O le Faaamanuia a Ieova e Faatamaoaiga Aʻi

“E faigata ona sao atu o le mauoa i le malo o le lagi.”—MATAIO 19:23.

1, 2. O a faaeseesega e mafai ona faia i le va o ituaiga o ʻoa?

E FAAPEFEA pe a faailoa atu e se tasi ia te oe, “Ua e mauʻoa”? E toatele o le a faagaeetia pe aai e faailoa ai lenei mea ma pe afai o i latou o le a mauʻoa i tupe, fanua, po o le matalasi o mea faitino. Peitai sei manatu i le mataupu tau i ʻoa i lenei itu: “O le faamanuia a Ieova, o lea e faatamaoaiga aʻi; na te le faaopoopo i ai se tiga.”—Faataoto 10:22.

² A o feagai ai le Atua ma augatamā anamua atoa ma le nuu o Isaraelu, sa ia faamanuiaina lo latou faamaoni i le avatua lea i ai o le tamaoaiga. (Kenese 13:2; Teuteronome 28:11, 12; Iopu 42:10-12) O le Tupu o Solomona o se tasi na matuā faamanuiaina. Sa oo ina anoanoai lona tamaoaiga. Peitai na ia aʻoaʻoina mai mea na tuputupu faapea o le olaga e faasilasila ai ʻoa faitino “o mea faatauvaa uma lava ia, ma le ʻai i le matagi.” (Failauga 2:4-11; 1 Tupu 3:11-13; 9:14, 28; 10:10) O lea ina ua tusia e Solomona, “O le faamanuia a Ieova—o lea e faatamaoaiga a’i,” na te lei faamamafaina le tamaoaiga i mea faitino. Sa ia faaleo le mea moni faapea a e maua le faamanuia a le Atua, e le mafaatusalia le faaʻoaina o lou olaga nai e e le auauna ia te ia. E faapefea?

3. O a auala e te mauʻoa moni ai pe afai ua ia te oe faamanuiaga a Ieova?

³ Afai o oe o se Kerisiano, e mafai ona faafiafiaina nei oe i le faamaoniga mai ia Ieova ma e maua ai faamanuiaga mai ia te ia e pei o le atamai faaleatua. E mafai ona talia oe i totonu o se faapotopotoga o Kerisiano e pei o se aiga o e fiafia, faatuatuaina, ma naunau fiafia ia te oe. E puipuia e tulafono a le Atua oe mai le tele o faamaʻi ma tulaga mataʻutia. E ia te oe foi mafuaaga e faamoemoe ai i le puipuiga faaleatua mai le “puapuaga tele” o loo i luma o lenei faiga leaga o mea—ma agai atu ai i le ola i le Parataiso e le uma i luga o le lalolagi. O lea, ua e tagai ai nei i faamanuiaga ofoofogia ma faamoemoega, e mafai ona e faapea atu ma le tonu, “Ua ou mauʻoa!”—Mataio 24:21, 22.

4. E faapefea ona e faaleagaina lou tulaga mauʻoa faaleagaga? (Faaaliga 3:17, 18)

⁴ O lou “faatamaoaigaina” i faamanuiaga a Ieova e mafai, ona faaleagaina e nisi ituaiga o ʻoa—o tupe po o mea faitino. O le toaitiiti o i tatou (manuia i tulaga tau tupe pe itiiti le tamaoaiga) o le a ioe mai faapea, ‘O loo ou feagai moni lava ma se tulaga mataʻutia ona o le manao tele i le tupe.’ Peitai, sei toe manatunatu i le lapataiga: “Auā o le manao i tupe, o le pogai lea o mea leaga uma lava; ua mananao tele i ai nisi, ona sese ai lava lea o i latou i le upu o le faatuatua, ua tuʻia ai ua ati i latou e i latou i puapuaga e tele.” (1 Timoteo 6:10) Sa tusia na upu i le taimi na faauuina ai Kerisiano faamaoni uma e le agaga o le Atua, e fai ma faailoga o le avea o i latou ma pule faalelagi faatasi ma Keriso. Atonu o le toatele o i latou sa feiloai i aposetolo ma i latou sa feoai faatasi ma Iesu. Afai na “sese ai” nisi o i latou ona o tupe, paga la le tele o le mataʻutia mo i tatou!—2 Korinito 5:5; Roma 8:17, 23.

O Le Tamaloa Mauʻoa ma le Kamela

5. O le a le vaaiga a Iesu i ʻoa?

⁵ Sa masani ona taʻua e Iesu iuga mataʻutia o le ʻoa, auā o se tulaga mataʻutia o loo feagai ma tagata uma, i latou o e tamaoaiga ma e e le faapena. (Mataio 6:24-32; Luka 6:24; 12:15-21) I le avea ma faavae mo se sailiiliga totino, sei manatunatu i se tasi o fetalaiga a Iesu i se mea na tupu o loo tauʻa i le Mataio 19:16-24; Mareko 10:17-30; ma le Luka 18:18-30. O le mea moni, ai se a e te le nofo ai nei ma faitau i se tasi po o le faitau i na tala uma?

6, 7. (a) O le a le talanoaga na faia i le va o Iesu ma se tane talavou? (e) Mulimuli ane, o le a le fautuaga na ofoina atu e Iesu?

⁶ Na sau se tasi alii ia Iesu ma fesili: “Se a le mea ou te faia, ou te maua ai le ola e faavavau?” Sa faatepa o ia e Iesu i le Tulafono, ma faaalia ai e lei faaletonu i ona folasia e Ieova mea e tatau ai. Na tali le alii faapea sa ia tausia tulafono a le Atua ‘talu ina o tamaitiiti o ia.’ Sa pei lava ua i ai o ia i i le faitotoa o le ola, a e peitai sa logo i ona tino na i ai se mea e le o ia te ia. Atonu na ia manatu, e i a i se lelei o le a faaopoopo atu, po o se gaoioiga taʻutaʻua, o le a avea ma laasaga mulimuli e ui atu ai i le faitotoa o le ola e faavavau. O le tali a Iesu e i ai sona faatatauga lautele: “Faatau atu i au mea uma, ma ia e tufatufaina i e matitiva, ona ia te oe lea o le faulaigāoloa i le lagi; i le sau, ma mulimuli mai ia te au.” O le a na tupu? “Ua faalogo o ia i na upu, ona tiga tele ai lea o ia, auā o le mauoa tele lava ia [auā sa ia te ia le tele o mea faitino].” O lea na alu ese ai le tamaloa.—Luka 18:18, 21-23; Mareko 10:22.

⁷ Mulimuli ane sa matauina e Iesu: “O le mea faigata nauā ona sao atu o e mauoa i le malo o le Atua. E faigofie ona ui atu o le kamela i le pu o le au, a e faigata ona sao atu o le mauoa i le malo o le Atua.” (Luka 24:25) Pe na o lena alii mauʻoa sa faatatau i ai le fautuaga? Pe o aafia ai ma oe, tusa lava pe e te maumea pe mativa? Sei o tatou vaaia.

8. (a) E faapei le alii talavou Iutaia? (e) O le a lona masei, ma ai se a ua aafia ai i tatou?

⁸ Atonu e mafai ona fesoasoania oe ia malamalama i le tulaga o lena alii pe afai e te vaai faalemafaufau i se faataʻitaʻiga tali tutusa faaona po nei—o se Kerisiano talavou mamā faatasi ai ma le poto i le Tusi Paia, e amio lelei, ma e sau mai se aiga e maumea. Atonu e te vaai ma le mataua i se a ituaiga o tagata i aso nei. Peitai na maua e Iesu se mea telē e lei i ai i lenei talavou Iutaia: “O lona tamaoaiga poo o mea totino sa faatauaina tele i lona olaga. O lea na fautuaina ai o ia e Iesu e tusa ma le tulaga sa i ai. Ua mafai nei ona iloa pe ai se a ua taua ai lenei mataupu o le Tusi Paia mo i tatou uma, tusa pe mauʻoa po o le mativa. O tupe ma mea totino e mafai ona taua tele i soo se tasi o i tatou, tusa lava pe ua uma ona i ai ia mea po o le na ona tatou momooo foi ia maua.

9. E faapefea ona tatou iloa e lei taʻuleagaina e Iesu le tulaga maumea?

⁹ E lei fetalai Iesu faapea o se tagata e mauʻoa faaletino e le mafai ona auauna i le Atua. O le toatele ua latou faia faapea. Sa faia faapena e le alii Iutaia—i se tulaga. Sa i ai foi se ao lafoga o Sakaio, o le sa “mauoa.” (Luka 19:2-10) O nisi o Kerisiano faauuina i le uluai senituri sa maumea ma sa i ai se lui faapitoa o le “mataalofa, ia latou avatu fua a latou mea.” (1 Timoteo 6:17, 18; Iakopo 1:9, 10) Ma o loo ia ai foi ni Kerisiano maumea i aso nei. E msani lava ona latou foai ma le agalelei i le lagolagoina o le galuega o le Malo, tatalaina o o latou fale mo sauniga, ma faaaoga a latou taavale i le faiva. Ai se a la na fetalai ai Iesu e uiga i le tamaloa mauʻoa ma le kamela? O le a e mafai ona tatou aʻoaʻoga mai ai?

10. O le a la tatou faaiuga mai le fautuaga a Iesu i le mea na tupu?

¹⁰ E mafai ona talisapaia, o le mea amata ia tapuai i le Atua; ae o le isi laasaga o le faamaonia o le tumau seia oo i le iuga. (Mataio 24:13; Filipi 3:12-14) Atonu o lena mea sa i le finagalo o Iesu ina o ia fetalai: “E faigofie i le kamela ona ui atu i le pu o le au, a e faigata i le mauoa ona sao i le malo o le Atua.” (Mareko 10:25) E leai se kamela e mafai ona ofi i le pu vaiti o le nila suisui, o lea e manino lava sa faaaogaina e Iesu se faaupuga, po o se upu e lē tatau ona faauigaina faaletino. Ae, ua faaalia ai le faigata i le tagata mauʻoa ona faia o se mea. O le a? E le na ona amata ona auauna i le Atua, leai, a e peitai o le “sao i le malo,” o le mauaina aiai o le ola e faavavau. Tusa lava po o le a lou tulaga tau tupe, ae mafai e fautuaga a Iesu ona fesoasoani i ou mafaufauga, lou agaigai i luma faaleagaga, ma lou mauaina o le ola e faavavau.

Ai se a Ua Faigata ai mo le Mauʻoa?

11. Sa faapefea ona aafia le mativa ma le maumea i le talaiga a Iesu?

¹¹ E ala i le talaiga na faia e Iesu ma aposetolo se auala atu ai le ‘folafolaina o le tala lelei i e matitiva.’ (Mataio 11:5) Sa leai se faailoga tagata faasaga i e mauʻoa. Peitai e foliga mai sa toatele tagata matitiva na iloa lo latou manaomia o le itu faaleagaga ma talia ai le feau o le faamoemoe. (Mataio 5:3,6; 9:35, 36) Sa sili ona faaamalieina Iutaia mauʻoa i le faagasologa o mea. (Faatusatusa Luka 6:20, 24, 25) Ui i lea e lei faapena uma i na aso, ma e le faapena uma foi aso nei. O nisi tagata maumea ua latou talia le feau a le Tusi Paia ma auauna ai i le Atua. O le iuga mo i latou e mafai ona ofoofogia. Sa faapena le tulaga mo Paulo, o le na lei faatagaina lona tulaga i le olaga e taofia o le ia. (Filipi 3:4-8) E ui i lea, na fetalai Iesu e sili ona faigata mo le mauʻoa.

“Pepelo O le Oa”

12, 13. (a) O le a le manatu na faia e Iesu i se faataʻitaʻiga e uiga i popolega? (e) Ai se a e fesagai ai e mauʻoa ma faafitauli faaopoopo?

¹² I lana faataʻitaʻiga o saito na luluina i eleele eseese, sa fetalai Iesu o isi na paū i “vao tuitui, ua tutupu ae foi le vao tuitui, ona fetinaiina ai lea.” Sa ia faamatala: “O le mea sa luluina i le vao tuitui o ia lea ua faalogo i le upu, a o le loto popole i mea a lenei lalolagi ma le pepelo o le oa ua fetinaiina ai le upu, ona o le fua mai lava lea.” (Mataio 13:7, 22) Toeitiiti lava o tagata uma ua i ai le “popole i mea a lenei lalolagi.” E faigofie ona iloa le mafuaaga ua faapea ai i tagata matelaina, e leai ni galuega, po o le le atoatoa o le malosi i le tino ma le mafaufau. O le tagata ua mautu tau tupe atonu e le ia te ia ia lava popolega, a e peitai e oo lava ia te ia le popole i aafiaga ona o le siitia o le tau o le soifuaga, fesuiaiga i lafoga, po o le mataʻutia o le gaoi. O lea, o e mauʻoa ma e matitiva atonu e tutusa o latou popolega.—Mataio 6:19-21.

¹³ Na faaalia e Iesu o nisi o le a taofiofia foi ona o “le pepelo o le oa.” O le mauaina o le manuia tau tupe e mafai ona saisaitia ai. Na faapea mai le milionea o Aristotle Onassis: “A maea ona e ausia o se tulaga iloga, ona le toe taua lea o tupe. O le mea taulia o le taulau. O le mea poto mo au e fai, o le taofi nei loa. Peitai e le mafai ona ou faia. E tatau ona ou tausinio pea i le maualuga e sili atu—auala e lagona gaee.” E faapena foi ona gaee se Kerisiano e tauivi agai i luga o tofi faapisinisi. Pe mafai foi ona taʻitaʻi seseina o ia e faatelē lana pisinisi ae ua leva ona ia ausia le tulaga “ua lava” sa ia te ia i le amataga o le olaga. Na i i lo le faaitiitia o lana galuega (pe litaea) ina ia avea ma faifeau sauatoa, ua ia ‘saʻena ona fale saito [po o fale] ae faatelēina.’ (Tagai i le Luka 12:15-21) Pe mafai ona tupu lena mea ia te oe? E te manatu e a o le a faamasinoina e le Atua soo se tasi o i lea tulaga faapea o loo auauna ia te ia ma le ola atoa?—Mataio 22:37.

14. E faapefea ona faataitaʻia faapea o ʻoa e mafai ona faalavelaveina ai se Kerisiano? (Faataoto 28:20)

¹⁴ E i ai foi nisi auala e mafai ai e ʻoa (po o tuinanauga ia maua) ona taofia se Kerisiano mai le ‘mauaina o le ola e faavavau.’ O le tasi o le tuinanau i ʻoa e ono uunaia ai o ia e faaaoga togafiti faalelalolagi, e pei o le lipotia uma o polofiti po o le faaaogaina o isi lava togafiti le faamaoni ua taatele. Afai foi na te faafaigaluegaina uso Kerisiano o e faamaoni ma galue mamafa, atonu o le a ia faamuamuaina lona lava manuia totino na i lo latou lelei faaleagaga. Mo se faataʻitaʻiga, ina ia saisaitia tagata faigaluega i a latou galuega, atonu na te uunaia i latou ia atiina ae se olaga lelei e sili atu ona taugata (po o le aitalafu ona o le manao i mea matalasi) Ma talu ai ona o ia o lo latou pule, atonu o lenei faiā o le a faaauau atu i taualumaga faalefaapotopotoga.

15. Atonu sa faapefea ona logo i tino o Kerisiano aafiaga leaga o le ʻoa? (Salamo 73:3-8, 12, 27, 28)

¹⁵ O nisi o Kerisiano maumea o le uluai senituri atonu sa avea i latou ma e na faaleagaina e “le pepelo o le oa.” Sa tusi atu Iakopo e i ‘puapuaga o ē tamaoaiga.’ Sa i ai o latou ofu taugata, faupuega o a latou auro ma ario ona o le faaitiitia o totogi o tagata faigaluega, ma ua tinoeese i le tele o mea matalasi. (Iakopo 5:1-5) Ua faapena foi i aso nei. E masani lava ona faatagaina e le maumea se tagata ia taumafa ma inu i mea taugata e ono faaleagaina ai lona tino. Atonu ua faaavanoaina ai foi e malaga soo e to esea ai o ia mai le faapotopotoga e auai. E le o lona uiga e faapea o lavalava mananaia, maa taua, mea ʻai, ma le faimalaga o ni mea e lamatia ai. Peitai, o “tagata tamaoaiga” na tusi faatatau i ai Iakopo, e lei fesoasoani i ai lo latou tamaoaiga; ae o lo latou tulaga faatauvaa faaleagaga ma le tulaga i luma o le Atua, ua mafua ai ona ‘fetagisi ma uio ona o puapuaga o le a oo mai.’

16 Ai se a na ofoina atu ai e Iesu fautuaga manino e uiga i ʻoa, ma o le a e tatau ona e fesili ifo ai?

¹⁶ Sa silafia lelei e Iesu le tiga ma toatuga i le itu faaleagaga e masani ona oo i ai e maumea. Na ia silafia foi o mea taua e mafai ona pala faaletino pe iu foi ina le aoga, o se mea e le taitai ona oo i ʻoa faa-Kerisiano. (Faataoto 11:28; Mareko 10:29, 30) O lea, na faia ai e Iesu se galuega lelei mo i tatou uma i lona lapatai mai: “O le mea faigata nauā ona sao mo i tatou tusa lava pe itiiti a tatou mea. E faapefea? E ala i lo tatou taofiofia o soo se faanaunauga o ia i tatou ia maumea i le taimi nei. Ua talitonu Kerisiano sa fetalai Iesu i le upu moni. Ua tatou talitonu ma ola a e i mea na tulei i ai Iesu e uiga i lona Tamā, ma le iuga o lenei faiga o mea, ma e uiga foi i le faatupuina o le alofa. O lē Tautala i le Upu Moni na ia taʻua foi: “E faigofie ona ui atu o se kamela i le pu o le au, a e faigata ona sao o le mauoa i le malo o le Atua.” (Mataio 19:24) E te talitonu moni ea i lena? O faamaonia ea e au gaoioiga, ma le ituaiga olaga o e ola ai, ma ou uiga e faamaonia ai o loo e faia faapea?

Faaauau ona Mauʻoa—I le Ala a le Atua

17. E faapefea e le toatele o Kerisiano ona tuua i latou lava ina ia faaʻoaina e Ieova?

¹⁷ Ua i ai faamaoniga mai i vaega uma o le lalolagi faapea o le toatele o auauna a le Atua ua latou ave i fale fautuaga e pei o lea o taʻua i le Mataio 19:16-24. O le toatele o talavou Kerisiano ua maumauai faapea a maea loa a latou aʻoga e tatau ai, ona latou sailia loa lea o le faiva sauatoa. O avā o e mafai ona faia galuega e faateleina ai le tupe a le aiga, ua tuuina atu le tele o latou taimi i gaoioiga faa-Kerisiano, i le faia o i latou lava faatasi ai ma isi ina ia mauʻoa faaleagaga. O nisi tane e i ai tiute tauave faale-Tusi Paia o le tausia o o latou aiga faaletino, ua latou faaavanoa auala e faateleina ai sa latou vaega i le faiva.

18, 19. O a laasaga ua uia e nisi o e ua sailia faamanuiaga a Ieova?

¹⁸ O se tasi toeaina ua silia ma le 30 ona tausaga sa tautino faapea “o le avea ma faifeau sauatoa sa na o ni upu e tautala i ai ou laugutu.” Na ia maua se totogi e sili atu i le $25,000 i le tausaga, e ese mai ai tupe faaagaga o mea e faatau, ma le faaaogaina o se taavale a le kamupani. Ona tofia lea ia te ia na te fofogaina atu le lauga i le Tauaofiaga i le 1983 “Faatutu ma Ausia o Sini Tatau.” Na ia taʻutino mai: “A o ou faitauina le mataupu ma le naunau lava. Sa ou maasiasi ma lagona le ma i lou loto tigā i lou loto fuatiaifo.” Sa talanoaina ma lona toalua lo la tulaga a o lei oo i le tauaofiaga. E lei umi lava ae maua sana galuega e le faalausosoo ona auai faatasi lea ma lana avā o se paeonia. O loo paeonia pea i laua, ma faafiafiaina i le tele o faaeaga faaleagaga.

¹⁹ O isi ua o ese mai i nofoaga e tele ai avanoa o tupe ma o atu i nofoaga e mafai ona faalautele ai a latou gaoioiga faaleagaga. Sa tusi mai se ulugalii Kanata e uiga i la la paeonia i Amerika Latina faapea: “E ui ina e tele le mativa o le au uso i inei, ae maoae lo latou maelega mo le upu moni. Atonu e matitiva i latou i le itu faalelalolagi, ae i le faaleagaga, o i latou o milionea. Ua ia i matou le au talai e 38, e toa 10 o paeonia sauatoa. Ua manaomia ona faaluaina sauniga ona o le toatele e auai—mai le 110 i le 140 i sona fua faatatau. O nei sauniga uma o loo tausia e toeaina e toalua ma auauna o le faiva e toatolu. Ua ma toe aʻoaʻoina mai i o tatou uso loto maulalo i inei le uiga moni o le faamuamuaina o Ieova i o tatou olaga. Ua latou faaalia ia i maua e mafai ona auauna mo Ieova ma le ola atoa e tusa lava po o a tulaga o siomia ai i tatou.”

20. E ao faapefea ona lagona i o tatou loto le mauʻoa i la le tino?

²⁰ O nei Kerisiano ua leai lava ni mafuaaga maumauai e mataua ai i se tagata mauʻoa, i fafo po o totonu o le faapotopotoga, po o le mafuli tele atu i faanaunauga faaletino. Ua latou iloa e manaomia se tupe mo le olaga faisoo. (Failauga 5:3; 7:12) Peitai ua latou talisapaia foi na fetalaiga Iesu i le upu moni—o le tagata mauʻoa e feagai o ia ma luitau faaleagaga, lui, ma tulaga mataʻutia. O se tasi o lui, ona o “e mauoa i lenei olaga, aua neʻi faamaualuga i latou, aua foi le faatuatua i le oloa e faaletumau a o le Atua.”—1 Timoteo 6:17.

21. O le a le tulaga o i latou o e naunau i mea faaleagaga?

²¹ E faanoanoa lava, ona sa le taulau i le alii na talanoa ma Iesu ona faafetaiai lena lui. O nisi e pei foi o ia, a auauna i le Atua mo sina taimi peitai mulimuli ane ua pagatia i le tiga ma le le taulau faaleagaga i le feagai ai ma a latou ʻoa. I le isi itu o le faitau miliona o Kerisiano faamaoni o e ua faaauau ona faamaonia faapea “o le faamanuia a Ieova, o lea e faatamaoaiga aʻi, na te le faaopoopo i ai se tiga.” (Faataoto 10:22) E uigā o latou olaga; e i ai o latou sini tautele ma se lagona o le faataulauina o se mea. O a latou galuega lelei o le a tumau e faavavau, e avatu ai ia i latou le olioli loloto i le taimi nei ma i le lumanai. Sei o tatou taumafai taitoatasi ina ia mauʻoa i lena auala.—Filipi 4:1; 1 Tesalonia 2:19,20.

Manatu e Fefulisai

◻ O a ituaiga ʻoa o loo uiga le Faataoto 10:22?

◻ O le a le autu o upu a Iesu e uiga i le tagata mauʻoa ma le kamela?

◻ Ai se a ua masani ai ona faigata le olaga mo e maumea?

◻ E faapefea ona tatou taumafai ia mauʻoa i ala o le Atua?

[Pusa i le itulau 12]

ʻOa ma le Aiga

Pe a mafaufau atu i aafiaga e ono tutupu mai ona o le ʻoa, aua nei le amanaiaina lou aiga. Manatunatu i mea nei: Sa lipoti mai Kanata e se fomaʻi o le mafaufau sa na suesueina tamaiti a ē sili ona mauʻoa: “Ua fiu i latou i le olaga. E leai ni o latou sini ua na o le faafiafiaina o i latou lava ma ua le mafai ona onosaia e oo lava i sina omiga laititi. Latou te faalogoina na o ni nai faalogona itiiti o soo se ituaiga. O o latou faaanunauga sili o le faatauina o mea, malaga, ma le sailia o puna fou o fiafiaga.”

O le tala a le The New York Times e uiga i se tasi sa milionea: “A o agai ina faataulauina o ia i le pisinisi ma maua mea, fai mai a ia na ia vaaia se suiga i lona aiga. ‘O lau avā ma lou afafine na la filia tagata e tusa ma tupe maua, ma a ou ave se fale e $300,000 i le tasi afafine, e tatau foi ona ou avea i le isi afafine le $300,000 o tino tupe.” “Ina ua uma ona pagatia o i le fatu na pe, “faatasi ai ma le vaai atu i le tulaga ua faia e le maumea i lana avā ma le fanau,” ona suia lea o lona olaga.

E tusa ai ma se atunuu mauʻoa i le suauu i Sasae Tutotonu na matauina ai e Arnold Hottinger faapea: “O le ʻoa e pei o se mafuaaga o mea masani lea i le tele o fomaʻi i atunuu i fafo o e o mai i i nei e sailia ai ni totogi maualuluga. E leai se isi nofoaga ua latou lipotia mai ai le taatele o maʻi faalemafaufau ma faalefaalogona e pei o i inei—o maʻi e mafua ai ni mafatiaga moni ae ua le mafua ona o se le taulau o totoga faaletino. Ua latou faapea mai, e i ai i tagata talavaou le faailoga mai o tagata matutua, a o tagata matutua ua amio e pei o ni tamaiti.’