Soifuaga o Iesu ma lana Faiva

O Se Tulaga Maualuga mo Ona Soʻo

Ua manatu taʻitaʻi lotu ia Iesu o sē soli Tulafono a le Atua ma ua oo ai ina latou taupulepule e fasioti ia te ia. O lea, a o faaauau e Iesu lana Lauga i Luga o le Mauga, na ia faamatala atu faapea: “Aua neʻi outou manatu ua ou sau e tatalaina le tulafono po o le au perofeta; ou te lei sau e tatalaina, i ia faataunuuina.”

Ua ia Iesu le manatu sili ona maualuga e faatatau i le Tulafono a le Atua ma ua ia faamalosiau i isi ina ia i ai foʻi lea manatu. O le mea moni, ua ia fetalai atu: “O lenei, o se na te tatalaina se poloaiga e tasi e aupito itiiti o nei poloaiga, ma faapea ona aʻoao i tagata, e taʻua ia e aupito itiiti i le malo o le lagi,” o lona uiga o lena ituaiga o tagata o le a lē mafai ona ulu atu i le Malo.

Na i lo le solia o le Tulafono a le Atua, sa taʻuleagaina e Iesu e oo lava i uiga e lagolagoina ai le solia o le Tulafono. Ina ua silafia e Iesu ua faapea mai le Tulafono, “Aua e te fasioti tagata,” sa faaopoopo atu Iesu: “A o aʻu, ou te fai atu ia te outou, ai se ita fua i lona uso, e nofo sala o ia i le faamasinoga.”

Talu ai, o le faaauau pea ona ita i lou uso e matuā matautia tele, ona atonu e oo atu ai ina taʻitaʻiina i le faia o le fasioti tagata, ua faataʻitaʻia ai e Iesu le mamao e tatau i se tasi ona tausia ai le filemu. Ua ia faatonu mai: “Pe afai foi e te avatu lau taulaga i le fata faitaulaga, ona e manatua ai lea ua i lou uso o se mea e tiga ai o ia ia te oe, ina tuu ia i lea mea o lau taulaga i luma o le fata faitaulaga, a e alu oe ia muai faalelei i lou uso, i le e sau ai, ma avatu lau taulaga.”

I le uaʻi atu i lona fitu o Tulafono e Sefulu, ua faaauau pea Iesu: “Ua outou faalogo, na fai mai i e anamua, Aua e te mulilua,” A e peitaʻi na taʻuvaleaina e Iesu, e oo lava i ni uiga totoʻa e faatatau i le mulilua. “A ou te fai atu aʻu ia te outou, ai se vaai atu i le fafine ina ia manao i ai, ua uma ona mulilua ma ia i lona loto.”

E le o tautala Iesu i inei e uiga i se manatu le mamā tau amio, a e uiga i le ‘vaai atu pea lava pea.’ O lena vaavaai pea e faagaee ai faanaunauga momoʻo, ia, a i ai loa se avanoa, e mafai ona iʻu ai i le mulilua. E mafai faapefea e se tagata ona puipuia mai le oo ina tupu o lea mea? Ua faataʻitaʻia e Iesu le tatau ona faia se fua silisili, i le faapea mai: “Afai foi e te tausuai i lou mata taumatau, ina sali ese ia, ma e lafoai . . . Afai foi e te tausuai i lou lima taumatau, ina tutū ese ia, ma e lafoai.”

E masani lava ona tuuina atu e tagata se itu tino ua faamaʻia ina ia tipiesea a e faasaoina ai le ola. A e pei o la Iesu, e sili ona tāua le ‘lafoai’ so o se mea, e oo lava i se mea faapelepele e pei o le mata po o o se lima, ina ia alofia ai manatu po o b amioga le mamā. O le mea lena ua faamanino mai ai e Iesu o na tagata o le a lafoina i Kena (o se faatafuna e lafo i ai otaota i tuā pa o Ierusalema), e faaatagia ai le faaumatiaga e faavavau.

Sa talanoaina foʻi e Iesu le auala e feagai ai ma tagata tau faaleaga ma tetee. “Aua neʻi outou tetee atu i le leaga,” o lana faatonuga lea. “Ai se na te po mai i lou alafau taumatau, ia e liliu atu ia te ia le isi.” E le o le uiga o le fetalaiga a Iesu faapea e le tatau i se tagata ona puipuia o ia po o lona aiga pe a osofaʻia. O le po atu e lē o se mea e afaina ai faaletino a e, o se tau faaleaga. O lea la, o le uiga o le fetalaiga a Iesu e faapea afai e taumafai se tasi e faatupu se misa po o se feupuaʻiga, pe ala i le po atu i le lima pe ala i le tutui atu i upu tau faaleaga, o se mea sese le taui atu.

Ina ua uma ona ia tataʻi atu manatu i le tulafono a le Atua ia alofa i le lua te tuaoi, sa taʻua e Iesu faapea: “Ia outou alolofa atu i e ua ita mai ia te outou . . . ia outou tatalo foi mo e ua tuuaʻi fua mai ma faasaua mai ia te outou.” I lona aumaia o se mafuaaga malosi e faia ai faapea, ua ia faaopoopo mai: “Ina ia faia outou ma atalii o lo outou Tamā o i le lagi, o le na te faaoso i lona la i e ua amio leaga atoa ma e ua amio lelei.”

Ua faaʻiu e Iesu lenei vaega o lana lauga i lona apoapoaʻi mai: “[O lenei] ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.” E le o faauiga e Iesu faapea e mafai e tagata ona lelei atoatoa i le tulaga atoa. Na i lo lena, e mafai ona latou faia faapena, i le faaaʻoaʻo i le Atua, ia faalautele atu lo latou alofa ia fusimau ai e oo lava i o latou fili. O le faamatalaga tali tutusa a Luka o loo faamauina ai upu a Iesu: “Ia mutimutivale lo outou alofa, pei ona alofa mutimutivale o lo outou Tamā.” Mataio 5:17-48; Luka 6:3.

◆ Na faapefea ona faaalia le manatu maualuga o Iesu i le Tulafono a le Atua?

◆ O le ā le faatonuga na aumaia e Iesu e liaʻiina ai pogai o le faisoti tagata ma le mulilua?

◆ I le ā na uiga i ai Iesu ina ua ia fetalai faatatau i le liliu atu o le isi alafau?

◆ E mafai faapefea ona tatou lelei atoatoa e pei o le Atua e atoatoa ona lelei?