau eseese i vaiaso taʻitasi. Pe afai e faatonuina e le taʻitaʻifono o le Sauniga o le Faiva ma le Olaga Faa-Kerisiano e faapuupuu le suʻesuʻega, ona filifili lea o le fai suʻesuʻega i le auala e faapuupuu ai. E mafai ona lē faitauina nisi o palakalafa.

UPU FAAIʻU

17. 3 minute. O le a autalu e le taʻitaʻifono o le Sauniga o le Faiva ma le Olaga Faa-Kerisiano ni manatu tāua mai i le sauniga. E tatau foʻi ona ia taʻua ni manatu o le a talanoaina i le sauniga o le vaiaso e sosoo ai. Pe a lava le taimi, e ono mafai foʻi ona ia faailoa atu igoa o tagata aʻoga ua tofia e faia vaega i le sauniga o le vaiaso e sosoo ai. Seʻi vaganā ua iai se isi faatonuga, ae o le taimi mo upu faaiʻu a le taʻitaʻifono, e mafai ona ia faia ai ni faasilasilaga e manaʻomia ona fai, pe faitau atu se tusi e tatau ona faailoa atu i le faapotopotoga. O faasilasilaga masani e pei o faatulagaga mo le auaunaga i le fanua ma galuega faamamā, e lē tatau ona faasilasila atu mai le pulelaa ae e ao ona faapipii i le laupapa mo faamatalaga. Pe afai e lē lava le taimi ua faatulaga atu mo upu faaiʻu a le taʻitaʻifono e fai ai faasilasilaga pe faitau atu ai se tusi, e ao la i le taʻitaʻifono ona talosaga i uso o le a faia vaega i le Auala e Ola ai o se Kerisiano, ina ia faapuupuu a latou vaega pe a talafeagai. (Tagaʻi i le palakalafa 16 ma le 19.) E faaiʻu le sauniga i le pese ma le tatalo.

FAAMĀLŌ MA FAUTUAGA

18. Pe a māeʻa tofiga taʻitasi a tagata aʻoga, e faaalu e le taʻitaʻifono o le Sauniga o le Faiva ma le Olaga Faa-Kerisiano le pe ā ma le tasi le minute, ina ia faamālō atu ma avatu se fautuaga e faavae mai i le suʻesuʻega ua faatulaga atu. Pe a faailoa atu e le taʻitaʻifono le tofiga o le tagata aʻoga, e na te lē faailoa atu le suʻesuʻega o loo galue ai le tagata. Peitaʻi, pe a māeʻa le lauga a le tagata ma faamālō atu i ai, e ao i le taʻitaʻifono ona faailoa atu le suʻesuʻega na galue ai le tagata, ma taʻua le māfuaaga na lelei ai lana lauga, pe faamatala atu ma le agalelei le māfuaaga e tāua ai ona toe uaʻi atili atu i lenā suʻesuʻega. E ono taʻua foʻi e le taʻitaʻifono nisi o vala o le lauga e manatu e aogā i le tagata aʻoga ma le aofia. E ono avatu foʻi e le taʻitaʻifono nisi fautuaga faaopoopo mai i polosiua o le Alofa i Tagata ma le Aʻoaʻo Atu, po o le tusi Aʻoga o le Faiva, pe a māeʻa le sauniga po o se isi taimi talafeagai, atonu e faatatau i le suʻesuʻega na galue ai, po o se isi suʻesuʻega.—Mo nisi faamatalaga e tusa ai ma le matafaioi a le taʻitaʻifono o le Sauniga o le Faiva ma le Olaga Faa-Kerisiano faapea le faiaʻoga lagolago, tagaʻi i le palakalafa 19, 24, ma le 25.

TAIMI

19. E lē tatau ona ovataimi so o se vaega o le sauniga, po o fautuaga a le taʻitaʻifono o le Sauniga o le Faiva ma le Olaga Faa-Kerisiano. E ui o loo faatulaga atu taimi mo vaega taʻitasi i le Polokalame mo le Sauniga o le Faiva ma le Olaga Faa-Kerisiano, ae pe afai ua uma ona talanoaina māeʻaeʻa lelei le mataupu, e lē manaʻomia ona faia ni faamatalaga faaopoopo ina ia faauma ai le taimi. Afai e ovataimi isi vaega o le sauniga, e tatau ona fautuaina na o le failauga i se taimi mulimuli ane e le taʻitaʻifono o le Sauniga o le Faiva ma le Olaga Faa-Kerisiano, po o le faiaʻoga lagolago. (Tagaʻi i le palakalafa e 24 ma le 25.) O le sauniga atoa e aofia ai ma pese ma tatalo, e tatau ona 1 le itula ma le 45 minute le umi.

ASIASIGA A LE OVASIA O LE MATAGALUEGA

20. Pe a asia le faapotopotoga e le ovasia o le matagaluega, e ao ona faia pea le sauniga e pei ona faatulaga atu ai i le Polokalame mo le Sauniga o le Faiva ma le Olaga Faa-Kerisiano. Peitaʻi, o nisi nei o vala o le a suia: O le Suʻesuʻega Faale-Tusi Paia a le Faapotopotoga lea e iai i le vaega Auala e Ola ai o se Kerisiano, o le a suia i le lauga o le auaunaga e 30 minute, lea e faia e le ovasia o le matagaluega. A o leʻi faia le lauga o le auaunaga, e ao i le taʻitaʻifono o le Sauniga o le Faiva ma le Olaga Faa-Kerisiano, ona toe autalu le sauniga na faia, aotele le polokalame o le sauniga i le vaiaso e sosoo ai, faia ni faasilasilaga e manaʻomia ona fai, ma faitau ni tusi e tatau ona faitau, ona valaaulia loa lea o le ovasia o le matagaluega. Pe a māeʻa le lauga o le auaunaga, ona faaiʻu lea e le ovasia le sauniga i se pese ua ia filifilia. E mafai ona ia valaaulia se isi uso e faaiʻu le sauniga i se tatalo. E leai ni vasega faaopoopo e faia i le gagana a le faapotopotoga i le vaiaso o le asiasiga a le ovasia o le matagaluega. E mafai ona fai le sauniga a se vaega e ui o loo asia e le ovasia o le matagaluega le faapotopotoga o loo vaaia i latou. Ae ui i lea, e tatau ona latou toe faatasi ma le faapotopotoga o loo vaaia i latou i le taimi e fai ai le lauga o le auaunaga a le ovasia o le matagaluega.

VAIASO O LE FONOTAGA PO O LE TAUAOFIAGA

21. E leai ni sauniga e faia i le vaiaso o se fonotaga po o se tauaofiaga. E ao ona faamanatu i le faapotopotoga, o mataupu ua faatulaga atu mo sauniga o na vaiaso, e tatau ona iloiloina e le tagata lava ia pe talanoaina e le aiga.

VAIASO O LE FAAMANATUGA

22. Pe afai e paʻū le aso o le Faamanatuga i se aso o le vaiaso, o le a leai la se Sauniga o le Faiva ma le Olaga Faa-Kerisiano e faatulaga atu mo lenā vaiaso.

OVASIA O LE SAUNIGA O LE FAIVA MA LE OLAGA FAA-KERISIANO

23. E filifilia e le ʻautoeaina se toeaina e avea ma ovasia o le Sauniga o le Faiva ma le Olaga Faa-Kerisiano. O lana matafaioi, o le faamautinoa ua faia le sauniga i se auala maopoopo, ma ia ōgatusa ma faatonuga nei. E tatau ona lelei a la fesootaʻiga ma le faiaʻoga lagolago. O le taimi lava e maua ai le Polokalame mo le Sauniga o le Faiva ma le Olaga Faa-Kerisiano, e tatau loa i le ovasia ona tofia tagata e faia vaega uma o le sauniga amata o le vaiaso mo na masina. E aofia ai tofiga mo tagata aʻoga, o uso mo isi vaega o le sauniga, faapea taʻitaʻifono ua faamaonia e le ʻau toeaina. (Tagaʻi i le palakalafa 3-16 ma le 24.) Pe a faia tofiga mo le aʻoga, e tatau i le ovasia ona mafaufau i tausaga, tomai, ma le saʻolotoga o le tagata aʻoga e tautala ai i se mataupu o loo tofia i ai. O le auala foʻi lenā e tatau ona ia faia ai tofiga mo isi vaega o le sauniga. E tatau ona tufa atu tofiga, a itiiti mai e tolu vaiaso a o leʻi oo i le aso e faia ai. E tatau ona faaaogā le pepa La Tatou Faiva ma le Olaga Faa-Kerisiano Tofiga mo Sauniga (S-89). E tatau ona faamautinoa e le ovasia o le Sauniga o le Faiva ma le Olaga Faa-Kerisiano, ua faapipii se kopi o le faasologa o tofiga i le laupapa mo faasilasilaga. E mafai ona tofia e le ʻau toeaina se isi toeaina po o se auauna o le faiva e fesoasoani iā te ia. Peitaʻi, e na o toeaina e mafai ona tofia tagata e faia isi vaega o le sauniga e ese mai i le Toleniga mo le Faiva i le Fanua.

TAʻITAʻIFONO O LE SAUNIGA O LE FAIVA MA LE OLAGA FAA-KERISIANO

24. I vaiaso taʻitasi, e tofia ai se toeaina e avea ma taʻitaʻifono a o faagasolo le Sauniga o le Faiva ma le Olaga Faa-Kerisiano. (Pe a toʻaitiiti toeaina, e mafai ona tofia ni auauna o le faiva agavaa pe a manaʻomia.) E gafa o ia ma le saunia o upu tomua ma upu faaiʻu. E na te faatomua atu vaega uma, ma e faalagolago i le toʻatele o le ʻautoeaina, e mafai foʻi ona ia faia nisi o mataupu i le sauniga, aemaise lava vaega e faaali ai na o se vitiō ae e lē talanoaina. E tatau ona faapuupuu faamatalaga i le vā o vaega taʻitasi. E filifili e le ʻautoeaina po o ai toeaina e agavaa mo lenei tofiga. O toeaina agavaa, e masani ona tofia e avea ma taʻitaʻifono mai lea taimi i lea taimi. E mafai ona faaaogā i le tele o taimi le ovasia o le Sauniga o le Faiva ma le Olaga Faa-Kerisiano e fai ma taʻitaʻifono nai lo o isi toeaina agavaa, e fua i le tulaga o le faapotopotoga. Pe afai e agavaa se toeaina e faia le Suʻesuʻega Faale-Tusi Paia a le Faapotopotoga, e agavaa foʻi la e avea ma taʻitaʻifono. Peitaʻi, ia manatua, o le toeaina e fai ma taʻitaʻifono e manaʻomia ona avatu i se auala alofa se faamālō, ma pe a manaʻomia, ia fautuaina ma le agalelei tagata aʻoga e faia ni tofiga. O le matafaioi foʻi a le taʻitaʻifono le faamautinoa ua māeʻa le sauniga i le taimi faatulagaina. (Tagaʻi i le palakalafa e 17 ma le 19.) Pe a manaʻo i ai le taʻitaʻifono ma pe a telē le avanoa, e mafai lava ona faatulaga sana maikorofoni tū i luga o le pulelaa e na te faailoa atu ai vaega o loo sosoo mai, a o faaaogā e le uso o le a fai lana lauga le tulaga o le failauga. E faapena foʻi pe a manaʻo le taʻitaʻifono e nofo i se laulau i luga o le pulelaa a o faia le Faitau Tusi Paia ma vaega o le Toleniga mo le Faiva i le Fanua. O le faia faapea e faasaoina ai le taimi.

FAIAʻOGA LAGOLAGO

25. Pe a mafai, e lelei ona faaaogā se toeaina ua iai le poto masani o se failauga mo lenei faaeaga. O le tiute o le faiaʻoga lagolago o le avatu lea o fautuaga pe a manaʻomia i se toeaina po o se auauna o le faiva pe a na o i laʻua, e faatatau i so o se lauga e latou te faia, e aofia ai vaega i le Sauniga o le Faiva ma le Olaga Faa-Kerisiano, lauga lautele, faia po o le faitau i le Suʻesuʻega o Le Olomatamata po o le Suʻesuʻega Faale-Tusi Paia a le Faapotopotoga. (Tagaʻi i le palakalafa 19.) Afai e toʻatele ni toeaina i le faapotopotoga o ni failauga ma o ni faiaʻoga agavaa, e mafai la ona faaaogā ni toeaina agavaa eseese e fai ma faiaʻoga lagolago i tausaga taʻitasi. E lē manaʻomia ona avatu e le faiaʻoga lagolago se fautuaga pe a uma tofiga taʻitasi.

VASEGA FAAOPOOPO

26. E faalagolago i le toʻatele o tagata aʻoga, ae e mafai e le faapotopotoga ona faia nisi vasega faaopoopo mo tagata aʻoga e iai tofiga. E tatau ona iai se faiaʻoga agavaa mo vasega faaopoopo taʻitasi ma e lelei ona faaaogā se toeaina. Pe a talafeagai, e mafai ona tofia se auauna o le faiva e sili ona agavaa. E ao i le ʻautoeaina ona filifili po o ai e tofia i lenei faaeaga ma pe tatau foʻi ona faasolosolo uso agavaa i lea tofiga. E tatau i le faiaʻoga ona mulimuli i le faatulagaga o loo faamatalaina i le palakalafa e 18. Pe a faia se vasega faaopoopo, e ao ona valaaulia tagata aʻoga e ō atu i le potu aʻoga pe a uma le vaega Saʻiliʻiliga mo ʻOa Faaleagaga lea o loo i le vaega o le ʻOa Tautele Mai i le Afioga a le Atua. E tatau ona latou toe faapotopoto mai i luma i le mea o loo iai le faapotopotoga pe a māeʻa le vaega mulimuli o le aʻoga.

VITIŌ

27. E iai vitiō ua filifilia e faaaogā i lenei sauniga. O vitiō mo sauniga amata o le vaiaso o le a maua i le JW Library® ma e mafai ona maua e ala i le faaaogā o masini eseese.

S-38-SM 11/23