Fautuaga Ua “Faamāi I Le Masima”
“Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata taitoatasi uma.”—KOLOSE 4:6.
1, 2 Ai se ā e tāua faapitoa ai ona “faamāi i le masima” fautuaga faa-Kerisiano?
I LE FAAGASOLOGA o le talafaasolopito, ua i ai se vaega faapitoa a le masima i le sauniunia o mea taumafa. E lē gata ina puipuia ai, a e avea foʻi ma mea e faaleleia ai le tofo, ma o le mea lea o le tele o taumafa e lē faamasimaina ua vaaia e lē manogi ma susua i le taumafa. O le mea lea, ina o tusi atu Paulo faapea o upu a se Kerisiano e tatau ona “faamāi i le masima,” sa ia faapea mai o a tatou tautalaga uma e ao ona atiina aʻe ai, ia mafai foʻi ona talia ma faatosina. (Kolose 4:6) E faapitoa ona moni o lenei pe a avatua fautuaga. Ai se ā?
2 O le fuafuaga o fautuaga e lē faapea e tau ina fetufaʻai ni faamatalaga. I le tele o tulaga, ua uma lava ona iloa e lē o loo fautuaina nisi o mataupu silisili faale-Tusi Paia ua fetaui lelei ma lona tulaga, a e ua ia te ia se faafitauli a lē o le faatatauina o le vaaia o lo latou tāua. O le mea lea, o le luʻi moni lava o fautuaga faa-Kerisiano ina ia suia ai auala o manatu o se tasi. (Kalatia 6:1; Efeso 4:11, 12) O lea, ua manaomia ai le “masima.”
3. O le ā le fesoasoani ua aumaia e Ieova mo fautua Kerisiano?
3 E moni, o le faufautua o se luʻi, ma ina ia faafetaiaʻia, e manaomia ai le poto ma le faautauta e le fautua. (Faataoto 2:1, 2, 9; 2 Timoteo 4:2) E fiafia lava, ona ua saunia e Ieova le Tusi Paia, ua lē gata ina maua ai le poto manaomia a e faapea foʻi ma le tele o faaaʻoaʻoga i le avatua o fautuaga e tagata faautauta o le Atua. O le iloiloina o nisi o nei mea o le a fesoasoani ia i tatou ia avea o ni fautua e sili ona uigā.
Manatunatu i le “Fautua Matagofie”
4. I le ofoina atu o fautuaga i le faapotopotoga, e mafai faapefea ona faaaʻoaʻo se toeaina Kerisiano ia Iesu Keriso?
4 Mo se faaaʻoaʻoga, seʻi manatu ia Iesu, le “Fautua Matagofie.” (Isaia 9:6 N.W.) I le faaiʻuga o le uluaʻi senituri, sa ia Iesu ni tusi o fautuaga na auina atu i faapotopotoga e fitu i itumalo o Asia. O nei tusi o ni faaaʻoaʻoga lelei tele mo toeaina o ē atonu e mananao e ofoina atu ni fautuaga ia latou faapotopotoga—ma ua fetaui lelei foʻi na mataupu silisili pe a fautuaina ai tagata taitoatasi. O le faafitauli na talanoaina e Iesu e matuiā: o le aposetasi, faatosinaga “faa-Iesepela,” le faaleaogalua, ma le manao i mea faitino, o nisi na o mea. (Faaaliga 2:4, 14, 15, 20-23; 3:1, 14-18) O lea sa talanoaina tuusaʻo lava e Iesu. Sa leai se faaletonu e uiga i mea na ia manao e taʻu atu i faapotopotoga taitasi. I aso nei, pe a ofoina atu e toeaina Kerisiano fautuaga i a latou faapotopotoga, e ao lava ona faamāi a latou fautuaga i le “masima” o le loto maulalo ma le agalelei ma e tusa ai ma le faataʻitaʻiga a Iesu. (Filipi 2:3-8; Mataio 11:29) I le isi itu, i le faataʻitaʻiga tuusaʻo. E lē tatau ona faanenefu ma soʻona faalauaitele le fautuaga ina neʻi misia e le faapotopotoga le manatu autu.
5, 6. O ā isi lesona atili e mafai e se toeaina Kerisiano ona aʻoaʻoina mai i feau a Iesu i faapotopotoga e fitu?
5 Matau foʻi pe a tusa ai, i le amataga lava sa matuā faamālō atu ai Iesu i faapotopotoga i le amataga a e faaiʻuina ana fautuaga i ni faalaeiauga e atiina aʻe ai. (Faaaliga 2:2, 3, 7; 3:4, 5) E ao foʻi i fautua Kerisiano ona faamāi a latou fautuaga i le faamalō ma faalaeiauga. “O le mea moni, e le tele ni mea e faataunuʻuina pe ana ona e otegia uso.” Pe a avatua fautuaga malolosi, e lē tatau i le au toeaina ona tuʻua uso ma ni faalogona loto vaivai, a e peitaʻi, ia faamalosia ma ia maumauaʻi e faia e sili atu ona lelei le lumanaʻi.—Faatusatusa 2 Korinito 1:1-4.
6 Mulimuli lava, a e faapefea feau a Iesu i faapotopotoga o Semurana ma Filatelefaia? Sa na leʻi faitioina nei uso. A e ona sa latou i ai i lalo o tofotofoga matuiā, sa ia faalaeiau atu i i latou ina ia tumau pea. (Faaaliga 2:8-11; 3:7-13) O ovasia Kerisiano foʻi la, e tatau ona lē gata ina ofoina atu fautuaga pe a manaomia ona faasaʻoina a e ia mataala e faamālō i uso mo a latou galuega lelei ma ia faalaeiau atu foʻi ina ia tumau.—Roma 12:12.
Faaaogā Faataʻitaʻiga
7, 8. (a) Na faapefea ona “faamāi i le masima” fautuaga a Iesu i ona soʻo? (e) Ai se ā e tautele ai faataʻitaʻiga pe a tatou ofoina atu fautuaga?
7 O se tasi taimi sa ofoina atu ai e Iesu fautuaga ona sa manatunatu ona soʻo po o ai o le a sili i le Malo o le lagi. Sa tatau ona ia matuā otegia ona soʻo ona o lenei manatu. Na i lo o lena, sa ia ‘faamāi ana upu i le masima.’ Sa valaau i se tamaitiiti, ua ia faapea atu: “O sē faamaulalo o ia ia te ia e pei o le tamaitiiti nei, e sili lea i le malo o le lagi.” (Mataio 18:1-4; Luka 9:46-48) Sa manino lava le fautuaga a e sa agalelei ma atiina aʻe ai. E ala i le faailoa atu faapea o le Malo o le lagi e matuā ese lava mai malo o lenei lalolagi, sa faalaeiau atu Iesu i ona soʻo ina ia loto maulalo, ma sa ia taumafai e aveese le pogai o la latou finauga.
8 Matau foʻi le auala tomai ma le uigā sa faaaogā e Iesu i lenei mea. O se faataʻtaʻiga ola—o se tamaitiiti! O fautua atamamai e masani lava ona “faamāi” a latou upu i ni faataʻitaʻiga, talu ai e mafai e lenei mea ona faamamafa le matuiā o le mataupu po o le fesoasoani atu foʻi i lē o talia le fautuaga ina ia fefulisaʻi ma vaai i le faafitauli i se malamalamaga fou. E masani lava ona fesoasoani ni faataʻitaʻiga e faataʻitaʻiga e faaitiʻitia ai le vevesi.
9. O ā nisi faaaʻoaʻoga faale-Tusi Paia i le faaaogāina o faataʻitaʻiga e avatua ai fautuaga?
9 Ina o lapataʻia Kaino faapea ua i ai o ia i se tulaga e mataʻutia e ono faia ai se agasala matuiā, sa faamatala maoti atu i ai e Ieova le agasala e pei o se manu feai. Sa ia fetalai atu: “O loo taoto i le faitotoa le agasala, e uai atu lona manao ia te oe.” (Kenese 4:7) Ina ua ita Iona auā na faasaoina tagata Nineva salamō, sa faatupuina e Ieova le laau o le kikaiona e fai ma ona faapaologa. Ma, ina ua mago le laau, sa faitio ai Iona, ona fetalai lea o Ieova: “Ua e alofa i le kikaiona, . . . o aʻu foi ou te le alofa ea i Nineva le aai tele, o loo i ai tagata e sili ona toatele i le selau afe ma afe e lua fulu?” (Iona 4:5-11) Maeu le malosi o le fautuaga!
10. Na faapefea ona faaaogāina e se fautua Kerisiano i aso nei se faataʻitaʻiga e fesoasoani ai i se tagata talavou ina ia malamalama i lagona o ona matua?
10 E faapena foʻi, ina ua le malie se tasi talavou ona sa faasāsāina e ona matua ana aumea, sa taumafai ai se ovasia faimalaga e fesoasoani ia te ia i lona faaaogāina o lenei faataʻitaʻiga: “E te fiafia e suʻisuʻi a ea? Seʻi manatu la faapea sa e faaaluina se taimi tele e faia ai se ofu mo se uō. A e ina ua e avatua ia te ia, sa e iloa mulimuli ane na ia faaaogāina e sili ai le fola o le fale. O la ā sou lagona?” Sa taʻutino mai e le teine o le a ia te ia le loto tigā. Sa toe faapea atu le faifeau: “O le vaaiga lena o loo i ou matua. Sa la faaaluina le tele o taimi e tausia ai oe, ma e mitamita ia te oe. O lea foʻi la, la te mananao ai ia e auaufaatasi ma tagata latou te agalelei ma faaaloalo ia te oe, a e lē o tagata e mulimuli ane latou faaleaga oe.” Sa fesoasoani le faataʻitaʻiga i le teine e talisapaia le mea sa taumafai i ai ona matua e fai.
Faaaogā Fesili
11. Na faapefea ona faaaogā ma le uigā e Ieova fesili ina o fautuaina Iona?
11 Ina o fetalai atu Ieova ia Iona ona o lona ita valea, atonu sa e matauina na Ia faaaogā ni fesili. Ina ua ita Iona ona ua lē faaumatia Nineva, sa fesili atu ina ia oti o ia, sa fetalai Ieova: “Ua lelei ea lou ita?” Sa leai se tali a Iona. O lea, sa faataga ai e Ieova le kikaiona e tuputupu aʻe ma oʻo ina mate. Ona toe ita ai foʻi lea o Iona. O lea na fesili atu ai Ieova ia te ia: “Ua lelei ea lou ita, ona o le kikaiona?” I le taimi lea sa tali atu ai Iona: “Ou te ita tele lava e oo lava i le oti.” O lenei la ua tali atu ai le perofeta ia Ieova, sa faatusatusa ai e Ieova uiga o Iona agai i lenei mea ua na o se laau ma ona agai ia Nineva, i lona fesiligia lea o le fesili e tali aʻi: “O aʻu foi ou te le alofa ea i Nineva?” (Iona 4:4, 9, 11) O lea sa fautuaina ai Iona ia faataʻitaʻi i uiga o Ieova agai i tagata Nineva salamō.
12. O le ā le tāua o fesili i fautuaga? Faataʻitaʻi.
12 Ioe, o fesili o le a fesoasoani i le fautua e iloa po o ā mea o i le mafaufau o lē o loo fautuaina. O le a fesoasoani foʻi i lena tagata ia matuā iloa manino ona faafitauli ma ona lagona. Mo se faaaʻoaʻoga, atonu ua manatu se tasi faapea e ia te ia so o se aiā e inu ai se ʻava malosi a o leʻi ave le taavale i lona fale. Atonu o lona lagona moni lava faapea, ‘Ou te lē afaina ai i le ʻava malosi!’ Atonu o le a manao se uō e feutagaʻi lelei ma ia, i lona faapea atu: ‘A e seʻi faapea o le a e aafia i se faalavelave e lē o oe e sese. A e o le ā le manatu o leoleo pe a latou maitauina faapea o oe sa e inu? Ma afai, o le mea moni, sa aafia au gaoioiga i le ʻava malosi i sina vaega itiiti. E te manao moni lava e ave lau taavale a e o lena e le o 100 pasene lau gaoioi? O le ā le aogā, o le inu a e tupu ai se faalavelave?’
13. O le ā le auala na faaaogāina ai e le tasi fautua le Tusi Paia, faatasi ai ma fesili i le ofoina atu o fautuaga? Ai se ā sa uigā ai lenei mea?
13 O fautuaga faa-Kerisiano e faavae lava i le Tusi Paia. Ma pe a mafai, e faaaogā e fautua Kerisiano le Tusi Paia lava ia e avatua ai fautuaga. O se fesoasoani malosi tele. (Eperu 4:12) Mo se faataʻitaʻiga: O toeaina agavaa sa taumafai e fesoaosani atu i se tasi ua lē toe gaoioi i le galuega talaʻi. Sa aumai e le toeaina le faataoto a Iesu i le tamaloa e toalua lana fanau, o i latou uma na ia faatonu e ō ma galulue i lona tovine. Na fai ma lē na muamua o le a alu a e leʻi alu. O lona lua na fai mai e lē alu a e na ia filifili mulimuli ane e alu. (Mataio 21:28-31) Ina ua fesili atu le fautua: “O lē fea o nei tama e toalua o loo e faaaʻoaʻo nei i ai?” Sa vave lava ona maua e le tagata talaʻi le manatu, a e maise ina ua faaauau pea le fautua: “O le ā sou manatu ia Ieova, o Lē ona le tovine, ona lagona e uiga i lou tulaga?”
14. O ā nisi tulaga e mafai ai ona avea fesili ma mea faigaluega tautele i le ofoina atu o fautuaga?
14 E faapena foʻi pe a e taumafai e fesoasoani atu ia i latou o i ai ni masalosaloga i latou ua i ai faafitauli tau faaipoipoga ma aiga foʻi, i latou o i ai faigata i le va ma isi, po o i latou i nisi lava tulaga faigata.a O fesili tomai e fesoasoani ia i latou o loo fautuaina ia fefulisaʻi ma iloilo i latou lava, ona taunuu ai lea i le faaiʻuga saʻo.
Faalogo ma le Faaeteete
15. (a) O ā mea na lē taulau ona faia ē “faamafanafana” e toatolu a Iopu? (e) E faapefea ona fesoasoani le faalogologo i se fautua Kerisiano?
15 O lea, ia manatua, o le faia o ni fesili e faaalia ai e te fia faalogo i ni tali. (Faataoto 18:13) E lē tatau ona paūū atu fautua i le mailei na lavevea ai “faamafanafana” e toatolu a Iopu. Sa tautala atu Iopu ia i latou, a e sa latou lē faalogo atu. Ua uma ona latou faia se faaiʻuga i o latou manatu faapea o puapuaga o Iopu na faapogaia ona o ana lava agasala. (Iopu 16:2; 22:4-11) I le faatusatusa atu la i ai, e tatau i se fautua Kerisiano ona faalogologo ma le faaeteete. O lea, atonu o le a ia matauina ni manavaga po o fesuiaiga o le leo e faailoa mai ai faapea e leʻi faamatalaina uma le mea na tupu. Atonu la o se fesili faaopoopo o le a aumai ai i fafo se manatu o loo natia i le mafaufau o le tagata.—Faatusatusa le Faataoto 20:5.
16. O le ā e manaomia e le fautua pe a faafaigata ona ia faalogologo i faamatalaga a se uso Kerisiano ua tigā i faa-logona ootia?
16 E moni, atonu e le faigofie pea lea mea. O se tagata ua faateʻia atonu o le a masua mai: “Ou te ʻinoʻino i oʻu matua!” a le o lea, “E lē toe mafai ona ma nonofo ma loʻu toalua!” O se mea e lē mautonu ai le faalogologo i mea faapena. Peitaʻi ia manatua sa naunau Ieova e faafofoga a o faitio Asafo faapea e foliga mai ua le taulau lona faamaoni. (Salamo 73:13, 14) Sa faafofoga foʻi Ieova, a o fai atu Ieremia faapea ua olegia o ia. (Ieremia 20:7) E foliga mai foʻi sa faitio Sapakuka ia faapea ua sauaina e tagata amioleaga e amiotonu, a e le silasila lava i ai Ieova. (Sapakuka 1:13-17) E faapena foʻi i fautua Kerisiano ona nofo sauni e faalogologo. Afai e i ai moni lava i tagata nei faalogona, e manaomia la ona iloa e le fautua e uiga i nei mea ina ia mafai ai ona fesoasoani atu. E tatau lava ona ia alofia lona uunaʻia malosi o lē o loo fautuaina e faaleo lagona ua ia manatu e tatau ona i ai i le tagata lava manatu moni. E ao foʻi i le fautua ona alofia le tali malosi atu pe faia faalefaamasinoga, atonu o lea o le a faavaivaia ai le tagata mai le tatalaina atili o lona fatu.—Faataoto 14:29; 17:27.
17. Ua faapefea i le na o le faalogologo i o tatou uso ona avea o se auala e faamafanafanaina ai i latou i nisi taimi?
17 I nisi taimi o le vaega autu o le faufautua o le faalologo, a e faatagaina le tagata e sasaʻa mai ona tigā, loto nutimomoiʻa, po o faalogona ootia tigā. Ina ua toe foʻi mai Naomi mai le laufanua o Moapi, sa faafeiloaʻia o ia e fafine Isaraelu i upu nei: “O Naomi ea lenei?” A ua tali atu Naomi ma le faanoanoa tele: “Aua tou te taʻua aʻu o Naomi, a ia taʻua aʻu o Mara; auā ua matuā oona mea ua faia ia te au e Lē ona le malosi uma lava. Na ou alu atu ua tamaoaiga, ua faafoiina mai aʻu e Ieova ua mativa; se a le mea tou te taʻua aʻu, o Naomi? auā ua faatigāina aʻu e Ieova, ua malaia aʻu i Lē ona le malosi uma lava.” (Ruta 1:19-21) Sa leai ni upu se tele sa mafai ona toe tali atu ai fafine Isaraelu. A e masani lava, o le faaavanoaina ma le alofa o se tasi e faalogologo a o faailoa mai e isi o latou faalogona tigā e saosaolaumea lea i lo latou faamaloloina.b
Ia Saʻo le Vaaiga
18. (a) O ā nisi o tali i fautuaga a Ieova ma Iesu Keriso? (e) O le ā le uiga e tatau i fautua Kerisiano ona atiina aʻe?
18 O le mea moni, o le tali atu i fautuaga e eseese. E foliga mai sa tali lelei atu Iona i le fautuaga a Ieova. Ina ua toe lelei le ita ma le tigā o le perofeta sa ia taʻu mai le mea na oʻo ia te ia ina ia mafai ona aʻoaʻoina ai isi. Sa umi sina taimi o aʻoaʻoina e soʻo o Iesu se lesona e uiga le loto maulalo. Vaai, i le po lava lena a o leʻi maliu Iesu, sa toe fefinauaʻi ai foʻi po o ai e sili ia te i latou! (Luka 22:24) O le mea lea, o i latou o avatua fautuaga e manaomia ona lava le onosaʻi. (Failauga 7:8) O se tagata ua mauaʻa sona uiga sese e masani ona lē suia lona ala ona o ni nai upu itiiti mai se toeaina. O ni faafitauli tuʻu umi i le va o paaga faaipoipo o le a lē nimo vave atu pe a uma se talanoaga se tasi ma se Kerisiano taʻumatuaina. O maʻi tigāina e tele ni masina e togafitia ai ma atonu e faapea foʻi le tele o faafitauli matuiā faaleagaga. Ma o le mea moni lava o le lē faalogo nisi i fautuaga aogā. E ui lava faapea sa fautuaina e Ieova lava ia, a e sa liliu atu Kaino ma fasioti i lona lava uso.—Kenese 4:6-8.
19. E mafai faapefea ona fesoasoani atu le faapotopotoga ia i latou ua manunuʻa i faalogona ootia?
19 O i latou e i ai faafitauli tugā e tatau ona i ai le vaaiga saʻo po o le ā o le a latou faatalitalia mai i le faapotopotoga. E lē mafai e se uso Kerisiano ona aveesea vaivaiga loloto faalemafaufau, po o lagona tigā o le loto e mafua ona o ni faanoanoaga po o ni mea mataʻutia na oʻo i ai. Pe maʻi faaletino se tagata, e masani lava ona na ona faia e le fomaʻi ia mapu, a o faatalitali le galuega o le faaleleia e le tino lava ia. E faapena foʻi, pe a puapuagatia se Kerisiano i faalogona ootia, e taumafai lava le faapotopotoga e “faia ia mapu,” i le tatalo faatasi ma ia pe mo ia foʻi, avatu se upu faalaeiau pe a tatau ai ma avatu soo o se fesoasoani aogā latou te mafaia. Ma o lea, e pei ona masani ai, o le taimi ma le agaga o Ieova e faamaloloina ai. (Faataoto 12:25; Iakopo 5:14, 15) O lea, na tusi atu ai se tasi na aafia i le mataʻifale: “E ui o le mataʻifale atonu e faigata i faalogona, ua faia e le faalapotopotoga a Ieova mea e tele e sapasapaia ai oe, ma faatasi ai ma fesoasoani mai le Tusi Paia ma le lagolagosua mai uso ma tuafafine, o le a mafai ai ona e manumalo.”c
20. O le ā le vaega e faia e fautuaga a o tatou taumafai uma lava e auauna pea ia Ieova?
20 Ioe, e i ai i Kerisiano le tiute tauave o le fesoasoani atu o le tasi i le isi. A e maise lava i le au toeaina, a e faapea foʻi ma tagata uma i totonu o le faapotopotoga, e tatau ona manatunatu mamafa le tasi mo le lelei o le isi ma ofoina atu fautuaga agamalu faale-Tusi Paia pe a manaomia. (Filipi 2:4) O le mea moni, o nei fautuaga e lē tatau ona avatua i se auala faatautalatasi saua ma le soonafai. E lē tatau foʻi ona faailoa atu ai le taumafai e pulea le olaga o se tasi. Na i lo o lea, e tatau ona faavae i le Tusi Paia ma ia “faamāi i le masima.” (Kolose 4:6) E manaomia e tagata uma le fesoasoani i lea taimi ma lea taimi, ma o fautuaga fuafua lelei, ua ‘faamāi’ i le agalelei ma le faalaeiauga, o le a fesoasoani ia i tatou uma e faaauau ai pea i le ala i le ola e faavavau.
[Faaopoopoga i lalo]
a Mo nisi faamatalaga i le fautuaina o ulugalii faaipoipo, vaai i le mataupu “Pe Faapefea ona Avatu Fautuaga E Mafai ona Fesoasoani Moni” i le Awake! o Iulai 22, 1983.
b Mo nisi faamatalaga atili, mo i latou o ogotia i manuʻa tau i faalogona, tagai i le mataupu “Le Faamoemoe mo i Latou ua Faavaivai” ma “Latou te Manumalo e Fesoasoani” i le The Watchtower o Aokuso 1, 1983, ma le “Fesoasoani Mo i Latou ua Aafia i le Mataʻifale” i le lomiga o Oketopa 1, 1983.
c Mo ni manatu i le faapefea ona fesoasoani i Kerisiano ua mafatia, vaai i le mataupu “Tautala Faamaise i E Faanoanoa Uma.” i le The Watchtower o Aperila 15, 1982, ma le “O Le Laulaufaiva ua Aʻoaʻoina—‘Ina ia Faaalaeiau i ē ua Mafatia” i le lomiga o Iuni 1, 1982.
O Ē Manatua?
◻ O ā vala o fautuaga a Iesu i faapotopotoga e fitu e mafai ona fesoasoani i toeaina i aso nei?
◻ O ā ni faaaʻoaʻoga faale-Tusi Paia o ia i ina, i le faaaogāina o faataʻitaʻiga e avatua ai fautuaga?
◻ Mo se fautua Kerisiano, o le ā le tāua moni o fesili?
◻ E faapefea ona faaaogāina e se fautua tomai le Tusi Paia?
◻ Ai se ā e ao ai i se tagata o avatua fautuaga ona avea o sē faalogologo lelei?
[Ata i le itulau 17]
I le faaaogāina o se tamaitiiti e faataʻitaʻia ai lona manatu, sa avatu ai e Iesu i ona soʻo se fautuaga manino, agalelei ma e atiina aʻe ai.
[Ata i le itulau 18]
Sa matuā tigā ma ita Iona, a e foliga mai na ia talileleia le fautuaga Ieova