O le Soifuaga o Iesu ma Lana Faiva

Aʻoaʻoina Mai Tofotofoga o Iesu

Ina ua maea loa lona papatisoga, ona taʻitaʻiina atu lea o Iesu e le agaga o le Atua i le vaomatua o Iutaia. E tele ni mea mo ia e mafaufau i ai, aua i lona papatisoga sa “faaavanoaina le lagi ia te ia” ina ia na iloa mea faalelagi. O lea la ua manatua atoatoa nei e Iesu lona soifuaga o se atalii agaga o le Atua, e aofia ai ma mea uma lava na fetalai ane ai le Atua ia te ia. E mautinoa lava, e tele mea mo ia e mafaufau loloto i ai.

Sa faaaluina e Iesu po e 40 i le vao ma sa lei taumafa lava o ia i lena taimi. A e, ina ua matua fia taumafa o ia, sa faalatalata ane le tiapolo ina ia tofotofo ia te ia, ua faapea atu: “Afai o oe o le Alo o le Atua, ina fetalai atu ia ia liu areto nei maa.” Ae peitai sa silafia lelei e Iesu o se mea sese le faaaogaina o lona mana faivavega e faamalie ai ona manoga faaletino. O lea sa ia teena ai le faaosoosoina o ia.

Peitai e lei fiu ai le Tiapolo. Sa ia toe taumafai foi i se isi auala. Sa ia luia Iesu ina ia oso ifo mai le malumalu ina ia faasaoina o ia e agelu a le Atua. Ae peitai se lei tofotofoina Iesu ina ia faia ni uiga faalialia vale. I lona siina mai o le Tusi Paia, sa ia faaalia ai le sese o le tuuina atu o le Atua ia tofotofoina i se auala faapena.

I le tofotofoga lona tolu, sa faaali atu e le Tiapolo ia Iesu malo uma lava o le lalolagi i se auala faavavega ma faapea atu: “Ou te avatua nei mea uma ia te oe, pe afai e te faapau ma ifo mai ia te aʻu.” Ae peitai sa toe teena foi e Iesu le gauai atu i tofotofoga ina ia faia le mea sese, a e na filifili ia tumau pea le faamaoni i le Atua.

E mafai ona aʻoaʻoina i tatou mai nei tofotofoga o Iesu. Ua latou faailoa mai, mo se faaaoaoga, faapea le Tiapolo ua le na o se uiga leaga, e pei ona manatu ai nisi tagata ae peitai o ia o se peresona moni, e le vaaia. Ua faaalia foi e tofotofoga o Iesu o malo uma lava o le lalolagi o mea totino a le Tiapolo. Aua e faapefea ona avea o se tofotofoga moni le ofoina atu o nei mea ia Keriso pe a na fai e le o ni mea totino a le Tiapolo?

Ma sei manatu i lenei mea: Sa fai atu le Tiapolo ua ia loto malie e tuuina se taui ia Iesu mo le faapau e tasi ma ifo atu ia te ia, i le avatua lea ia te ia o malo uma lava o le lalolagi. Atonu e mafai foi e le Tiapolo ona taumafai e tofotofoina i tatou i se auala foi faapea, atonu i le tuuina lea i o tatou luma o avanoa e faatosina ai i tatou ina ia maua tamaoaiga faalelalolagi, le pule, po o tulaga foi. Ae peitai maeu le poto mo i tatou pe a tatou mulimuli i le faaaoaoga a Iesu i le tumau faamaoni i le Atua tusa lava po o le a le tofotofoga! Mataio 3:16; Mareko 1:12,13; Luka 4:1-13.

◆ O le a le uiga o le faaavanoaina o le lagi ia Iesu?

◆ Na faapefea ona taumafai le Tiapolo e tofotofoina Iesu?

◆ O a mea e mafai ona tatou aʻoaʻoina mai tofotofoga o Iesu?

[Ata atoa i le itulau 21]