Soifuaga o Iesu ma lana Faiva

Ua Valaauina Soo e Toafa

Ina a mavae taumafaiga i lona lava nuu o Nasareta ina ia fasiotia Iesu, ona maliu atu lea o ia i Kapanaumi e lata ane i le Sami i Kalilaia. Ua faataunuuina ai i lenei mea le isi foi valoaga a Isaia. Le valoaga lea na valoia ai faapea o le a vaaia e tagata Kalilaia o e nonofo latalata i le sami se malamalama tele.

A o faagasolo ona tauaveina e Iesu lana galuega e faamalamalamaina ai o le talaiga o le Malo i ina, sa ia faafesootai atu ai i ona soo e toafa. O i latou ia sa uluai faimalaga ma ia a e na toe foi atu i a latou galuega o le fai faiva ina ua latou toe fai mai ma Iesu, ona o le taimi lenei ua tatau ona i ai ni fesoasoani lotomau ma ia auai pea, i latou ia e mafai ona ia aʻoaʻoina, ina ia faaauau ona tauaveina le faiva pe a mavae lona maliu.

O lea, a o savali atu Iesu i le matafaga, ona ia silafia ai lea o Simona Peteru ma ana uo o ta o latou upega, ona faalatalata atu lea o Iesu ia te i latou. Ua maliu aʻe o ia i luga o le vaa o Peteru ma faatoga atu i ai ina ia tuutuu ese atu le vaa nai le auvai. Ona nofo loa lea o ia i lalo i le vaa ma amata ona aʻoaʻo atu i le motu o tagata i luga o le auvai.

Mulimuli ane ona faapea atu lea o Iesu ia Peteru: “Ina tuutuu atu ia i le loloto, ma tuu ifo ai o outou upega e maua ai ni iʻa”

“Le Alii e,” ua tali mai ai Peteru, “ua atoa le po ua tigaina ai i matou, e leai ni mea ua maua; a ona o lau fetalaiga ou te tuu ifo ai le upega.”

Ina ua tuu ifo le upega ua latou maua iʻa e tele lava ua amata ona masaesae o lo latou upega. Sa genogeno faanatinati atu i latou nei i isi a latou uo e o mai e fesoasoani. Sa lei pine a e faatutumuina uma nei vaa i iʻa ua tauāu ina gogoto. Ina ua vaai atu Peteru i lenei mea ona faapau lea o ia i tulivae o Iesu ua faapea atu: “Le Alii e, ina maliu ese atu ia oe ia te aʻu, auā o aʻu le tagata agasala.”

Ona tali atu lea o Iesu: “Aua e te fefe, e amata i nei ona po ona e maua tagata.”

Sa valaaulia foi e Iesu Aneterea le uso o Peteru: “Ina mulimuli mai ia i te aʻu, ou te faia oulua ma fai faiva i tagata.” Sa ia pulunaunau atu ai ia te i laua. Sa faapea ona valaaulia a la uo o Iakopo ma Ioane o atalii o Sepetaio, ma ua la tali mai foi ma le leai o se faatautu i le valaau a Iesu. O lea la ua tuua ai le toafa lenei a latou galuega o le fai faiva, a e avea o uluai soo lotomau e toafa ua mulimuli pea ia Iesu. Luka 5:1-11; Mataio 4:13-22; Mareko 1:16-20; Isaia 9:1, 2.

◆ Ai se a ua valaaulia ai e Iesu ona soo e mulimuli ia te ia, ma o ai i latou nei?

◆ O le a le vavega na mataʻu ai Peteru?

◆ O le a le ituaiga o faiva ua valaaulia ai e Iesu ona soo e fai?